CHIIYO 39
Kuti Umwi Wamumpuli Wasiya Jehova
“Tazilivwulili kaka ziindi nzyobakali kumuzangila . . . akumucisizya moyo.”—INT. 78:40.
LWIIMBO 102 “Mweelede Kubagwasya Aabo Batajisi Nguzu”
ZITAYIIGWE *
1. Muntu umvwa biyeni kuti muntu ngwayanda wagwisigwa mumbungano?
KULI umwi muntu nguyanda na wakagwisigwa mumbungano? Kweelede kuti zyakakuchisa loko. Umwi muchizi uutegwa Hilda wakaamba kuti: “Chiindi mulumaangu naakafwa katuli twaba aaminyaka iili 41 kuzwa nitwakachada, ndakali kubonaanga takwe chimwi chintu chichisa loko nchindakali kuyooswaana mubuumi bwangu. * Pesi chiindi mwanaangu naakagwisigwa mumbungano akusiya mwanakazi wakwe abana, zyakandichisa loko kwiinda kufwidwa aamulumaangu.”
Jehova ulizi kuti zichisa biyeni kuti umwi wamumpuli wasiya kumukomba (Langa fuka 2-3) *
2-3. Kweendelana alugwalo lwa Intembauzyo 78:40, 41, Jehova umvwa biyeni kuti umwi muntu wasiya kumukomba?
2 Yeeya mbuzyakamuchisa Jehova chiindi bamwi bangelo nibakasala kumupapila. (Jud. 6) Alubo yeeya mbuzyakamuchisa chiindi naakali kubona bantu mbaakali kuyandisya loko maIsrayeli kabali kumupapila kutali kwachiindi chimwi biyo pesi kwaziindi zyiingi. (Bala Intembauzyo 78:40, 41.) Tuli aachoonzyo chakuti Taateesu wakujulu siluyando zilamuchisa kuti umwi muntu nguyanda wasiya kumukomba. Ulizi kuti anduwe zilikukuchisa loko. Akaambo kakuti Leza uli aalweetelelo uyookuumbulizya alubo uyookupa lugwasyo nduyanda.
3 Muchiiyo eechi, tulabona Jehova mbakonzya kutugwasya kuti tuzumanane kulisimya kuti umwi muntu ngutuyanda wasiya kumukomba. Alubo tulabona mbutukonzya kugwasya bamwi mumbungano bali muchiimo eechi. Pesi kwalino, atusaangune kubona mizeezo njituteelede kubaayo.
UTALIPI MULANDU
4. Bazyali biingi bamvwa biyeni kuti mwanaabo waleka kukomba Jehova?
4 Kuti mwana wagwisigwa mumbungano, chiindi chiingi bazyali ngabalipa mulandu wakuti bakamulekelezya mwanaabo kuti bamugwasye kuti azumanane kali mukasimpe. Chiindi mwanaakwe mulombe naakagwisigwa mumbungano, Mukwesu uutegwa Luke wakaamba kuti: “Ndakali kulipa mulandu alubo ndakali kulota zintu zitali kabotu atala azyakachitika. Chimwi chiindi ndakali kulila alubo moyo wangu wakali kundichisa loko.” Umwi muchizi uutegwa Elizabeth anguwe wakaswaanana aachiimo chikozyenie. Wakaamba kuti: “Ndakali kuyeeya kuti amwi kuli nzindakabisya mbuli muzyali. Alubo ndakali kubonaanga ndakakachilwa kumuyiisya kasimpe mwanaangu mulombe.”
5. Ngwani uli aamulandu kuti umwi wasala kuleka kukomba Jehova?
5 Tweelede kuyeeya kuti Jehova wakapa umwi awumwi wesu lwaangunuko lwakulisalila. Eezi zyaamba kuti umwi awumwi ulakonzya kulisalila kumuswiilila naakuti pe. Bamwi bana bakasala kukomba Jehova alubo balikuzumanana kumubelekela nikuba kuti bazyali babo teebakali zikozyano zilikabotu. Pesi bamwi bakasala kuleka kukomba Jehova nikuba kuti bazyali babo bakabeleka changuzu kuti babayiisye kasimpe. Eezi zibikka aantanganana kuti umwi awumwi ulakonzya kulisalila kuti kayanda kukomba Jehova. (Jos. 24:15) Nkinkaako, nibazyali, kuti kamuli aamwana wakaleka kukomba Jehova mutalipi mulandu kamuyeeya kuti mwakakachilwa kumuyiisya.
6. Mwana umvwa biyeni kuti muzyali wasala kuleka kukomba Leza?
6 Chimwi chiindi muzyali ulakonzya kusiya kasimpe alubo ulakonzya kusiya mpuli yakwe. (Int. 27:10) Eezi zilakonzya kubachisa loko bana nkaambo nga balikulangilila kuti bazyali babo babe zikozyano zilikabotu. Atubone mbaakalimvwa umwi muchizi uutegwa Esther chiindi wisi naakagwisigwa mumbungano. Wakaamba kuti: “Ndakali kukkala kandilila nkaambo ndakabona kuti ndeende wakalisalila biya achaali kuti asiye Jehova. Chiindi naakagwisigwa mumbungano, moyo wangu wakandichisa loko. Alubo ndakali kukkala kandikataazikene atala abuumi bwakwe nkaambo ndilamuyanda ndeende.”
7. Jehova umvwa biyeni atala amwana uli aamuzyali wakagwisigwa mumbungano?
7 Nibana, kuti kamuli aamuzyali wakagwisigwa mumbungano, tuli aamawuse loko atala azyakamuchitikila. Inche kaka, amube aachoonzyo chakuti Jehova uzizi loko zyakamuchitikila alubo zilamuchisa Jehova. Jehova andiswe tubakombinyokwe tulamuyanda alubo tulabotelwa akaambo kakuzumanana kwanu kusyomeka. Mutalubi kuti tamukwe mulandu pe akaambo kakusala nkwaakachita muzyali wanu. Mbuli mbutwabona aajulu, wakapa umwi awumwi lwaangunuko lwakulisalila. Umwi awumwi mukombi wakwe wakalipeda kulinguwe akubbabbatizigwa “weelede kunyamuna mukuli wakwe uumugeme.”—Gal. 6:5.
8. Niinzi nzibakonzya kuchita bamumpuli yamuntu wakagwisigwa mumbungano kabachilinda kuti aboole kuli Jehova? (Langa kabbokesi kati “ Amuboole Kuli Jehova.”)
8 Kuti umwi muntu ngutuyanda waleka kukomba Jehova, zili mulindiswe biya kulangilila kuti limwi zuba uzooboola. Niinzi nzukonzya kuchita kuchilindila kuti aboole? Weelede kubeleka changuzu kuti ukkale kuli aalusyomo lusimide. Kuti wachita oobo, chikozyano chako chilakonzya kugwasya bamwi bamumpuli nikuba ooyo wakagwisigwa ulakonzya kwiiya kuzwa kuchikozyano chako. Alubo kuyookugwasya kuti ulisimye kuchiimo eechi chichisa loko. Kwalino, atubone zimwi zintu zikonzya kukugwasya kuti ukkale kuli aalusyomo lusimide.
NIINZI NZUKONZYA KUCHITA KUTI UKKALE KULI AALUSYOMO LUSIMIDE?
9. Niinzi nzukonzya kuchita kuti uukkale kuli aalusyomo lusimide? (Langa kabbokesi kati “ Magwalo Aakonzya Kukuumbulizya Kuti Umwi Wamumpuli Wasiya Jehova.”)
9 Kkala kuchita zintu zyabukombi. Kulayandikana kuti ukkale kuli aalusyomo lusimide akuti ugwasye bamwi bamumpuli. Kujana wazichita biyeni eezi? Simya lusyomo lwako muli Leza kwiinda mukubala Jwi lyakwe, kuyeeyesesya akunjila miswaangano chiindi choonse. Atumwve zyakagwasya muchizi uutegwa Joanna chiindi wisi amukulanaakwe nibakasiya kasimpe. Wakaamba kuti: “Kubala atala azyakachitikila Abbigayeli, Esta, Jobu Josefa aJesu kwakanduumbulizya. Alubo zikozyano eezi zipa kuti nditayeeyi zintu zikonzya kundimana manguzu. Chimwi chindigwasya kuti ndilisimye, miimbo aaBroadcasting.”
10. Lugwalo lwa Intembauzyo 32:6-8, lutugwasya biyeni kuti tulisimye chiindi nitukataazikene?
10 Buzya Jehova zyoonse zilikukukataazya. Utaleki pe kukomba kuli nguwe chiindi nukataazikene. Kumbila Leza siluyando kuti akugwasye kuti ubone chiimo chako mbuli mbachibona akuti akugwasye “kuba amaano akukuyiisya nzila njoyelede kutobela.” (Bala Intembauzyo 32:6-8.) Nisimpe kuti kulakonzya kukuyumina kubuzya Jehova mbulimvwa. Nikuba boobo, baachoonzyo chakuti Jehova ulikubwene kukataazikana nkulikuchita mumoyo wako. Ukuyanda loko alubo ukusungwaazya kuti umubuzye zyoonse zili mumoyo wako.—Kul. 34:6; Int. 62:7, 8.
11. Kweendelana alugwalo lwa Bahebrayo 12:11, nkamboonzi nitweelede kusyoma kuti mabambe aakugwisya sizibi mumbungano ngakumutondeezya luyando? (Langa kabbokesi kati “ Mabambe Aakugwisya Sizibi Mumbungano Atondeezya Kuti Jehova Ulaaluyando.”)
11 Zumina kusala kwachitwa aabaalu. Jehova nguwe wakabikka mabambe aakuti sizibi weelede kugwisigwa mumbungano. Mabambe aaya atondeezya kuti Jehova ulaaluyando alubo alamugwasya sizibi kuswaanizya abamwi boonse mumbungano. (Bala Bahebrayo 12:11.) Bamwi mumbungano balakonzya kwaamba kuti baalu teebakasala kabotu kugwisya muntu ooyo mumbungano. Pesi utalubi kuti bantu baamba oobo nga tabayandi pe kwaamba zintu zitali kabotu atala amuntu wakabisya. Chiliwo nchakuti nga tatukwe makani woonse atala ankani eeyo. Nkinkaako, zilikabotu kuti tusyome kuti baalu bakabeleka changuzu kuti babelesye malayilile aali muBbayibbele chiindi nibakali kubeteka muntu ooyo akuti ‘bakabetekela Jehova.’—2 Mak. 19:6.
12. Bamwi bakagwasigwa biyeni akaambo kakuzuminana aamabambe aaJehova aakugwisya sizibi mumbungano?
12 Kuti wazuminana aakusala kwachitwa aabaalu kwakuti muntu nguyanda agwisigwe mumbungano nga ulikutondeezya kuti uyanda kumugwasya kuti aboole kuli Jehova. Elizabeth waambwa aajulu uuli aamwana mulombe wakagwisigwa mumbungano wakaamba kuti: “Chakali chintu chiyumu loko kuleka kwaambuula aamwaneesu pesi chiindi naakaboola kuli Jehova wakazumina kuti kusala nkubakachita baalu kuti agwisigwe mumbungano kwakali kabotu. Alubo wakazoowamba kuti wakayiya zintu zyiingi. Ndakabona kuti nzila Jehova njatululamika aayo ilagwasya.” Mulumi waElizabeth, Mark wakayungizya kuti: “Mukuya kwachiindi, mwanaangu wakandibuzya kuti chimwi chintu chakamugwasya kuti ayande kuboola kuli Jehova nkuti twakatobelezya malayilile aakuti tuleke kwaambuula aamuntu uugwisidwe mumbungano. Ndilabotelwa kuti Jehova wakatugwasya kuti tukonzye kutobelezya malayilile aakwe.”
13. Niinzi zikonzya kukugwasya kuti ulisimye kuti kuli kumvwa kuchisa mumoyo wako?
13 Buzya mweenzinyokwe ngusyoma zintu zilikukukataazya. Jana chiindi chakuliswaanizya aamaKristu basimide mubukombi batakugwasye kuti uzumanane kulisimya. (Tus. 12:25; 17:17) Joanna waambwa aajulu wakaamba kuti: “Ndakali kubonaanga ndili aandilikke pesi kwaambuula aabeenzuma mbindisyoma kwakandigwasya kuti ndilisimye.” Pesi niinzi nzukonzya kuchita kuti bamwi mumbungano baamba zintu zipa kuti ukataazikane loko?
14. Nkamboonzi nitweelede kuzumanana “kweengelelana akulekelelana camoyo woonse”?
14 Ba aamoyo mulamfu. Utalangilili kuti bantu boonse bayoowamba zintu zilikabotu. (Jak. 3:2) Toonse tuli aachibi nkinkaako, utagambi pe kuti bamwi babula majwi aakwaamba naakuti baamba majwi akuchisa, kabatali kuzichita achaali. Pesi weelede kuyeeya majwi aaPawulu aakuti: “Amuzumanane kweengelelana akulekelelana camoyo woonse nokuba kuti umwi kajisi kaambo kakutongooka mweenzinyina.” (Kol. 3:13) Umwi muchizi uli aabbululu wakwe wakagwisigwa mumbungano wakaamba kuti: “Jehova wakandigwasya kuti ndilekelele bakwesu abachizi bakali kwaamba zintu zindichisa kabali kubonaanga balikunduumbulizya.” Niinzi nzibakonzya kuchita bamumbungano kuti bagwasye bamumpuli yamuntu wakagwisigwa mumbungano?
BAMUMBUNGANO NGA BALAGWASYA BIYENI?
15. Bamumbungano nga balabagwasya biyeni bamumpuli yamuntu wakagwisigwa mumbungano?
15 Chita zintu zitondeezya kuti ulaandaba abamumpuli yamuntu wakagwisigwa mumbungano. Muchizi uutegwa Miriam wakali kuyoowa kuya kumiswaangano chiindi munyandumi wakwe naakagwisigwa mumbungano. Wakaamba kuti: “Ndakali kuyoowa kuti bantu bayootyeni. Pesi bamwi bakwesu abachizi bakatondeezya kuti ambabo zyakali kubachisa kuti munyandumaangu wakali wagwisigwa mumbungano alubo takwe nibakaamba zintu zitali kabotu atala anguwe. Ndilabalumba akaambo kakuti bakandigwasya kuti ndilisimye.” Umwi muchizi wakaamba kuti: “Chiindi mwaneesu mulombe naakagwisigwa mumbungano, beenzuma bakasika kuti bazootuumbulizye. Bamwi bakaamba kuti teebakalikwe majwi aakwaamba pe pesi bamwi bakali kulila andime alubo bakali kundilembela magwalo aasungwaazya. Nzibakachita zyakandigwasya loko.”
16. Niinzi nzibeelede kukkala kabachita bamumbungano kuti bagwasye bamumpuli yamuntu wakagwisigwa mumbungano?
16 Zumanana kubagwasya bantu bamumpuli yamuntu wakagwisigwa mumbungano. Chiimo chabo chiyanda kuti tubasungwaazye loko akuti tubatondeezye luyando. (Heb. 10:24, 25) Chimwi chiindi bamumpuli yamuntu wakagwisigwa mumbungano balakonzya kubonaanga bamumbungano tabachiyandi pe kuliswaanizya aambabo. Tatuyandi pe kuchita zintu zitape kuti bayeeye oobo. Bamwi bantu mbitweelede kusungwaazya kapati, mbana bali aamuzyali wakagwisigwa mumbungano. Muchizi uutegwa Maria ulaamulumi wakagwisigwa mumbungano alubo wakasiya mpuli yakwe wakaamba kuti: “Bamwi beenzuma bakatuswaya kung’anda, bakali kutujikila alubo bakali kusika kuti tuzooyiye abana katuli aamwi. Bakatondeezya kuti zyakandichitikila zyakali kubachisa alubo bamwi bakali kulila aandime. Bakandiiminina chiindi bamwi nibakali kwaamba majwi aakubeja atala andime. Bakandisimya loko.”—Rom. 12:13, 15.
Bamumbungano balakonzya kugwasya bamumpuli yamuntu wakagwisigwa mumbungano (Langa fuka 17) *
17. Baalu nga balabagwasya biyeni bantu bamumpuli yamuntu wakagwisigwa mumbungano?
17 Nibaalu, amubelesye myeenya yoonse njimulaayo kuti mugwasye bamumpuli yamuntu wakasiya Jehova. Muli aamulimu uuyandikana loko wakuumbulizya bakombinyokwe bali ababbululu bakasiya Jehova. (1 Tes. 5:14) Amwaambuule aambabo miswaangano kayitanasaanguna aniyamana kuti mukonzye kubasungwaazya. Amubaswaye mumaanda aabo alubo mukombe ambabo. Amweendaabo mumulimu wakukambawuka naakuti mubatambe kuti muzoochite aamwi kukomba kwampuli. Baalu beelede kutondeezya kuti balaandaba abakombi baJehova bawuside kwiinda mukubatondeezya luyando, kubeetelela akubapa lugwasyo ndubayanda.—1 Tes. 2:7, 8.
ZUMANANA KUBA AABULANGILIZI AKUSYOMA JEHOVA
18. Kweendelana alugwalo lwa 2 Petro 3:9, Leza uyanda kuti basizibi bachiteenzi?
18 Jehova tayandi kuti “muntu uuli woonse anyonyoonwe, pele uyanda kuti boonse bakonzye kweempwa.” (Bala 2 Petro 3:9.) Nikuba kuti muntu wachita chibi chipati pesi buumi bwakwe nga buchiyandikana kuli Leza. Utalubi kuti Jehova wakapa Mwanaakwe ngwayandisya kuti abe chinunuzyo chakunununa basizibi. Jehova ulikubatondeezya luyando aabo bakamusiya nkaambo ulikubagwasya anzila zyoonse kuti baboole kuli nguwe. Ulangilila kuti bayoosala kuchita oobo mbuli mbaakachita mulombe wakasweeka uli muchikozyano chakaambwa aaJesu. (Lk. 15:11-32) Biingi bakali basiya kasimpe bakaboola lubo kuli Taata wabo siluyando. Alubo bamumbungano bakabatambula amaanza aabili. Elizabeth waambwa aajulu wakabotelwa loko chiindi mwanaakwe mulombe naakabweedezegwa mumbungano. Wakaamba kuti: “Ndilabalumba bakwesu abachizi bakatusungwaazya kuti tuzumanane kuba aabulangilizi.”
19. Nkamboonzi nweelede kuzumanana kusyoma Jehova?
19 Tulakonzya kusyoma Jehova amoyo wesu woonse nkaambo utupa malayilile aatugwasya chiindi choonse. NguTaata uupa, uuli aalweetelelo alubo ulabayanda bakombi bakwe bamuyanda abamukomba. Baachoonzyo chakuti Jehova takakulekelezyi pe chiindi nukataazikene. (Heb. 13:5, 6) Mark waambwa aajulu wakaamba kuti: “Jehova takatulekelezyi pe. Unooli aandiswe chiindi nituli mubuyumu-yumu.” Jehova uyoozumanana kutupa “nguzu zigambya iziinda zyabantu.” (2 Kor. 4:7) Ulakonzya kuzumanana kusyoma Jehova akuba aabulangilizi nikuba kuti umwi wamumpuli wasiya kukomba Jehova.
LWIIMBO 44 Mupailo Wamuntu Uupengede
^ par 5 Zituchisa loko kuti umwi muntu ngutuyanda wasiya kukomba Jehova. Muchiiyo eechi, tulabona kuti Leza umvwa biyeni kuti eezi zyachitika. Mpawo tulalanga-langa nzibakonzya kuchita bamumpuli yamuntu ooyo kuti balisimye akuti bakkale kabasimide mubukombi. Alubo tulalanga-langa nzibakonzya kuchita bamumbungano kuti bawumbulizye bamumpuli yamuntu ooyo akuti babagwasye.
^ par 1 Amwi mazina ngitwabelesya muchiiyo eechi akachinchwa.
