CHIIYO 39
Zina Lyako Mulili Na “Mubbuku Lyabuumi”?
“Ibbuku lyakwiibalusya lyakalembwa kumbele lyakwe kujatikizya baabo bamuyoowa Jehova.”—MALK. 3:16.
LWIIMBO 61 Kamweenda Nobakamboni, Mutapiluki Musyule!
ZITAYIIGWE *
Kuzwa chiindi Jehova walikulemba mazina “mubbuku lyabuumi” (Langa fuka 1-2)
1. Kweendelana alugwalo lwa Malaki 3:16, ndiilili bbuku Jehova ndyaliikulemba alubo walikulembaanzi mulindilyo?
KWAMINYAKA myiingi, Jehova walikulemba bbuku liyandikana. Mubbuku eeli walikulemba mazina aabantu alubo zina lyakusaanguna mubbuku eeli ndilya Abbelo kamboni uusyomeka. * (Lk. 11:50, 51) Mukuya kwachiindi, Jehova wakayungizya amwi mazina mubbuku eeli, sunu lyaba aamamiliyoni aamazina. MuBbayibbili, bbuku eelyo lyiitwa kuti “ibbuku lyakwiibalusya,” ‘bbuku lyabuumi,’ alubo lyiitwa kuti ‘bbuku lyakupeta lyabuumi.’Muchiiyo eechi, bbuku eeli tulalyiita kuti ‘bbuku lyabuumi.’—Bala Malaki 3:16; Chi. 3:5; 17:8.
2. Mbantu bali biyeni bali aamazina aalembedwe mubbuku lyabuumi, alubo niinzi nzitweelede kuchita kuti mazina eesu akajanike mubbuku eelyo?
2 Bbuku eeli liyandikana lilaamazina aabantu boonse bayoowa Jehova alubo balemeka zina lyakwe. Bantu aaba balangilila kuzoojana buumi butamani. Mazubaano, mazina eesu alakonzya kulembwa mubbuku eeli kuti twaba aabweenzuma busimide aJehova kwiinda muchinunuzyo chaMwanaakwe, Jesu Kkristu. (Joh. 3:16, 36) Toonse tuyanda kuti mazina eesu ajanike mubbuku eeli kazitakwe ndaba kuti tuli aabulangilizi bwakuyoopona kujulu na naakuti aanyika.
3-4. (a) Kuti zina lyesu lyalembwa mubbuku lyabuumi zyaamba kuti ziyume zitete tuyoobujana na buumi butamani ? Pandulula. (b) Tulalanga-langaanzi muchiiyo eechi amuchiiyo chitobela?
3 Kuti zina lyesu lyajanika mubbuku lyabuumi, zyaamba kuti ziyume zitete tuyoobujana na buumi butamani? Nsandulo twiijana mumajwi ngaakaamba Jehova ngaakabuzya Mozesi aalembedwe muli Kulonga 32:33. Jehova wakaamba kuti: “Kufwumbwa ooyo wandibisizya, ngonguwe ngonditiimwaye mubbuku lyangu.” Eezi zyaamba kuti mazina aali mubbuku lyabuumi alakonzya kuzimwa, kuli mbuli kuti Jehova usaanguna kulemba mazina aayo kabelesya pensele. (Chi. 3:5, makani aamunsi) Tweelede kubeleka changuzu kuti mazina eesu akkalilile mubbuku eelyo kube mbuli kuti alembwa aa-inki.
4 Nikuba oobo, kulakonzya kubuka imwi mibuzyo. Muchikozyano, Bbayibbili lityeni atala abaabo bali aamazina aalembedwe mubbuku lyabuumi kuswaanizya abaabo bali aamazina aatalembedwe pe mulindilyo? Aabo bali aamazina aalembedwe mubbuku lyabuumi bazoobujana lili buumi butamani? Bazoochitwa biyeni aabo bakatajana mweenya wakwiiya atala aJehova? Zilachita na kuti mazina aabo azoolembwe mubbuku lyabuumi? Mibuzyo eeyi ilasandulwa muchiiyo eechi amuchiiyo chitobela.
MBAANI BALEMBEDWE MUBBUKU LYABUUMI?
5-6. (a) Kweendelana alugwalo lwa Bafilipi 4:3, mbaani bali aamazina aalembedwe mubbuku lyabuumi? (b) Ndiilili mazina aabo naayookkalilila mubbuku lyabuumi?
5 Mbaani bali aamazina aalembedwe mubbuku eeli lyakukozyanisya? Kuti tusandule mubuzyo ooyu, tulalanga-langa tubunga twabantu tuli 5. Mutubunga ootu, mazina aabamwi akalembwa mubbuku lyabuumi pesi aabamwi taalembedwe pe.
6 Kabunga kakusaanguna kapangwa aabaabo bakasalwa kuti bakeendelezyaamwi aJesu kujulu. Mazina aabo akalembwa na mubbuku lyabuumi? Iiyi. Kweendelana amajwi mwaapostoli Pawulu ngaakalembela bakombinyina bakuFilipi, mazina aabananike bakatambwa kuti bakeendelezye aaJesu ali mubbuku lyabuumi. (Bala Bafilipi 4:3.) Pesi kuti mazina aabo akkale kaali mubbuku eelyo lyakukozyanisya, beelede kukkala kabasyomeka. Mpawo nibatambula chitondeezyo chamamanino kufumbwa kabatanafwa naakuti kaatanasaanguna mapenzi mapati, mazina aabo ayookkalilila mubbuku eeli.—Chi. 7:3.
7. Kweendelana alugwalo lwa Chiyubunuzyo 7:16, 17, ndiilili mazina aabantu bali munkamu mpati naayookkalilila mubbuku lyabuumi?
7 Kabunga kachibili kapangwa aankamu mpati yazimwi mbelele. Mazina aabo alilembedwe na mubbuku lyabuumi? Iiyi alilembedwe. Mazina aabo anoolimo na mubbuku lyabuumi yaakwiinda Armagedoni? Iiyi anoolimo. (Chi. 7:14) Jesu wakati aabo bali mbuli mbelele bazootambula “buumi butamani.” (Mt. 25:46) Nikuba oobo, bantu batakafutuke yaakwiinda Armagedoni tabakajani buumi butamani mpawaawo. Nikuba kuti mazina aabo anoolembedwe mubbuku lyabuumi, kunooli mbuli kuti anoolembedwe aapensele. MuBweendelezi bwaMinyaka Iili Chuulu, Jesu “uzoobeembela alubo uzoobazulwida kutusawu twamaanzi aabuumi.” Aabo batakaswiilile akuzumina kuzulwidwa aaJesu akubonwa kuti balasyomeka kuli Jehova, mazina aabo ayoolembwa akukkalilila mubbuku lyabuumi.—Bala Chiyubunuzyo 7:16, 17.
8. Mbaani bali aamazina aatalembedwe mubbuku lyabuumi alubo niinzi chitazoochitike kulimbabo?
8 Kabunga kachitatu, kapangwa aabaabo bayimininwa aampongo batazoonyonyoonwe lya-Armagedoni. Mazina aabo taamope mubbuku lyabuumi. Jesu wakaamba kuti bantu aaba “bazoonyonyoonwa kukabe kutamani.” (Mt. 25:46) Kazulwidwa aamuuya uusalala, Pawulu wakaamba kuti “bantu aaba bazoojana chisubulo chakunyonyoonwa kukabe kutamani.” (2 Tes. 1:9; 2 Pet. 2:9) Nchimwi biyo akuli baabo bakabisizya muuya uusalala achaali. Tabakajani buumi butamani pesi bazoonyonyoonwa kukabe kutamani. Zili aantanganana kuti tabakabusigwi pe. (Mt. 12:32; Mk. 3:28, 29; Heb. 6:4-6) Lino atulange-lange tubunga ootu tubili twabantu batazoobusigwe kuti bazoopone aanyika.
AABO BATAZOOBUSIGWE
9. Mbuuli mbukulembedwe muli Milimu 24:15 ntuutuli tubunga tubili twabantu batazoobusigwe kuti bazoopone aanyika, alubo nguuli musiyano uuliwo aakati katubunga ootu?
9 Bbayibbili lyaambuula atala atubunga tubili twabantu batazoobusigwe kabali aabulangilizi bwakuzoopona kukabe kutamani aanyika, kabunga ‘kabaluleme’ “abataluleme.” (Bala Milimu 24:15.) “Baluleme” mbaabo bakabelekela Jehova chakusyomeka nibakachili kupona. Mpawo ‘bataluleme,’ mbaabo bakatabelekela Jehova chakusyomeka. Bataluleme bakali kuchita zintu zitali kabotu. Mbukunga bantu bali mutubunga ootu bayoobusigwa, zilachita na kuti twaambe kuti mazina aabo alilembedwe mubbuku lyabuumi? Kuti tusandule mubuzyo ooyu, atulange-lange kabunga kamwi akamwi.
10. Nkamboonzi baluleme nibayoobusigwa alubo bamwi babo bayoopegwa chilongezyo chakuchitaanzi? (Langa mutwe uuti “Mibuzyo Yabasikubala” mumagazini eeyi uuli atala akubusigwa kwabantu aanyika.)
10 “Baluleme” bapanga kabunga kachine. Kabatanafwa, mazina aabo akalembwa mubbuku lyabuumi. Pesi kuti bafwa mazina aabo alazimwa na mubbuku eeli? Peepe, nkaambo “mbawumi” mumizeezo yaJehova. Jehova “nguLeza wabawumi kutali wabafwide pe nkaambo boonse mbawumi kulinguwe.” (Lk. 20:38) Eezi zyaamba kuti aabo baluleme baakusigwa aanyika, mazina aabo ayoojanika kaalembedwe mubbuku lyabuumi nikuba kuti kunooli mbuli kuti alembedwe aapensele. (Lk. 14:14) Zili aantanganana kuti bamwi batazoobusigwe bazoojana chilongezyo chakubeleka kabali “basilutwe munyika yoonse.”—Int. 45:16.
11. Niinzi nzibeelede kuzooyiya bantu ‘bataluleme’ kuti mazina aabo azoolembwe mubbuku lyabuumi?
11 Kabunga kamamanino kapangwa aabantu ‘bataluleme.’ Kulakonzeka kuti bantu aaba bakali kupona buumi butali’kabotu nkaambo teebakamuzi pe Jehova. Mazina aabo taakalembwa pe mubbuku lyabuumi. Nkinkaako, Leza uyoobabusya kuchitila kuti akabape mweenya wakuti mazina aabo akalembwe mubbuku eelyo lyabuumi. Bantu aaba ‘bataluleme’ bayooyanda kugwasigwa, nkaambo bamwi babo kabatanafwa bakali kuchita zintu zibi loko. Nkinkaako, beelede kuzooyiisigwa kuti bapone kweendelana azyeelelo zyaJehova ziluleme. Kuti bantu aaba bazookonzye kupona kweendelana azyeelelo zyaJehova, Bwaami bwaLeza buyoochita mabambe aakuti kukachitwe mulimu mupati wakuyiisya bantu batakabusigwe.
12. (a) Ngwani uutazooyiisye bantu bataluleme? (b) Niinzi zitazoochitike kubantu batazookake kuswiilila?
12 Ngwani uutazooyiisye bantu bataluleme? Bantu bataluleme bazooyiisigwa aabaabo bankamu mpati kuswaanizya abaluleme batazoobusigwe. Bantu bataluleme beelede kuzooba aabweenzinyina busimide aJehova akulipeda kulinguwe kuchitila kuti mazina aabo azoolembwe mubbuku lyabuumi. Jesu Kkristu abaabo mbanooyendelezyaabo banooli aachiyandisyo chipati chakuziba kuti bantu bataluleme banoochita biyeni muchiindi eechi chakuyiisigwa. (Chi. 20:4) Kufumbwa muntu uutakakake kuswiilila, uyoonyonyoonwa nikuba kali wasisya minyaka iili 100. (Is. 65:20) Jehova aJesu balakonzya kubona zili mumyoyo yabantu, nkinkaako, tabakazumizyi kufumbwa muntu kuti akapambanisye zintu munyika mpya.—Is. 11:9; 60:18; 65:25; Joh. 2:25.
KUBUSIGILWA KUBUUMI AKUKUBETEKWA
13-14. (a) Chiindi twakali kwaamvwisisisya biyeni majwi aali muli Johane 5:29? (b) Niinzi nzitweelede kubikkila maanu kumajwi aaya?
13 Jesu anguwe wakaambuula atala abantu batazoobusigwe kuti bazoopone aanyika. Wakaamba kuti: “Chizoosika chiindi aawo bantu boonse bali mutubanda twakuyeezya nibazoomvwa jwi lyakwe, mpawo bazwe mulintuto. Aabo bakachita zintu zibotu, bazoobusigilwa kubuumi alubo aabo bakachita zintu zibi, bazoobusigilwa kukubetekwa.” (Joh. 5:28, 29) Jesu wakali kwaambaanzi mumajwi aaya?
14 Chiindi, majwi aaJesu twakali kwaamvwisisisya kuti aamba milimu bantu batakabusigwe njibayoochita chiindi baakubusigwa, nkukwaamba kuti, bamwi bayoobusigwa mpawo bakachite zintu zibotu kakuli bamwi bayoobusigwa mpawo bakachite zintu zibi. Tweelede kubikkila maanu kumajwi ngaakabelesya Jesu. Jesu taakaamba kuti, aabo batazoozwe mutubanda twakuyeezya, bazoochita zintu zibotu naakuti zintu zibi. Pesi wakabelesya mabala aatondeezya chintu chakachitika kale musule. Wakaambuula atala abaabo bakachita zintu zibotu abaabo bakachita zintu zibi. Eezi zitondeezya kuti zintu eezi zyakachitwa chiindi bantu aaba kabatanafwa pe. Eezi zili aantanganana, teembubo na? Nkaambo taakwe uutakazumizigwe kuti achite zintu zibi munyika mpya. Kweelede kuti zintu eezi zibi bantu bakazichita kabatanafwa pe. Nkinkaako, tweelede kwaamvwisisisya biyeni majwi aaJesu aakuti ‘kubusigilwa kubuumi’ akubusigilwa kukubetekwa’?
15. Mbaani ‘batazoobusigilwe’ kubuumi alubo nkamboonzi?
15 Bantu baluleme bakachita zintu zibotu kabatanafwa, “bazoobusigilwa kubuumi” nkaambo mazina aabo anoolembedwe mubbuku lyabuumi. Eezi zyaamba kuti kubusigwa kwabaabo “bakachita zintu zibotu” baambidwe muli Johane 5:29, kulikozyenie akubusigwa ‘kwabaluleme’ baambidwe muli Milimu 24:15. Bupanduluzi oobu buleendelana amajwi aalembedwe muli Baroma 6:7 aakuti: “Ooyo wafwa, waangununwa kuchibi chakwe.” Zibi zichitwa aabantu aaba baluleme zilazimwa chiindi nibafwa, pesi mpuwo yabo yakusyomeka inooliwo chiindi choonse. (Heb. 6:10) Nikuba oobo, bantu aaba baluleme batakabusigwe beelede kuyookkala kabasyomeka chiindi choonse, kuchitila kuti mazina aabo akakkalilile mubbuku lyabuumi.
16. Majwi aakuti ‘kubusigilwa kukubetekwa’ aambaanzi?
16 Niinzi chitazoochitike kubantu bakachita zintu zibi kabatanafwa? Nikuba kuti zibi zyabo zilazimwa chiindi nibafwa, pesi tabakwe mpuwo yakuchita zintu zibotezya Leza. Mazina aabo taalembedwe pe mubbuku lyabuumi. Nkinkaako, kubusigwa kwabantu “bakachita zintu zibi” kulikozyenie akubusigwa kwabantu ‘bataluleme’ kwaambidwe muli Milimu 24:15. Bantu aaba “bazoobusigilwa kukubetekwa.” * Kubetekwa kwabantu bataluleme kunooli mbuli kuti balikulangwa-langwa. (Lk. 22:30) Ziyootola chiindi kuti kukaboneke kuti baleelela na kuti mazina aabo akalembwe mubbuku lyabuumi. Mazina aabantu bataluleme ayoolembwa kuti basiya michito yabo mibi njibakali kuchita chiindi akulipeda kuli Jehova.
17-18. Bantu boonse batazoobusigwe kuti bapone aanyika beelede kuzoochitaanzi, alubo yaambaanzi ‘michito’ yaambidwe muli Chiyubunuzyo 20:12, 13?
17 Kazitakwe ndaba kuti bakaliluleme naakuti teebakaluleme, bantu batazoobusigwe beelede kuzooswiilila milawu njibatazoojane mumabbuku aakupeta mapya aatazoojulwe muminyaka iili 1 000. Mwaapostoli Johane wakaamba nzyaakabona muchilengaano naakati: “Ndakabona bafwide, bapati abaniini, kabayimvwi kunembo lyachuuno chabwaami, alubo mabbuku aakupeta akajulwa. Pesi limwi bbuku lyakupeta lyakajulwa, bbuku eeli ndibbuku lyabuumi. Mpawo bafwide bakabetekwa kakubelesegwa zintu zyakalembedwe mumabbuku aakupeta kweendelana amichito yabo.”—Chi. 20:12, 13.
18 Aabo batazoobusigwe bazoobetekwa kweendelana “amichito” iili? Bazoobetekwa kweendelana amichito njibakachita kabatanafwa na? Peepe! Nkaambo mbuli mbutwabona kale zibi zyabo zyakazimwa chiindi nibakafwa. Pesi michito eeyi, yaamba nzibatazoochite munyika mpya nibanooyiisigwa. Nibaba baalumi basyomeka bali mbuli Nowa, Samiyele, Davida aDaniyele, beelede kuzooyiisigwa atala aJesu Kkristu akutondeezya lusyomo muchipayizyo chakwe. Kuti kakuyandikana kuti bantu aaba baluleme bazooyiisigwe, kutegwani abantu bataluleme?
19. Niinzi chitazoobachitikile bantu bafutatila chilongezyo chipati?
19 Niinzi chitazoobachitikile bantu batazoofutatile mweenya ooyu mubotu? Chiyubunuzyo 20:15 yaamba kuti: “Kufumbwa muntu wakajanika katalembedwe mubbuku lyabuumi, wakawaalilwa mulwizi lwamulilo.” Nisimpe, bantu aabo bayoonyonyoonwa kukabe kutamani. Nkinkaako, kulayandikana kuti tube aachoonzyo chakuti zina lyesu lilembwe mubbuku lyabuumi akuti litazimwi pe!
Mukwesu ulikutola lubazu mumulimu mupati wakuyiisya utakachitwe muMinyaka Iili Chuulu (Langa fuka 20)
20. Nguuli mulimu mupati uutazoochitwe muBweendelezi bwaMinyaka Iili Chuulu? (Langa chifanikisyo chili aachivumbyo.)
20 Kuyoochitika zintu zibotu loko muBweendelezi bwaMinyaka Iili Chuulu! Kuyooba mabambe mapati aatanachitika aakuyiisya bantu munyika yoonse. Alubo chinooli chiindi chakulangwa-langwa kwabantu baluleme abataluleme. (Is. 26:9; Mil. 17:31) Pesi mabambe aaya aakuti bantu bakayiisigwe ayoochitwa biyeni? Chiiyo chitobela chizoosandula mubuzyo ooyu.
LWIIMBO 147 Buumi Butamani Bwasyomezyegwa
^ Muchiiyo eechi, tulabona kubambululwa kwakachitwa kunzila njitumvwisisisyaayo majwi aaJesu aalembedwe muli Johane 5:28, 29 aambuula atala abaabo “bazoobusigilwa kubuumi” abaabo “bazoobusigilwa kukubetekwa.” Tulabona kuti kubusigwa ooku kwaambaanzi akuti mbaani batazoobusigwe.
^ Bbuku eeli lyakasaanguna kulembwa kumatalikilo aanyika nkukwaamba kumatalikilo aanyika yabantu bakonzya kunununwa kuzwa kuchibi. (Mt. 25:34; Chi. 17:8) Nkinkaako, kweelede kuti Abbelo ngunguwe wakusaanguna kulembwa mubbuku eeli lyabuumi.
^ Chiindi, twakali kupandulula kuti bbala lyakuti kubetekwa libelesedwe mulugwalo oolu lyakali kwaamba chisubulo naakuti zintu zibi zyakali kuyoochitikila sikubetekwa. Mbumbubo, bbala lyakuti kubetekwa lilakonzya kupandululwa munzila eeyo. Pesi mulugwalo oolu, kweelede Jesu wakabelesya bbala eeli lyakuti “kubetekwa” kwaamba zichitwa munkuta chiindi nikulangwa-langwa kuti muntu ulaamulandu na, mbuli mbulipandulula limwi bbuku lyachiGrikki lipandulula mabala.
