1-2. Niinzi zyakachitika basikwiiya baJesu babili nibakali kuya ku-Emawusi?

 MUNISANI 16, 33 C.E., basikwiiya baJesu bakaliwuside alubo bakaliyoowede. Bamwi basikwiiya babili bakazwa kuJerusalema kabaya ku-Emawusi, muunzi wakali kulampa makkilomita aasika ku 11 kuzwa kuJerusalema. Baalumi aaba, bakalimvwa kabamanide manguzu akaambo kakuti Jesu ngubakali kutobela wakali wajayigwa. Bakali kulangilila kuti Mesiya wakali kuzoobachitila zintu zibotu loko maJuda pesi aachiindi eecho wakali wafwa. Pesi kuli zimwi zintu zyakachitika kabatayeeyeli pe.

² Basikwiiya bakaswaana umwi mwaalumi ngubakataziba pe mpawo bakeenda aamwi. Basikwiiya bakasaanguna kumubuzya atala azintu zibi zyakali zyachitikila Jesu. Mpawo mwaalumi ooyo wakasaanguna kwaambuula atala azintu nzibakataluba pe basikwiiya. Wakabelesya Magwalo abupolofita kalikupandulula kuti nkamboonzi Mesiya naakeelede kupenzegwa akujayigwa. Baalumi aaba batatu nibakasika ku-Emawusi, mwaalumi ooyo wakalitondeezya kuti nguJesu wakali wabusigwa. Basikwiiya bakabotelwa loko nibakaziba kuti Mesiya wakali wabuka.—Lk. 24:​13-35.

3-4. Niinzi zyakachitikila basikwiiya baJesu alubo tulayiyaanzi muchiiyo eechi? (Milimu 1:3)

³ Jesu wakakkala aanyika kwamazuba aali 40 katanabweeda kujulu alubo wakalibonia kuli basikwiiya bakwe kwaziindi zyiingi mumazuba aayo aali 40. (Bala Milimu 1:3.) Jesu wakasungwaazya basikwiiya bakwe bakawuside alubo bakayoowede. Basikwiiya bakwe  bakabotelwa alubo bakaba aachibindi chakukambawuka akuyiisya makani mabotu aali atala aBwaami. a

⁴ Tulakonzya kugwasikana kuti twabala atala anzyaakachita Jesu muchiindi eecho. Muchiiyo eechi, tulabona Jesu mbaakabelesya chiindi eecho kuti (1) asungwaazye basikwiiya bakwe, (2) abagwasye kuti bamvwisisisye Magwalo (3) akuti abayiisye mulimu ngubakali kuzoochita muchiindi chili kunembo. Mukaambo kamwi akamwi, tulabona mbutukonzya kutobelezya chikozyano chaJesu.

SUNGWAAZYA BAMWI

5. Nkamboonzi basikwiiya baJesu nibakali kuyandikana kusungwaazigwa?

⁵ Basikwiiya baJesu bakali kuyandikana kusungwaazigwa. Nkamboonzi? Bamwi bakali basiya myuunzi yabo, bamumpuli amabbizinesi aabo kuti batobele Jesu. (Mt. 19:27) Bamwi teebakali kujatwa kabotu pe akaambo kakuti bakali baba basikwiiya bakwe. (Joh. 9:22) Bakalipeda kuchincha maponeno aabo akuti bapenzegwe akaambo kakuti bakali kusyoma kuti Jesu nguwe wakali Mesiya wakasyomezedwe. (Mt. 16:16) Pesi chiindi Jesu naakajayigwa, bakali bamana manguzu nkaambo bakali babonaanga nzibakali kulangilila teezyakali kuzoozuzikizigwa pe.

6. Jesu wakachitaanzi naakabusigwa?

⁶ Jesu wakazimvwisisisya kuti nkamboonzi basikwiiya bakwe nibakawusa chiindi naakafwa. Alubo wakalikazi kaambo kakapede kuti basikwiiya bakwe bawuse kutali kuti bakawusa akaambo kakuti bakali aalusyomo luche. Nkinkaako, mubuzuba mbuboobo naakabusigwa, wakasaanguna kusungwaazya beenzinyina. Muchikozyano, Jesu wakalibonia kuli Mariya Magadalena naakali kulila kukabanda kakwe. (Joh. 20:​11, 16) Alubo wakalibonia kuli basikwiiya babili bakali kuya ku-Emawusi baambwa mumafuka aabili aakusaanguna. Alubo wakazoolibonia kumwaapostoli Petro. (Lk. 24:34) Twiiyaanzi kuchikozyano chaJesu? Atubone zyakazoochitika naakalibonia kuli Mariya Magadalena.

7. Mbuli mbukwaambidwe muli Johane 20:​11-16, Jesu wakabona Mariya kalikuchitaanzi alubo niinzi nzyaakamuchitila? (Johane 20:​11-16) (Langa chifanikisyo.)

⁷ Bala Johane 20:​11-16. Kuseeni-seeni muNisani 16, bamwi banakazi bakayinka kukabanda  Jesu nkwaakalazikidwe. (Lk. 24:​1, 10) Umwi wakali aakati kabanakazi aabo nguMariya Magadalena. Chiindi Mariya naakasika kukabanda, wakajana mubili waJesu kawutamo pe. Wakayinka kuti akabuzye Petro aJohane atala anzyaakajana. Baalumi aaba kabali babili bakachijaana kabaya kukabanda mpawo Mariya wakabatobela. Nibakaziba kuti mukabanda teemwakalikwe chintu pe, baalumi aaba bakabweeda kung’anda pesi Mariya wakasyaala kalikulila. Mariya taakwe naakazi pe kuti Jesu wakalizibwene zyoonse nzyaakali kuchita. Jesu wakabona kuti Mariya wakali kumulila alubo wakayanda kumuumbulizya. Nkinkaako, wakalibonia kuli Mariya mpawo wakachita chimwi chintu chakamusungwaazya loko Mariya. Wakaambuulaawe mpawo wakamupa mulimu uuyandikana loko wakuti akabuzye bamwi kuti Jesu wakali wabusigwa.—Joh. 20:​17, 18.

8. Kujana twamutobelezya biyeni Jesu?

⁸ Kujana twamutobelezya biyeni Jesu? Tutobelezya Jesu chiindi nitusungwaazya bakwesu abachizi kuti bayinkilile kunembo kabakomba Jehova. Mbuli Jesu, tweelede kubikkila maanu kubuyumu-yumu mbubalikuswaana bamwi alubo tweezye kumvwisisisya mbubalimvwa mpawo tubawumbulizye. Atubone zyakachitikila umwi muchizi uutegwa Jocelyn, ulaamwanike wachanakazi wakafwa munzila iichisa. Wakaamba kuti: “Kwamyeezi myiingi ndakali kukkala kandilila.” Nikuba oobo, umwi mukwesu amwanakazaakwe bakamutamba kung’anda yabo muchizi ooyu. Mpawo bakamuswiilisisya chiindi naakali kwaamba mbaakali kulimvwa. Alubo bakamubuzya kuti Leza umubona kayandikana. Jocelyn wakaamba kuti: “Ndakamvwa mbuli kuti Jehova wakabelesya mukwesu amuchizi ooyu kuti bandinune mulwizi mundakali ndanikila kabandibikka mubwaato. Bakandigwasya kuti ndibe aachiyandisyo lubo chakwiinkilila kunembo kandikomba Jehova.” Andiswe tulakonzya kusungwaazya bamwi kwiinda mukubaswiilisisya chiindi nibaamba zintu zibakataazya zili mumyoyo yabo. Kuzwa waawo, tusale majwi aalikabotu katuli aamakanze aakuti tubasimye kuchitila kuti bayinkilile kunembo kabakomba Jehova.—Rom. 12:15.

GWASYA BAMWI KUTI BAMVWISISISYE MAGWALO

9. Mbuubuli buyumu-yumu mbubakaswaana basikwiiya baJesu alubo Jesu wakabagwasya biyeni?

⁹ Basikwiiya baJesu bakali kulisyoma Jwi lyaLeza alubo bakali kweezya kusikila mpubagolela kuti baswiilile Jehova. (Joh. 17:6) Nikuba oobo, kwakali kubayumina kuti bamvwisisisye kuti nkamboonzi Jesu naakajayigwa mbuli chigwebenga. Jesu wakalizi kuti basikwiiya bakwe bakali aalusyomo akuti bakali kumuyanda Jehova. Pesi wakabona kuti bakeelede kwaamvwisisisya kabotu Magwalo. (Lk. 9:​44, 45; Joh. 20:9) Nkinkaako, wakabagwasya kuti bamvwisisisye zyakali kwaambwa aazintu nzibakali kubala muMagwalo. Atubone mbaakazichita eezii chiindi naakalibonia kuli basikwiiya babili bakali kuya ku-Emawusi.

10. Jesu wakabagwasya biyeni basikwiiya bakwe kuti bamvwisisisye kuti nguwe wakali Mesiya choonzyo? (Lukka 24:​18-27)

¹⁰ Bala Lukka 24:​18-27. Jesu taakafwambaana pe kulizibya kuti wakalini kuli basikwiiya bakwe. Pesi wakababuzya mibuzyo. Nkamboonzi? Amwi wakali kuyanda kuti baambe nzibakali kuyeeya azyakali mumyoyo yabo. Alino nzizyo nzibakachita. Bakamubuzya kuti bakali kulangilila kuti Jesu uzooba Mwaami wa-Israyeli akuti nguwe wakali kuzoobeendelezya kutali maRoma. Nibakazwa aakwaamba maboneno aabo, Jesu wakabelesya Magwalo kuti agwasye baalumi aabo kuti bamvwisisisye zyakali zyachitika. b Mubuzuba oobo goko, Jesu wakaswaanana aabamwi basikwiiya bakwe alubo wakabapandulwida nchibwakali kwaamba bupolofita. (Lk. 24:​33-48) Twiiyaanzi kuzintu eezi zyakachitika?

11-12. (a) Niinzi nzitweelede kuchita kuti tuyiisye bamwi kasimpe kamuBbayibbili mbuli mbaakachita Jesu kuli basikwiiya bakwe? (Langa zifanikisyo.) (b) Mukwesu wakali kwiiya aaNortey wakamugwasya biyeni kuti amvwisisisye Magwalo?

 ¹¹ Kujana twamutobelezya biyeni Jesu? Chiindi nituyiisya bantu Bbayibbili, tweelede kusaanguna kubuzya mibuzyo munzila yabupampu kuchitila kuti tuzibe nzibayeeya azili mumyoyo yabo. (Tus. 20:5) Kuti twaziba mbubalimvwa, tweelede kubatondeezya mbubakonzya kujana mavesi aamuBbayibbili aakonzya kubagwasya muchiimo chabo. Tatweelede kubabuzya nzibeelede kuchita pe. Pesi tweelede kubagwasya kuti bamvwisisisye nzyaawamba Magwalo akubona mbubakonzya kwaabelesya mubuumi bwabo. Atubone zyakachitikila umwi mukwesu wakuGhana uutegwa Nortey.

¹² Naakali aaminyaka iili 16, Nortey wakasaanguna kwiiya Bbayibbili. Kakutanayinda chiindi, bamumpuli yakwe bakasaanguna kumukazya. Niinzi zyakamugwasya kuti ayinkilile kunembo kayiya Bbayibbili? Mukwesu wakali kumuyiisya Bbayibbili, wakali wabelesya lugwalo lwa Mateyo chaandaano 10 kale kuti amupandulwide kuti maKkristu bachoonzyo bakali kuyoopenzegwa. Nortey wakaamba kuti: “Nindakasaanguna kukazigwa, ndakaba aachoonzyo chakuti ndakali ndajana kasimpe.” Mukwesu wakamuyiisya Bbayibbili wakamugwasya kuti ayeeyesesye atala alugwalo lwa Mateyo 10:16 kuchitila kuti abikkile maanu akuti abalemeke bamumpuli yakwe chiindi naakali kubabuzya atala azyabukombi. Naakazwa aakubbabbatizigwa, Nortey wakali kuyanda kupayona pesi wisi wakali kuyanda kuti ayinke kuyunivesiti. Kwiinda kuti mukwesu wakali kwiiya aaNortey Bbayibbili amubuzye nzyaakeelede kuchita, pesi wakamubuzya mibuzyo alubo wakabelesya malayilile aali muMagwalo kuti amugwasye kuti ayeeyesesye atala amavesi aakali kuyoomugwasya kuti asale kabotu. Njiili mpindu yakaba? Nortey wakasala kuti apayone. Wisi wakamwaanda aang’anda. Nortey wakamvwa biyeni azyakamuchitikila? Wakati: “Ndili aachoonzyo chakuti ndakasala munzila iilikabotu.” Andiswe tulakonzya kusungwaazya bamwi kuti bayeeyesesye atala aMagwalo kuchitila kuti Magwalo aayo asimye lusyomo lwabo akuti bayinkilile kunembo kabakomba Jehova.—Ef. 3:​16-19.

YIISYA BAKWESU KUTI BABE “ZIPO MUBANTU”

13. Niinzi Jesu nzyaakachita kuti mulimu waWisi wiinkilile kunembo kawuchitwa? (Ba-efeso 4:8)

¹³ Chiindi naakali aanyika, Jesu wakachita zintu nzyaakabuzigwa aaWisi kuti achite. (Joh. 17:4) Pesi Jesu taakali kuyeeya kuti nguwe  alikke wakali kukonzya kuchita zintu nzyaakali kuyanda Jehova. Muminyaka iitatu ahafu Jesu njaakakambawuka aanyika, wakayiisya bamwi kuti ambabo bachite oobo. Katanabweeda kujulu, Jesu wakapa basikwiiya bakwe mulimu wakukambawuka akuyiisya makani mabotu akulangania bakombi baJehova. Bamwi basikwiiya bakapegwa mulimu wakuzulwida kweelede kuti teebakayinasisya pe minyaka iili 30. (Bala Ba-efeso 4:8.) Baalumi aaba, bakabeleka changuzu kabalaamwi aJesu alubo bakali kumuswiilila. Pesi katanabweeda kujulu, Jesu wakabayungizizya zyakuchita baalumi aaba kuchitila kuti beelele kuba “zipo mubantu.” Wakabayiisya biyeni?

14. Jesu wakabagwasya biyeni basikwiiya bakwe kuti basime mubukombi mumazuba aamamanino aali 40 naakali aanyika? (Langa chifanikisyo.)

¹⁴ Jesu wakabalulamika chaluyando basikwiiya bakwe. Muchikozyano, wakazibona kuti bamwi basikwiiya teebakali kusyoma chachoonzyo pe kuti wakali wajayigwa akubusigwa. Nkinkaako, wakabagwasya kuti bazibe kasimpe kwiinda mukubapa lulayo. (Lk. 24:​25-27; Joh. 20:27) Alubo wakababuzya kuti babikkile maanu kukulangania bakombi baJehova kwiinda kuti babikkile maanu kumabbizinesi aabo. (Joh. 21:15) Wakabayeezya kuti bakkutisikane azintu nzibakali kuchitila Jehova kutali kuti bazyeezyanisye aazyakali kuchitwa aabamwi. (Joh. 21:​20-22) Alubo wakabalulamika kumaboneno aatali kabotu ngibakalaawo atala aBwaami akubagwasya kuti babikkile maanu kukumbawuka makani mabotu. (Mil. 1:​6-8) Baalu bayiyaanzi kuli Jesu?

15-16. (a) Baalu kujana bamutobelezya biyeni Jesu? (b) Lwakamugwasya biyeni lulayo Patrick?

¹⁵ Baalu kujana bamutobelezya biyeni Jesu? Beelede kuyiisya bakwesu nikuba aabo bachili baniini kuti babe aazyakuchita zyiingi mumbungano. c Baalu tabalangilili kuti bakwesu mbibayiisya bamaninine pe. Beelede kubayiisya munzila yaluyando kuchitila kuti bayiye kuba bantu balibombya, basyomeka alubo balipedelede kugwasya bamwi.—1 Tim. 3:1; 2 Tim. 2:2; 1 Pet. 5:5.

¹⁶ Atubone lulayo mbulwakagwasya umwi mukwesu uutegwa Patrick. Muminyaka miche yakali yayinda, Patrick wakali kupopotela bamwi kuswaanizya abachizi alubo wakali kwaambuula zintu zitabayaki pe. Umwi mwaalu wakazibona  kuti Patrick wakeelede kuchincha buntu bwakwe alubo wakamupa lulayo munzila yaluyando. Patrick wakaamba kuti: “Ndilabotelwa kuti mwaalu ooyu wakanditondeezya mpundakeelede kubambulula.” Wakayungizya kuti: “Ndakayinoonga ndanyema nindakali kubona bamwi bakwesu kabalikujana zilongezyo nzindakali kuyanda. Pesi lulayo lwamwaalu ooyu, lwakandigwasya kuti ndibone kuti ndakeelede kubelekela kuba muntu uulibombya chiindi nindigwasya bakwesu abachizi kutali kuti ndibikkile maanu kukujana zilongezyo nzindakali kuyanda.” Chiindi Patrick naakabambulula, wakazoosalwa kuti abe mwaalu kali aaminyaka iili 23.—Tus. 27:9.

17. Jesu wakatondeezya biyeni kuti wakali kubasyoma basikwiiya bakwe?

¹⁷ Jesu wakapa basikwiiya bakwe mulimu wakuti babuzye bantu makani mabotu akuti bapandulule Magwalo. Kulakonzeka kuti basikwiiya bakwe bakali kubonaanga teebakali kukonzya pe kuchita mulimu Jesu ngwaakabapa. Nikuba oobo, Jesu wakalizi kuti balawukonzya mulimu ooyo. Nzizyo zyakapa kuti abatume. Jesu wakatondeezya kuti wakali kubasyoma basikwiiya bakwe naakababuzya kuti: “Mbuli Taata mbaakandituma, andime ndilikumutuma.”—Joh. 20:21.

18. Baalu kujana bamutobelezya biyeni Jesu?

¹⁸ Baalu kujana bamutobelezya biyeni Jesu? Baalu bali aabusongo bayiisya bamwi kwiinda mukubapa zyakuchita. (Flp. 2:​19-22) Muchikozyano, baalu balakonzya kukumbila bachikula kuti babagwasilizye mukusalazya akubambulula Ng’anda yaBwaami. Alubo baalu balakonzya kupa bamwi bakwesu imwi milimu yakuchita akubayiisya mbiichitwa milimu eeyo. Alubo beelede kubasyoma kuti balakonzya kwiichita kabotu milimu eeyo. Umwi mwaalu uuchili mupya uutegwa Matthew ulabalumba baalu bali aaluzibo bakamuyiisya kuti achite milimu iisiyene-siyene mumbungano akumusyoma kuti wakali kukonzya kwiichita kabotu milimu eeyo. Wakaamba kuti, “Nindakali kupambanisya, bakali kundigwasya kubona nzindakeelede kuchita kuchitila kuti nditazooyindululi lubo pe kuchita mbuli mbundachita muchiindi chili kunembo.” d

19. Tweelede kukanza kuchitaanzi?

¹⁹ Jesu wakabelesya mazuba aakumamanino aali 40 naakali aanyika kuti asungwaazye, akambawuke akuti ayiisye bamwi. Atukanze kuti tutobelezye chikozyano chakwe. (1 Pet. 2:21) Jesu unootugwasya kuti tuchite oobo, nkaambo wakatusyomezya kuti: “Ndinooli aandinywe mazuba woonse kusikila kumamanino aabwiime bwazintu.”—Mt. 28:20.