Atubone kuti Bbayibbili lyiisandula biyeni mibuzyo eeyi.

Lugwalo lwa Milimu 24:15 lwaamba kuti kuzooba “kubusigwa kwabantu bafwide, baluleme abataluleme.” Baluleme mbaabo bakafwa kabaswiilila Leza nkinkaako, mazina aabo alilembedwe mubbuku lyabuumi. (Malk. 3:16) Bataluleme mbaabo bakafwa kabatajene mweenya wakwiiya atala aJehova, nkinkaako, mazina aabo taalembedwe pe mubbuku lyabuumi.

Lugwalo lwa Johane 5:28, 29 lwaamba tubunga tubili twabantu baambidwe muli Milimu 24:15. Jesu wakaamba kuti “aabo bakachita zintu zibotu bazoobusigilwa kubuumi” pesi aabo “bakachita zintu zibi bazoobusigilwa kukubetekwa.” Balulami bakachita zintu zibotu kabachipona, bayoobusigilwa kubuumi nkaambo mazina aabo alilembedwe mubbuku lyabuumi. Nikuba oobo, bataluleme, bakali kuchita zintu zibi kabatanafwa. Bayoobusigilwa kukubetekwa. Mazina aabo taanalembwa pe mubbuku lyabuumi alubo bayoolinda kubetekwa. Chiindi nibaakubusigwa bayooba aamweenya wakuti bayiye atala aJehova akuti mazina aabo alembwe mubbuku lyabuumi.

Lugwalo lwa Chiyubunuzyo 20:12, 13 lutondeezya kuti boonse batakabusigwe bayooyandikana kuti bakaswiilile zintu zitanoolembedwe mumabbuku aakupeta, chaamba milawu mipya iitanoobeleke munyika mpya. Aabo bataswiilili bayoonyonyoonwa.—Is. 65:20.

Lugwalo lwa Daniele 12:2 lutondeezya kuti bamwi balikoona mulufu bayoobuka bamwi “kubuumi butamani pele bambi kukusampaulwa akukusesemwa mane kukabe kutamani.” Vesi eeyi yaambuula atala azintu zyakumamanino zitazoochitikile bantu batanooli babusigwa, kuti bayoojana ‘buumi butamani’ na naakuti ‘bayoosampawulwa kukabe kutamani.’ Nkinkaako, kumamanino aaminyaka iili 1 000 bamwi bayoojana buumi butamani pesi bamwi bayoonyonyoonwa kukabe kutamani.—Chi. 20:15; 21:3, 4.

Atulange-lange chikozyano eechi. Nkamu eezi zibili zyabantu batakabusigwe, zikozyanisidwe aabantu bazwa kuliimwi nyika kabalongela kuliimwi. Balulami bali mbuli muntu wapegwa viza yamulimu naakuti viza yakukkala munyika eeyo. Eezi zipa kuti muntu ooyo abe aalwaangunuko akuzumizigwa kuchita zimwi zintu. Pesi bataluleme bali mbuli bantu bazwa kuliimwi nyika bapegwa viza yakukkala kwamazuba mache kunyika nkubaswaya. Bantu bapegwa maviza aakukkala kwachiindi chifwiifwi, beelede kubeleka changuzu kuti baswiilile milawu yakunyika ooko nkubabede kuchitila kuti bazumanane kukkala kabali munyika eeyo. Munzila iikozyenie, bantu bataluleme baakubusigwa beelede kuyoozumina kupona kweendelana amilawu yaJehova akutondeezya kuti balayanda kuzoopona munyika yaParadayizi. Nikuba kuti bantu bazwa kuli zimwi nyika ngabapegwa maviza aasiyene-siyene nibalikunjila muliimwi nyika, bamwi ngabazoozumizigwa kuti bakkalilaato munyika eeyo pesi bamwi ngababweedezegwa kulimbabo. Chiindi nikusalwa kuti muntu ooyo akkalilaato na nkwaaswaaya naakuti abweede kulimbabo nga balanga kuti wakali kwiiswiilila na milawu yamunyika eeyo nkwaakabede. Munzila iikozyenie, kubetekwa kwakumamanino nkubatakachitwe bantu batanooli babusigwa, kunooyendelana aakuti balaalusyomo luli biyeni akuti balijata biyeni kabali munyika mpya.

Jehova nguLeza ulaaluyando alubo ubeteka chabululami. (Dt. 32:4; Int. 33:5) Uyootondeezya luyando oolo kwiinda mukubusya balulami abataluleme. Alubo uyoolangilila kuti bantu aabo batakabusigwe bakapone kweendelana azyeelelo zyakwe zyakulijata. Aabo batakatondeezye kuti balamuyanda akulipeda kupona kweendelana azyeelelo zyakwe zyakulijata, mbabo batakazumizigwe kukkala munyika mpya.