1. Lugwalo lwa 2 Bakorinto 3:1-3 lutondeezya biyeni kuti nchilongezyo kuyiisya muntu Bbayibbele kusikila wabbabbatizigwa? (Langa chifanikisyo chili achivumbyo.)

UMVWA biyeni kuti chiiyo chaBbayibbele chinjila ambungano yanu chabbabbatizigwa? Zipa kuti ubotelwe! (Mt. 28:19) Pesi kuti kuli nduwe wakayiya amuntu ooyo ulabotelwa loko kumubona kali kubbabbatizigwa! (1 Tes. 2:19, 20) Basikwiiya bachizwa kubbabbatizigwa “magwalo aatulumbaizya,” toonse mumbungano kutali bantu bakayiyaabo luzutu.—Bala 2 Bakorinto 3:1-3.

2. (a) Nguuli mubuzyo ngututalange-lange alubo nkamboonzi? (b) Chiiyo chaBbayibbele niinzi? (Langa makani aamunsi.)

² Zilabotezya kuti kwaminyaka iili 4 yayinda twakalipota zyiiyo zyaBbayibbele * zyiinda ku10 miliyoni mweezi amweezi munyika yoonse. Muminyaka njiyeeyo kwakabbabbatizigwa bantu basika ku280 000 munyaka amunyaka kuti babe Bakamboni baJehova abasikwiiya baJesu Kristu. Kujana twabagwasya biyeni mamiliyoni aabantu aaba balikwiiya Bbayibbele kuti babbabbatizigwe? Kufumbwa kuti Jehova kachitondeezya moyo mulamfu kwiinda mukupa bantu mweenya wakuti bakonzye kuba basikwiiya baJesu, tunoochita zyoonse nzitukonzya kuti tubagwasye kuti bakonzye kubbabbatizigwa chakufwambaana. Chiindi chachaala nchiche loko!—1 Kor. 7:29a; 1 Pet. 4:7.

3. Muchiiyo eechi tulalanga-langaanzi?

 ³ Akaambo kakuti mulimu wakuchita basikwiiya wabuyandikana loko mazubaano, bamuKabunga Keendelezya bakabuzya mitabi kuti niinzi zyeelede kuchitwa kuti kugwasigwe zyiiyo zyaBbayibbele kuti zibbabbatizigwe. Muchiiyo eechi achitobela tulalanga-langa zyiiyo nzitujana kuzwa kumapayona, mamishinali abalangizi bamabazu bali aluzibo. * (Tus. 11:14; 15:22) Bakaamba zyeelede kuchitwa aasikwiiya Bbayibbele asikuchitisya kuti bazwidilile. Muchiiyo eechi tulalanga-langa zintu zili 5 zyeelede kuchitwa amuntu wiiya Bbayibbele kuti ayinkilile kunembo kusikila abbabbatizigwe.

4. Niinzi nzitweelede kuziba atala akwiiya aamuntu katwiimvwi?

⁴ Bakwesu abachizi biingi bayiya abantu Bbayibbele kabayimvwi. Nikuba kuti kuchita oobo kulakonzya kugwasya muntu kuti abe achiyandisyo chakwiiya Bbayibbele, pesi mulakonzya kwaambuula kwachiindi chifwiifwi alubo kulakonzya kumuyumina kuzichita mviki amviki. Kuti bagwasye muntu ooyo kuti akkale kali achiyandisyo, bamwi basikupupulula nga bakumbila namba zyafooni zyamuntu ooyu kuchitila kuti bamufoonene naakuti kumusendela meseji atala amakani ajanika muBbayibbele. Eezi zilakonzya kutola myeezi myiingi pesi tazipi kuti chiiyo chizwidilile. Ubonaanga kuti muntu katajani chiindi chiingi chakwiiya Jwi lyaLeza nga ulayinkilila kunembo na kusikila akalipede akubbabbatizigwa? Ulakonzya kukachilwa kwiinkilila kunembo.

5. Kweendelana alugwalo lwa Luka 14:27-33, niinzi nzyaakaamba Jesu zikonzya kutugwasya mumulimu wesu wakuchita bantu kuti babe basikwiiya?

⁵ Ali chimwi chiindi Jesu wakaamba chikozyano chitondeezya zyeelede kuchitwa amuntu wiiya Bbayibbele kuti abe sikwiiya wakwe. Wakaamba chikozyano chamuntu uuyanda kuyaka ngazi achamwaami uuyanda kuya kunkondo. Jesu wakaamba kuti muntu uuyanda kuyaka ngazi weelede ‘kukkala ansi akubona mali iiyandikana’ kuti amaninsye ngazi yakwe akuti mwaami weelede ‘kusaanguna kukkala ansi kuyeeya akulomba lulayo’ kuchitila kuti abone kuti masoja aakwe alakonzya na kulwana basinkondonyina. (Bala Luka 14:27-33.) Jesu wakalizi kuti muntu uuyanda kuba sikwiiya wakwe weelede kukkala aansi akulangisisya zintu nzyayelede kuchita kuti abe sikwiiya wakwe. Akaambo kazeezi, tweelede kusungwaazya bantu mbitwiiyaabo  Bbayibbele kuti katwiiyaabo mviki amviki. Nga tulazichita biyeni eezi?

6. Niinzi nzitweelede kuchita kuti zyiiyo zyesu zyiinkilile kunembo?

⁶ Yungizya chiindi nchimutola kamuli kwaambuuzyania. Muchikozyano, ulakonzya kwaamba amwi makani aali muBbayibbele chiindi nimwaambuuzyania. Kuti muntu ngwiiyaawe kazumina kwiiya kwachiindi chilamfu, mukumbile kuti mwiiye kamukkede aansi. Nsandulo yakwe ilakutondeezya kuti ulaachiyandisyo na chakwiiya. Kuti umugwasye kuti afwambaane kuba aluzibo ulakonzya kumukumbila kuti kamwiiya tubili amviki. Pesi kuli zyiingi ziyandikana kutali kwiiya kamwi naakuti tubili amviki.

7. Sikupupulula nga ulalibambila biyeni chiiyo chimwi achimwi?

⁷ Mbuli muyiisi, weelede kulibambila kabotu chiiyo chimwi achimwi. Weelede kubala nzimutazooyiye amagwalo alimukati. Mvwisisisya twaambo tupati. Langa-langa mutwe wachiiyo, tutwe tuniini, mibuzyo, magwalo aalembedwe kuti “bala,” zifanikisyo amavidiyo akonzya kukugwasya kupandulula chiiyo eecho. Kuli kuyeeya atala amuntu ngwiiyaawe, yeeyesesya kuti nga ulachipandulula biyeni chiiyo munzila nguba alubo iimvwisisika zitape kuti muntu ngwiiyaawe azimvwisisisye akuzibelesya.—Neh. 8:8; Tus. 15:28a.

8. Majwi aamwaapostolo Pawulu aalembedwe muli Bakolose 1:9, 10 atuyiisyaanzi atala akukombela bantu mbitwiiyaabo?

⁸ Chiindi nulibambila, komba kuli Jehova umukumbile kuti agwasye muntu ngwiiyaawe mpayanda kugwasigwa. Kumbila Jehova kuti akugwasye kumuyiisya zintu zizwa muBbayibbele munzila iimusika amoyo. (Bala Bakolose 1:9, 10.) Yezya kuyeeyela zintu zikonzya kumuyumina kumvwisisisya akutambula. Utalubi kuti makanze aako ngakumugwasya kuti ayinkilile kunembo kusikila akabbabbatizigwe.

9. Kujana wamugwasya biyeni muntu ngwiiyaawe kuti alibambile? Pandulula.

⁹ Tusyoma kuti kukkala katuyiya amuntu kulakonzya kupa kuti ayande kulumba Jehova aJesu akaambo kazintu nzibakamuchitila. (Mt. 5:3, 6) Kuti agwasigwe azintu nzyalikwiiya, muntu wiiya Bbayibbele weelede kuzibikkila maanu zintu nzyalikwiiya. Kuti umugwasye kuchita oobo, musungwaazye kuti alibambile chiiyo chimwi achimwi akuti ayeeyesesye atala ambakonzya kuzibelesya mubuumi bwakwe zintu nzyalikwiiya. Kujana wamugwasya biyeni kulibambila? Amulibambile chimwi chiiyo  kamulaamwi kuti umutondeezye kuti zichitwa biyeni. * Mugwasye mbakonzya kujana nsandulo zyamibuzyo akuti kweenga amwi mabala kulamugwasya biyeni kuti atalubi nsandulo zyakwe. Mpawo musungwaazye kuti asandule kali kubelesya majwi aakwe. Kusandula kabelesya majwi aakwe kulakugwasya kubona kuti wachimvwisisisya biyeni chiiyo. Pesi kuli chimwi chintu nchukonzya kusungwaazya muntu ngwiiyaawe Bbayibbele kuti achite.

10. Nkamboonzi kubala Bbayibbele buzuba abuzuba nikuyandikana alubo niinzi nchakonzya kuchita muntu kuti agwasigwe aakubala ooku?

¹⁰ Kuli zimwi zintu muntu wiiya Bbayibbele nzyayelede kuchita alikke buzuba abuzuba kutali kwiiya Bbayibbele mviki amviki luzutu. Weelede kunoowambuula aJehova. Biyeni? Kwiinda mukuswiilila Jehova akukomba kulinguwe. Ulakonzya kuswiilila Jehova kwiinda mukubala Bbayibbele buzuba abuzuba. (Jos. 1:8; Int. 1:1-3) Mutondeezye mbakonzya kubelesya “Pulogilamu yaKubala Bbayibbele” njakonzya kulipulintila iijanika aajw.org. * Pesi kuti agwasigwe, musungwaazye kuti ayeeyesesye kuti nzyalikubala zimuyiisyaanzi atala aJehova akuti nga ulazibelesya biyeni mubuumi bwakwe.—Mil. 17:11; Jak. 1:25.

11. Niinzi chikonzya kugwasya muntu ngwiiyaawe kuti akonzye kukomba, alubo nkamboonzi nikuyandikana kukkala katukomba kuli Jehova?

¹¹ Sungwaazya muntu ngwiiyaawe Bbayibbele kuti kaambuula aJehova kwiinda mukukomba buzuba abuzuba. Kumasaangunino aakumamanino achiiyo chanu, komba kazizwaansi amoyo kulaamwi amuntu ngwiiyaawe alubo umuswaanizye munkombyo. Chiindi nanooswiilizya nkombyo zyako, ulayiya mbakonzya kukomba kazizwa aansi amoyo akuti weelede kukomba kuli Jehova Leza kwiinda muzina lyaJesu Kristu. (Mt. 6:9; Joh. 15:16) Yeeya mbukukonzya kumugwasya kubala Bbayibbele buzuba abuzuba (kuswiilila Jehova) akukomba (kwaambuula aJehova) kuti aswene aafwiifwi aLeza! (Jak. 4:8) Kuchita zintu eezi kulakonzya kumugwasya kuti asike mpabweza ntaamu yakulipeda akubbabbatizigwa. Pesi niinzi zimwi nzyayelede kuchita?

12. Kujana wamugwasya biyeni muntu ngwiiyaawe kuti ayande Jehova?

¹² Zintu nzyayiya muntu wiiya Bbayibbele zyeelede kumusika aamoyo kutali kuzimvwisisisya luzutu pe. Nkamboonzi? Nkaambo  moyo wesu uswaanizya zintu nzituyanda ambutulimvwa zipa kuti tuyande kubweza ntaamu. Jesu wakali kuyiisya munzila iimvwisisika. Pesi bantu bakasala kumutobela nkaambo wakali kubayiisya zibasika aamoyo. (Lk. 24:15, 27, 32) Muntu ngwiiyaawe weelede kubona Jehova mbuli muntu ngwakonzya kuba abweenzinyina anguwe alubo weelede kumubona mbuli Wisi, Leza wakwe aMweenzinyina. (Int. 25:4, 5) Chiindi nimuli kwiiya Bbayibbele, mugwasye kuti amvwisisisye buntu bwaLeza. (Kul. 34:5, 6; 1 Pet. 5:6, 7) Kazitakwe ndaba akuti muli kwiiya chili chiiyo, mugwasye kuti abone kuti Jehova Muntu ulibiyeni. Mugwasye kuti alumbe Jehova akaambo kabuntu bwakwe bubotu buswaanizya luyando, luzyalo alweetelelo. Jesu wakaamba kuti ‘mulawu mupati alubo wakusaanguna’ ngwakuti “weelede kuyanda Jehova Leza wako.” (Mt. 22:37, 38) Yezya kugwasya muntu ngwiiyaawe kuti ayande Leza.

13. Amba chikozyano chitondeezya kuti kujana wamugwasya biyeni muntu ngwiiyaawe kuti azibe buntu bwaJehova.

¹³ Chiindi nuli kwaambuula aamuntu ngwiiyaawe Bbayibbele, weelede kumutondeezya kuti ulamuyanda Jehova. Eezi zilagwasya muntu ngwiiyaawe kuti abone kuti anguwe weelede kuba abweenzinyina buli kabotu aLeza. (Int. 73:28) Muchikozyano, kuli majwi na ajanika mubbuku ndimuli kwiiya naakuti mulugwalo akakusika amoyo atondeezya kuti Jehova ulaaluyando, musongo, mululami akuti ulaamanguzu? Kuti kaliwo, mubuzye muntu ngwiiyaawe alubo umugwasye kuziba kuti nziimwi zipa kuti umuyande loko Taateesu ulikujulu. Pesi kuli chimwi lubo muntu ngwiiyaawe nchayelede kuchita kuti ayinkilile kunembo kusikila akabbabbatizigwe.

14. Kweendelana alugwalo lwa Bahebrayo 10:24, 25, kunjila miswaangano nga kulamugwasya biyeni muntu wiiya Bbayibbele kuti ayinkilile kunembo?

¹⁴ Toonse tuyanda kuti bantu mbitwiiyaabo bayinkilile kunembo kusikila bakabbabbatizigwe. Imwi nzila njitukonzya kubagwasyaayo, nkubasungwaazya kuti banjile miswaangano. Basikupupulula bali aluzibo bakaamba kuti zyiiyo zyaBbayibbele zifwambaana kunjila miswaangano zilafwambaana kubweza ntaamu. (Int. 111:1) Bamwi bapandulwida zyiiyo zyabo kuti luzibo lwamuBbayibbele ndubajana kuzyiiyo nzibachita nchipanzi luzutu pesi chimwi chipanzi chijanika kumiswaangano. Bala Bahebrayo 10:24, 25 amuntu ngwiiyaawe, mpawo umupandulwide bubotu buba akaambo kakunjila miswaangano. Mutondeezye  kavidiyo kati Niinzi Cicitika KuN’anda yaBwami? * Mugwasye kubona kuti kunjila miswaangano mviki amviki nchintu chiyandikana loko mubuumi bwakwe.

15. Niinzi nzitweelede kuchita kuti tusungwaazye bantu mbitwiiyaabo Bbayibbele kuti banjile miswaangano mviki amviki?

¹⁵ Niinzi nzweelede kuchita kuti muntu ngwiiyaawe kaatanasika pe kumiswaangano naakuti katasiki mviki amviki? Mubuzye zintu nzwaakayiya kumiswaangano yayinda. Kuchita oobo kulamusungwaazya kwiinda kumutamba luzutu. Mupe Ngaziyakulinda aKabbuku Kamuswaangano waBuumi Bwesu BwachiKristu Amulimu Wesu nkimuli kwiiya kumiswaangano. Mutondeezye nzimuyooyiya kumuswaangano uutobela mpawo umubuzye kuti nchiichili chipanzi chimunoneezya loko. Naatazoosike kakusaanguna kumiswaangano, uzoobona zintu zisiyene anzyazibide kubona kuli zimwi zikombelo. (1 Kor. 14:24, 25) Uyooswaana bamwi bali zikozyano zibotu mbaakonzya kutobelezya alubo bakonzya kumugwasya kuti ayinkilile kunembo kusikila abbabbatizigwe.

16. Niinzi nzitweelede kuchita kuti bantu mbitwiiyaabo bayinkilile kunembo kusikila babbabbatizigwe, alubo tuyoolanga-langaanzi muchiiyo chitobela?

¹⁶ Kujana twachita kuti biyeni kuti bantu mbitwiiyaabo bayinkilile kunembo kusikila bakabbabbatizigwe? Tulakonzya kugwasya muntu ngutwiiyaawe kuti abone kuti chiiyo chilayandikana kwiinda mukumusungwaazya kuti katwiiya mviki amviki akuti kalibambila chiiyo chimwi achimwi. Alubo tweelede kumusungwaazya kuti kaambuula aJehova buzuba abuzuba akuti abe abweenzinyina bulikabotu anguwe. Tweelede kumusungwaazya kuti kanjila miswaangano mviki amviki. (Langa kabbokesi kali aapeji 12 kati “ Zyeelede Kuchitwa Amuntu Wiiya Bbayibbele Kuti Ayinkilile Kunembo Kusikila Akabbabbatizigwe.”) Muchiyo chitobela tuzooyiya zintu zili 5 zyeelede kuchitwa asikupupulula kuti agwasye muntu ngwayiyaawe kuti ayinkilile kunembo kusikila azoobbabbatizigwe.