1-2. Nkamboonzi nikuyandikana kuti twiiye atala alwaano lwaSamisoni?

 UYEEYAANZI kuti wamvwa zina lyakuti Samisoni? Kweelede kuti uyeeya atala amwaalumi wakali aamanguzu miingi. Kuti kakuli boobo, wayasa nondo muliso. Pesi Samisoni wakasala munzila iitali kabotu. Eezi zyakapa kuti aswaane mapenzi. Nikuba oobo, Jehova wakalangisisya kusyomeka kwaSamisoni alubo wakapa kuti lwaano lwaSamisoni lulembwe muBbayibbili kuchitila kuti tugwasigwe.

² Jehova wakabelesya Samisoni kuti achite zintu zigambya kuti agwasye ma-Israyeli. Nikwakayinda minyaka myiingi Samisoni kali wafwa, Jehova wakazulwida mwaapostoli Pawulu kuti abikkilizye Samisoni chiindi naakali kulemba milongo yabantu bakali aalusyomo lusimide. (Heb. 11:​32-34) Chikozyano chaSamisoni chilatusungwaazya. Wakasyoma Jehova nikuba naakali muziindi ziyumu. Atubone mbutukonzya kusungwaazigwa aachikozyano chakwe azyiiyo nzitujana.

3. Nguuli mulimu ngwaakapegwa Samisoni?

³ Chiindi Samisoni naakazyalwa, maFilisiti bakali kweendelezya chisi chama-Israyeli alubo bakali kubadyaaminina. (Bab. 13:1) Ma-Israyeli bakali kuswaana mapenzi miingi loko akaambo kakuti maFilisiti bakali kubeendelezya munzila yalunya. Jehova wakasala Samisoni kuti abe “kumbele mukuvwuna bana Israyeli kuzwa kumaanza aaba Filisiti.” (Bab. 13:5) Ooyu wakali mulimu muyumu. Samisoni wakeelede kusyoma Jehova kuti awuchite mulimu ooyu.

4. Jehova wakamugwasya biyeni Samisoni chiindi maJuda nibakamwaanga akumutola kumaFilisiti? (Babetesi 15:​14-16)

 ⁴ Atubone Samisoni mbaakatondeezya kuti wakali kusyoma Jehova alubo tulabona Jehova mbaakamupa manguzu. Aali chimwi chiindi, masoja aamaFilisiti bakasika kuti bazoojate Samisoni kuLehi. Kuyeeyelwa kuti Lehi yakali kuJuda. Bantu bamuJuda bakayoowa mpawo bakasanga Samisoni kuli basinkondonyina. MaJuda bakajata Samisoni akumwaanga ntambo zibili zipya mpawo bakamutola kumaFilisiti. (Bab. 15:​9-13) Nikuba oobo, “muuya wa Jehova wakamupa nguzu” Samisoni, mpawo wakalyaangununa ntambo eezyo. Samisoni wakazoojana “mweebo wambongolo uutanayuma; wakaubweza akuubelesya kujaya baalumi bali 1,000.”—Bala Babetesi 15:​14-16.

5. Samisoni wakatondeezya biyeni kuti wakali kusyoma Jehova?

⁵ Nkamboonzi Samisoni naakabelesya mweebo wadonki? Aachiindi eecho, teezyakajayilikene pe kuti mweebo wadonki ulabelesegwa munkondo. Zilaantanganana kuti Samisoni wakalizi kuti wakeelede kusyoma Jehova kuti azwidilile kutali kusyoma chilwanisyo nchaakabelesya. Mwaalumi ooyu uusyomeka wakabelesya chibelesyo nchaakajana aachiindi eecho kuti achite kuyanda kwaJehova. Kusyoma Jehova nkwaakachita Samisoni nkuko kwakapa kuti azunde basinkondonyina.

6. Niinzi nzitwiiya kuzwa kuli Samisoni?

⁶ Jehova ulakonzya kutupa manguzu aakuti tuchite milimu njatupede nikuba eeyo njitubonaanga tatuyikonzyi pe. Ulakonzya kuchita oobo munzila njitutayeeyeli pe. Atusyome Jehova kuti ulakonzya kutupa manguzu aakuti tuchite kuyanda kwakwe kuti twakkala katumusyoma mbuli mbaakachita kuli Samisoni.—Tus. 16:3.

7. Amba chikozyano chitondeezya mbukuyandikana kukumbila Jehova kuti atuzulwide.

⁷ Bakwesu abachizi biingi bali mumulimu wakuyaka mayake aambunga bakatondeezya kuti basyoma Jehova. Chiindi, bakwesu bakali kulidilowela mapulani akuyaka Maanda aaBwaami miingi akuyaka aamwi mayake. Pesi mukuya kwachiindi, kwakazooba kuchincha akaambo  kakuti mbunga yaJehova ilikukomena. Bakwesu bazulwida bakakomba kuli Jehova kabakumbila kuti abazulwide alubo bakeezya kubelesya nzila mpya mbuli kuula mayake aaliwo kale akwaabambulula. Robert, waba aachiindi kabeleka mumulimu wakuyaka mayake aambunga munyika zyiingi wakati: “Kumasaangunino, kwakali kuyumu kubelesya nzila eeyi mpya nkaambo ilisiyene anzila nzitwakajayide kubelesya kwaminyaka yayinda. Pesi bakwesu bakalipeda kuchincha alubo Jehova wakazilongezya nzila eezi mpya.” Eechi nchiimwi chikozyano chitondeezya Jehova mbazulwida bakombi bakwe kuti bachite kuyanda kwakwe. Chiindi achiindi, toonse tulakonzya kulibuzya kuti, ‘Ndilakomba na kuli Jehova kandikumbila kuti andizulwide akuti ndikkale kandichincha-chincha kweendelana azyiimo?’

8. Samisoni wakachitaanzi chiindi naakaba aanyota?

⁸ Kulakonzeka kuti wakabala atala azintu zigambya nzyaakachita Samisoni. Kali aalikke, wakajeya mulavu mpawo wakajeya maFilisiti bali 30 mumuunzi wa-Asikkeloni. (Bab. 14:​5, 6, 19) Samisoni wakalizi kuti taakali kukonzya pe kuchita zintu eezi kuti katagwasigwi aaJehova. Eezi tulazibona chiindi naakaba aanyota kali wazwa aakujeya maFilisiti bali 1 000. Samisoni wakachitaanzi? Kwiinda kuti alisyome kuti ulakonzya kujana maanzi aakunywa, wakayita Jehova kuti amugwasye.—Bab. 15:18.

9. Jehova wakayisandula biyeni nkombyo yaSamisoni? (Babetesi 15:19)

⁹ Jehova wakasandula Samisoni kwiinda mukupa kuti ajane maanzi munzila yachigambyo aali kamwi kasawu. Chiindi Samisoni naakanywa maanzi kuzwa mukasawu aako, “nguzu zyakwe zyakapiluka alimwi wakabukuluka.” (Bala Babetesi 15:19.) Kulakonzeka kuti kasawu aaka kakachiliwo chiindi mupolofita Samuyeli naakazulwida kulemba bbuku lyaBabetesi. Kweelede kuti maanzi aakali kuzwa mukasawu aako akali kuyeezya ma-Israyeli kuti Jehova ulakonza kugwasya bakombi bakwe nibayanda lugwasyo kuti baba aalusyomo mulinguwe.

10. Niinzi nzitweelede kuchita kuti tugwasigwe aaJehova? (Langa pikicha.)

¹⁰ Andiswe tweelede kukumbila Jehova kuti atugwasye kazitakwe ndaba kuti tuli aachipo chakuchita zimwi zintu naakuti kuli zintu nzitwakazwidilila kuchita mumulimu wakwe. Tweelede kulibombya, tuzumine kuti tulakonzya kuzwidilila kuti twagwasigw aaJehova. Mbuli Samisoni mbaakaba aanguzu chiindi naakanywa maanzi ngaakamupa Jehova, andiswe tulasima mubukombi kuti twabelesya zintu zyoonse nzyatupede Jehova.—Mt. 11:28.

11. Niinzi nzitukonzya kuchita kuti tubelesye zintu zyoonse nzyatupede Jehova? Amba chikozyano.

¹¹ Atubone chikozyano chamukwesu uutegwa Aleksey wakuRussia. Mukwesu Aleksey ulikupenzegwa loko. Niinzi chimugwasya kuti akkale kasimide mubukombi nikuba kuti ulimuchiimo chiyumu loko? Mukwesu Aleksey amwanakazaakwe bakaba aapulogilamu yakuchita zintu zyabukombi. Wakaamba kuti: “Ndileezya kuti ndikkale kanditobelezya pulogilamu yangu yakubala Bbayibbili akuyanduulisisya buzuba abuzuba. Buzuba abuzuba kuseeni, ime amwanakazaangu ngatwabala lugwalo lwabuzuba alubo ngatwakomba kuli Jehova katulaamwi.” Twiiyaanzi? Kwiinda kuti tulisyome, tweelede kusyoma Jehova. Biyeni? Tweelede kuba aapulogilamu yakuchita zintu zyabukombi mbuli kubala Bbayibbili akuyanduulisisya katuli aatulikke akuchita iimwi milimu yabukombi kuchitila kuti tusimye lusyomo lwesu. Kuti twachita oobo, Jehova ulazilongezya zyoonse nzituchita kuti tumubelekele. Mbukunga wakapa Samisoni manguzu, andiswe ulakonzya kutupa manguzu.

12. Nkuukuli kusala kutali kabotu nkwaakachita Samisoni alubo kuyandana aamwanakazi muFilisiti kwakasiyene biyeni akuyandana aaDelila?

¹² Samisoni wakali aachibi mbuli ndiswe, nkinkaako chimwi chiindi wakali kusala munzila iitali kabotu. Aali chimwi chiindi wakasala zintu zyakazoomunjizya mumapenzi. Samisoni naakabeleka kali mubetesi, “wakayanda mukaintu ku Kkuti lya Soreki, izina lyakwe wakali Delila.” (Bab. 16:4) Katanayandana aaDelila, Samisoni wakali kuyanda kukwata mwanakazi muFilisiti alubo “makani aaya akazwa kuli Jehova, nkaambo wakali kuyandaula nzila yakulwana ba Filisiti.” Mukuya kwachiindi, Samisoni wakazookkala mung’anda yawuule mumuunzi waGaza kuFilisiti. Kali kunkooko, Samisoni wakanyukula milyango yamuunzi, eezi zyakapa kuti kubawubile basinkondonyina kuti babanjilile. (Bab. 14:​1-4; 16:​1-3) Pesi Samisoni taakayandana aaDelila kali aamakanze aakuyanduula mweenya wakulwana baFilisiti nkaambo kuyeeyelwa kuti Delila wakali mu-Israyeli.

13. Niinzi nzyaakachita Delila zyakapa kuti Samisoni asale munzila iitali kabotu?

¹³ Delila wakatambula mali nyingi loko kuzwa kumaFilisiti kayanda kuti awuzye Samisoni. Samisoni wakali kumusyoma loko na Delila zyakuti luyando lwakali lwamujala zyakuti wakakachilwa kubona kuti Delila wakali kuyanda kumuuzya? Kufumbwa mbuzyakabede, kwaziindi zyiingi, Delila wakakataazya Samisoni kuti amubuzye nkwaakali kujana manguzu alubo Samisoni wakazoojinka kawamba. Zilawusisya kuti kusala nkwaakachita Samisoni kwakazoopa kuti amane manguzu woonse ngaakalaawo akuti atatambuliki pe kuli Jehova.—Bab. 16:​16-20.

14. Nziizili mpindu nzyaakajana Samisoni akaambo kakusyoma Delila?

 ¹⁴ Samisoni wakatebula nzyaakabyala munzila iichisa nkaambo wakasyoma Delila kwiinda kuti asyome Jehova. MaFilisiti bakamujata mpawo bakamudonkola meso. Bakamubikka mujele kuGaza, kumuunzi ooko nkwaakali wanyukula milyango yamuunzi mpawo bakati abaziyile zilyo. MaFilisiti nibakeeta Samisoni nkubakabungene kuti basekelele limwi pobwe, bakapa zipayizyo zyiingi kuli leza wabo wakubeja Dagoni, kabaamba kuti nguwe wakabagwasya kuti bajate Samisoni. Bakeeta Samisoni kuzwa mujele kuti ‘azoobachitile zintu zisesya’ kabayanda kumuseka.—Bab. 16:​21-25.

15. Samisoni wakatondeezya biyeni kuti wakamusyoma lubo Jehova? (Babetesi 16:​28-30) (Langa pikicha iili aachivumbyo.)

¹⁵ Nikuba kuti Samisoni wakali wasala munzila iitali kabotu, pesi taakaleka pe kuchita kuyanda kwaJehova. Wakayanduula mweenya wakuti achite mulimu ngwaakapedwe aaLeza wakulwana maFilisiti. (Bala Babetesi 16:​28-30.) Samisoni wakakombelezya Jehova kati: “O Mwami Singuzuzyoonse Jehova, kondiyeeya kaka . . . kuti ndipilusizye ba Filisiti.” Leza wakasimpe wakayisandula nkombyo yaSamisoni alubo wakamupa manguzu aagambya. Aachiindi eechi, Samisoni wakajaya maFilisiti biingi loko kwiinda mbaakajayide kumasaangunino.

16. Twiiyaanzi kuzwa kukulubizya kwaSamisoni?

¹⁶ Nikuba kuti Samisoni wakajana mpindu zichisa akaambo kakulubizya kwakwe, taakaleka pe kuchita kuyanda kwaJehova. Andiswe kuti twalubizya mpawo twalulamikwa naakuti twasweekelwa chimwi chilongezyo, tatweelede kumana manguzu pe. Tutalubi kuti Jehova ulilibambilide kutulekelela. (Int. 103:​8-10) Nikuba kuti ngatwalubizya, ngakuli nzituchikonzya kuchitila Jehova mbuli mbaakachita Samisoni.

17-18. Wayiyaanzi kuzwa kuchikozyano chaMukwesu Michael? (Langa pikicha.)

¹⁷ Atubone chikozyano chamukwesu uutegwa Michael. Michael wakalijisikini amilimu yabukombi, wakali kubeleka kali mubelesi wambungano alubo wakali payona wachiindi choonse. Zilawusisya kuti Mukwesu Michael wakazoobisya mpawo wakasweekelwa aazilongezyo zyakwe. Michael wakaamba kuti: “Ndakali kukkala kandijisikini kuchita milimu yabukombi. Pesi mukulaba kwaliso, zintu zyakazoochincha. Ndakali kubonaanga taakwe nchindichikonzya pe kuchita mumulimu waJehova.  Nikuba oobo, taakwe nindakayeeya kuti Jehova wandilekelezya, pesi ndakali kulibuzya kuti ndizookonzya na kubambulula kuti ndibe aabweenzuma bulikabotu aJehova mbuli chiindi naakuti kuchita zyoonse nzindikonzya kuti ndimubelekele mbuli mbundakali kuchita chiindi.”

¹⁸ Zilabotezya kuti Michael taakaleka pe kuchita kuyanda kwaJehova. Wakaamba kuti: “Ndakabeleka changuzu kuti ndibambulule bweenzuma bwangu aJehova kwiinda mukkala kandikomba kulinguwe kandimubuzya zyakali kuzwa aansi amoyo wangu, kandibala akuyeeyesesya.” Mukuya kwachiindi, Michael wakazoozijana lubo zilongezyo nzyaakalaazyo mumbungano. Lino ulikubeleka kali mwaalu alubo ngupayona wachiindi choonse. Michael wakaamba kuti: “Kugwasigwa akusungwaazigwa aabakombima ikapati abaalu kwakandigwasya kubona kuti Jehova uchindiyanda. Lino ndilikukomba Jehova kandili aamoyo uutandipi mulandu. Zyakandichitikila zyakandiyiisya kuti Jehova ulabalekelela aabo basanduka chachoonzyo.” Andiswe tulakonzya kuba aachoonzyo chakuti Jehova ulatubelesya akutulongezya nikuba kuti twakali twachita zintu zimunyemya, pesi ulatulekelela kuti twachita zyoonse nzitukonzya kuti tuchinche maponeno eesu akuti twiinkilile kunembo katumusyoma.—Int. 86:5; Tus. 28:13.

19. Chikozyano chaSamisoni chakusimya biyeni?

¹⁹ Muchiiyo eechi, twalanga-langa ziche biyo zyakachitwa aaSamisoni. Nikuba kuti Samisoni wakali aachibi mbuli ndiswe pesi taakaleka pe kubelekela Jehova nikuba kuti wakali wasala munzila iitali kabotu chiindi naakayandana aaDelila. Alubo Jehova wakayinkilila kunembo kumubelesya Samisoni. Leza wakazoomubelesya lubo Samisoni kwiinda mukumupa manguzu aagambya. Jehova wakachili kubona Samisoni kuti mwaalumi uuli aalusyomo lusimide alubo wakamubikkilizya mumilongo yabantu bakali aalusyomo lusimide balembedwe muli Mahebberu chaandaano 11. Zilatusungwaazya kaka kuti tukomba Taateesu wakujulu siluyando uuli aachiyandisyo chakutusimya ikapati nitumanide manguzu. Mbuli Samisoni, atukombelezye Jehova katuti: “Kondiyeeya kaka akundiyumya.”—Bab. 16:28.