MUNYIKA yoonse mbiizulwa, baalu balayibotelwa milimu njibabeleka akati kabakombi baLeza. Tulabotelwa kubeleka aamwi ambabo. Pesi muminyaka miche yakiinda, kuli kumwi kuchincha kwakaba. Baalu bakomena bakakumbilwa kuti basiile baalu bachili baniini imwi mikuli mipati mumbunga. Mikuliinzi?

Mabambe aaya mapya akatondeezya kuti balangizi bamabazu abakwesu bayiisya kuzikolo zyambunga, beelede kwiimikila kubeleka milimu eeyi kuti baba aminyaka iili 70. Alubo baalu bali aminyaka iili 80, beelede kusiila baalu bachili baniini imwi mikuli mbuuli kuba mulangizi waKkomiti Yamutabi naakuti mulangizi wakabunga kabaalu mumbungano. Baalu aaba bakomena bakakutambula biyeni kuchincha ooku? Bakatondeezya kuti balasyomeka kuli Jehova akumbunga yakwe!

Mukwesu Ken wakali mulangizi waKkomiti Yamutabi kwaminyaka iisika ku49 wakati: “Zyakasalwa, ndakazizumina amoyo woonse. Buzuba mbundakamvwa atala amabambe aaya, ndakali ndakomba kuli Jehova kandikumbila kuti  umwi mukwesu uchili muniini abe mulangizi.” Mbaakalimvwa mukwesu Ken kutondeezya mbubalimvwa bakwesu bakomena basyomeka munyika yoonse. Nikuba boobo, bakakataazikana aniini nkaambo balakuyanda kubelekaamwi abakombinyina.

Mukwesu Esperandio wakali mulangizi wakabunga kabaalu wakati: “Zyakandikaatazya mbichani.” Pesi wakati, “Ndakali kuyanda chiindi chiingi kuti ndisilikwe kubulwazi bwangu.” Mukwesu Esperandio, mukombi waJehova uusyomeka alubo nchilongezyo mumbungano.

Pesi kutegwani abakwesu bakali balangizi bamabazu kwaminyaka myiingi bakanchinchwa akubeleka imwi milimu? Mukwesu Allan wakali mulangizi wabbazu kwaminyaka iili 38 wakati, “Nindakamvwa atala amabambe aaya ndakamana manguzu.” Nikuba boobo, wakabona kuti kulagwasya kuyiisya bakwesu bachili baniini kubeleka milimu alubo uchili mukombi waJehova uusyomeka.

Mukwesu Russell, wakabeleka kwaminyaka iili 40 kali mulangizi wabbazu akuyiisya kuzikolo zyambunga wakati, nibakazimvwa amukayintu wakwe bakamana manguzu. “Twakali kuuyanda loko mulimu ooyu alubo twakali kulimvwa kuti tuchili amanguzu akwiinkilila kunembo amulimu ooyu.” Mukwesu Russell amukayintu wakwe bali kubelesya lwiiyo aluzibo ndubakajana mumbungano alubo eezi zipa kuti basikupupulula babotelwe.

Makani aali muli 2 Samuele alakonzya kukugwasya kuti umvwisisisye mbubakalimvwa bakwesu baambidwe ajulu nikuba kuti tazinakuchitikila pe.

Atuyeeye zyakachitika chiindi Abbisalomu naakapapila Mwaami Davida, wisi. Davida wakachija kuzwa kuJerusalemu kaya kuMahanayimu, kubuzwezuba kwamulonga waJordani. Nibakali nkuko, Davida abeenzinyina bakali kuyanda zimwi zintu ziyandikana. Uchiyeeyede na kuti niinzi chakachitika?

Baalumi batatu bakeeta malo, zyakulya azimwi zibelesyo. Bbarizilayi wakaliwo akati kabaalumi aaba. (2 Sam. 17:27-29) Makanze aAbbisalomu taakazwidilila pe mpawo Davida wakabweeda kuJerusalemu alubo Bbarizilayi wakamusindikila kusika kumulonga waJordani. Davida wakamukombelezya kuti bayinkaamwi kuJerusalemu. Mwaami wakasala kupa Bbarizilayi chakulya nikuba kuti Bbarizilayi ‘wakanotede loko’ zyakuti taakali kuchiyanda pe chakulya nchaakapegwa. (2 Sam. 19:31-33) Pesi Davida wakali kuyanda kuti Bbarizilayi akamugwasye kuJerusalemu nkaambo wakali aluzibo lwiingi. Chakali chilongezyo chipati loko kukkala akubelekela mung’anda yamwaami!

Bbarizilayi wakasandula kuti wakali aminyaka iili 80. Eezi zitondeezya kuti wakali kulibombya. Mpawo wakati: “Sa ndizi cintu mbucibede, na cibi na cibotu?” Bbarizilayi wakali kwaambaanzi? Bbarizilayi wakali aluzibo lwiingi nkaambo wakali wakomena. Alubo wakali kukonzya kwaambila Davida makani aagwasya mbuuli mbubakazoochita  baalumi ‘bapati’ kuMwaami Rewobbowamu. (1 Bam. 12:6, 7; Int. 92:12-14; Tus. 16:31) Nkinkaako, majwi aBbarizilayi aakutakonzya kusiyanisya chibotu achibi, akali kutondeezya zintu zyeetwa akuchembaala. Wakazumina kuti kukomena kwakali kwapa kuti atakonzyi kumvwa kunona kwachintu naakuti kumvwa kumatwi. (Muk. 12:4, 5) Bbarizilayi wakabuzya Davida kuti ayinke amwanaakwe mulombe wakachili mukubusi uutegwa Kkimuhamu.​—2 Sam. 19:35-40.

Kuchincha kwakachitika kweendelana aminyaka kulikozyenie amaboneno ngaakali aawo Bbarizilayi. Pesi mukuchincha ooku, kwakalangwa-langwa zyiingi kutali zyiimo naakuti zintu nzyakonzya kuchita muntu mbuuli kuli Bbarizilayi. Kwakalangwa-langwa zintu zikonzya kugwasya baalu basyomeka munyika yoonse.

Baalu bakomena bakabona kuti mbunga yaJehova ilakonzya kuzwidilila kuti bayiisya baalu bachili baniini mikuli njibakali kubeleka kwachiindi chilamfu. Chiindi chiingi, baalu bakomena mbabo bayiisya baalu bachili baniini, mbuuli mbaakachita Bbarizilayi kumwanaakwe amwaapostolo Pawulu kuli Timotewo. (1 Kor. 4:17; Flp. 2:20-22) Bakwesu aaba bachili baniini batondeezya kuti ‘nzipego mubantu’ alubo balikugwasilizya ‘mukuyaka mubili waKristu.’​—Ef. 4:8-12; kozyanisya amajwi aali muli Myeelwe 11:16, 17, 29.

Bantu biingi mumbungano bakasiila bamwi mikuli, balikubelesya nzila mpya naakuti kuyungizya nzibachita mukubelekela Jehova.

Mukwesu Marco, wakali mulangizi wabbazu kwaminyaka iili 19 wakati: “Zyiimo zyangu zipya zindigwasya kuti ndikambawukile baalumi batakombi bakwete bachizi bali mumbungano yesu.”

Geraldo, wakali mulangizi wabbazu kwaminyaka iili 28 wakati: “Chimwi chipekeezyo chesu nkugwasya batachichiti kabotu mubukombi akwiiya abantu biingi Bbayibbele.” Wakati we amukayintu wakwe balikwiiya Bbayibbele abantu bali 15 akuti bantu biingi bakatali kuchita kabotu mubukombi balikunjila miswaangano yachiKristu.

Mukwesu Allan, waambidwe kumatalikilo wakati: “Lino tuli achiindi chiingi chakubelesya nzila zisiyene-siyene mumulimu wakukambawuka. Tulikuchita bukambawusi bwaantanganana, tukambawukila kumasena kuchitwa zyabbizinesi akukambawukila basimayakilane alubo babili bakalisikide kuNg’anda yaBwaami.”

Kuti kuli mukwesu uusyomeka alubo wakapegwa mulimu mupya mumbunga, kuli imwi nzila njukonzya kugwasilizya. Ulakonzya kugwasilizya mumulimu waJehova kwiinda mukwaabila bakwesu bachili baniini luzibo ndulaalo. Mukwesu Russell, waambwa kumatalikilo wakati: “Jehova ulikuyiisya bakwesu bachili baniini alubo bali azipo zisiyene-siyene. Bakombima balikugwasigwa akuyiisya, akweembela butanga nkubachita!”—Langa kabbokesi kati “ Gwasya Bakwesu Bachikula Kuti Bachite Zyiingi.”

Kuti wakapegwa mulimu mupya mumbunga, kkala kuli amaboneno aali kabotu. Mulimu ngwaakabeleka wakagwasya bantu biingi alubo ulakonzya kwiinkilila kunembo kugwasya bamwi. Bantu bakatondeezya kuti balakuyanda alubo bachikuyanda.

Alubo chiinda kubota nchakuti, mwakachita chintu chitalubiki pe mumoyo waJehova. Nkinkaako, ‘takayilubi milimu yanu akuyanda nkumwakatondeezya nkaambo kazina lyakwe ambumwabelekela basalali.’ (Heb. 6:10) Lugwalo oolu lulatusungwaazya toonse  nkaambo lutondeezya kuti Jehova ulatulongezya akaambo kamilimu njituchita. Muyandikana loko kuli Jehova zyakuti takayilubi pe milimu njimwakachita anjimulikubeleka lino kuti muchite zintu zimubotezya!

Pesi kutegwani kuti taakwe nwaakachincha mukuli kweendelana amabambe aambidwe aajulu? Makani aaya alakonzya kukugwasya anduwe. Munzilaanzi?

Kuti mumbungano yanu kakuli mukwesu uusyomeka wakomena wakachincha mulimu, ulakonzya kugwasigwa aluzibo ndwalaalo. Kumbila kuti akugwasye. Buzya maboneno aakwe atala ankani zisiyene-siyene. Alubo bona mbali kubeleka chakusyomeka ambali kubelesya luzibo lwakwe mumikuli njalikuchita lino.

Kufumbwa kuti uli mukwesu wakomena uli amikuli mipya naakuti uli mukwesu naakuti muchizi ulikugwasigwa abakwesu bakomena, weelede kuziba kuti Jehova ulabotelwa akusyomeka nkubachita bakombi bakwe bakamubelekela kuzwa chiindi abalikwiinkilila kunembo kabamubelekela.