CHIIYO 36
LWIIMBO 89 Amuswiilile Akutobela Zyaambwa Kutegwa Mulelekwe
“Amube Basikuchita Zyaambwa aaJwi”
“Amube basikuchita zyaambwa aajwi, kutali basikumvwa kupela.”—JAK. 1:22.
NZITUTAYIYE
Chiiyo eechi chilatugwasya kuti tubale Jwi lyaLeza buzuba abuzuba alubo tuyeeyesesye atala anzitubala akuzibelesya mubuumi bwesu.
1-2. Niinzi chipa kuti bakombi baLeza babotelwe? (Jakkobo 1:22-25)
JEHOVA aMwanaakwe bayanda kuti tubotelwe. Mulembi wa Intembauzyo 119:2 wakaamba kuti: “Balikkomene aabo batobela ziyeekezyo [zyaLeza], ibamuyandaula camoyo woonse.” Jesu wakayungizya kuti: “Babotelwa mbaabo bamvwa jwi lyaLeza akulibamba!”—Lk. 11:28.
2 Mbukunga tuli bakombi baLeza, tuli bantu babotelwa. Nkamboonzi? Tuli aatwaambo twiingi loko tupa kuti tubotelwe. Kamwi kaambo nkakuti, tukkala katubala Jwi lyaLeza akuti tuleezya kubelesya nzitubala.—Bala Jakkobo 1:22-25.
3. Kutugwasya biyeni kubelesya zintu nzitubala muJwi lyaLeza?
3 Tulagwasikana munzila zyiingi kuti twaba “basikuchita zyaambwa aajwi.” Tulizi kuti, kuti twaba basikuchita zyaambwa aaJwi, Jehova ulabotelwa. Kuti Jehova wabotelwa, andiswe tulabotelwa. (Muk. 12:13) Kuti twabelesya nzitubala muJwi lyaLeza, tulabotelwa mumpuli alubo tulamvwanana abakombima. Kulakonzeka kuti wakazibona eezi mubuumi bwako. Mukuyungizya, tutantamuka mapenzi ngibaswaana bantu batatobelezyi milawu yaJehova. Nichoonzyo, tuzuminana aaMwaami Davida. Naakazwa aakwaamba atala amulawu, malayilile ambeta zyaJehova mulwiimbo lwakwe, muvesi 11 wakajinsya aamajwi aakuti: “Ikuzibamba kuletela bulumbu bupati.”—Int. 19:7-11.
4. Nkamboonzi nikukonzya kutuyumina kuti tubelesye zintu nzitubala muJwi lyaLeza?
4 Kwaamba choonzyo, teekuuba pe kuti tukkale katubala Jwi lyaLeza akubelesya zintu nzitubala. Nikuba kuti tulaazyiingi zyakuchita, pesi tweelede kujana chiindi chakubala Bbayibbili akuyeeyesesya atala anzitubala kuchitila kuti tuzibe zintu Jehova nzyayanda kuti tuchite. Atulange-lange zimwi nzila zikonzya kutugwasya kuti tukkale katubala Bbayibbili. Alubo tulalanga-langa zintu zikonzya kutugwasya kuti tuyeeyesesye atala azintu nzitubala ambutukonzya kuzibelesya.
JANA CHIINDI CHAKUBALA BBAYIBBILI
5. Njiili milimu njitulaayo iipa kuti tukkale katujisikini?
5 Bakombi baJehova biingi bakkala kabajisikini. Kuli zyiingi nzyalangilila kuti tuchite Jehova. Muchikozyano, biingi besu tulabeleka kuti tulisanine akuti tusanine mpuli zyesu. (1 Tim. 5:8) MaKkristu biingi, balangania babbululu babo bachiswa naakuti bachembeede. Alubo toonse tuchita zyoonse nzitukonzya kuti tukkale katuli aamibili iisimide, kuchita oobu kuyanda chiindi. Kuyungizya aamikuli njitulaayo, tulaamilimu mumbungano. Tuli aawumwi mulimu uuyandikana loko wakukambawuka. Kujana wachijana biyeni chiindi chakubala Bbayibbili chiindi choonse, kuyeeyesesya atala anzubala akubelesya zintu nzubala kakuli ulaazimwi kale nzweelede kuchita?
6. Niinzi nzweelede kuchita kuti utondeezye kuti ukubona kakuyandikana kubala Bbayibbili? (Langa chifanikisyo.)
6 Kubala Bbayibbili, kuli aakati ‘kazintu ziyandikana’ kumaKkristu, nkinkaako, tweelede kukubikka mubusena bwakusaanguna mubuumi bwesu. (Flp. 1:10) Naakali kupandulula atala amuntu uubotelwa, muchaandaano chakusaanguna chantembawuzyo, sintembauzyo wakaamba kuti: “Ukkomanina mulawo wa Jehova, alimwi ulabala mulawo wakwe caansaansi syikati amasiku.” (Int. 1:1, 2) Eezi zilaantanganana, tweelede kujana chiindi chakuti tubale. Nchiichili chiindi chilikabotu chakubala Bbayibbili? Nsandulo zyesu zilakonzya kusiyana-siyana. Pesi nsandulo nguba yamubuzyo ooyu, njakujana chiindi chakukkala katubala Bbayibbili. Umwi mukwesu uutegwa Victor wakati: “Ndiyandisya kubala Bbayibbili kuseeni nikuba kuti kufuma takuli mulindime pe. Pesi kuseeni nga nziche zintu zindipambanisya. Ngandabikkila maanu kuzintu nzindilikubala.” Amwi anduwe uyanda kubala kuseeni. Libuzye kuti, ‘Nchiichili chiindi chilikabotu kulindime chakubala Bbayibbili?’
Nchiichili chiindi chilikabotu chakubala Bbayibbili? Ndiilili nindeelede kukkala kandibala? (Langa fuka 6)
YEEYESESYA ATALA ANZUBALA
7-8. Tweelede kuchita biyeni kuti tugwasigwe chakumaninina nitubala Bbayibbili? Amba chikozyano.
7 Simpe ndyakuti, tulakonzya kubala zintu zyiingi katutayeeyesesyi pe. Kuli nwaakali wabala iimwi na nkani mpawo kuchizwaakubala wajata zintu ziche, zyiingi waziluba? Toonse zyakatuchitikila eezi. Chuusisya nchakuti, eezi zilakonzya kuchitika nikuba katuli kubala Bbayibbili. Kulakonzeka kuti kuli zyaandaano nzitwakasala kuti katubala buzuba abuzuba. Zilabotezya eezi. Tweelede kulibikkila zipeekezyo mpawo tuchite kweendelana azipeekezyo eezyo. (1 Kor. 9:26) Nikuba oobo, kubala Bbayibbili masaangunino biyo pesi kuli zintu zyiingi nzitweelede kuchita kuti tugwasikane chakumaninina aJwi lyaLeza.
8 Ngatuzikozyanisye munzila eeyi: Zilimwa kuti zikomene, ziyanda maanzi. Pesi kuti mvula yavulisya loko, zilimwa ngazyasalala. Kuti zilimwa zyasalala, mvula ngatayichigwasyi pe. Alubo seele ngatalichikwe manyowa pe, nkinkaako, zilimwa ngazyafwa. Munzila iikozyenie, tatweelede kuchijaana biya pe chiindi nitubala Bbayibbili nkaambo tulakonzya kuziluba zyoonse mpawo kubala kwesu ngakwaba kwabuyo.—Jak. 1:24.
Mbuli zilyo mbuziyanda mvula amanyowa kuti zikomene, andiswe tuyanda chiindi chakuyeeyesesya akubelesya zintu nzitubala muJwi lyaLeza (Langa fuka 8)
9. Niinzi nzitukonzya kuchita kuti twabaachiimbo chakubala Bbayibbili katuchijaana?
9 Amwi ulaapenzi lyakubala kuchijaana? Niinzi nzweelede kuchita? Bala mbichaani-mbichaani. Lipe chiindi chakuti uyeeyesesye atala anzulikubala naakuti nzwaalikubala. Kuchita oobo, takweelede kuba mulimu uukumizya pe. Ulakonzya kulampya chiindi kuchitila kuti ujane chiindi chakuyeeyesesya. Kuli limwi bbazu, ulakonzya kusala kubala mavesi mache mpawo chiindi chasyaala uyeeyesesye atala anzwaalikubala. Victor waambwa musule wakati: “Ngandabala mavesi mache, chimwi chiindi ngandabala chaandaano chimwi kupela. Mbukunga ngandibala kuseeni, ngazyandipa chiindi chakuti ndiyeeyesesye atala azintu nzindabala buzuba boonse.” Kufumbwa nzila njwaabelesya, kulayandikana kuti utachijaani chiindi nulikubala kuchitila kuti ubone mbukonzya kubelesya zintu eezyo nzwaalikubala.—Int. 119:97; langa kabbokesi katii, “ Mibuzyo Njukonzya Kulanga-langa.”
10. Pandulula mbukonzya kubelesya zintu nzulikubala. (1 Batesalonikka 5:17, 18)
10 Tazikwe ndaba pe kuti ubala chiindiinzi akuti utola chiindi chilamfu biyeni, chintu chiyandikana nchakuti uyeeyesesye atala azintu nzulikubala. Chiindi nwaanoobala imwi nkani muJwi lyaLeza, libuzye kuti, ‘Kujana ndazibelesya biyeni zintu nzindilikubala lino naakuti ndizoozibelesya biyeni muchiindi chilikunembo?’’ Atuteedi ulikubala 1 Batesalonikka 5:17, 18. (Bala.) Chiindi nwaazwaakubala mavesi aayo aabili, ulakonzya kwiimikila mpawo uyeeyesesye kuti ukomba tungane akuti nziizili zintu nzweelede kwaamba munkombyo zyako. Alubo, ulakonzya kuyeeyesesya atala azintu zibotu nzyaakakuchitila Jehova mpawo umulumbe. Ulakonzya kumulumba koli kudombola zintu zitatu nzyaakakuchitila. Chiindi nuyeeyesesya atala azintu eezyo nikuba koli wazibala kwachiindi chifwiifwi, nga ulikuswiilila akuchita nzilyaamba Jwi lyaLeza. Yeeya mbukukonzya kukugwasya kuchita zintu eezi, buzuba abuzuba chiindi nubala mavesi aamuBbayibbili. Kwaamba choonzyo, kuti wachita zintu eezi, ulayinkilila kunembo kuchita nzilyaamba Jwi lyaLeza. Niinzi nzweelede kuchita kuti wabona kuti zintu nzweelede kubambulula zyavula loko?
LIBIKKILE ZIPEEKEZYO NZUKONZYA
11. Nziizili zintu zikonzya kutumana manguzu chiindi nitubala Bbayibbili? Amba chikozyano.
11 Nubala Bbayibbili akubona mbuyelede kuzibelesya nzulikubala, ulakonzya kumana manguzu kuti wabona kuti nzweelede kubambulula zyavula loko. Atuzibikke munzila eeyi: Atuteedi sunu ulikubala atala akusaluula bamwi. (Jak. 2:1-8) Nwaazwaakubala, wabona kuti weelede kuchincha nzila njubajataayo bamwi, nkinkaako, wasala kuti ubambulule. Nga wachita kabotu. Kuzwa waawo, juunza wabala atala akuti tubikkile maanu kunzila njitwaambuulayo. (Jak. 3:1-12) Nwaazwaakubala, wabona kuti chimwi chiindi ulaapenzi lyakwaambuula zintu zitayaki bamwi. Nkinkaako, wabona kuti weelede kubelekela kuti waambuule ziyaka azisungwaazya bamwi. Mpawo, zoona wabala atala azyakulikondelezya. (Jak. 4:4-12) Nwaazwaakubala, wabona kuti weelede kuchincha nzila njusalaayo zyakulikondelezya. Mubuzuba bwachi 4, nga zyakukola nkaambo nga zyavula loko zintu nzweelede kubambulula.
12. Nkamboonzi nuteelede kumana manguzu kuti wabona kuti kuli zintu zyiingi nzweelede kubambulula nwaazwaakubala Bbayibbili? (Langa makani aamunsi.)
12 Kuti wabona kuti kuli zintu zyiingi nzweelede kubambulula, utamani manguzu. Eezi zitondeezya kuti ulalibombya akuti ulaamoyo uuyiisika. Muntu uulibombya alubo uuyanda kuchincha, ubala Magwalo kali aamakanze aakubambulula aayanda kubambululwa. a Utalubi kuti kuzwaata “buntu bupya” nchintu cheelede kukkala kachichitwa. (Kol. 3:10) Niinzi chikonzya kukugwasya kuti ukkale kuchita zyaambwa aaJwi lyaLeza?
13. Kuti wabona kuti kuli zintu zyiingi nzweelede kubambulula, niinzi nzweelede kuchita? (Langa chifanikisyo.)
13 Kwiinda kuti weezye kubelesya zyoonse nzubala aachiindi chimwi, sala kubelesya ziche. (Tus. 11:2) Ulakonzya kweezya eezi: Zilembe aansi zintu nzuyanda kubambulula. Kuzwaawo, usale chimwi naakuti zibili nzuyanda kusaanguna kubambulula notazooye kuli zimwi. Weelede kusaanguninaali?
Kwiinda kuti ubambulule zintu zyoonse aachiindi chimwi, ulakonzya kulibikkila zintu nzukonzya kuchita. Ulakonzya kusaanguna kubambulula chintu chimwi naakuti zibili (Langa fuka 13-14)
14. Nziizili zintu nzukonzya kusaanguna kubambulula?
14 Ulakonzya kusaanguna kubambulula zintu nzukonzya. Naakuti ulakonzya kusala kusaanguna kubambulula zintu nzubona kuti nzizyo ziyandikana loko. Kuti wasala nzuyanda kubambulula, ulakonzya kuyanduulisisya kubelesya Watch Tower Publications Index naakuti kubelesya Bbuku Ligwasya Kuvuntauzya lya Bakamboni baJehova. Komba kuli Jehova atala azintu nzwaasala, kumukumbila kuti akupe kuti ube “aachiyandisyo amanguzu aakuchita zintu.” (Flp. 2:13) Kuzwaawo, ubelesye zintu nzwaasala. Kuti wabona kuti wakonzya kubambulula chintu chakusaanguna nchwaasalide, zilakonzya kukupa manguzu aakuti ubambulule zimwi. Kuti wabelekela kuba aabumwi buntu bwachiKkristu, zilakuubila kuti ubambulule zimwi ndawu ziyanda kubambululwa.
JWI LYALEZA ‘ALIBELEKE MULINDINYWE’
15. Bakombi baJehova basiyene biyeni abamwi bantu baamba kuti babala Bbayibbili? (1 Batesalonikka 2:13)
15 Bamwi bantu nga baamba kuti bakalibala Bbayibbili lyoonse kwaziindi zyiingi. Pesi balazisyoma na nzilyaamba Bbayibbili? Balazibelesya na mubuumi bwabo zintu nzibabala? Chuusisya nchakuti, tabazibelesyi pe. Kuli musiyano mupati loko azichitwa aabakombi baJehova. Mbuli maKkristu bakusaanguna, tulazumina kuti Bbayibbili twakalitambula “mbuli mbulibede choonzyo, mbuli jwi lyaLeza.” Alubo tuleezya anguzu zyoonse kuti tubelesye zintu nzitubala muBbayibbili.—Bala 1 Batesalonikka 2:13.
16. Niinzi zikonzya kutugwasya kuti tuchite nzilyaamba Jwi?
16 Kulakonzya kutuyumina kubala akubelesya zintu nzitubala muJwi lyaLeza. Chimwi chiindi, kulakonzya kutuyumina kujana chiindi chakubala. Tulakonzya kubala katuchijaana alubo katutayeeyesesyi atala anzitulikubala. Naakuti tulakonzya kumana manguzu kuti twabona kuti nzyiingi loko zintu nzitweelede kubambulula. Kufumbwa buyumu-buyumu mbuswaana, ulakonzya kubuzunda kwiinda mukugwasigwa aaJehova. Atukanze kuti tugwasigwe aaJehova akuti tutalubi zintu nzitubala pesi tube basikuchita kweendelana azyaambwa aaJwi. Kuti twakkala katubala Bbayibbili akubelesya nzitubala mubuumi bwesu, tulabotelwa.—Jak. 1:25.
LWIIMBO 94 Kulumba Akaambo ka Jwi lya Leza
a Langa kavidiyo katii, Nzibaamba Basela Lyako—Kubala Bbayibbele aajw.org.
