1. Nkamboonzi nitweelede kulibombya kuli Jehova?

TWEELEDE kulibombya * kuli Jehova nkaambo nguMulengi wesu. Nkinkaako ulaacheelelo chakuzipa malayilile zintu nzyaakalenga. (Ciy. 4:11) Kamwi kaambo kapa kuti tumuswiilile nkakuti, bweendelezi bwakwe buli kabotu loko. Kuzwa chiindi, bantu biingi bakapegwa nguzu zyakweendelezya bamwi. Pesi Jehova ulisiyene ambabo nkaambo Mweendelezi musongo, ulaaluyando, ulaaluzyalo alubo uumvwisisisya.​—Kul. 34:6; Rom. 16:27; 1 Joh. 4:8.

2. Kweendelana amajwi aali muli Bahebrayo 12:9-11, nkamboonzi nitweelede kulibombya kuli Jehova?

² Jehova uyanda kuti katumuswiilila kutali akaambo kakuti tulamuyoowa pe pesi akaambo kakumuyanda mbuuli Taata siluyando. Mulugwalo lwakwe ndwaakalembela BaHebrayo, Pawulu wakaamba kuti tweelede “kulibombya kuli Taata” nkaambo ulatuyiisya “kutegwa tupone.”​—Bala Bahebrayo 12:9-11.

3. (a) Tutondeezya biyeni kuti tulalibombya kuli Jehova? (b) Njiili mibuzyo njitutasandule?

³ Tutondeezya kuti tulalibombya kuli Jehova kwiinda mukumuswiilila muzintu zyoonse akumusyoma kutali kusyoma maanu eesu pe. (Tus. 3:5) Nkuuba kulibombya kuli Jehova kuti katuzi buntu bwakwe bubotu. Nkamboonzi? Nkaambo buntu bwakwe oobu bulatondeezegwa muzintu nzyachita. (Int. 145:9) Kwiiya atala aJehova kupa kuti twiinkilile kunembo  katumuyanda. Kuti katumuyanda Jehova, tatukayandi kulembelwa milawu myiingi itondeezya nzitweelede kuchita anzituteelede kuchita. Tuleezya kuchita kuti mizeezo yesu anzituchita zyeendelane anzyayanda akuti tutantamuke zintu zibi. (Int. 97:10) Pesi chimwi chiindi kulakonzya kutuyumina kuswiilila Jehova. Nkamboonzi nikuli boobo? Alubo niinzi baalu, mataata amamaama nzibakonzya kwiiya kuzwa kuchikozyano chaMweendelezi Nehemiya, Mwaami Davida aMariya bayina aJesu? Mibuzyo eeyi ilasandulwa muchiiyo eechi?

4-5. Kweendelana amajwi ajanika muli Baroma 7:21-23, nkamboonzi nikukonzya kutuyumina kulibombya kuli Jehova?

⁴ Kamwi kaambo kapa kuti kutuyumine kulibombya kuli Jehova nkakuti twakakona chibi akuti tatumaninide pe. Nkinkaako tulaamuuya wakupapila. Adamu aEva nibakapapila Leza kwiinda mukulya muchelo ngubakakasidwe, bakatalisya kulisalila chibotu achibi. (Matl. 3:22) Nikuba mazubaano, bantu bachikaka kuswiilila Jehova kwiinda mukulisalila chibotu achibi.

⁵ Nikuba bantu bamuzi Jehova akumuyanda kulabayumina kulibombya kulinguwe. Mwaapostolo Pawulu wakaziswaana eezi. (Bala Baroma 7:21-23.) Mbuuli Pawulu, tuyanda kuchita zintu zibotezya Jehova. Nkinkaako tweelede kwiinkilila kunembo kulwana muuya wakuyanda kuchita chibi.

6-7. Nkaakali kamwi kaambo kapa kuti kutuyumine kulibombya kuli Jehova? Amba chikozyano.

⁶ Kamwi kaambo kakonzya kupa kuti kutuyumine kulibombya kuli Jehova, ninzila njitwakakomezegwa aayo akutobelezya ziyanza zyesu. Bantu biingi bali amaboneno asiyene aaJehova, nkinkaako kulakonzya kutuyumina kuba amaboneno asiyene angibalaawo bantu biingi. Atubone chikozyano chitobela.

⁷ Muli zimwi zisi bana basungilizigwa kuti bayande kuzoobeleka milimu iifozya mali nyingi. Muchizi uutegwa Mary * wakaswaanana abuyumu-yumu buli boobu. Katanayiya atala aJehova, wakali kwiiya kuchikolo chisumpukide loko muchisi chabo. Bamumpuli yakwe bakali kumusungilizya kuti abeleke mulimu uufozya mali nyingi alubo uupa kuti alemekwe abamwi. Anguwe wakali kuziyanda. Pesi naakayiya atala aJehova, wakatalika kumuyanda mpawo wakachincha nzyaakali kuyanda kuchita mubuumi. Nkinkaako wakati: “Chimwi chiindi ndijana myeenya yakuchita zyabbizinesi zikonzya kundipa mali nyingi pesi zilakonzya kunyongania bukombi bwangu. Akaambo kambundakakomezegwa, kuchindiyumina kukaka. Nkinkaako nga ndakomba kuli Jehova kandikumbila kuti andigwasye kuzunda sunko lyakubeleka mulimu undikachizya kuchita zintu zyabukombi.”​—Mt. 6:24.

8. Niinzi nzitutalange-lange?

⁸ Kulibombya kuli Jehova kugwasya ndiswe. Pesi bantu bapedwe nguzu zyakweendelezya bamwi mbuuli baalu, mataata amamaama balaakamwi kaambo kapa kuti balibombye kuli Leza, beelede kugwasya bamwi. Atulange zikozyano zizwa muBbayibbele zikonzya kutuyiisya mbutweelede kubelesya nguzu zyesu munzila ibotezya Jehova.

9. Mbuyumu-yumuunzi mbwaakaswaananaabo Nehemiya?

⁹ Jehova wakapa baalu mulimu uuyandikana loko wakulangania bantu bakwe. (1 Pet. 5:2) Baalu balakonzya kwiiya zyiingi kwiinda mukulanga-langa chikozyano chaNehemiya mbakeendelezya bantu baJehova. Mbuuli Mweendelezi wamaJuda, Nehemiya wakali amanguzu. (Neh. 1:11; 2:7, 8; 5:14) Yeeya buyumu-yumu mbwaakaswaananaabo Nehemiya. Wakali wamvwa kuti bantu bakali kuchita zibi aatempele alubo teebakachili kubapa pe maLevi zintu zyakali kuyandikana mbuuli mbuwakali kwaamba mulawu. MaJuda teebakachili kuutobela mulawu waSabata alubo bamwi baalumi bakali kukwata banakazi bazwa kuli zimwi zisi. Mweendelezi Nehemiya wakeelede kubambulula kabuyumu-yumu oobu.​—Neh. 13:4-30.

10. Nehemiya wakachita biyeni akaambo kabuyumu-yumu mbwaakaswananaabo?

¹⁰ Nehemiya takwe naakabelesya manguzu aakwe kuti ababikkile milawu yakwe bantu baLeza. Pesi wakakomba kakumbila kuzulwidwa aJehova alubo wakayiisya bantu milawu yaJehova. (Neh. 1:4-10; 13:1-3) Alubo Nehemiya wakatondeezya kulichesya kwiinda mukubelekaamwi abakombinyina alubo wakabagwasya kuyakulula miduli yaJerusalemu.​—Neh. 4:15.

11. Kweendelana amajwi ajanika muli 1 Batesalonika 2:7, 8 baalu beelede kwiiyendelezya biyeni mbungano?

¹¹ Baalu tabaswaani chiimo chikozyenie achaNehemiya pe pesi balakonzya kwiiya zyiingi kuzwa kuli nguwe munzila zyiingi. Muchikozyano, babeleka changuzu kuti bagwasye bakwesu abachizi. Alubo tabaliboni kabasumpukide pe kwiinda bamwi akaambo kamulimu wabo. Pesi beendelezya mbungano munzila yaluzyalo. (Bala 1 Batesalonika 2:7, 8.) Luyando akulichesya zipa kuti baambuule kabotu abamwi. Andrew, mukwesu ulaachiindi chilamfu kali mwaalu wakati: “Ndakabona kuti bakwesu abachizi balamuswiilila mwaalu kuti kali aluzyalo alubo kaangunukide kuti bamwi baambuulaawe. Buntu oobu bupa kuti bakwesu babelekaamwi abaalu.” Alubo umwi mukwesu utegwa Tony waba achiindi kali  mwaalu wakati: “Ndileezya kubelesya lulayo lujanika muli Bafilipi 2:3 akubeleka changuzu kuti ndibone kuti bamwi bantu balandiinda. Kuchita oobu kupa kuti nditamanikizyi bakwesu kuti bachite nzindiyanda.”

12. Nkamboonzi baalu nibeelede kulibombya?

¹² Baalu beelede kulibombya, nkaambo Jehova ulalibombya. Nikuba kuti Jehova Mweendelezi Mupati wanyika yoonse, “ulooka” naakuti ulalifwiinsya kuti abusye “muntu [uuli mumapenzi] kuzwa mulusuko.” (Int. 18:35; 113:6, 7) Nisimpe, bantu balisumpula balamusesemya Jehova.—Tus. 16:5.

13. Nkamboonzi mwaalu nayelede kujata “mulaka wakwe”?

¹³ Mwaalu uulibombya kuli Jehova weelede kujata “mulaka wakwe.” Chimwi chiindi ulakonzya kwaambuula majwi atali kabotu kuti umwi muntu watondeezya kutamulemeka. (Jak. 1:26; Gal. 5:14, 15) Andrew waambwa musule wakati: “Chimwi chiindi ndilimvwa kandiyanda kusandula mukwesu naa muchizi munzila iitali kabotu kuti watondeezya kutandilemeka. Nikuba boobo, ndakayeeyesesya atala azikozyano zyabantu basyomeka zijanika muBbayibbele alubo eezi zyakandigwasya kuti ndibe muntu uulichesya.” Baalu batondeezya kuti balalibombya kuli Jehova kwiinda mukuba aaluyando aluzyalo kubakombinyina kuswaanizya abamwi baalu.​—Kol. 4:6.

14. Nguuli mulimu Jehova ngwaakapa mataata, alubo ulangilila kuti bachiteenzi?

¹⁴ Jehova wakapa mwaalumi mulimu wakuba mutwe wampuli alubo ulangilila kuti ayiisye akulaya bana bakwe. (1 Kor. 11:3; Ef. 6:4) Pesi mataata tabeelede kweendelezya mpuli zyabo kufumbwa mbubayanda nkaambo bazoolyambilila kuli Jehova atala ambubakali kuzyeendelezya. (Ef. 3:14, 15) Mataata batondeezya kuti balalibombya kuli Jehova kwiinda mukubelesya manguzu aabo munzila iimubotezya. Balakonzya kwiiya zyiingi kwiinda mukuyeeyesesya atala abuumi bwaMwaami Davida.

15. Nkamboonzi Mwaami Davida nali chikozyano chibotu kumataata?

¹⁵ Jehova wakasala Davida kuba mutwe wampuli yakwe awachisi chamaIsrayeli choonse. Akaambo kakuti wakali mwaami, Davida wakali amanguzu miingi loko. Chimwi chiindi Davida wakakachilwa kwaabelesya kabotu manguzu aakwe mpawo wakachita chibi chipati. (2 Sam. 11:14, 15) Pesi wakalibombya kuli Jehova kwiinda mukutambula lulayo. Alubo wakakomba kuli Jehova amoyo  woonse. Wakeezya amanguzu aakwe woonse kuswiilila Jehova. (Int. 51:1-4) Kuyungizya waawo, Davida wakali kutambula lulayo kutali kuzwa kubaalumi luzutu pesi akubanakazi. (1 Sam. 19:11, 12; 25:32, 33) Davida wakayiya kuzwa kuchibi chakwe alubo wakayanda kubelekela Jehova kwabuumi bwakwe boonse.

16. Bamataata bayiyaanzi kuzwa kuli Davida?

¹⁶ Atulange-lange zyiiyo nzibakonzya kwiiya mataata kuzwa kuMwaami Davida: Tamweelede kubelesya manguzu ngimwakapegwa aJehova munzila itali kabotu. Zumina kuti wabisya alubo tambula lulayo luzwa muBbayibbele ndubakupa bamwi. Kuti wachita oobo bampuli yako balakulemeka akaambo kakulibombya. Chiindi nuyiminina bamumpuli yako munkombyo, komba kuli Jehova amoyo wako woonse. Batondeezye kuti uyanda kugwasigwa akuzulwidwa aJehova. Alubo tondeezya kuti kubelekela Jehova nchintu chiyandikana mubuumi bwako. (Dt. 6: 6-9) Chikozyano chako chibotu nchipo chiyandikana chikonzya kugwasya bamumpuli yako.

17. Nguuli mulimu Jehova ngwaakapa mamaama?

¹⁷ Jehova wakapa mamaama mulimu uuyandikana mumpuli, manguzu akweendelezya bana babo. (Tus. 6:20) Nzibachita anzibaamba banyina zilakonzya kugwasya naakuti kunyongania bana babo kwabuumi bwabo boonse. (Tus. 22:6) Atubone nzibakonzya kwiiya mamaama kuzwa kuli Mariya bayina aJesu.

18-19. Niinzi mamaama nzibakonzya kwiiya kuzwa kuli Mariya?

¹⁸ Mariya wakalaazi loko Magwalo. Mariya wakali kumuyanda Jehova alubo wakaba abweenzinyina bulikabotu anguwe. Wakalilipedelede kuswiilila malayilile aJehova nikuba kuti akali kukonzya kuchincha buumi bwakwe boonse.​—Lk. 1:35-38, 46-55.

¹⁹ Nimamaama mulakonzya kwiiya zyiingi kuzwa kuli Mariya. Biyeni? Chakusaanguna, mweelede kuba abweenzinyokwe bulikabotu aJehova kwiinda mukubala Bbayibbele akukomba kamuli amulikke. Chachibili, kwiinda mukuzumina kuchincha buumi bwanu kuti muchite zibotezya Jehova. Muchikozyano, kulakonzeka kuti bazyali banu bakali kufwambaana kunyema alubo bakali kumupopotela. Nkinkaako zilakonzeka kuti mwakakomena kamuzi kuti niinzila mbotu yakukomezya bana. Nikuba kuti mwakayiya atala zyeelelo zyaJehova, kulakonzeka kuti kulamuyumina kuba amoyo mulamfu kubana banu kapati nibachita zitali kabotu kamukatede. (Ef. 4:31) Muchiindi chili boobo, mweelede kukomba kamukumbila Jehova kuti amugwasye.  Umwi mwanakazi uutegwa Lydia wakati: “Chimwi chiindi ngandakomba amoyo wangu woonse kuchitila kuti nditaambi majwi mabi kumwanaangu kuti waleka kundiswiilila. Chimwi chiindi nga ndajinkila munzila majwi ngindali kuyanda kwaamba mpawo ngandakomba mumoyo kuti Jehova andigwasye. Kukomba kupa kuti ndikkalinkane mumizeezo.”​—Int. 37:5.

20. Mbuyumu-yumuunzi mbubaswaananaabo bamwi banakazi, alubo nga balabuzunda biyeni?

²⁰ Bamwi mamaama baswaana buyumu-yumu bukozyenie aboobu, kulabayumina kutondeezya luyando kubana babo. (Tit. 2:3, 4) Bamwi banakazi bakakomenena mumpuli bana mubakatali kumvwanana kabotu abazyali babo. Kuti mbumwakakomezegwa, tamweelede kwiindulula kubisya kwabazyali banu pe. Mwanakazi ulibombya kuli Jehova weelede kwiiya kuyanda bana bakwe. Nikuba kuti kulakonzya kumuyumina kuchincha mizeezo, mbalimvwa ambachita, pesi weelede kuchita oobo nkaambo zilakonzya kumugwasya we ampuli yakwe.

21-22. Kweendelana amajwi aajanika muli Isaya 65:13, 14, kulibombya kuli Jehova kutugwasya biyeni?

²¹ Mwaami Davida wakalizi kuti kulibombya kuli Jehova kulagwasya. Wakalemba kuti: “Malailile aa Jehova aliluleme, apa kuti moyo ukkomane; mulawo wa Jehova ulasalala, upa kuti meso ajaluke. Mubelesi wako wacenjezyegwa anzizyo; ikuzibamba kuletela bulumbu bupati.” (Int. 19:8, 11) Mazubaano, tulakonzya kubona musiyano uuliwo akati kabantu balibombya kuli Jehova abantu bakaka lulayo lwakwe lubotu. Bantu balibombya kuli Jehova “bayakoongolola cakukondwa akaambo kakukkomana kwamyoyo yabo.”​—Bala Isaya 65:13, 14.

²² Kuti baalu, mataata amamaama balibombya kuli Jehova, buumi bwabo bulasumpuka, mpuli zyabo zilabotelwa alubo mbungano zilajatana. Kwiinda zyoonse balabotezya moyo waJehova. (Tus. 27:11) Eechi nchilongezyo chipati loko!