1. Nkamboonzi bantu biingi nikubayumina kusiyanisya chikombelo chakasimpe achakubeja?

MAZUBAANO, kuli zikombelo zyiingi alubo bantu banjila zikombelo eezyo balyaamba kuti maKristu akuti bukombi bwabo bulatambulika kuli Leza. Eezi zilikupa kuti bantu biingi bakachilwe kusiyanisya chikombelo chakasimpe achakubeja. Bantu aaba balibuzya kuti: “Kuli chikombelo chimwi na chakasimpe naakuti zikombelo zyoonse zilatambulika kuli Leza?” Aniswe tuli aachoonzyo na chakuti zintu nzituyiisya nzyakasimpe akuti nzila njitumukombaayo Jehova njiyo ayilikke iitambulika kulinguwe? Kuti kakuli boobo, tuli aabumboni? Atubone.

2. Kweendelana alugwalo lwa 1 Batesalonika 1:5, nkamboonzi mwaapostolo Pawulu naakali aachoonzyo chakuti zintu nzyaakali kusyoma nzyakasimpe?

² Mwaapostolo Pawulu wakali aachoonzyo chakuti zintu nzyaakali kusyoma nzyakasimpe. (Bala 1 Batesalonika 1:5.) Pawulu wakali aachoonzyo atala azintu nzyaakali kusyoma nkaambo wakali musungu kukubala Jwi lyaLeza kutali akaambo kakuti zintu eezyo zyakali kupa kuti abotelwe. Wakali kusyoma kuti “Magwalo oonse akasololelwa a Leza.” (2 Tim. 3:16) Niinzi nzyaakajana Pawulu kuzwa muMagwalo? Wakajana bumboni bwakali kutondeezya kuti Jesu nguwe wakali Mesiya wakasyomezegwa nikuba kuti bapati bazikombelo bachiJuda bakasala kutabusyoma bumboni oobu. Bapati bazikombelo aaba bakali kwaamba kuti zintu nzibakali kuyiisya atala aLeza nzyakasimpe pesi nzibakali kuchita zyakali kumunyemya Leza. (Tit. 1:16) Kusiyana abapati bazikombelo aaba bakali kusala  njiisyo nzibakali kuyanda kusyoma, Pawulu wakali kusyoma njiisyo zyoonse zili muMagwalo. Alubo wakalilibambilide kuyiisya akubelesya zintu “zyoonse nzyayanda Leza.”​—Mil. 20:27.

3. Kuziba kuti zintu nzusyoma nzyakasimpe, zyaamba kuti weelede kuziba nsandulo zyamibuzyo yoonse na? (Langa kabbokesi kati, “ Milimu yaJehova aMakanze Aakwe ‘Tandikonzyi Kuzibandauka Zyoonse’”)

³ Bamwi babonaanga chikombelo chakasimpe cheelede kuba aansandulo zyamibuzyo yoonse kuswaanizya amibuzyo iitakwe nsandulo zijanika muBbayibbele. Zilachita na kuti muntu azibe zintu zyoonse? Atujane nsandulo kuzwa kuchikozyano chaPawulu. Nikuba kuti Pawulu wakasungwaazya bakombinyina kuti ‘basinizye zintu zyoonse,’ pesi wakazumina kuti kwakali zintu zyiingi nzyaakatali kumvwisisisya. (1 Tes. 5:21) Tuzizi biyeni? Pawulu wakaamba kuti: “Tujisi luzyibo lutazulide.” Alubo wakayungizya kuti: “Tatuboni kabotu nkaambo tulanga mucimbonimboni calubulo.” (1 Kor. 13:9, 12) Eezi zitondeezya kuti Pawulu taakali kuzimvwisisisya pe zintu zyoonse. Mbukubede andiswe, tatuzimvwisisisyi pe zintu zyoonse. Nikuba boobo, Pawulu wakalizizi njiisyo zyakasimpe ziyandikana zili atala aJehova. Zintu nzizeezyo nzyaakazi zyakapa kuti abe aachoonzyo chakuti wakajana kasimpe.

4. Niinzi nzitweelede kuchita kuti tube aachoonzyo chakuti zintu nzitusyoma nzyakasimpe alubo niinzi nzitutalange-lange?

⁴ Imwi nzila iikonzya kutugwasya kuti tube aachoonzyo chakuti zintu nzitusyoma nzyakasimpe nkulanga-langa kukozyania kuliwo akati kazintu nzyaakali kuchita Jesu azintu zilikuchitwa aaBakamboni baJehova mazubaano. Muchiiyo eechi, tulabona kuti maKristu bakasimpe (1) tabakombi zifanikisyo, (2) balemeka zina lyaJehova, (3) balakayanda kasimpe akuti (4) balayandana kazizwa aansi aamoyo.

5. Niinzi zitondeezya kuti Jesu wakali kukomba Jehova alikke alubo twiiyaanzi kuzwa kuchikozyano chakwe?

⁵ Jesu naakali kujulu anaakali aanyika, wakali kukomba Jehova alikke nkaambo wakali kumuyanda. (Lk. 4:8) Wakayiisya basikwiiya bakwe kuti bakombe Jehova alikke. Bbayibbele taakwe mpulitondeezya pe kuti Jesu abasikwiiya bakwe basyomeka bakali kubelesya zifanikisyo chiindi nibakali kukomba. Mbukunga Leza Muuya, taakwe muntu uukonzya kupanga chintu chifenene anguwe. (Is. 46:5) Ani kutegwani atala akupanga zifanikisyo zyabasaante akuzikomba? Mulawu wachibili waMilawu iili 10 Jehova njaakapa maIsrayeli, wakaamba kuti: “Utalipangili cikozyanyo cibezedwe naa cikozyanyo cili mbuli cintu cili coonse icili kujulu naa icili aanyika . . . Utazikotamini.” (Kul. 20:4, 5) Bantu bayanda kuchita zintu zibotezya Leza balawumvwisisisya mulawu ooyu.

6. Njiili nzila yabukombi njibatobelezya Bakamboni baJehova?

⁶ Basikulanga-langa makani aachiindi bakaamba kuti maKristu bakusaanguna bakali kukomba Leza alikke. Limwi bbuku lyaambuula atala amakani aachiindi lyakaamba kuti, maKristu bakusaanguna “bakali kukonzya kutazumina” kubelesya zifanikisyo mumasena aakukombela. Mazubaano, Bakamboni baJehova batobelezya chikozyano chamaKristu aaba. Tatuzikombi pe zifanikisyo zyabasaante. Tatubakombi pe bangelo kuswaanizya aJesu. Alubo tatuchiti zintu zitondeezya kuti tukomba zifanikisyo zyiiminina nyika. Ziyume zitete, tukanzide kuswiilila majwi aaJesu aakuti: “Ngu Jehova Leza wako ngoelede kukomba.”​—Mt. 4:10.

7. Nguuli musiyano uuliwo aakati kaBakamboni baJehova azimwi zikombelo?

⁷ Mazubaano, bantu biingi batobela bapati bazikombelo bali aampuwo. Babayanda loko zyakuti ngakwaba mbuli kuti babubakomba biya. Bawula mabbuku aabo alubo basanga mali nyingi iigwasilizya kumilimu njibachita. Balazisyoma zintu zyoonse nzibaamba. Bantu aaba nibababona bapati bazikombelo balabotelwa zyakuti ngakwaba mbuli kuti babona Jesu kumugama. Pesi kusiyana aabantu aaba, bakombi baJehova mazubaano tabakwe bapati bazikombelo mbibatobela. Nikuba kuti tulabalemeka aabo batuzulwida pesi tatuleki pe kuswiilila majwi ngakaamba Jesu aakuti: “Nywebo nyoonse muli babunyina.” (Mt. 23:8-10) Tatukombi bantu pe nikuba kuti mbapati bazikombelo na naakuti mbeendelezi banyika. Alubo tatugwasilizyi pe kumilimu njibachita kuzikombelo zyabo naakuti kunjilila mutwaambo twanyika. Nkinkaako, akaambo kakuti tatuchiti pe zintu eezi, tutondeezya kuti tulisiyene abantu biingi balyaamba kuti maKristu.​—Joh. 18:36.

8. Tuzizi biyeni kuti Jehova uyanda kuti zina lyakwe lilemekwe akuti lizibikane kubantu boonse?

⁸ Aali chimwi chiindi, Jesu wakakomba kati: “Taata, kopa kuti zina lyako lilemekwe.” Jehova wakayisandula nkombyo eeyo kwiinda mukwaamba kuti wakali kuyoopa kuti zina lyakwe lilemekwe. (Joh. 12:28) Jesu naakali aanyika, wakapa kuti zina lyaWisi lilemekwe. (Joh. 17:26) Nkinkaako, maKristu bakasimpe bachibona kachili chilongezyo chipati kubelesya zina lyaLeza akulizibya bamwi.

9. MaKristu bakusaanguna bakatondeezya biyeni kuti bakali kulilemeka zina lyaLeza?

⁹ Kakuli kwayinda chiindi chifwiifwi biyo mbungano yachiKristu kayili yasaangunwa, Jehova ‘wakababikkila maano bamasi kuti mulimbabo ajane bantu bazina lyakwe.’ (Mil. 15:14) MaKristu bakusaanguna bakachibona kachili chilongezyo chipati kubelesya zina lyaLeza akulizibya bamwi. Bakali kulibelesya mumulimu  wakukambawuka anibakali kulemba Magwalo. Eezi zyakatondeezya aantanganana kuti mbantu bayitwa aazina lyaLeza.​—Mil. 2:14, 21.

10. Tuzizi biyeni kuti Bakamboni baJehova mbabo abalikke babuzya bamwi atala azina lyaJehova?

¹⁰ Bakamboni baJehova mbabo na abalikke bayitwa aazina lyaJehova? Atulange-lange bumboni. Mazubaano, bapati bazikombelo balikuchita zyoonse nzibakonzya kuti bape kuti zina lyaLeza litazibikanwi pe. Muchikozyano, bakagwisya zina lyaLeza mumaBbayibbele aabo alubo bamwi bakakasya bantu kuti batalibelesyi pe muzikombelo zyabo. * Pesi Bakamboni baJehova balikupa kuti zina lyaLeza lizibikane kubantu boonse. Eezi zibikka aantanganana kuti mbabo abalikke balemeka zina lyaJehova. Tulikuchita zyoonse nzitukonzya kuti tupone kweendelana azina lyesu lyakuti Bakamboni baJehova. (Is. 43:10-12) Bakamboni bakagwisya maBbayibbele aaBusanduluzi Bwanyika Mpya ayinda ku240 miliyoni alubo zina lyaJehova lyakabweedezegwa mpulyakali kujanika chiindi. Alubo bagwisya mabbuku aabelesya zina lyaLeza mumilaka yiinda ku1 000.

11. Niinzi zitondeezya kuti maKristu bakusaanguna bakali kukayanda kasimpe?

¹¹ Jesu wakali kukayanda kasimpe kali atala aaLeza amakanze aakwe. Wakapona kweendelana akasimpe aako alubo wakakayisya bamwi.  (Joh. 18:37) Ambabo batobeli baJesu balakayanda kasimpe. (Joh. 4:23, 24) Mwaapostolo Petro wakaamba kuti chiKristu ‘ninzila yakasimpe.’ (2 Pet. 2:2) Akaambo kakuti maKristu bakusaanguna bakali kukayanda kasimpe, teebakali kutobela njiisyo zyakubeja, ziyanza ziteendelani aMagwalo amaboneno aabantu aakali kukazyania akasimpe kali muBbayibbele. (Kol. 2:8) Mbukubede mazubaano, maKristu bakasimpe bali kubeleka changuzu kuti ‘beende mukasimpe’ kwiinda mukupona kweendelana anzibayiya muJwi lyaLeza.​—3 Joh. 3, 4.

12. Bakwesu batuzulwida bachita biyeni kuti babona kuti kuli kubambululwa kweelede kuchitwa atala ambutumvwisisisya imwi njiisyo yamuBbayibbele alubo nkamboonzi nibachita oobo?

¹² Bakamboni baJehova taakwe nibaamba kuti bazi zintu zyoonse zili muBbayibbele. Chimwi chiindi, balalubizya kunzila njibamvwisisisyaayo imwi njiisyo yamuBbayibbele naakuti kunzila njibachitaayo zimwi zintu mumbungano. Eezi tazyeelede kutugambya pe. Magwalo atondeezya kuti zilakonzya kubweza chiindi kuti tukamvwisisisye kabotu kamwi kasimpe kali muBbayibbele. (Kol. 1:9, 10) Jehova umunikila bantu kasimpe mbichaani-mbichaani, nkinkaako tweelede kuba aamoyo mulamfu kusikila tukakamvwisisisye kabotu. (Tus. 4:18) Kuti bakwesu bazulwida babona kuti kuli kumwi kubambululwa kweelede kuchita atala anzila njitumvwisisisyaayo imwi njiisyo yamuBbayibbele, balafwambaana kubambulula. Bazikombelo biingi mazubaano bachincha njiisyo zyabo kabayanda kubotezya bantu alubo ngabayanda kuba aampuwo munyika, pesi kubambululwa kuchitwa mumbunga yaJehova kugwasya muntu woonse kuti aswene aafwiifwi aJehova akuti amukombe munzila njayanda mbuli mbaakali kuchita Jesu. (Jak. 4:4) Bakamboni baJehova tabachinchi mbubamvwisisisya imwi njiisyo akaambo kakuti maboneno aabantu munyika achincha pesi bachita oobo akaambo kakuti ngabayimvwisisisya kabotu njiisyo eeyo. Eezi zibikka aantanganana kuti tulakayanda kasimpe.​—1 Tes. 2:3, 4.

13. Mbuubuli buntu buyandikana mbubakalaabo maKristu bakusaanguna alubo Bakamboni baJehova balikubutondeezya biyeni buntu oobu?

¹³ MaKristu bakusaanguna bakali aaluyando alubo buntu oobu buyandikana loko. Jesu wakaamba kuti: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.” (Joh. 13:34, 35) Mazubaano, Bakamboni baJehova munyika yoonse balikutondeezyania luyando oolu alubo balijisini. Tulisiyene azimwi zikombelo zyoonse nkaambo tuli mbuli mpuli iimwi nikuba kuti tuzwa munyika zisiyene-siyene akuti tuli aaziyanza zisiyene-siyene. Tulazibona eezi chiindi nituli kumiswaangano yambungano, yabbazu ayabbooma. Bumboni oobu mbubo bupa kuti tube aachoonzyo chakuti nzila njitumukombaayo Jehova ilatambulika kulinguwe.

14. Kweendelana alugwalo lwa Bakolose 3:12-14, niinzi nzitweelede kuchita zitondeezya kuti tulayandana kapati?

¹⁴ Magwalo atusungwaazya kuti ‘tuyandane kapati.’ (1 Pet. 4:8) Tutondeezya kuti tulayandana kazizwa aansi aamoyo kwiinda mukulekelela bamwi akweengelelana. Alubo imwi nzila njitukonzya kutondeezya kuti tulayandana nkwiinda mukuba bantu bapa akutamba bakombima kumaanda eesu kuswaanizya abaabo bakatunyemya. (Bala Bakolose 3:12-14.) Kuyandana munzila iili boobu kutondeezya kuti tuli maKristu bakasimpe.

15. Niinzi zitondeezya kuti maKristu bakasimpe mazubaano balikutobelezya chikozyano chamaKristu bakusaanguna?

¹⁵ Kuli zimwi zintu zyakali kuchitwa amaKristu  bakusaanguna nzitutobelezya andiswe mazubaano. Mbunga yesu ibambidwe mbuli mbuyakabede muchiindi chamaKristu bakusaanguna. Muchikozyano, mazubaano tuli aabalangizi bamabazu, baalu ababelesi babelekela. (Flp. 1:1; Tit. 1:5) Alubo mbuli maKristu bakusaanguna, tulayilemeka milawu yaJehova iili atala amakani akoonana, lukwatano ambutweelede kubelesya ganzi. Alubo tulaaswiilila mabambe akugwisya sizibi mumbungano uutayandi kweempwa.​—Mil. 15:28, 29; 1 Kor. 5:11-13; 6:9, 10; Heb. 13:4.

16. Twiiyaanzi kuzwa kumajwi aajanika muli Baefeso 4:4-6?

¹⁶ Jesu wakaamba kuti bantu biingi bakali kuyoolyaamba kuti mbaasikwiiya bakwe pesi teeboonse pe bakali kuyooba basikwiiya bakwe bachoonzyo. (Mt. 7:21-23) Alubo Magwalo aamba kuti kumazuba aakumamanino, bantu biingi bakali ‘kuyoolibonya mbuli kuti balilyaabide mubukombi.’ (2 Tim. 3:1, 5) Pesi Bbayibbele libikka aantanganana kuti kuli “lusyomo lomwe” lutambulika kuli Leza.—Bala Baefeso 4:4-6.

17. Mbaani balikutondeezya kuti bali aalusyomo lumwi mazubaano?

¹⁷ Muchiiyo eechi, twalanga-langa chikozyano chaJesu chitondeezya kuti wakali kukomba Jehova alikke. Alubo twalanga-langa zintu zyakali kuchitwa aamaKristu bakusaanguna zitondeezya kuti bakali kupona kweendelana akasimpe. Nkinkaako, kweendelana abumboni mbutwajana, mbaani bali kutondeezya kuti bali aalusyomo lumwi mazubaano? Nsandulo ili aatuba, Mbaakamboni baJehova. Tuli aachilongezyo chipati chakuba bakombi baJehova akuziba kasimpe kali atala anguwe amakanze aakwe. Toonse atuzumanane kukakatila kukasimpe nkitwakajana.