CHIIYO 42
Gwasya Bantu Mbwiiyaabo Kuti Bayinkilile Kunembo Kusikila Babbabbatizigwe—Chipanzi 2
“Lyoonse kolibamba omwini akubikkila maano kapati kukuyiisya kwako.”—1 TIM. 4:16.
LWIIMBO 77 Mumuni Munyika Yamudima
ZITAYIIGWE *
1. Tuzizi biyeni kuti mulimu wakuchita bantu kuti babe basikwiiya ufutula buumi bwabantu?
MULIMU wakuchita bantu kuti babe basikwiiya ufutula buumi bwabantu. Tuzizi biyeni? Jesu wakatupa mulawu uujanika muli Matayo 28:19, 20 wakuti: “Kamuya, . . . mukayiisye bantu . . . kuti babe basikwiiya, akubabbapatizya.” Nkamboonzi kubbabbatizigwa nikuyandikana? Nkaambo kuti muntu kayanda kuyoofutuka, weelede kubbabbatizigwa. Muntu uuyanda kubbabbatizigwa weelede kuba alusyomo lwakuti lufutuko luba akaambo kakuti Jesu wakalipeda kutufwida akuti wakabusigwa. Eezi nzizyo zyakapa kuti mwaapostolo Petro abuzye bakombinyina kuti: “Lubbapatizyo, . . . alwalo lulamufwutula lino . . . kwiinda mububuke bwa Jesu Kristo.” (1 Pet. 3:21) Chiindi muntu nabbabbatizigwa nga ulikutondeezya kuti uyanda kuyoofutulwa.
2. Lugwalo lwa 2 Timoteyo 4:1, 2 lutusungwaazya kuti tube bayiisi bali biyeni?
2 Kuti katuyanda kugwasya bantu kuti babe basikwiiya, tweelede kuba “aluzyibo mukuyiisya.” (Bala 2 Timoteyo 4:1, 2.) Nkamboonzi? Nkaambo Jesu wakatulayilila kuti: “Kamuya mukayiisye bantu . . . kuti babe basikwiiya.” Mwaapostolo Pawulu wakabuzya Timoteyo kuti: ‘Bikkila maano kapati kukuyiisya kwako. Kakatila kuzintu eezyi, nkaambo kwiinda mukucita boobo uyoolifwutula omwini alimwi abaabo bakuswiilila.’ (1 Tim. 4:16) Malayilile achibeleka akuli ndiswe mazubaano. Mbukunga mulimu wakuchita bantu kuti babe basikwiiya uleendelana akuyiisya, tuyanda kuba bayiisi balikabotu.
3. Tulalanga-langaanzi muchiiyo eechi?
3 Tuyiisya mamiliyoni aabantu kasimpe kajanika muBbayibbele. Mbuli mbutwakabona muchiiyo chakayinda, tweelede kuziba kuti nga tulabagwasya biyeni bantu aaba biingi kuti babe basikwiiya baJesu Kristu babbabbatizidwe. Muchiiyo eechi tulabona zimwi zintu zili 5 sikupupulula umwi awumwi nzyayelede kuchita kuti agwasye muntu ngwayiyaawe kuti ayinkilile kunembo kusikila akabbabbatizigwe.
ZUMIZYA BBAYIBBELE KUTI LIYIISYE
Kumbila sikupupulula ulaaluzibo kuti akugwasye mbweelede kuzumizya Bbayibbele kuti liyiisye (Langa fuka 4-6) *
4. Nkamboonzi nitweelede kulinyona chiindi nitwiiya amuntu Bbayibbele? (Langa makani aamunsi.)
4 Tulaziyanda zintu zizwa muJwi lyaLeza nzituyiisya bantu. Eezi zilakonzya kutusunka kuti twaambuule zintu zyiingi zitubotezya. Nkinkaako kazitakwe ndaba kuti ulikuchitisya Chiiyo chaNgaziyakulinda na, Chiiyo chaBbayibbele chaMbungano, naakuti ulikwiiya awumwi muntu Bbayibbele utaambuuli zyiingi pe. Kuti uzumizye Bbayibbele kuti liyiisye, weelede kulinyona alubo utapandululi zyoonse nzuzi atala avesi naakuti nkani eeyo. * (Joh. 16:12) Kozyanisya luzibo lwaBbayibbele ndulaalo lino andwakalaalo chiindi nwakabbabbatizigwa. Aachiindi eecho, wakali kumvwisisisya njiisyo ziche ziyandikana luzutu. (Heb. 6:1) Zyakakutolela minyaka myiingi kuti uzibe zintu nzuzi lino nkinkaako utayiisyi muntu zintu zyiingi aachiindi chimwi.
5. (a) Kweendelana alugwalo lwa 1 Batesalonika 2:13, niinzi nzituyanda kuti bantu mbitwiiyaabo Bbayibbele bamvwisisisye? (b) Nga tulamusungwaazya biyeni muntu ngutwiiyaawe kuti aambe nzyalikwiiya?
5 Tuyanda kuti muntu ngutwiyaawe abone kuti zintu nzyalikwiiya zizwa muJwi lyaLeza. (Bala 1 Batesalonika 2:13.) Kujana twazichita biyeni? Sungwaazya muntu ngwiiyaawe kuti aambe zintu nzyalikwiiya. Utamupandulwidi zyoonse nzyalikwiiya pesi mukumbile kuti akupandulwide zimwi. Mugwasye kubona kuti nzyalikwiiya muJwi lyaLeza zimugwasya biyeni. Mubuzye mibuzyo iikonzya kumugwasya kuti aambe mbalimvwa ambayeeya atala alugwalo ndwaazwa kubala. (Lk. 10:25-28) Muchikozyano, ulakonzya kumubuzya kuti: “Lugwalo oolu lwakugwasya biyeni kuti ubone bumwi buntu bwaJehova?” “Kujana kakugwasya biyeni kasimpe aaka kali muBbayibbele?” “Umvwa biyeni atala anzwayiya?” (Tus. 20:5) Kuziba zyiingi teenkuko kuyandikana loko pe pesi chiyandikana loko nkuti ngwiiyaawe uziyanda biyeni akuti uzibelesya biyeni nzyazi.
6. Nkamboonzi nikuyandikana kwiinka abasikupupulula balaaluzibo kuzyiiyo zyesu?
6 Nga wayinka abasikupupulula balaaluzibo na chiindi nuyakwiiya achiiyo chako? Kuti wayinkaabo ulakonzya kubakumbila kuti baambe nzibabona munzila njuyiisyaayo ambuzumizya Bbayibbele kuti liyiisye. Weelede kulibombya kuti kuyanda kuba muyiisi uulikabotu. (Kozyanisya a Milimo 18:24-26.) Alubo ulakonzya kubuzya sikupupulula ooyo ulaaluzibo kuti ubonaanga muntu ngwiiyaawe ulikukajata na kasimpe. Kuyungizya waawo ulakonzya kukumbila sikupupulula ooyo kuti kanooyiya achiiyo chako kuti kutawo kwamviki imwi naakuti kwiinda. Eezi zilagwasya muntu ngwiiyaawe kuti akkale kayiya akubona mbuchiyandikana chiiyo. Utalibuzyi kuti ooyu “nchiiyo changu” takwe muntu weelede kwiiyaawe pe. Pesi nchuyanda nkuchita zyoonse kuti muntu ngwiiyaawe ayinkilile kunembo kwiiya kasimpe.
YIISYA MUNZILA IITONDEEZYA KUTI ULAZIYANDA AKUTI ULAZISYOMA NZULIKUYIISYA
Mubuzye zikozyano zyabantu zikonzya kumugwasya kubona kuti kupona kweendelana amalayilile ali muBbayibbele kulagwasya (Langa fuka 7-9) *
7. Niinzi chikonzya kupa kuti muntu ngwiiyaawe ayande nzyalikwiiya?
7 Chiindi nituyiisya muntu, tweelede kumutondeezya kuti tulakayanda kasimpe kali muBbayibbele akuti tulakasyoma. (1 Tes. 1:5) Eezi zilakonzya kupa kuti aziyande zintu nzyalikwiiya. Kuti kazichita ulakonzya kumubuzya kuti kupona kweendelana amalayilile amuBbayibbele kwakakugwasya biyeni mubuumi bwako. Eezi zilakonzya kumugwasya kubona kuti Bbayibbele lili amalayilile akonzya kumugwasya anguwe.
8. Niinzi zimwi nzukonzya kuchita kuti ugwasye muntu ngwiiyaawe alubo nkamboonzi nweelede kuzichita?
8 Chiindi nimulookwiiya ulakonzya kubuzya muntu ngwiiyaawe zikozyano zyabantu bakazunda buyumu-yumu buli mbuli bwakwe. Ulakonzya kwiinka awumwi sikupupulula wakachitikilwa zintu zikozyenie azichitikila muntu ngwiiyaawe. Naakuti kuyanduula zyakachitikila bamwi zijanika aajw.org aalembedwe kuti “IBbaibbele Lilakonzya Kubacinca Bantu.” * Zyiiyo eezi amavidiyo zilakonzya kugwasya muntu ngwiiyaawe kubona mbukugwasya kupona kweendelana amalayilile ali muBbayibbele.
9. Kujana twamusungwaazya biyeni muntu ngutwiiyaawe kuti abuzye bamumpuli abeenzinyina zintu nzyalikwiiya?
9 Kuti muntu ngwiiyaawe kakwete, ngwakwetenaawe ulikwiiya na? Kuti katalikwiiya ulakonzya kumukumbila kuti mwiiye aamwi. Sungwaazya muntu ngwiiyaawe kuti abuzye bamumpuli abeenzinyina zintu nzyalikwiiya. (Joh. 1:40-45) Kujana wamusungwaazya biyeni? Ulakonzya kumubuzya kuti: “Kujana wabapandulwida biyeni bamumpuli zintu nzwayiya?” naakuti “Nduululi lugwalo ndukonzya kubelesya kuti upandulwide mweenzinyokwe nkani eeyi?” Kuti wachita oobu nga ulikuyiisya muntu ngwiiyaawe kuti azoobe muyiisi. Kuti weelela ulakonzya kukambawuka kali sikupupulula uutanabbabbatizigwa. Ulakonzya kubuzya muntu ngwiiyaawe kuti kuli muntu ngwazi na uyanda kwiiya Bbayibbele. Kuti kaliwo, ulakonzya kwaambuulaawe kumukumbila kuti muzoosaangune kwiiya Bbayibbele. Mutondeezye kavidiyo kategwa Niinzi Cicitika Kuciiyo caBbaibbele? *
MUSUNGWAAZYE KUTI ABE ABEENZINYINA MUMBUNGANO
Musungwaazye kuti abe abeenzinyina mumbungano (Langa fuka 10-11) *
10. Kweendelana alugwalo lwa 1 Batesalonika 2:7, 8, kujana twachitobelezya biyeni chikozyano chaPawulu?
10 Basikupupulula beelede kutondeezya kuti balabayanda bantu mbibayiyaabo. Babone mbuli bakombinyokwe bajuunza. (Bala 1 Batesalonika 2:7, 8.) Teekuba pe kuti basiye beenzinyina bakunyika akuti bachite zyoonse ziyandikana kuti bakonzye kubelekela Jehova. Tweelede kubagwasya kuti bajane beenzinyina bali kabotu mumbungano. Ba mweenzinyina wamuntu ngwiiyaawe kwiinda mukujana chiindi chakubaamwi anguwe kutali chiindi nimulikwiiya luzutu. Kwiinda kumubona, kumufoonena naakuti kumulembela meseji kutondeezya kuti ulamuyanda.
11. Tuyanda kuti bantu mbitwiiyaabo bachiteenzi alubo nkamboonzi?
11 Kuli kasimpi kaamba kuti: “Mwana ngwabantu boonse.” Tulakonzya kwaamba kuti: “Muntu wiiya Bbayibbele ngwambungano yoonse.” Eezi nzizyo zipa kuti basikupupulula bazwidilila batondeezye muntu ngubayiyaawe bantu bamumbungano bakonzya kumugwasya. Kuti twachita oobo, bantu mbitwiiyaabo balakonzya kubotelwa kuliswaanizya abakombi baLeza bakonzya kubagwasya muzintu zyabukombi amuzintu zibakataazya. Tuyanda kuti muntu ngutwiiyaawe alimvwe kayandikana mumbungano akuti mukombima. Tuyanda kuti abe achiyandisyo chakuliswaanizya abakombima balaaluyando. Eezi ziyoopa kuti kumuubile kusiya beenzinyina batamusungwaazyi kuti ayande Jehova. (Tus. 13:20) Alubo ziyoopa kuti atakataazikani kuti bamukaka beenzinyina nkaambo unoozi kuti ulakonzya kujana beenzinyina mumbungano.—Mk. 10:29, 30; 1 Pet. 4:4.
MUSUNGWAAZYE KUTI ABE AAMAKANZE AKULIPEDA AKUBBABBATIZIGWA
Kuli zintu zisiyene-siyene muntu wiiya Bbayibbele nzyayelede kuchita kuti ayelele kubbabbatizigwa (Langa fuka 12-13)
12. Nkamboonzi nitweelede kwaambuula abantu mbitwiiyaabo atala akulipeda akubbabbatizigwa?
12 Kkala kwaambuula atala ambukuyandikana kulipeda akubbabbatizigwa. Makanze aakuyiisya bantu Bbayibbele ngakubagwasya kuti bazoobe basikwiiya babbabbatizidwe. Kuti kwayinda myeezi miche kamuli kwiiya kapati kuti kalikunjila miswaangano, muntu ngwiiyaawe Bbayibbele weelede kumvwisisisya kuti makanze aachiiyo ngakumugwasya kuti abelekele Jehova kali Kamboni wakwe.
13. Niinzi nzyayelede kuchita muntu wiiya Bbayibbele kuti ayelele kubbabbatizigwa?
13 Kuli zintu zisiyene-siyene muntu wiiya Bbayibbele nzyayelede kuchita kuti ayelele kubbabbatizigwa. Chakusaanguna, weelede kuziba Jehova, kumuyanda akumusyoma. (Joh. 3:16; 17:3) Mpawo weelede kuba abweenzinyina bulikabotu aJehova abantu bamumbungano. (Heb. 10:24, 25; Jak. 4:8) Kuyungizya waawo, weelede kusiya zintu zibi nzyaakali kuchita mpawo achinche. (Mil. 3:19) Mpawo lusyomo luyoopa kuti ayande kubuzya bamwi zintu nzyasyoma. (2 Kor. 4:13) Alubo weelede kulipeda kuli Jehova akutondeezya kulipeda kwakwe kwiinda mukubbabbatizigwa. (1 Pet. 3:21; 4:2) Buzuba oobu bunoononeezya loko. Kuti muntu ngwiiyaawe wachita chimwi chintu chiyandikana kuti ayelele kubbabbatizigwa, weelede kumulumba akumusungwaazya kuti ayinkilile kunembo kachita zintu zilikabotu.
KKALA KULANGA KUTI MUNTU NGWIIYAAWE ULIKWIINKILILA KUNEMBO NA
14. Kujana sikupupulula wachita biyeni kuti abone kuti muntu ngwayiyaawe ulikwiinkilila kunembo na?
14 Tweelede kuba aamoyo mulamfu chiindi nitugwasya muntu kuti ayinkilile kunembo kusikila akalipede akubbabbatizigwa. Pesi chimwi chiindi weelede kunoolanga kuti ulaachiyandisyo na chakubelekela Jehova Leza. Kuli nzintu nzyali kuchita na zitondeezya kuti ulaaswiilila malayilile aaJesu? Naakuti ulikunoneezegwa kwiiya Bbayibbele luzutu?
15. Niinzi nzyayelede kulanga sikupupulula kuti abone kuti muntu ngwayiyaawe ulikwiinkilila kunembo na?
15 Kkala kulanga kuti muntu ngwiiyaawe ulikwiinkilila kunembo na. Muchikozyano, zintu nzyaambuula zitondeezya kuti ulamuyanda na Jehova? Ulakomba na kuli Jehova? (Int. 116:1, 2) Ulaachiyandisyo na chakubala Bbayibbele? (Int. 119:97) Ulanjila na miswaangano mviki amviki? (Int. 22:22) Ulikuchincha na nzila njali kupona aayo? (Int. 119:112) Ulababuzya na bamumpuli yakwe abeenzinyina nzyali kwiiya? (Int. 9:1) Kwiinda zyoonse, ulaachiyandisyo na chakuba Kamboni waJehova? (Int. 40:8) Kuti katali kwiinkilila kunembo, yanduula chimukachizya kuti ayinkilile kunembo mpawo waambuule aawe munzila yaluzyalo pesi kumuzwida antanganana. *
16. Niinzi chikonzya kutugwasya kubona kuti tuleke na kwiiya amuntu Bbayibbele?
16 Weelede kukkala kulanga kuti zilachita na mwiinkilile kunembo kamuli kwiiya. Libuzye kuti: ‘Talibambili na chiiyo? Takwe chiyandisyo na chakuza kumiswaangano? Uchichita zintu zitali kabotu na? Uchiliswaanizya achikombelo chakubeja na?’ Kuti nsandulo yamibuzyo eeyi kayili yakuti iiyi, kwiinkilila kunembo kwiiya amuntu ooyo kufenene akuyiisya muntu kuyamba naakuti kudubbwa katayandi pe kuteta. Kuti muntu ngwiiyaawe kataziyandi pe nzyali kwiiya alubo katayandi pe kuchincha, nkamboonzi nweelede kwiinkilila kunembo kwiiyaawe?
17. Kweendelana alugwalo lwa 1 Timoteyo 4:16, sikupupulula umwi awumwi weelede kuchitaanzi?
17 Tuubona kuyandikana mulimu wakuchita bantu kuti babe basikwiiya alubo tuyanda kugwasya bantu mbitwiiyaabo kuti bayinkilile kunembo kusikila babbabbatizigwe. Eezi ziyoopa kuti tuzumizye Bbayibbele kuti liyiisye akuti tutondeezye kuti tulaziyanda akuzisyoma nzituyiisya. Tuyoosungwaazya bantu mbitwiiyaabo kuti bajane beenzinyina mumbungano. Alubo tuyoobasungwaazya kuti babe aamakanze akulipeda akubbabbatizigwa akukkala katulanga kuti balikwiinkilila kunembo na. (Langa kabbokesi kali aapeji 13 kati “ Nga Ulamugwasya Biyeni Muntu Ngwiiyaawe Kuti Ayinkilile Kunembo Kusikila Akabbabbatizigwe?”) Tulabotelwa kuti tutola lubazu mumulimu ooyu uufutula bantu. Atubeleke changuzu kuti tugwasye bantu mbitwiiyaabo kuti bayinkilile kunembo kusikila bakabbabbatizigwe.
LWIIMBO 79 Amubayiisye Kwiima Nji
^ par 5 Mulimu wakuyiisya bantu Bbayibbele utupa chilongezyo chakuyiisya bantu kuti bayeeye, balimvwe akuchita mbuli mbayanda Jehova. Muchiiyo eechi tulayiya zimwi nzitweelede kuchita kuti tube bayiisi balikabotu.
^ par 4 Langa chiiyo chiti: “Utachiti Zintu Zikonzya Kulebya Nuchitisya Chiiyo chaBbayibbele” chijanika muKabbuku Kamuswaangano waBuumi Bwesu BwachiKristu Amulimu Wesu kamuSeptember 2016.
^ par 8 Yinka alembedwe kuti KUJATIKIZYA NDISWE > ZYAKULUULA ZYA BAKAMBONI BA JEHOVA.
^ par 9 AaJW Library®, yinka alembedwe kuti MEDIA > OUR MEETINGS AND MINISTRY > TOOLS FOR THE MINISTRY.
^ par 15 Langa chiiyo chiti “Kuyanda Jehova Akumulumba Kupa Kuti Uyande Kubbabbatizigwa” achiti “Uleelela Na Kubbabbatizigwa?” zijanika muNgaziyakulinda yamuMarch 2020.
^ par 77 BUPANDULUZI BWACHIFANIKISYO: Nibazwa achiiyo, muchizi ulaaluzibo ulikubuzya wali kuchitisya chiiyo mbayelede kuchita kuti ataambuuli zintu zyiingi achiiyo.
^ par 79 BUPANDULUZI BWACHIFANIKISYO: Mwanakazi ulikuyiisigwa mbakonzya kuba mwanakazi ulikabotu. Mukuya kwachiindi, ulikubuzya mulumi wakwe nzyayiya.
^ par 81 BUPANDULUZI BWACHIFANIKISYO: Mwanakazi walikwiiya Bbayibbele ulikubotelwa amulumi wakwe kabali aamuunzi wamweenzinyina ngwaakabonana aawe kuNg’anda yaBwaami.
