1-2. Nguuli muzuzumo wakukozyanisya wakaambilizigwa amupolofita Hagai?

KULI bamwi bantu bakafutuka nikwakachitika muzuzumo wanyika kuNepal mu2015. Bamwi babo bakaamba kuti: “Mukulaba kwaliso, zintoolo amaanda aakali aba aachiindi akasaanguna kudilika.” “Bantu biingi bakali yoweede . . . Biingi bakaamba kuti muzuzumo ooyu wakachitika kwamamineti aabili. Pesi ime ndakabonanga wakatola chiindi chilamfu.” Kuti kuli wakaswaanana aachimwi chintu chakakuyoosya, tuzoofwi wachiluba pe.

² Muchiindi eechino nchitulikupona, kuli kuchitika muzuzumo uusiyene awaambwa aajulu. Muzuzumo ooyu tawuli kuchitika mudolopo limwi naakuti muchisi chimwi pe pesi ulikuchitika muzisi zyoonse alubo waba aaminyaka kulikuchitika. Muzuzumo ooyu wakaambilizigwa aamupolofita Hagai. Wakalemba kuti: “Mboobu mbwaamba Jehova wamakamu, ‘Mukaindi kaniini buyo, ndiyakwaazungaanya alimwi majulu, nyika, lwizi alimwi ansi njumu.’”—Hag. 2:6.

3. Muzuzumo wakaambwa aaHagai usiyene biyeni amuzuzumo wanyika ngutuzi?

³ Muzuzumo wakaambwa aamupolofita Hagai ulisiyene amuzuzumo wanyika ngutuzi uunyoonyoona zintu. Nkamboonzi nitwaamba oobu? Nkambo muzuzumo wakaambwa aaHagai upa kuti kuchitike zintu zibotu. Jehova lwakwe wakaamba kuti: “Ndiyoozungaanya zisi zyoonse, eelyo zintu ziyandisi zyazisi zyoonse ziyooboola akunjila mukati; aboobo ndiyoozuzya ŋanda eeyi abulemu.” (Hag. 2:7) Bupolofita oobu bwakali kwaambaanzi kubantu bakapona muchiindi chaHagai alubo bwaambaanzi kulindiswe mazubaano? Mibuzyo eeyi ilasandulwa muchiiyo eechi. Alubo tulayiya kuti nga tulachita biyeni kuti tutole lubazu mumulimu ooyu wakuzungaania zisi mazubaano.

4. Nkaamboonzi Jehova naakatuma mupolofita Hagai kubakombi bakwe?

⁴ Jehova wakapa mupolofita Hagai mulimu uuyandikana ngwakeelede kuchita. Atubone zyakachitika Hagai katanapegwa mulimu ooyu. Kweelede kuti Hagai wakali aakati kamaJuda bakabweeda kuJerusalemu nibakazwa mubuzike kuBbabbiloni mu537 B.C.E. Nibakasika kuJerusalemu, kwakayinda chiindi chiniini biyo mpawo bakatalisya kuyaka ntalisyo yatempele lyaJehova. (Ezr. 3:8, 10) Pesi chiwusisya nchakuti, nikwakayinda chiindi bakayimikila kuyaka akaambo kakuti bakakazigwa abantu bakali kukkala aafwiifwi ambabo. (Ezr. 4:4; Hag. 1:1, 2) Mu520 B.C.E, Jehova wakatuma Hagai kuti akabasungwaazye kuti bamaninsye mulimu wakuyaka tempele. *—Ezr. 6:14, 15.

5. Nkamboonzi nitukonzya kwaamba kuti mulumbe waHagai wakabasimya maJuda?

⁵ Makanze aamulumbe wakaambwa aaHagai akali aakusimya lusyomo lwabakombi baJehova. Mupolofita Hagai wakatondeezya chibindi kwiinda mukubuzya maJuda bakali bamana manguzu kuti: “‘Amuyume, nyoonse nobantu bamucisi,’ mbwaamba Jehova, ‘mubeleke. Nkaambo ndilaandinywe,’ mbwaamba Jehova wamakamu.” (Hag. 2:4) Kweelede kuti majwi aakuti “Jehova wamakamu” akabasimya maJuda nkaambo Jehova uli aankamu mpati yabangelo mbaakali kukonzya kubelesya kuti abagwasye. Nkinkaako, maJuda bakeelede kusyoma muli Jehova kuti bazwidilile mumulimu wabo wakuyaka.

6. Kuzungaanisigwa kwakaambwa aaHagai kwakali kuyooyeta mpinduunzi?

⁶ Jehova wakatuma Hagai kuti akabuzye maJuda kuti wakali kuyoozungaania zisi zyoonse. Mulumbe ooyo wakagwasya maJuda bakali bamana manguzu kuti babone kuti Jehova wakali kuyoozungaania bweendelezi bwaPesiya bwakali kweendelezya zisi zyiingi aachiindi eecho. Kuzungaanisigwa ooku kwakali kuyooyeta mpinduunzi? Chakusaanguna, kwakali kuyoopa kuti maJuda bamaninsye mulimu wabo wakuyaka tempele. Chachibili, bamwi bakatali maJuda bakali kuyooliswaanizya ambabo kuti bakombe Jehova mutempele eeli. Mulumbe ooyu wakabasungwaazya loko bakombi baLeza.—Zek. 8:9.

7. Nguuli mulimu ngutulikuchita ulikuzungaania nyika yoonse? Pandulula.

⁷ Bupolofita bwakaambwa aHagai bwaambaanzi kulindiswe mazubaano? Jehova ulikuzungaania zisi zyoonse mazubaano alubo andiswe tulikugwasilizya mumulimu ooyu. Yeeya atala azeezi, mu1914 Jehova wakabikka Jesu Kristu kuti abe Mwaami waBwaami bwakwe bwakujulu. (Int. 2:6) Kubikkwa kwaBwaami oobu kwakabanyemya beendelezi banyika. Nkamboonzi? Nkaambo kubikkwa kwaBwaami oobu kwakali kwaamba kuti “ciindi cibikkidwe camasi” naakuti chiindi chakuti beendelezi banyika beendelezye kakutakwe mwiiminini waJehova chakali chazuzikizigwa naakuti chakali chamana. (Lk. 21:24) Akaambo kazeezi, kuzwa mu1919, bakombi baJehova bakali kwaambilizya kuti Bwaami bwaLeza mbubo abulikke butazoomaninsye mapenzi aanyika. Zilaatanganana kuti mulimu wakukambawuka “makani mabotu aa Bwami” ulikuzungaania nyika yoonse.—Mt. 24:14.

8. Kweendelana alugwalo lwa Intembauzyo 2:1-3, bantu biingi bawubona biyeni mulumbe ngutukambawuka?

⁸ Bantu balikwaatambula biyeni makani mabotu aali atala aBwaami? Biingi balikubikka zigwilinti mumatwi. (Bala Intembauzyo 2:1-3.) Zisi zyanyema. Bantu balikukaka kutambula Mweendelezi wakasalwa aaJehova. Mulumbe  ngutukambawuka uuli atala aBwaami tabawuboni mbuli “makani mabotu” pe. Kuyungizya aali zeezi, zimwi mfulumende zilikukasya mulimu wesu wakukambawuka makani mabotu. Nikuba kuti beendelezi biingi baanyika balyaamba kuti bakomba Leza pesi tabayandi pe kulibikka aansi aabweendelezi bwaLeza. Mbuli mbubakachita beendelezi bamuchiindi chaJesu, beendelezi bamazubaano balookukazyania aaMunanike waJehova kwiinda mukulwana batobeli bakwe.—Mil. 4:25-28.

9. Jehova ubabuzya kuti bachiteenzi bantu bakaka kumuswiilila?

⁹ Jehova ubabuzya kuti bachiteenzi bantu bakaka kumuswiilila? Nsandulo yamubuzyo ooyu ijanika muli Intembauzyo 2:10-12, yaamba kuti: “Nywebo nobami, amusongwaale; amuzumine kululamikwa, nywebo nobabetesi baanyika. Amumubelekele Jehova cakuyoowa, alimwi amukondwe akukankama. Amumulemeke mwana, buyo-buyo Leza ulakalala aboobo mulaloba munzila, nkaambo bukali bwakwe bubuka buyo. Balikkomene aabo boonse ibayuba mulinguwe.” Jehova ulikubatondeezya luzyalo alubo ulikubapa mwenya wakuti basale kabotu. Balakonzya kuchincha alubo balibikke aansi aabweendelezi bwaJehova. Pesi chiindi chamana nkaambo tulikupona “kumazuba aamamanino” aabweende bwazintu. (2 Tim. 3:1; Is. 61:2) Nkinkaako, bantu beelede kufwambaana kusala kuti bayiye kasimpe akuti bakombe Jehova.

10. Kweendelana alugwalo lwa Hagai 2:7-9, niinzi zitondeezya kuti bamwi bawutambula kabotu mulumbe ulikuzungaania zisi?

¹⁰ Bamwi balikuutambula kabotu mulumbe ulikuzungaania nyika wakaambilizigwa aaHagai. Hagai wakaamba kuti kuzungaanisigwa ooku kwakali kuyoopa kuti “zintu ziyandisi [bantu bali aamyoyo iibombede] zyazisi zyoonse ziyoboola” kuti zikombe Jehova. * (Bala Hagai 2:7-9.) Isaya aMikka ambabo bakaambilizya kuti eezi zyakali kuyoochitika “kumazuba aamamanino.”—Is. 2:2-4, makani aamunsi; Mik. 4:1, 2.

11. Umwi mukwesu wakachitaanzi chiindi naakamvwa mulumbe waBwaami?

 ¹¹ Atubone kuti mulumbe uuzungaania zisi wakapa kuti Mukwesu Kenny achiteenzi. Mukwesu Kenny ubeleka kumawofesu eesu mapati. Uchiziyeeyede nzyaakachita chiindi naakamvwa mulumbe waBwaami muminyaka iisika ku40 yayinda. Kenny wakaamba kuti: “Chiindi nindakasaanguna kumvwa kasimpe kali muJwi lyaLeza, ndakabotelwa loko kuziba kuti tulikupona kumazuba aakumamanino. Ndakabona kuti, kuti ndibotezye Jehova akuti ndizoojane buumi butamani ndakeelede kusiya nyika mpawo ndiye kubbazu lyakwe. Ndakakomba mpawo ndakachita oobo chakufwambana. Ndakaleka kutola lubazu muli zyanyika mpawo ndakayubila kuBwaami bwaLeza butazoozungaanisigwi pe.”

12. Niinzi zitondeezya kuti tempele lyaJehova lyakumuuya lyazula aabulemu mazubaano aakumamanino?

¹² Zilaantanganana kuti Jehova ulikulongezya bakombi bakwe. Mazubaano aakumamanino, namba yabakombi bakwe ilikuyungizya. Mu1914, bakombi baLeza bakali kusika ku5 100 pesi lino babwiinda ku8 miliyoni. Alubo munyaka amunyaka mamiliyoni aabantu ngabasika kuChiyubulusyo. Akaambo kazeezi, lubuwa lwatempele yaJehova yakumuuya yaanyika naakuti mabambe aakwe aabukombi busalala bwazula “azintu ziyandisi zyazisi zyoonse.” Chiindi bantu aaba nibachincha buntu bwabo akuzwaata buntu bupya, bapa kuti zina lyaJehova lilemekwe.—Ef. 4:22-24.

13. Aamba bumwi bupolofita bulikuzuzikizigwa mazubaano akaambo kakuyungizya kwabakombi baJehova. (Langa chifanikisyo chili aachivumbyo.)

¹³ Zilikuchitika mazubaano zilikuzuzikizya bumwi bupolofita, mbuli oobu bujanika muli Isaya chaandano 60. Vesi 22 yachaandaano eechi yaamba kuti: “Muniini uyooba cuulu. Awalo musyoonto uyooba cisi cilaanguzu. Mebo lwangu, nde Jehova, ndiyoopa kuti eeci cifwambaane kucitika muciindi cancico ceelede.” Akaambo kakuti bantu biingi balikuza mubukombi bwakasimpe, kuli chimwi chintu chibotu chili kuchitika. “Zintu ziyandisi” eezi naakuti bantu aaba balikuza aaluzibo lwabo alubo bali aachiyandisyo chakukambawuka “makani mabotu aaBwami.” Bantu aaba balikubelesya luzibo lwabo mukubelekela Jehova. Isaya wakakozyanisya luzibo oolo ‘amukupa wazisi.’ (Is. 60:5, 16) Baalumi abanakazi aaba bayandwa,  balikubeleka changuzu mukukambawuka makani mabotu muzisi zili 240 alubo balikugwasilizya kuti mabbuku eesu apupululwe mumilaka yiinda ku1 000.

14. Bantu beelede kusala kuchitaanzi lino?

¹⁴ Mazubaano aakumamanino, kuzungaanisigwa kwazisi kulikupa kuti bantu basale kuti bayoolibikka aansi aaBwaami bwaLeza na naakuti bayoosyoma mfulumende zyanyika kuti nzizyo zikonzya kubagwasya. Umwi awumwi weelede kusalila. Nikuba kuti bakombi baJehova balayiswiilila milawu yamfulumende zyankubakkala pesi tabanjili pe mutwaambo twanyika. (Rom. 13:1-7) Balizi kuti Bwaami bwaLeza mbubo abulikke bukonzya kumaninsya mapenzi akuti Bwaami oobu tabuli bwanyika pe.—Joh. 18:36, 37.

15. Nkusunkwa kuli kupati nkubayooswaana bakombi baLeza mbuli mbukwaambidwe mubbuku lyaCiyubunuzyo?

¹⁵ Bbuku lyaCiyubunuzyo lyaambuula atala akusunkwa kwalusyomo lwabakombi baLeza kumazuba aakumamanino. Kusunkwa ooko kuyoopa kuti tupenzegwe loko. Beendelezi bamfulumende zyanyika bayootusinikizya kuti tubakombe alubo bayoopenzya aabo bayookaka kubakomba. (Ciy. 13:12, 15) ‘Bayoosinikizya bantu boonse, ibaniini abapati, ibavwubi abacete, baangulukide abazike kuti . . . bababikke [makki] kujanza lyabo lyalulyo naa ankumo yabo.’ (Ciy. 13:16) Chiindi, muzike wakali kubikkwa makki iitoondeeezya kuti wakali muzike wani. Munzila iikozyenie, bantu boonse bayoolangililwa kuti babe aamakki yakukozyanisya aakuboko naakuti ankumu zyabo. Eezi zyaamba kuti bayoolangililwa kuti batondeezye kuti mbanyika akuti batola lubazu muli zyapolitikisi kwiinda muzintu nzibachita anzibayeya.

16. Nkamboonzi nitweelede kusimya lusyomo lwesu muli Jehova lino?

¹⁶ Tuyoozumina na kubikkwa makki yakukozyanisya akusumpula mfulumende zyanyika? Aabo bayookaka kubikkwa makki bayooswaanana aabuyumu-yumu alubo bayoopenzegwa. Bbuku lyaCiyubunuzyo lyaamba kuti: ‘Takwe muntu naba omwe uukonzya kuula naa kusambala ccita buyo muntu ooyo uujisi [makki eeyo].’ (Ciy. 13:17) Pesi bakombi baLeza balizi kuti Leza uyoobachitaanzi bantu balaamakki yaambwa muli Ciyubunuzyo 14:9, 10. Nkinkaako, tabakazumini pe kubikkwa makki eeyo pesi bayoolemba aakuboko kwabo kuti, “Wa Jehova.” (Is. 44:5) Lino nchichiindi chakuti tusimye lusyomo lwesu muli Jehova. Kuti twachita oobo, Jehova uyoobotelwa alubo uyoowamba kuti tuli bantu bakwe.

17. Niinzi nzitweelede kuziba atala amoyo mulamfu waJehova?

¹⁷ Mumazubaano aakumamanino, Jehova ulikutondeezya kuti ulaamoyo mulamfu kapati. Tayandi pe kuti muntu uuli woonse anyonyoonwe. (2 Pet. 3:9) Wakapa bantu boonse mweenya wakuti bachinche akuti balisalile kumukomba. Pesi moyo mulamfu waJehova kuli mpuugolela. Aabo bakaka kuchincha bayooswaanana aachiimo chikozyenie anchakaswaana Faro wamuchiindi chaMozesi. Jehova wakabuzya Faro kuti: “Kusikila lino nindalitandabikide kale janza lyangu akukuumya cilwazi, yebo abantu bako alimwi nimwalilobede kale anyika. Pele kaambo ncondakulekela kuti kocipona nkakuti: Ndikutondezye nguzu zyangu akuti izina lyangu lyaambilizyigwe munyika yoonse.” (Kul. 9:15, 16) Bantu bazisi zyoonse bayooziba kuti Jehova nguwe alikke Leza wakasimpe. (Ezk. 38:23) Bayooziba biyeni?

18. Kuzungaana kwaambidwe muli Hagai 2:6, 20-22 kusiyene biyeni akwaambidwe muli Hagai 2:7? (b) Tuzizi biyeni kuti majwi aali muli Hagai 2:20-22 ayoozuzikizigwa muchiindi chili kunembo?

¹⁸ Kakuli kwayinda minyaka myiingi mupolofita  Hagai kali wafwa, mwaapostolo Pawulu wakatondeezya kuti majwi aajanika muli Hagai 2:6, 20-22 akali kuyoozuzikizigwa muchiindi chili kunembo. (Bala.) Wakalemba kuti: “Kuciindi eeco ijwi lyakwe lyakazungaanya nyika, pele lino wasyomezya kuti, ‘alimwi ndiyoozungaanya ikutali buyo nyika ilikke pe, pele ajulu.’ Lino ibbala lyakuti ‘pele alimwi’ lyaamba kugusyigwa kwazintu izizungaanizyigwa, nkokuti izintu zyakapangwa, ikutegwa izintu eezyo izitazungaanizyigwi zizumanane kubako.” (Heb. 12:26, 27) Kuzungaana ooku kulisiyene akuzungaana kwaambidwe muli Hagai 2:7, nkaambo kuzungaana ooku kwaamba kunyonyoonwa chakumaninina kwabantu bakaka kulibikka aansi aabweendelezi bwaJehova mbuli zyakachitwa aaFaro.

19. Niinzi chitakonzyi kuzunganisigwa alubo tuzizi biyeni?

¹⁹ Niinzi chitakonzyi kuzungaanisigwa naakuti kugwisigwa? Pawulu wakayungizya kuti: “Lino mbotwabona kuti tuyootambula Bwami butakonzyi kuzungaanizyigwa, atuzumanane kutambula luzyalo lwa Leza, kutegwa kwiinda mulindulo tukonzye kubelekela Leza mulimo uusetekene munzila yeelede cakuyoowa Leza akumulemeka kapati.” (Heb. 12:28) Kuzungaanisigwa ooku nikwazoomana, Bwaami bwaLeza mbubo abulikke butazoosyaale alubo bunooliwo kukabe kutamani.—Int. 110:5, 6; Dan. 2:44.

20. Bantu beelede kusala kuchitaanzi alubo nga tulabagwasya biyeni?

²⁰ Mbukunga chiindi chamana, muntu umwi awumwi weelede kusala kuti uyanda kuzumanana kupona mbuli bamwi bantu balimunyika na naakuti uyanda kuchincha akupona kweendelana ambayanda Leza. Kuti muntu wasala kupona mbuli bantu bali munyika, uzoonyonyoonwa pesi kuti wasala kupona kweendelana ambayanda Leza uzoojana buumi butamani. (Heb. 12:25) Tulakonzya kugwasya bantu kuti balisalile munkani eeyi iiyandikana kwiinda mukubakambawukila. Atugwasye bantu biingi balaamyoyo iibombede kuti basale kulibikka aansi aaBwaami bwaLeza. Alubo atukkale katuyeeya majwi aaMwaami wesu Jesu aakuti: “Makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika.”—Mt. 24:14.