1-2. Kweendelana alugwalo lwa Tusimpi 16:31, tweelede kubabona biyeni bakwesu abachizi bachembeede? (b) Njiili mibuzyo njitutasandule muchiiyo eechi?

KU-AMERICA kuli ndawu iijanika madayamondi. Madayamondi aaya ngatanagwisigwa pe doti kuti ang’ayimine akuti abelesegwe kupanga zimwi zintu. Bantu biingi baswaya ndawu eeyi ngabaabona mabwe aayo pesi ngatabazi pe kuti ayandikana biyeni alubo nga tabakwe ndaba pe angawo.

² Bakwesu abachizi bachembeede bali mbuli madayamondi aaya aayandikana. Jwi lyaLeza likozyanisya mvwi zyabo amusini. (Bala Tusimpi 16:31; 20:29) Pesi tulakonzya kutababona kabayandikana bakwesu abachizi aaba. Kuti bachiniini baziba kuti bachembeede bayandikana loko, balakonzya kwiiya zyiingi kuzwa kuli mbabo. Muchiiyo eechi, tulasandula mibuzyo iitatu iitobela: Nkamboonzi Jehova nababona kabayandikana loko bakwesu abachizi bachembeede? Nkamboonzi nibayandikana mumbunga yaJehova? Niinzi nzitweelede kuchita kuti twiiye zyiingi kuzwa kuli mbabo?

3. Kweendelana alugwalo lwa Intembauzyo 92:12-15, nkamboonzi Jehova nababona kabayandikana bachembeede?

³ Bakwesu abachizi bachembeede bayandikana loko kuli Jehova Leza. Ulibazi kuti mbantu balibiyeni alubo buntu bwabo bubotu mbubalaabo ububona kabuyandikana. Ulabotelwa chiindi nabona bachembeede kabali kubuzya bachiniini zintu zibotu nzibakaswaana mubuumi bwabo. (Job. 12:12; Tus. 1:1-4) Alubo Jehova ulabotelwa chiindi nababona kabali kulisimya kumapenzi. (Malk. 3:16) Bakwesu abachizi aaba bakaswaanana aamapenzi mubuumi bwabo pesi bakazumanana kuba aalusyomo lusimide. Bulangilizi bwabo bwasima kwiinda nibakasaanguna kwiiya Bbayibbele. Alubo Jehova  ulabayanda nkaambo balikuzumanana kwaambilizya zina lyakwe “nokuba kubucembele.”—Bala Intembauzyo 92:12-15.

4. Ngaali majwi aakonzya kuumbulizya bakwesu abachizi bachembeede?

⁴ Kuti kamuli mwakachembaala, amube aachoonzyo chakuti Jehova ulayiyeeya milimu yanu njimwakachita chiindi. (Heb. 6:10) Mwakabeleka changuzu mumulimu wakukambawuka alubo eezi zilamubotezya Taateesu wakujulu. Mwakalisimya kumapenzi kuswaanizya amasunko mayumu loko, mwakaswiilila milawu iili muBbayibbele, mwakachita milimu mipati njimwakali kupegwa alubo mwakayiisya bamwi. Mwakachita zyoonse nzimukonzya kuti mweendelane akuchincha kwiingi kuli kuchitwa mumbunga yaJehova. Mwakagwasya bamwi akubasungwaazya kuti banjile mumulimu wachiindi choonse. Jehova Leza umuyanda loko akaambo kakusyomeka kwanu. Usyomezya kuti “takabalekelezyi pe bantu bakwe basyomeka.” (Int. 37:28) Alubo umusyomezya kuti: “Kusikila mukatube mvwi, mebo ndilazumanana kumuyumuna.” (Is. 46:4) Nkinkaako, tamweelede kulibuzya kuti, ‘Mbukunga ndachembaala, tandichiyandikani pe mumbunga yaJehova.’ Pesi amube aachoonzyo chakuti muyandikana loko.

5. Niinzi nzibeelede kuziba bakwesu abachizi bachembeede?

⁵ Bakwesu abachizi bachembeede balakonzya kubelesegwa mumbunga yaJehova munzila zisiyene-siyene. Nikuba kuti kulakonzeka kuti ngatabachikwe manguzu pe mbuli chiindi, pesi bali aaluzibo lwiingi ndubakajana mumulimu waJehova. Alubo Jehova ulikuzumanana kubabelesya munzila zisiyene-siyene mbuli mbututabone muzikozyano zyabakombi bakwe bachiindi abamazubaano.

6-7. Amba zikozyano zili muBbayibbele zyabakombi baJehova bachembeede bakajana zilongezyo akaambo kakusyomeka kwabo.

⁶ MuBbayibbele mujanika zikozyano zibotu zyabakombi baJehova bakazumanana kumubelekela nikuba kuti bakali bachembaala. Muchikozyano, Mozesi wakali aaminyaka iisika ku80 chiindi naakasaanguna kubeleka kali mupolofita waJehova alubo kali mwiiminini wachisi chamaIsrayeli. Jehova wakazumanana kubelesya Daniyele kali mupolofita wakwe nikuba kuti wakali aaminyaka iili kuma90. Alubo kweelede kuti mwaapostolo Johane wakali aaminyaka iili kuma90  chiindi naakazulwidwa kuti alembe bbuku lyaCiyubunuzyo.

⁷ Bakombi baJehova biingi bachembeede teebakalikwe mpuwo pe. Eezi zyakali kukonzya kupa kuti bantu batababoni kabayandikana pe. Pesi Jehova wakali kubabona alubo wakabapa bulumbu akaambo kakusyomeka kwabo. Muchikozyano, muBbayibbele mwaambidwe zintu ziche atala amwaalumi “mululami alimwi mukombi” uutegwa Simeyoni. Pesi Jehova wakalimuzi alubo wakamupa chilongezyo chakubona Jesu chiindi naakali muniini achilongezyo chakwaamba bupolofita buli atala aJesu abayina. (Lk. 2:22, 25-35) Ani kutegwani atala awumwi mupolofita mukamufu wakali kutegwa Ana? Ana taakwe naakali kulova pe kutempele nikuba kuti wakali aaminyaka iili 84. Jehova wakamulongezya akaambo kakuti wakali kukkala kayinka kutempele alubo wakamupa chilongezyo chakubona Jesu chiindi naakali muniini. Simeyoni aAna bakali kuyandikana kuli Jehova.—Lk. 2:36-38.

8-9. Njiili milimu njibachita bamukabafu mumbunga yaJehova?

⁸ Mazubaano, kuli bakwesu abachizi biingi bali kusiila bachiniini zikozyano zibotu. Atubone chikozyano chamuchizi uutegwa Lois Didur. Wakasaanguna kubeleka kali payona uuyandikana chiindi naakali aaminyaka iili 21 kuCanada. Kuzwa waawo, Muchizi Lois amulumaakwe John, bakabeleka mumulimu wakwendeenda kwaminyaka myiingi. Bakazoobelekela kuBbeteli kuCanada kwaminyaka yinda ku20. Mukuya kwachiindi, bakazookumbilwa kuti bakabelekele kuUkraine chiindi Muchizi Lois naakali aaminyaka iili 58. Bakazumina na kwiinka naakuti bakalibuzya kuti bakali bachembaala zyakuti teebakali kuyookonzya pe kuyoobelekela kuli iimwi nyika? Bakazumina kwiinka alubo mulumaakwe wakakubeleka kali umwi waKkomiti yaMutabi. Nikwakayinda minyaka iili 7 kabali kuUkraine, John wakazoofwa pesi Lois wakasala kwiinkilila kunembo kabelekela nkuko. Lino Muchizi Lois uli aaminyaka iili 81, ulikuzumanana kuchita mulimu uuyandikana alubo bamumpuli yaBbeteli kuUkraine bamuyanda loko.

⁹ Bamukabafu bali mbuli Muchizi Lois balakonzya kubonwa kabatachiyandikani pe kuti balumi babo kabatachiwo. Pesi kuba mukamufu tazyaambi kuti muntu tachiyandikani pe. Jehova ubabona kabayandikana bachizi bakagwasya balumi babo kwaminyaka myiingi alubo baliikuzumanana kumubelekela nikuba kuti balumi babo tabachiwope. (1 Tim. 5:3) Alubo bachizi aaba bali kubagwasya loko bachiniini kwiinda mukubasungwaazya.

10. Amba zintu zibotu zyakachitwa aaMukwesu Tony.

¹⁰ Bamwi bakwesu abachizi bachembeede bakkala aabalikke naakuti ampuli zyabo. Pesi kuli zimwi nyika, kuli masena aakkala bantu bachembeede. Boonse bakwesu abachizi aaba balayandikana. Muchikozyano, mukwesu uutegwa Tony ukkala kubusena bukkala bantu bachembeede. Mukwesu ooyu wakabbabbatizigwa muAugust 1942 kuPennsylvania, U.S.A. kali aaminyaka iili 20. Mukuya kwachiindi, wakasungwa akaambo kakutatola lubazu mutwaambo twanyika mpawo wakabikkwa mujele kwaminyaka iibili ahafu.  Tony amwanakazi wakwe Hilda bakaba aabana babili alubo boonse bakabakomezya mukasimpe. Kwaminyaka myiingi, Tony wakabeleka kali mulangizi wambungano * mumbungano zitatu alubo wakabeleka kali mulangizi wamuswaangano wabbazu. Wakali kwiinka kuli limwi jele kuti akachitisye miswaangano akwiiya Bbayibbele abasungwa. Lino Tony uli aaminyaka iili 98 alubo ulikwiinkilila kunembo kubelekela Jehova. Ulikuchita zyoonse nzyakonzya kuti abelekele Jehova akuchita imwi milimu mumbungano njanjilaayo.

11. Nga tulatondeezya biyeni kuti tubabona kabayandikana bakwesu abachizi bachembeede bakkala aabalikke naakuti bakkala aabana babo?

¹¹ Ngatulatondeezya biyeni kuti tubabona kabayandikana bakwesu abachizi bachembeede bakkala aabalikke naakuti bakkala aabana babo? Baalu balakonzya kubagwasya kuti bachite mulimu wakukambawuka, banjile miswaangano naakuti bajane miswaangano yakalekkodwa. Tulakonzya kutondeezya kuti tubabona kabayandikana kwiinda mukubaswaya naakuti kubafoonena katubelesya vidiyo. Tuyanda kutondeezya kuti tubabikkila maanu bakwesu abachizi bachembeede bakkala kule ambungano zyabo. Kuti teetwachenjelela, tulakonzya kuchita zintu zitondeezya kuti tatukwe ndaba pe ambabo. Bamwi bachembeede kulakonzya kubayumina kuti basaangune kwaambuula aatala azyakachitika mubuumi bwabo naakuti balakonzya kuzibona kazitali kabotu pe. Pesi kuti twalipa chiindi chakwaambuula aabo akuswiilila chiindi nibatubuzya zintu zibotu nzibakaswaana mukubelekela Jehova tuyoogwasigwa loko.

12. Niinzi nzitukonzya kujana mumbungano yesu?

¹² Kuti walipa chiindi, ulakonzya kugamba kuti bakwesu abachizi bali mumbungano yako bali aazintu zyiingi zikonzya kukugwasya. Muchikozyano, kuli umwi muchizi uutegwa Harriette wakabelekela Jehova kwaminyaka myiingi kuNew Jersey, kuU.S.A. Muchizi ooyu wakazoolonga mpawo wakakukkala aamwanaakwe kuli iimwi ndawu ilikule. Bakwesu abachizi bamumbungano njaakali wabunjilaayo bakalipa chiindi chakuti bazibe zyiingi atala anguwe mpawo bakabona kuti Muchizi Harriette uli aazintu zyiingi zibotu zyakachitika mubuumi bwakwe. Wakababuzya zintu zyakabasungwaazya nzyakaswaana mumulimu wakukambawuka chiindi nakayiya kasimpe kuma1920. Aachiindi eecho, muchizi ooyu wakali kukkala kayenda aachakukumbya menyo (toothbrush) mumulimu wakukambawuka kuchitila kuti azooyibelesye kuti wasungwa. Mu1933, wakasungwa tubili mpawo wakali kubikkwa mujele kwamviki. Muchizi Harriette naakali mujele, mulumaakwe uutali Kamboni wakali kusyaala kalangania bana babo batatu. Zilaantanganana kuti tweelede kubabona kabayandikana loko bachembeede bali mbuli Muchizi Harriette.

13. Twayiyaanzi atala amulimu ngubalaawo bakwesu abachizi bachembeede mumbunga yaJehova?

¹³ Bakwesu abachizi bachembeede bali aamulimu uuyandikana mumbunga yaJehova. Bakabona Jehova mbaakalongezya mbunga yakwe munzila zisiyene-siyene ambaakabalongezya mubuumi bwabo. Bakayiya zintu zyiingi kuzwa kukulubizya kwabo. Nkinkaako, babone mbuli “kasensa kabusongo” alubo ambuulaabo kuchitila kuti wiiye kuzwa kuzintu zyakabachitikila mubuumi bwabo. (Tus. 18:4) Kuti walipa chiindi chakuti uzibe zyiingi atala ambabo, lusyomo lwako luyoosima alubo uyooyiya zyiingi kuzwa kulimbabo.

14. Lugwalo lwa Deuteronomo 32:7, lusungwaazya bakwesu abachizi bachiniini kuti bachiteenzi?

¹⁴ Jana chiindi chakwaambuula aabakwesu abachizi bachembeede. (Bala Deuteronomo 32:7.) Nisimpe kuti kulakonzeka kuti tabachiboni kabotu, beenda mbichaani-mbichaani, baambuula mbichaani-mbichaani pesi bachili  aachiyandisyo chakubelekela Jehova alubo bakalichitila “izina libotu” aJehova. (Muk. 7:1) Utalubi kuti nkamboonzi Jehova nababona kabayandikana. Zumanana kubalemeka. Ba mbuli Elisha. Elisha taakali kuyanda pe kusiya Eliya mubuzuba bwabo bwamamanino kubaamwi nkaambo kwaziindi zitatu wakabuzya Eliya kuti: “Tandikookuleka pe.”—2 Bam. 2:2, 4, 6.

15. Njiili mibuzyo njitukonzya kubuzya bakwesu abachizi bachembeede?

¹⁵ Tondeezya kuti uyanda kuziba zyiingi atala abakwesu abachizi bachembeede kwiinda mukubabuzya mibuzyo. (Tus. 1:5; 20:5; 1 Tim. 5:1, 2) Babuzye mibuzyo iili mbuli yakuti: “Niinzi zyakapa kuti ube aachoonzyo chakuti wajana kasimpe?” “Zintu nzwakaswaana mubuumi bwako zyakakugwasya biyeni kuti uswene aafwiifwi aJehova?” “Niinzi nchwaakabona chikonzya kugwasya muntu kuti azumanane kubotelwa mumulimu waJehova?” (1 Tim. 6:6-8) Swiilisisya chiindi nibali kusandula mibuzyo yako.

16. Bachembeede abachiniini bagwasigwa biyeni kuti bajana chiindi chakwaambuulaamwi?

¹⁶ Kuti bachembeede abachiniini bajana chiindi chakuyooma, boonse balagwasigwa. (Rom. 1:12) Kuti bachita oobo, bachiniini bayoobona kuti nichoonzyo kuti Jehova ulabalangania bakombi bakwe basyomeka alubo bachembeede bayoobona kuti bamwi balabayanda. Eezi ziyoopa kuti bachembeede baangunuke kubuzya bachiniini atala ambaakabalongezya Jehova.

17. Nkamboonzi nitukonzya kwaamba kuti bachembeede balayungizya kubota chiindi nibayabukomena?

¹⁷ Bubotu bwachiwa bulakonzya kumana chiindi muntu nayabuchembaala pesi bakombi baJehova basyomeka ngabali kuyungizya kubota kuli Jehova chiindi nibayabuchembaala. (1 Tes. 1:2, 3) Nkamboonzi nituli kwaamba oobu? Nkaambo kwaminyaka myiingi, bakazumizya muuya uusalala kuti ubagwasye kuti babelekele kuba aabuntu bubotu. Kuti twalipa chiindi chakuti tubazibe kabotu bakwesu abachizi bachembeede, twabalemeka akwiiya kuzwa kuzikozyano zyabo, tuyoobabona kabayandikana loko.

18. Tuyooyiya atalaanzi muchiiyo chitobela?

¹⁸ Mbungano ilasima kuti bachiniini bababona kabayandikana bakwesu abachizi bachembeede akuti ambabo bachembeede bababona kabayandikana bakwesu abachizi bachiniini. Muchiiyo chitobela, tuyooyiya kuti bachembeede ngabalatondeezya biyeni kuti bababona kabayandikana bachiniini mumbungano.