1. Nziizili zimwi zipo Jesu nzyaakatupa?

 TAAKWE muntu uupa mbuli Jesu. Naakali aanyika, wakagwasya bantu kwiinda mukuchita zigambyo. (Lk. 9:​12-17) Wakapa buumi bwakwe akaambo kandiswe. Eechi nchipo chipati loko nchaakatupa. (Joh. 15:13) Kuzwa naakabusigwa, Jesu uchiinkilila kunembo kutugwasya. Mbuli mbaakasyomezya, wakakumbila Jehova kuti atile muuya wakwe uusalala kuti utuyiisye akuti utuumbulizye. (Joh. 14:​16, 17, makani aamunsi) Kwiinda mumiswaangano yambungano, Jesu ulikwiinkilila kunembo kutugwasya kuti tugwasye bantu munyika yoonse kuti bakwe basikwiiya.—Mt. 28:​18-20.

2. Mbaani bategwa “zipo mubantu” baambidwe muli Ba-efeso 4:​7, 8?

² Kuli chimwi chipo Jesu nchaakatupa. Mwaapostoli Pawulu wakalemba atala achipo eecho Jesu kali waya kujulu, wakaamba kuti, Jesu “wakapa zipo mubantu.” (Bala Ba-efeso 4:​7, 8.) Pawulu wakapandulula kuti Jesu wakatupa zipo eezi kuti zitugwasye mumbungano munzila zisiyene-siyene. (Ef. 1:​22, 23; 4:​11-13) Mazubaano, “zipo mubantu” ziswaanizya babelesi bambungano, baalu abalangizi bamabazu. a Bakwesu aaba tabamaninide pe, chimwi chiindi balakonzya kupambanisya. (Jak. 3:2) Pesi Mwaami wesu Jesu Kkristu ubelesya mbabo kuti batugwasye, nzipo kulindiswe.

3. Pandulula mbutukonzya kugwasilizya mulimu uuchitwa aabakwesu, “zipo mubantu.”

³ Jesu wakapa bakwesu aaba mulimu uuyandikana loko wakusimya mbungano. (Ef. 4:12) Nikuba oobo, toonse tulakonzya kubagwasilizya chiindi nibachita mulimu wabo. Tulakonzya kuzikozyanisya aazichitika nikulikuyakwa Ng’anda yaBwaami. Bamwi nga balikuyaka. Bamwi nga balikugwasilizya mulimu ooyo kwiinda  mukubajikila, kubabweza amoota akubachitila zimwi zintu ziyandikana. Munzila iikozyenie, toonse tulakonzya kugwasilizya milimu iichitwa aababelesi bambungano, baalu abalangizi bamabazu kwiinda muzintu nzitwaamba anzituchita. Lino atulange mbutugwasigwa akubeleka changuzu nkubachita ambutukonzya kutondeezya kuti tulabalumba bakwesu aaba akuti tulamulumba Jesu akaambo kakutupa “zipo mubantu.”

BABELESI BAMBUNGANO BACHITA “MILIMU YAKUGWASYA”

4. Njiili imwi “milimu yakugwasya” yakali kuchitwa aababelesi bambungano mumwaanda wamunyaka wakusaanguna?

⁴ Mumwaanda wamunyaka wakusaanguna, bamwi bakwesu bakasalwa kuti babe babelesi bambungano. (1 Tim. 3:8) Kubonekaanga bakwesu aaba mbabo bakali kuchita “milimu yakugwasya” Pawulu njaakaamba. (1 Kor. 12:28) Nkinkaako, kubonekaanga babelesi bambungano bakali kuchita milimu iiyandikana kuchitila kuti baalu babikkile maanu kukuyiisya akweembela. Muchikozyano, kulakonzeka kuti babelesi bambungano bakali kuula zintu ziyandikana kuchitila kuti kujanike makkopi aamagwalo.

5. Njiili imwi milimu yakugwasya iichitwa aababelesi bambungano mazubaano?

⁵ Yeeya atala ayimwi milimu yakugwasya iichitwa aababelesi bambungano mumbungano yako. (1 Pet. 4:10) Bamwi balakonzya kulangania zyamali, ndawu zyakukambawukila, kuwoda mabbuku aambungano, kubelesya minchina ya-audio/video akuba balindi naakuti kugwasilizya kubambulula Ng’anda yaBwaami. Zintu zyoonse eezi nzibachita, zipa kuti mumbungano mubambikane. (1 Kor. 14:40) Mukuyungizya, bamwi babelesi bambungano bapa nkani zili mukabbuku kaBuumi Bwesu bwachiKristu Amulimu Wesu ankani zyabantu boonse. Alubo mubelesi wambungano ulakonzya kukumbilwa kuti agwasilizye mulangizi wakabunga. Chimwi chiindi, babelesi bambungano beelela nga bayinkaamwi abaalu kuti bakeembele butanga bwambelele.

6. Njiili imwi milimu iipa kuti tubalumbe babelesi bambungano?

⁶ Mulimu uuchitwa aababelesi bambungano ubagwasya biyeni bamwi mumbungano? Beberly, b muchizi wakuBolivia wakaamba kuti, “Ndilabalumba babelesi bambungano bali mumbungano yesu, bachita zintu zipa kuti miswaangano indinoneezye.” Wakazoowamba kuti, “Mulimu wabo upa kuti ndikonzye kwiimba, kusandula, kuswiilizya nkani, kweebela mavidiyo akubona zifanikisyo. Babaachoonzyo chakuti bantu boonse bali aamiswaangano balikwabililidwe alubo nga bagwasya aabo banjila miswaangano kababelesya mavidiyo kkoolu. Niyamana miswaangano, nga batola lubazu kukukkilina, kugwasilizya zyamali akuba aachoonzyo chakuti batupa mabbuku ngitulikuyanda. Ndibalumba loko!” Muchizi uutegwa Leslie uukkala kuColombia ulaamulumi mwaalu, wakaamba kuti: “Mulumi wangu ugwasigwa aababelesi bambungano. Kaansinga tabawo pe, nikunga ukkala kajisikini. Nkinkaako, ndilabalumba bakwesu aaba akaambo kabusungu bwabo akulipeda kugwasilizya.” Toonse tulabalumba babelesi bambungano akaambo kazintu nzibachita.—1 Tim. 3:13.

7. Niinzi nzitukonzya kuchita zitondeezya kuti tulabalumba babelesi bambungano? (Langa chifanikisyo.)

⁷ Nikuba kuti tulazibona nzibachita babelesi bambungano, pesi Bbayibbili lyaamba kuti, “Amutondeezye  kuti muli bantu balumba.” (Kol. 3:15) Krzysztof mwaalu wakuFinland, utondeezya mbabalumba babelesi bambungano. Wakaamba kuti, “Nga ndasenda kakkaadi naakuti meseji mpawo ndabikka vesi kandili kudombola mbaakandisungwaazya mubelesi wambungano  alubo ngandamubuzya mbuuyandikana mulimu wakwe.” Mukwesu Pascal amwanakazi wakwe Jael bakkala kuNew Caledonia, bakkala kabakombela babelesi bambungano. Pascal wakaamba kuti, “Tukkala katukombela babelesi bambungano bamumbungano yesu katulikulumba Jehova kuti wakatupa mbabo akumukumbila kuti abe aambabo akuti abagwasye.” Jehova ulaziswiilila nkombyo zili boobu alubo eezi zisimya mbungano.—2 Kor. 1:11.

BAALU “BALIKUBELEKA CHANGUZU AAKATI KANU”

8. Nkamboonzi Pawulu naakaamba kuti baalu bamumwaanda wamunyaka wakusaanguna bakali ‘kubeleka changuzu’? (1 Batesalonikka 5:​12, 13)

⁸ Baalu bamumwaanda wamunyaka wakusaanguna, bakali kubeleka changuzu mumbungano. (Bala 1 Batesalonikka 5:​12, 13; 1 Tim. 5:17) Bakali ‘kuzulwida’ kwiinda mukuchitisya miswaangano akusala zyakuchita. Alubo bakali kupa bakwesu abachizi lulayo munzila yaluyando kuchitila kuti bakkale kabali aalusyomo lusimide. (1 Tes. 2:​11, 12; 2 Tim. 4:2) Nikuba oobo, bakwesu aaba bakali kubeleka changuzu kuti basanine mpuli zyabo akuti bo lwabo babe aabweenzinyina busimide aJehova.—1 Tim. 3:​2, 4; Tit. 1:​6-9.

9. Njiili imwi mikuli njibalaayo baalu mazubaano?

⁹ Mazubaano, baalu balijisikini. Bachita mulimu wabukambawusi. (2 Tim. 4:5) Balazulwida mumulimu wakukambawuka, babamba mulimu wakukambawuka mundawu mubakkala alubo balatuyiisya mbutukonzya kukambawuka akuyiisya munzila iizwidilila. Alubo babeteka munzila yaluzyalo kabatasaluuli. Kuti umwi mumbungano wachita chibi chipati, baalu babeleka changuzu kuti bamugwasye muntu ooyo kuti abambulule bweenzinyina aJehova. Alubo achiindi nchicheecho, babikkila maanu kuti mbungano ikkale kayisalala. (1 Kor. 5:​12, 13; Gal. 6:1) Kwiinda zyoonse, baalu mbeembezi. (1 Pet. 5:​1-3) Bapa nkani zizwa mumagwalo, zibambilidwe kabotu. Babeleka changuzu kuti bazibe umwi awumwi mumbungano alubo bachita mulimu wakweembela. Bamwi baalu balagwasilizya mukuyaka akubambulula Maanda aaBwaami, kubamba miswaangano yabbooma alubo bamwi babeleka kabali muKkomiti Yakwaambuuzyania Abasilisi (HLC) alubo bamwi bali muTubunga Tuswaya Bachiswa (PVG) aajulu aayimwi milimu njibalaayo. Baalu babeleka changuzu kuti batugwasye.

10. Ntuutuli tumwi twaambo tupa kuti tubalumbe baalu babeleka changuzu?

¹⁰ Jehova wakaambilizya kuti beembezi banoozilangania mbelele zyakwe alubo wakaamba kuti, “kunyina noziyakuyoowa limbi pe, nokuba kuba abukandu.” (Jer. 23:4) Eezi nzizyo zyakachitikila muchizi wakuFinland uutegwa Johanna chiindi bayina nibakachiswa loko. Wakaamba kuti: “Kulandiyumina kubuzya bamwi mbundilimvwa. Pesi umwi mwaalu ngundakatajayide pe wakanditondeezya moyo mulamfu kwiinda mukundiswiilila nindakali kumubuzya zintu zyakali kundikataazya. Wakakomba aamwi andime alubo wakandibuzya kuti Jehova ulandiyanda. Tandichiziyeeyede loko pe nzyaakaamba pesi ndichiyeeyede kuti ndakalimvwa kandikwabililidwe, teendakachili kukataazikana pe. Ndisyoma kuti Jehova nguwe wakamutuma kuti azoondigwasye.” Aachiindi nwaakali kuyanda kugwasigwa, baalu bamumbungano yako bakakugwasya biyeni?

11. Niinzi nzitukonzya kuchita kuti tutondeezye kuti tulabalumba baalu? (Langa chifanikisyo.)

¹¹ Jehova uyanda kuti tutondeezye kuti tulabalumba baalu kazizwa aansi aamoyo “akaambo kamulimu wabo.” (1 Tes. 5:​12, 13) Henrietta anguwe uukkala kuFinland, wakaamba kuti: “Baalu bagwasya bamwi chakuliyandila pesi eezi tazyaambi kuti bali aamanguzu akuti bali aachiindi chiingi chakuti bagwasye bamwi naakuti tabakwe buyumu-yumu pe mbubaswaana  mubuumi. Chimwi chiindi nga ndababuzya kuti, ‘Uli mwaalu uulikabotu ndalikuyanda kuti uzibe kupela.’” Muchizi waku Türkiye c uutegwa Sera wakaamba kuti: “Baalu bayanda kusungwaazigwa kuchitila kuti bayinkilile kunembo kuchita mulimu wabo. Nkinkaako, tulakonzya kubalembela kakkaadi, kubatamba kuti tulyaamwi naakuti kwiinkaamwi ambabo mumulimu wakukambawuka.” Kuli mwaalu na ngulumba akaambo kakubeleka changuzu nkwachita mumbungano? Yanduula nzila zitondeezya kuti ulamulumba akaambo kazintu nzyachita.—1 Kor. 16:18.

BALANGIZI BAMABAZU BALATUSIMYA

12. Nkaakali kamwi kabunga kabaalumi Jesu nkaakabelesya kuti kasungwaazye mbungano? (1 Batesalonikka 2:​7, 8)

¹² Jesu Kkristu wakapa mbungano “zipo mubantu” kuti zigwasye mbungano muliimbi nzila. Wakabelesya baalu bamuJerusalema kuti batume Pawulu, Bbanabbasi abamwi, kuti babe balangizi beendeenda. (Mil. 11:22) Nkamboonzi? Kuchitila kuti bachite mulimu wabo wakusimya mbungano mbuli mbubachita babelesi bambungano abaalu. (Mil. 15:​40, 41) Baalumi aaba bakalipeda munzila zisiyene-siyene kuchitila kuti bachite mulimu ooyu. Chimwi chiindi, bakali kubikka buumi bwabo mungoozi kuti bayiisye akusungwaazya bamwi.—Bala 1 Batesalonikka 2:​7, 8.

13. Njiili imwi mikuli njibalaayo balangizi bamabazu?

¹³ Balangizi bamabazu tabakkali aandawu iimwi pe. Bamwi beenda misinzo milamfu kabaswaya mbungano. Mviki amviki mulangizi wabbazu upa nkani zisiyene-siyene, uyembela butanga alubo uchitisya muswaangano wamapayona, wabaalu amuswaangano wamumulimu wakukambawuka. Ulibambila nkani alubo ubamba miswaangano yabbazu ayabbooma. Uyiisya  muzikolo zyamapayona, ubamba muswaangano uuyandikana wamapayona bamubbazu lyakwe. Alubo ulangania zimwi nkani ziyandikana nzyapegwa aawofesi yamutabi.

14. Ntuutuli tumwi twaambo tutondeezya kuti nkamboonzi nitweelede kubalumba balangizi bamabazu babeleka changuzu?

¹⁴ Mbungano zigwasigwa biyeni abalangizi bamabazu? Kalikwaambuula atala akuswaya nkubachita balangizi bamabazu, umwi mukwesu wakuTürkiye wakaamba kuti: “Kuswaya kwabo nkubachita chiindi achiindi kundipa kuti ndijane chiindi chiingi chakusungwaazya bakwesu abachizi. Ndakabonana aabalangizi bamabazu biingi, pesi taakwe pe naba uumwi aakati kabo wakandibuzya kuti ulijisikini naakuti wakatondeezya kuti tasikiki.” Johanna waambwa kumasaangunino wakayinka mumulimu wakukambawuka amulangizi wabbazu pesi taakwe muntu pe ngubakajana aang’anda. Wakaamba kuti, “Nikuba oobo, tandizoobulubi pe buzuba oobo. Bakulana bangu basimbi babili bakalonga alubo ndilikubayeeya loko. Mulangizi wabbazu wakandisungwaazya alubo wakandigwasya. Wakandibuzya kuti lino tulakonzya kutakkala aamwi abamumpuli zyesu abeenzuma, pesi munyika mpya tuzoobotelwa kukkala aamwi ambabo mane kukabe kutamani.” Biingi besu tulabalumba balangizi bamabazu alubo tulayilumba nzila njibakatugwasyaayo.—Mil. 20:37–21:1.

15. (a) Kweendelana alugwalo lwa 3 Johane 5-8, kujana twatondeezya biyeni kuti tulabalumba balangizi bamabazu? (Langa chifanikisyo.) (b) Nkamboonzi nitweelede kubalumba banakazi babakwesu babeleka changuzu mumbungano alubo kujana twazichita biyeni? (Langa kabbokesi kati, “ Yeeya Banakazi Babo.”)

¹⁵ Mwaapostoli Johane wakasungwaazya Gayo kuti atambule bakombinyina bakalikuswaya kabalikusimya mbungano akuti ‘abasindikile munzila iibotezya Leza.’ (Bala 3 Johane 5-8.) Imwi nzila mutukonzya kuchita eezi nkwiinda mukutamba mulangizi wabbazu kuti tuzoolye  aamwi anguwe. Alubo imwi nzila njakutola lubazu mumulimu wakukambawuka natuswayide. Leslie waambwa kumasaangunino utondeezya kulumba mulizimwi nzila. Wakaamba kuti, “Ngandakomba kuli Jehova kandimukumbila kuti abape nzibayandikana.” Wakayungizya kuti, “Ime amulumi wangu nga twabalembela magwalo katubabuzya mbutunga twasungwaazigwa chiindi nibatuswaya.” Tutalubi kuti balangizi bamabazu ambabo ngabaswaanana aabuyumu-yumu alubo nga bakatala mbuli ndiswe. Chimwi chiindi, balakonzya kuchiswa, kukataazikana naakuti kumana manguzu. Nkinkaako, majwi aalikabotu naakuti chipo chiniini amwi chilakonzya kuba nsandulo yankombyo yamulangizi wabbazu.—Tus. 12:25.

TUYANDIKANA “ZIPO MUBANTU”

16. Kweendelana alugwalo lwa Tusimpi 3:​27, njiili mibuzyo njibakonzya kulibuzya bakwesu?

¹⁶ Munyika yoonse, tuyanda bakwesu biingi kuti babeleke kabali “zipo mubantu.” Kuti kuli mukwesu uubbabbatizidwe, ulayanda na kugwasilizya munzila eeyi? (Bala Tusimpi 3:27.) Ulayanda na kubeleka kuli mubelesi wambungano? Kuti kuli mubelesi wambungano kale, ulayanda na kubeleka kuli mwaalu? d Ulakonzya na kuchincha zyiimo zyako kuti ukonzye kunjila Chikolo chaBakambawusi baBwaami? Chikolo eecho chilakonzya kukuyiisya akukugwasya kuti ubelesegwe chakumaninina aJesu. Kuti walimvwa kutakonzyi pe kuchita zintu eezi, komba kuli Jehova. Mukumbile kuti akupe muuya uusalala kuchitila kuti ukonzye kuchita kufumbwa mulimu nguwapegwa.—Lk. 11:13; Mil. 20:28.

17. “Zipo mubantu” zitondeezya kuti Mwaami wesu Jesu Kkristu uli biyeni?

¹⁷ Nzibachita bakwesu Jesu mbaakasala kuti babe “zipo mubantu” mbukamboni butondeezya kuti nguwe ulikutuzulwida kumazubaano aakumamanino. (Mt. 28:20) Tulamulumba Mwaami wesu uuli aaluyando alubo mwaabi, wakatupa bakwesu beelela kuti batugwasye. Nkinkaako, tweelede kuyanduula myeenya kuti tutondeezye kuti tulabalumba bakwesu aaba. Alubo tutalubi kulumba Jehova akaambo kakuti nguwe uutupa “zipo zyoonse zibotu azipo zyoonse zimaninide.”—Jak. 1:17.