1-2. (a) Nimpinduunzi ziyooyetwa aArmagedoni kubantu? (b) Njiili mibuzyo njitutalange-lange muchiiyo eechi?

BAMWI bantu basyoma kuti nyika eeyi iyoonyonyoonwa kakubelesegwa mabbomba anyukkiliya naakuti mapenzi aalichitikila. Pesi eezi zilisiyene azyaambwa aBbayibbele nkaambo kuzooba nkondo iyooyeta mpindu mbotu kubantu. Nkondo eeyo itegwa Armagedoni alubo nzilyaamba Bbayibbele atala ankondo eeyi zyeelede kutubotezya! (Ciy. 1:3) Nkondo yaArmagedoni iyoovuna bamwi bantu alubo tikanyonyooni bantu boonse pe! Ziyoochitika biyeni eezi?

² Bbayibbele litondeezya kuti Armagedoni iyoovuna bantu kwiinda mukugwisya mfulumende zyabantu zyoonse. Nkondo eeyi iyoovuna bantu kwiinda mukunyonyoona bantu babi akufutula baluleme. Alubo iyoovuna bantu kwiinda mukukwabilila nyika kuti itanyonyoonwi pe. (Ciy. 11:18) Kuti tutumvwisisisye kabotu twaambo ootu, atulange lange mibuzyo iitobela: Armagedoni niinzi? Niinzi ziyoopa kuti isike? Nga tulachita biyeni kuti tukafutuke? Nga tulakkala biyeni katusyomeka mbukunga Armagedoni yaswena aafwiifwi?

3. (a) Bbala lyakuti Armagedoni lyaambaanzi? (b) Kweendelana amajwi aali muli Ciyubunuzyo 16:14, 16 nkamboonzi Armagedoni niitegwa mbusena bwachikozyano?

³ Bala Ciyubunuzyo 16:14, 16. Bbala liti “Amagedoni” lijanika kamwi luzutu muMagwalo alubo lizwa kubbala lyachiHebbrayo lyaamba kuti “Cilundu ca Megido.” (Ciy. 16:16; makani aamunsi) Megido mbumwi busena bwakali kukkala maIsrayeli  chiindi. (Jos. 17:11) Pesi Armagedoni teendawu iijanika aanyika pe. Armagedoni chaamba chiindi aawo baami “bamunyika yoonse” nibayoobungana antoomwe kuti balwane aJehova. (Ciy. 16:14) Alubo muchiiyo eechi, tulabelesya bbala lyakuti “Amagedoni” kwaamba nkondo itazoochitike chiindi maami naazoobungana. Tuzizi biyeni kuti Armagedoni mbusena bwakukozyanisya? Chakusaanguna, taakwe chilundu chitegwa Megido pe. Chachibili, busena bwaMegido mbuniini loko “kubami bamunyika yoonse” amasoja aabo kuti bakkwane azilwanio zyabo. Chachitatu, mbuuli mbututabone, nkondo yaArmagedoni izoosaanguna aawo “baami” banyika nibazoosaanguna kulwana bantu baLeza bali munyika yoonse.

4. Megido ankondo mpati yaJehova zinjililana biyeni?

⁴ Megido ankondo mpati yaJehova zinjililana biyeni? Nkaambo chiindi nkondo zyiingi zyakali kulwaninwa kuMegido akuMupata waJezriyeli wakali aafwiifwi. Chimwi chiindi, Jehova wakali kunjilila kunkondo eezyo. Muchikozyano, “kumbali amaanzi aa Megido” Leza wakagwasya Mubetesi wamaIsrayeli Bbarakki kuti azunde masoja aakuKkenani aakali kuzulwidwa aSisera. Bbarakki aDibbora bakalumba Jehova akaambo kakuti bakazunda. Bakayimba kuti: “Nyenyeezi zyakalwana kujulu; . . . zyakalwana Sisera. Kalonga ka Kisoni kakabatola.”​—Bab. 5:19-21.

5. Nguuli musiyano uyandikana uuliwo aakati kankondo yaArmagedoni ankondo yakalwanwa aBbarakki?

⁵ Bbarakki aDibbora bakamanisya lwiimbo lwabo amajwi aati: “Aboobo basinkondonyoko boonse bafwe mbubonya oobo, O Jehova, pele aabo bakuyanda babe mbuli zuba nolipasula mubulemu bwalyo.” (Bab. 5:31) Kuchiindi chaArmagedoni, basinkondonyina baLeza bayoonyonyoonwa mbuuli chiindi pesi aabo bayanda Leza bayoofutuka. Pesi kuli musiyano uuyandikana loko uuliwo aakati kankondo yakalwanwa aBbarakki ankondo yaArmagedoni. Kuchiindi chaArmagedoni bantu baLeza tabakalwani pe. Alubo tabanoolikwe zilwanio pe! Bayooba amanguzu ‘kufwumbwa buyo kuti bakabatame akuba alusyomo’ muli Jehova ampi yakwe yabasilumba bakujulu.​—Is. 30:15; Ciy. 19:11-15.

6. Jehova ulakonzya kuzoobelesya nzila zili kunyonyoona basinkondonyina munkondo yaArmagedoni?

⁶ Leza uzoobazunda biyeni basinkondonyina munkondo yaArmagedoni? Ulakonzya kuzoobelesya nzila zisiyene-siyene. Muchikozyano, ulakonzya kubelesya muzuzumo wanyika, chivulamabwe naakuti tulabi. (Job. 38:22, 23; Ezk. 38:19-22) Ulakonzya kupa kuti basinkondonyina balwane chabo-chabo. (2 Mak. 20:17, 22, 23) Alubo ulakonzya kubelesya bangelo kuti bajaye basizibi. (Is. 37:36) Kufumbwa nzila Leza njazoobelesya, uyoozunda. Basinkondonyina boonse bazoonyonyoonwa. Pesi baluleme boonse bazoofutuka.​—Tus. 3:25, 26.

7-8. (a) Nkwaambilizyaanzi nkubatazoochite beendelezi banyika kujanika muli 1 Batesalonika 5:1-6? (b) Nkamboonzi kubeja ooku nikunooli kubi loko?

⁷ Kwaambilizya “luumuno akuliiba” kuyoosaanguna kuchitika “buzuba bwa Jehova” kabutanasika. (Bala 1 Batesalonika 5:1-6.) “Buzuba bwa Jehova” bwaambwa muli 1 Batesalonika 5:2, “mapenzi mapati.” (Ciy. 7:14) Tuyooziba biyeni kuti mapenzi mapati abaafwiifwi kutalika? Bbayibbele lyaamba kuti kuyooba kwaambilizya kupati munyika yoonse. Kwaambilizya ooku kuyooba chitondeezyo chakuti mapenzi mapati aaba aafwiifwi.

⁸ Kwaambilizya “luumuno akuliiba” ooku nkuko kwakalembwa chiindi kuti kuzoochitika. Nkamboonzi beendelezi banyika nibazoowamba oobu? Ani bapati bazikombelo  bazooswaanizigwa na mukwaambilizya ooku? Kweelede oobo. Kufumbwa mbukutanoobede, kwaambilizya ooku kunooli kumwi kubeja kuzulwidwa amadimoni. Alubo kubeja ooku kunooli kubi loko nkaambo kuzoopa kuti bantu babonaanga balikwabilidwe mapenzi mapati kaatanasika. “Mpoonya cakutayeeyela lunyonyooko luyoobasikila cakufwambaana mbubonya mbuli kumyongwa kwamukaintu uumitide nayanda kutumbuka.” Pesi niinzi zitazoochitike kubakombi baJehova basyomeka? Balakonzya kuzoogamba nkaambo tabazi pe kuti buzuba bwaJehova buyoosika lili pesi banoolibambilide.

9. Jehova uzooyinyonyoona biyeni nyika yaSaatani?

⁹ Jehova tazoonyonyooni nyika yaSaatani achiindi chimwi mbuuli mbaakachita muchiindi chaNowa. Pesi uzooyinyonyoona muzipanzi zibili. Chakusaanguna, uzoonyonyoona Bbabbiloni Mupati, chaamba bukombi bwakubeja bujanika munyika yoonse. Chachibili, munkondo yaArmagedoni uzoonyonyoona nyika yaSaatani iswaanizya bazyapolitikisi, basinkondo abazyabbizinesi. Atulange chimwi achimwi chazipanzi eezi.

10. Kweendelana amajwi aali muli Ciyubunuzyo 17:1, 6; 18:24 nkamboonzi Jehova nayoonyonyoona Bbabbiloni Mupati?

¹⁰ “Lubeta lwamuvwuule imupati.” (Bala Ciyubunuzyo 17:1, 6; 18:24.) Bbabbiloni Mupati wakapa kuti bantu baleke kulemeka zina lyaLeza. Wakabayiisya manwa atala aLeza. Wakachita bwaamu kwiinda mukupanga chizuminano abeendelezi banyika. Bbabbiloni Mupati wakabelesya manguzu aakwe kudyaaminina bantu mbayendelezya kwiinda mukubatolela mali munzila yabuchenjezu. Alubo wakatila ganzi lyabantu biingi kuswaanizya alyabakombi baLeza. (Ciy. 19:2) Jehova uyoomunyonyoona biyeni Bbabbiloni Mupati?

11. ‘Munyama uusalala pyu’ wiimininaanzi alubo Leza uzoomubelesya biyeni kuti anyonyoone Bbabbiloni Mupati?

¹¹ Jehova uyoonyonyoona “muvwuule mupati” kabelesya ‘meja aali kkumi’ kuswaanizya ‘amunyama uusalala pyu.’ Munyama ooyu  wakukozyanisya wiiminina United Nations. Meja aali kkumi ayiminina zisi zisumpukide muli zyapolitikisi ziswaanizidwe muUnited Nations. Achiindi chaLeza cheelede, zisi eezi ziyoobukila Bbabbiloni wakukozyanisya. Zisi eezi “ziyoomusaala akumusiya mantanda” alubo ziyooomunyanga bunoti bwakwe akutondeezya bubi bwakwe kumuntu woonse. (Ciy. 17:3, 16) Lunyonyooko oolu lutazoochitike chakufwambaana luyoobagambya aabo banooli kubbazu lyakwe. Bbabbiloni Mupati wakali kulidunda kati: “Ndilikkede aano ndemwami mukaintu, tandili mukamufwu alimwi kunyina pe nondiyakoomoka kulila.”​—Ciy. 18:7, 8.

12. Niinzi Jehova nchaatayookasye zisi kuti zichite alubo nkamboonzi?

¹² Leza takazumizyi zisi kuti zinyonyoone bantu bakwe basyomeka. Nkaambo babelesya zina lyakwe, alubo bakaswiilila mulawu wakwe wakuti bazwe muli Bbabbiloni Mupati. (Mil. 15:16, 17; Ciy. 18:4) Kuyungizya waawo, bakagwasya bantu biingi kuti bazwe mulinguwe. Nkinkaako bakombi baJehova tabazooswaanizigwi pe ‘muzipenzyo zyakwe zimwi.’ Pesi lusyomo lwabo luzoosunkwa.

13. (a) Ngwani Gogo? (b) Kweendelana amajwi aajanika muli Ezekieli 38:2, 8, 9, zisi ziyoosika biyeni aabusena bwakukozyanisya butegwa Armagedoni?

¹³ Kulwana kwaGogo. (Bala Ezekieli 38:2, 8, 9.) Chiindi nibwaakunyonyoonwa bukombi bwakubeja, bantu baJehova bayoosyaala kabali mbuuli munsamu wasyaala awulikke chiindi nikwayinda guwo pati lyanyukula imwi minsamu. Eezi ziyoomunyemya Saatani. Uzootondeezya kunyema kwakwe kwiinda mukubelesya “majwi aasololelwa amadaimona” atazoope kuti nkamu yazisi zyoonse ibukile bakombi baJehova. (Ciy. 16:13, 14) Nkamu yazisi eeyi itegwa “Gogo wakucisi ca Magogo.” Chiindi zisi eezi zyazoosaanguna kulwana bantu baJehova, zinooli zyasika aabusena bwakukozyanisya butegwa Armagedoni.​—Ciy. 16:16.

14. Gogo uyoozibaanzi?

¹⁴ Gogo uyoosyoma “janza lyanyama,” chaamba masoja aakwe. (2 Mak. 32:8) Pesi iswe  tuyoosyoma Jehova Leza wesu nikuba kuti zinoobonekaanga mbufuba-fuba kubantu bazisi. Baleza baBbabbiloni Mupati ulaanguzu bayookachilwa kumuvuna kuzwa ‘kumunyama’ ‘akumeja aakwe aali kkumi’! (Ciy. 17:16) Nkinkaako, Gogo uyoolangilila kuti uyoozunda. Uyoolwana bantu baJehova “mbuli makumbi aavwumba cisi.” (Ezk. 38:16) Pesi Gogo uzoobona kuti walinjizya mukakole. Uzooziba kuti uli kulwana aJehova mbuuli zyakachitwa aFaro kuLwizi Lusalala.​—Kul. 14:1-4; Ezk. 38:3, 4, 18, 21-23.

15. Jesu uyoozunda biyeni kuchiindi chaArmagedoni?

¹⁵ Kristu amasoja aakwe aakujulu bazookwabilila bantu baJehova kwiinda mukunyonyoona Gogo abantu bali kulubazu lwakwe. (Ciy. 19:11, 14, 15) Niinzi chiyoochitika kuli sinkondonyina waJehova mupati, Saatani ooyo wakapa kuti zisi zilwane bantu baJehova? Jesu uyoowaala Saatani amadimoni aakwe mumulindi uutagoli, alubo bayoojalilwa kwaminyaka iili 1 000.​—Ciy. 20:1-3.

16. (a) Tutondeezya biyeni kuti ‘tulimuzi Leza’? (b) Nkamboonzi kuzibwa aJehova nichili chilongezyo kuchiindi chaArmagedoni?

¹⁶ Nikuba kuti twaba achiindi chilamfu naakuti tuli bapya mukasimpe, kuti tukafutuke kuchiindi chaArmagedoni tweelede ‘kuziba Leza’ akuswiilila “makani mabotu aa Mwami wesu Jesu.” (2 Tes. 1:7-9) Tutondeezya kuti ‘tulimuzi Leza’ kwiinda mukuziba nzyayanda anzyatayandi azyeelelo zyakwe. Kuyungizya waawo, kumuyanda, kumuswiilila akumukomba kutondeezya kuti tulimuzi Leza. (1 Joh. 2:3-5; 5:3) Kuti twatondeezya kuti tulamuyanda Jehova, tulaba aachilongezyo ‘chakuzibwa aanguwe,’ eezi ziyoopa kuti tukafutuke munkondo yaArmagedoni! (1 Kor. 8:3) Nkamboonzi? Nkaambo ‘kuzibwa aanguwe’ chaamba kuyandwa aLeza.

17. Chambaanzi kuswiilila “makani mabotu aa Mwami wesu Jesu”?

¹⁷ “Makani mabotu aa Mwami wesu Jesu” aswaanizya zyoonse zyakayiisigwa aJesu  zijanika muJwi lyaLeza. Tutondeezya kuti tulaaswiilila makani mabotu kwiinda mukupona kweendelana angawo. Kuswiilila ooku kuswaanizya kubikka Bwaami mubusena bwakusaanguna, kupona kweendelana azyeelelo zyaLeza ziluleme akwaambilizya atala aBwaami bwaLeza. (Mt. 6:33; 24:14) Alubo kuswaanizya kugwasya bakwesu bananikidwe kuchita mulimu wabo wakukambawuka makani mabotu kuchita kuti bantu babe basikwiiya.​—Mt. 25:31-40.

18. MaKristu bananikidwe bazoolutondeezya biyeni luzyalo ndubakatondeezegwa nibakachili aanyika?

¹⁸ Lino-lino bakombi baLeza bananikidwe bazootondeezya luzyalo ndubakatondeezegwa ‘aabambelele zimbi.’ (Joh. 10:16) Bazoolutondeezya biyeni? Kiitanasika nkondo yaArmagedoni, boonse bananikidwe bali 144 000 banooli babusigwa kuti bapone kujulu kabali zilenge zyamuuya zitafwi. Bayooba chipanzi chamasoja aakujulu ayoonyonyoona Gogo akukwabilila “nkamu mpati” yabantu baswiilila Jehova. (Ciy. 2:26, 27; 7:9, 10) Chinooli chilongezyo chipati kunkamu mpati inooli yakagwasya bananike baJehova nibakachili aanyika!

19-20. Nga tulakkala biyeni katusyomekede mbukunga Armagedoni yaswena aafwiifwi?

¹⁹ Bakombi baJehova balikuswaana buyumu-yumu mumazuba aaya aakumamanino. Nikuba boobo, tulalisimya katubotelwa. (Jak. 1:2-4) Chitugwasya kuti tulisimye, nkukomba amoyo woonse. (Lk. 21:36) Tweelede kuchita kweendelana ankombyo zyesu kwiinda mukubala Jwi lyaLeza akuyeeyesesya atala anzitubala ziswaanizya bupolofita buli atala amazuba aano. (Int. 77:12) Kuchita eezi akukambawuka chiindi choonse, kuyoopa kuti lusyomo lwesu lusime akuti tukkale katuli abulangizi!

²⁰ Yeeya kuti uyoobotelwa biyeni Bbabbiloni Mupati kaatachiwo pe alubo nkondo yaArmagedoni kayili yamana! Kwiinda zyoonse, yeeyela mbuutanoobotelwe chiindi zina lyaLeza abweendelezi bwakwe kazili zyasalazigwa! (Ezk. 38:23) Armagedoni iyooyeta mpindu mbotu kuli baabo bamuzi Leza, baswiilila Mwanaakwe akulisimya kusikila kumamanino.​—Mt. 24:13.