1-2. Lugwalo lwa Mukambausi 11:6 lweendelana biyeni amulimu wakukambawuka makani mabotu?

MULI zimwi nyika bantu bali achiyandisyo chakumvwa makani mabotu. Balabotelwa kumvwa makani mabotu. Pesi muli zimwi nyika bantu tabakwe chiyandisyo loko pe chakumvwa atala aLeza aBbayibbele. Ani nkukkala baatambula biyeni makani mabotu? Kufumbwa mbubaatambula, Jehova uyanda kuti tuzumanane kukambawuka kusikila akaambe kuti kwakkwana.

² Jehova wakabikka kale chiindi mulimu wakukambawuka makani mabotu nutazoomane, kuti chiindi eecho chasika “mamanino ayoosika.” (Mt. 24:14, 36) Niinzi chinga chilatugwasya kuti tuswiilile malayilile aakuti “utalekeli maanza aako kulyookezya”? *​—Bala Mukambausi 11:6.

3. Tulalanga-langaanzi muchiyo eechi?

³ Muchiiyo chakayinda twakayiya zintu zili 4 nzitweelede kuchita kuti tube “bazubi babantu” bazwidilila. (Mt. 4:19) Muchiiyo eechi tulalanga-langa zintu zitatu zikonzya kutugwasya kuti tuzumanane kukambawuka kazitakwe ndaba kuti tuli muzyiimo zili biyeni. Tulabona kuti nkamboonzi nikuyandikana (1) kubikka mulimu wakukambawuka mubusena bwakusaanguna, (2) kuba amoyo mulamfu (3) akukkala katuli alusyomo lusimide.

4. Nkamboonzi nitweelede kuubikka mubusena bwakusaanguna mulimu ngwaakatupa Jehova?

⁴ Jesu wakabuzya basikwiiya bakwe zintu zyakali kuyoochitika mumazuba aakumamanino azintu zyakali kuyookonzya kubakachizya  kuchita mulimu wabo wakukambawuka. Wakabuzya basikwiiya bakwe kuti bazumanane ‘kulindila.’ (Mt. 24:42) Mazubaano tuswaanana azintu zikozyenie azintu zyakakachizya bantu bamuchiindi chaNowa kuswiilila mulumbe ngwaakali kukambawuka. (Mt. 24:37-39; 2 Pet. 2:5) Nkinkaako tweelede kubikka mulimu wakukambawuka mubusena bwakusaanguna.

5. Lugwalo lwa Milimo 1:6-8 lutondeezya kuti mulimu wakukambawuka wakali kuyooyungizya biyeni?

⁵ Mazubaano, kulayandikana kuti mulimu wakukambawuka tuubikke mubusena bwakusaanguna. Jesu wakaamba kuti basikwiiya bakwe bakali kuyoochita zyiingi mumulimu wakukambawuka kwiinda nzyaakachita kachili aanyika. (Joh. 14:12) Jesu naakafwa, bamwi basikwiiya bakwe bakabweeda lubo kumulimu wabo wakuteya baswi. Naakabusigwa, Jesu wakachita chigambyo chakuti basikwiiya bakwe bajate baswi biingi. Kuzwa waawo, wakasimya kaambo kakuti mulimu wakukambawuka akuchita bantu kuti babe basikwiiya wakali kuyandikana loko kwiinda milimu yoonse. (Joh. 21:15-17) Jesu katanabweeda kujulu, wakabuzya basikwiiya bakwe kuti mulimu wakukambawuka wakali kuyooyungizya kusika kumasena akatali kukkalwa amaIsrayeli. (Bala Milimo 1:6-8.) Nikwakayinda minyaka, Jesu wakatondeezya mwaapostolo Johane muchilengaano zintu zyakali kuyoochitika “mubuzuba bwa Mwami.” * Chimwi chintu Johane nchaakabona chakali chilengaano chamungelo “wakajisi makani mabotu aatamani aakwaambilizya kuli baabo bakkala anyika, kumasi oonse, kumisyobo yoonse, kumilaka yoonse alimwi akubantu bamisyobo yoonse.” (Ciy. 1:10; 14:6) Zilaantanganana kuti Jehova uyanda kuti tukambawuke makani mabotu kusikila akaambe kuti kwakkwana.

6. Niinzi chikonzya kutugwasya kuti tubikke mulimu wakukambawuka mubusena bwakusaanguna?

⁶ Kuyeeyesesya atala ambatugwasya Jehova  kulakonzya kupa kuti tubikke mulimu wakukambawuka mubusena bwakusaanguna. Muchikozyano, utupa chakulya chamubukombi chiingi loko kwiinda mumabbuku akapulintwa, aajanika mumafooni, mavidiyo, zyakuswiilizya zyakalekkodwa aBroadcasting. Amuyeeye biyo, makani aali aawebbusayiti yesu alajanika mumilaka yiinda ku1 000. (Mt. 24:45-47) Nikuba kuti munyika muzwide bantu batajisini akaambo kakuti balisiyene muli zyapolitikisi, zyabukombi azyabunoti pesi bakombi baJehova bayinda ku8 miliyoni balijisini munyika yoonse. Muchikozyano, muli Bwasanu 19 April 2019, Bakamboni baJehova bakajatana munyika yoonse kuti baswiilizye pulogilamu iimwi yalugwalo lwabuzuba. Mubuzuba mbuboobo goko, bantu bali 20 919 041 bakabungana kuti bayeeye lufu lwaJesu. Kuyeeyesesya atala azintu zigambya zilikuchitika mazubaano zipa kuti tuyande kubikka mulimu wakukambawuka mubusena bwakusaanguna.

7. Chikozyano chaJesu chitugwasya biyeni kuti tuzumanane kukambawuka?

⁷ Chimwi chintu chikonzya kutugwasya kuti tukkale katubikka mulimu wakukambawuka mubusena bwakusaanguna, nkutobelezya chikozyano chaJesu. Taakazumizya kufumbwa chintu kuti chimukachizye kukambawuka. (Joh. 18:37) Taakazumina kweenwa aSaatani chiindi naakamusyomezya kumupa “mami oonse aamunyika abulemu bwangawo” alubo wakaka chiindi bantu nibakali kuyanda kumubikka kuti abe mwaami. (Mt. 4:8, 9; Joh. 6:15) Taakaba aachiyandisyo chakuti abe abunoti alubo taakayoowa chiindi naakali kukazigwa. (Lk. 9:58; Joh. 8:59) Kuti twaswaanana azyiimo zisunka lusyomo lwesu, kuyeeya malayilile aakalembwa amwaapostolo Pawulu kulakonzya kutugwasya. Wakasungwaazya maKristu kuti batobelezye chikozyano chaJesu kuchitila kuti ‘batakatali pe akucileka.’​—Heb. 12:3.

8. Kuba amoyo mulamfu chambaanzi alubo nkamboonzi nikuyandikana loko lino?

⁸ Kuba amoyo mulamfu nkulindila kubateme kusikila zyiimo zyachincha. Tweelede kuba amoyo mulamfu chiindi nitulindila kuti chimwi chintu chitali kabotu chimane naakuti chimwi chintu chibotu chisike. Mupolofita Habbakkukki wakali kuyanda kuti kulwana kumane muchisi chaJuda. (Hab. 1:2) Basikwiiya baJesu bakali kusyoma kuti Bwaami bwaLeza bwakali kuyoobaangununa ‘mpawo-mpawo’ kukudyaamininwa amaRoma. (Lk. 19:11) Tulindila chiindi Bwaami bwaLeza nibuyoomaninsya mapenzi oonse akweeta nyika mpya inooli aabantu baswiilila Leza. (2 Pet. 3:13) Pesi tweelede kuba amoyo mulamfu akulindila buzuba bwaJehova bubikkidwe. Atubone zimwi nzila Jehova nzyatuyiisyaazyo kuba amoyo mulamfu.

9. Nzikozyanoonzi zitondeezya kuti Jehova ulaamoyo mulamfu?

⁹ Jehova nchikozyano chibotu chakuba amoyo mulamfu. Wakapa Nowa chiindi chakuyaka bwaato ‘achakukambawuka.’ (2 Pet. 2:5; 1 Pet. 3:20) Abrahamu wakayindulula kubuzya Jehova mibuzyo atala akunyonyoonwa kwabantu bataswiilili bamuSodoma aGomora, pesi Jehova wakamuswiilila. (Matl. 18:20-33) Kwaminyaka myiingi, Jehova wakabatondeezya moyo mulamfu kwaziindi zyiingi maIsrayeli bakatali kusyomeka. (Neh. 9:30, 31) Mazubaano Jehova ulikutondeezya moyo mulamfu kwiinda mukupa bantu mbakwelela kuli nguwe chiindi chakuti “bakonzye kweempwa.” (2 Pet. 3:9; Joh. 6:44; 1 Tim. 2:3, 4) Andiswe tweelede kutobelezya chikozyano chaJehova kwiinda mukutondeezya moyo mulamfu chiindi nituli kuchita mulimu wesu wakukambawuka akuyiisya. Alubo Jehova utuyiisya kuba amoyo mulamfu kabelesya chikozyano chijanika muJwi lyakwe.

10. Kweendelana ambukulembedwe aali Jakobo 5:7, 8, chikozyano chamulimi chituyiisyaanzi?

 ¹⁰ Bala Jakobo 5:7, 8. Chikozyano chamulimi chituyiisya kuti tube amoyo mulamfu. Zimwi zintu zilimwa ilafwambaana kukomena. Pesi zimwi zilanonoka, kapati zizyala michelo. Muchiindi chamaIsrayeli, chiindi chakulima chakali kutola myeezi iili 6. Mulimi wakali kubyala mbuto yakwe kuti mvula yakusaanguna yawa alubo wakali kutebula kuti chiindi chamvula chayinda. (Mk. 4:28) Tulakonzya kutondeezya kuti tulaabusongo kwiinda mukuba amoyo mulamfu mbuli mulimi. Pesi kuchita oobo kulakonzya kutuyumina.

11. Kuba amoyo mulamfu kuyootugwasya biyeni mumulimu wakukambawuka?

¹¹ Bantu batamaninide bayanda kubona mpindu zyamilimu njibachita chakufwambaana. Kuti katuyanda kutebula kabotu, tweelede kubeleka changuzu kukupanda, kubyala, kusakwida akutiliila. Anguwo mulimu wakuchita bantu kuti babe basikwiiya uyanda kuti tubeleke changuzu. Ziyanda chiindi kuti tugwasye bantu mbitwiiyaabo Bbayibbele kuti bagwisye kusaluula kukozyenie amasokwe akuti batondeezye luyando. Kuti bantu mbitukambawukila kabataswiilili, kuba amoyo mulamfu kulatugwasya kuti tutamani manguzu. Nikuba kuti twajana bantu baswiilila, tweelede kuba amoyo mulamfu. Tatukonzyi pe kumanikizya muntu ngutwiiyaawe kuti abe alusyomo lusimide. Nikuba basikwiiya baJesu, chimwi chiindi teebakali kumvwisisisya pe nzyaakali kuyiisya. (Joh. 14:9) Atuzibe kuti mulimu wesu ngwakubyala akutiliila, pesi Jehova nguwe uukomezya.​—1 Kor. 3:6.

12. Kujana twatondeezya biyeni moyo mulamfu chiindi nitukambawukila babbululu besu?

¹² Chimwi chiindi kulakonzya kutuyumina kutondeezya moyo mulamfu chiindi nitukambawukila babbululu besu batali Bakamboni. Malayilile ali mulugwalo lwa Mukambausi 3:7 alakonzya kutugwasya. Luti: Kuli “ciindi cakuumuna aciindi cakwaambaula.” Zintu nzituchita zilakonzya kupa kuti babbululu besu  bayande kuswiilila mulumbe wesu, alubo kuti twajana mweenya tulakonzya kubabuzya kasimpe atala aJehova. (1 Pet. 3:1, 2) Tweelede kuba basungu kukambawuka akuyiisya, alubo tweelede kubatondeezya moyo mulamfu bantu boonse kuswaanizya abamumpuli.

13-14. Amba zimwi zikozyano zyakuba amoyo mulamfu nzitukonzya kutobelezya.

¹³ Chimwi chintu chikonzya kutugwasya kuti tube amoyo mulamfu, nkulanga-langa zikozyano zili muBbayibbele azyabakombi baJehova bamazubaano. Nikuba kuti Habbakkukki wakali kuyanda kuti Jehova amaninsye bubi boonse, wakaamba kuti: “Ndinakwiimvwi akatungu kangu kabulindizi.” (Hab. 2:1) Alubo mwaapostolo Pawulu wakali kuyanda ‘kumanisya’ mulimu wakwe pesi wakazumanana kuba amoyo mulamfu kwiinda mukupa “bumboni cakulomya kujatikizya makani mabotu.”​—Mil. 20:24.

¹⁴ Atubone chikozyano chayimwi mpuli yakagilajuweta kuGiliyadi mpawo yakumbilwa kuti ikabelekele kunyika yakali aBakamboni bache alubo bantu biingi teebakali maKristu pe. Bantu biingi bakkala munyika eeyo teebakali achiyandisyo pe chakwiiya Bbayibbele. Pesi bamwi mbibakagilajuweta aabo bakali kubabuzya atala azyiiyo zyabo zyakali kuzwidilila akuba Bakamboni munyika nzibakali kubelekela. Nikuba kuti bantu bamunyika eeyo teebakali kuyanda, mpuli eeyo yakatondeezya moyo mulamfu kwiinda mukuzumanana kukambawuka. Kabali bakambawuka kwaminyaka iili 8 mundawu eeyo, bakazoobotelwa kubona umwi ngubakali kwiiyaawe kali kubbabbatizigwa. Chikozyano eechi chamazubaabo chikozyenie biyeni azyachiindi? Boonse teebakaleka pe kusungwaala naakuti kulekela maanza aabo kuti alyookezye, alubo Jehova wakabalongezya akaambo kakuba amoyo mulamfu. Toonse atutobelezye “baabo kwiinda mulusyomo akukkazika moyo ibayookona zyakasyomezyegwa.”​—Heb. 6:10-12.

15. Lusyomo lutugwasya biyeni kuti tuzumanane kukambawuka?

¹⁵ Tulawusyoma mulumbe ngutukambawuka, eezi zipa kuti tuyande kukambawukila bantu biingi. Tulazisyoma zisyomezyo zili muJwi lyaLeza. (Int. 119:42; Is. 40:8) Tulikubona bupolofita bwamuBbayibbele kabuli kuzuzikizigwa mazubaano. Alubo tuli kulibonena bantu kabali kuchincha buumi bwabo akutalika kupona buumi bulikabotu chiindi nibasaanguna kubelesya malayilile aali muBbayibbele. Eezi zipa kuti tube achoonzyo chakuti muntu woonse weelede kukambawukilwa makani aaBwaami.

16. Kweendelana alugwalo lwa Intembauzyo 46:1-3, kusyoma Jehova aJesu kutugwasya biyeni kuti tuzumanane kukambawuka?

¹⁶ Alubo tulaalusyomo muli Jehova, Kasensa kamulumbe ngutukambawuka amuli Jesu Mwaami waBwaami bwaLeza. (Joh. 14:1) Kufumbwa zyiimo nzitwaswaana, Jehova uyookkala kali mayubilo eesu anguzu zyesu. (Bala Intembauzyo 46:1-3.) Kuyungizya waawo, tulaachoonzyo chakuti Jesu ulikuzulwida mulimu wakukambawuka kali kujulu alubo ulikubelesya manguzu ngaakapegwa aJehova.​—Mt. 28:18-20.

17. Amba chikozyano chitugwasya kubona kuti tweelede kuzumanana kukambawuka.

¹⁷ Lusyomo lupa kuti tube achoonzyo chakuti Jehova uyootulongezya akaambo kakubeleka changuzu, chimwi chiindi utulongezya munzila njitutayeeyeli. (Muk. 11:6) Muchikozyano, buzuba abuzuba zyuulu zyabantu zilatubona katuli aamabbuku eesu mumatebbulu amutungolo. Nzila eeyi yakukambawuka ilikuzwidilila na? Iiyi ilikuzwidilila. Mulimo Wesu wa Bwami wamu November 2014 wakali achikozyano  chawumwi musimbi uuchikula wakali kuyunivesiti. Musimbi ooyo wakali kuyanda kulemba amwi makani atala aBakamboni. Wakeezya kuyanduula Ng’anda yaBwaami pesi taakayijana pe. Wakazoobona tebbulu lyakali aamabbuku eesu aafwiifwi akuchikolo chakwe, eezi zyakamugwasya kuti ajane makani ngaakali kuyanda. Mukuya kwachiindi wakazoobbabbatizigwa alubo lino ngupayona wachiindi choonse. Zikozyano zili boobu zilatusungwaazya kuti tuzumanane kukambawuka nkaambo zitondeezya kuti kuli bantu balikuyanduula abayanda kumvwa mulumbe waBwaami.

18. Nkamboonzi nitulaachoonzyo chakuti tunooswini katukambawuka kusikila Jehova akaambe kuti kwakkwana?

¹⁸ Tulaachoonzyo chakuti mulimu wakukambawuka makani aBwaami uyoomana aachiindi cheelede. Atubone zyakachitika mumazuba aaNowa. Jehova wakatondeezya kuti uchita zintu aachiindi cheelede. Jehova wakaamba kuti wakali kuyooyeta Zambangulwe kakuchisyeede minyaka iili 120. Nikwakayinda minyaka, Jehova wakabuzya Nowa kuti ayake bwaato. Kakuli kwasyaala minyaka iili 40 naakuti 50 kuti Zambangulwe lisaangune, Nowa wakabeleka changuzu. Nikuba kuti bantu teebakali kuswiilila pe, Nowa wakazumanana kubachenjezya kusikila Jehova naakamubuzya kuti anjizye banyama mubwaato. Mpawo aachiindi cheelede “Jehova wakaujala mulyango.”​—Matl. 6:3; 7:1, 2, 16.

19. Tuyoojana zilongezyoonzi kuti teetwazumizya maanza eesu kulyookezya?

¹⁹ Lino-lino, Jehova uyootubuzya kuti twiimikile kukambawuka, mpawo uyoonyonyoona nyika yaSaatani akweeta nyika mpya inooli abantu baluleme. Katuchilindila chiindi eecho, atutobelezye chikozyano chaHabbakkukki, Nowa abamwi bakatazumizya maanza aabo kulyookezya. Atuzumanane kubikka mulimu wakukambawuka mubusena bwakusaanguna, kuba amoyo mulamfu akuba alusyomo muli Jehova amuzisyomezyo zyakwe.