Kweendelana alugwalo lwa 1 Bakkorinto 15:8, Pawulu wakaamba kuti: “Kumamanino wakazoolibonia kulindime nindakachili mbuli mwana wakatumbukwa chiindi kachitanakkwana.” Chiindi twakali kupandulula kuti, kweelede Pawulu wakali kwaamba zintu zyakamuchitikila chiindi naakabona chilengaano chaJesu kali mubulemu bwakujulu. Kwakali mbuli kuti wakapedwe chilongezyo eechi chakuzyalwa naakuti chakubusigwa kuti akapone kujulu kakuchisyeede minyaka myiingi kuti kubusigwa kuli boobu kuchitike. Nikuba oobo, kuyanduulisisya nkutwakachita atala amajwi aaya, kwakapa kuti tubambulule nzila njitwakali kulupandululaayo lugwalo oolu.

Nisimpe kuti mulugwalo oolu Pawulu wakali kwaambuula atala azintu zyakachitika chiindi naakasanduka. Nikuba oobo, wakali kwaambaanzi loko naakaamba kuti, “wakatumbukwa chiindi kachitanakkwana”? Kuli twaambo twiingi twakapa kuti aambe oobo.

Kusanduka kwakwe kwakachitika mukulaba kwaliso alubo kwakali kuyoosya. Kuzyalwa chiindi kachitanakkwana, chiindi chiingi kuchitika mukulaba kwaliso muntu katalangilili. Sawulu (ooyo wakazooba Pawulu) wakali kuya kuDamasikko kuti akapenzye maKkristu, taakali kulangilila kubona chilengano chaJesu ooyo wakali wabusigwa. Kusanduka kwakwe kwakachitika mukulaba kwaliso, kutali kulinguwe kupela pesi nikuba amaKkristu bamumuunzi mbaakali kuyanda kupenzya bakagamba akusanduka kwakwe. Mukuyungizya, zintu zyakamuchitikila Pawulu zyakali kuyoosya loko zyakuti wakoofwaala kwachiindi chifwiifwi.—Mil. 9:1-9, 17-19.

Pawulu wakasanduka “aachiindi chitali nchicho.” Bbala lyakusaanguna lyachiGrikki lyakasandululwa kuti, “mwana wakatumbukwa chiindi kachitanakkwana,” lilakonzya kusandululwa kuti, “mwana wakazyalwa aachiindi chitali nchicho.” The Jerusalem Bible lisandulula majwi aaya kuti: “Kuli mbuli kuti ndakazyalwa bantu kabatalangilili pe.” Pawulu naakasanduka, Jesu wakali wabweeda kujulu. Kusiyana abantu mbaakaamba kumatalikilo, Pawulu taakwe naakali wamubona Jesu wakali wabusigwa katanta kaya kujulu. (1 Kor. 15:4-8) Kulibonia nkwaakachita Jesu kuli Pawulu katalikulangilila, kwakamupa mweenya wakuti anguwe amubone kali wabusigwa nikuba kuti eezi zyakachitika “aachiindi chitali nchicho.”

Pawulu wakaamba majwi aaya kalikutondeezya kuti ulalibombya. Kweendelana abasyaabusongo bamwi, bakaamba kuti majwi ngaakabelesya Pawulu ngakulilangilaansi. Kuti kakuli kuti Pawulu wakalemba majwi aaya kali aamuzeezo ooyu, nkukwaamba kuti wakali kulibona kateeleli pe kutambula chilongezyo nchaakalaacho. Mukuyungizya, Pawulu wakazoowamba kuti: “Ime ndendime muniini loko kuli bamwi baapostoli alubo tandeeleli pe kwiitwa kuti ndili mwaapostoli nkaambo ndakapenzya mbungano yaLeza. Pesi akaambo kaluzyalo lupati lwaLeza, ndili mbuli mbundibede.”—1 Kor. 15:9, 10.

Nkinkaako, majwi aaPawulu kweelede akali kwaamba kulibonia nkwaakachita Jesu kulinguwe katalangilili, kusanduka nkwaakachita katalangilili, naakuti kuteelela kubona chilengaano chaJesu nkwaakachita. Kufumbwa kuti wakali kwaambaanzi Pawulu, zyakachitika mubuzuba oobo taakaziluba pe. Zyakamugwasya kuziba kuti Jesu wakali wabusigwa choonzyo. Chilengano eecho chakachitika katalangilili chakali kupa kuti akkale kakambawukila bamwi atala akubusigwa kwaJesu.—Mil. 22:6-11; 26:13-18.