Channel yaJW Broadcasting yabujanika aSatellite Dish. Mweezi amweezi, tulangilila kwaayebela mapulogilamu aaya aakumuuya kuswaanizya amavidiyo aanga azwa aaJW Broadcasting. Pesi bakombima biingi bakuAfrica tabakonzyi pe kwaayebela mapulogilamu aaya aaintaneti. Nkamboonzi?

 Masena miingi aamuAfrica taakwe netiwekki pe yakunjila aaintaneti. Alubo kumasena nkwiijanika ilakataazya kujata naakuti iladula loko. Muchikozyano, umwi Mulangizi wabbazu wakuMadagascar wakayinka kuyoodawuniloda pulogilamu yaJW Broadcasting yamweezi kubusena nkubabbadalisya kuti bantu bakonzye kubelesya intaneti. Wakabbadala $16, mali eeyi yiinda mali njibafozegwa bantu mumviki. *

 Nikuba kuti kuli buyumu-yumu buli boobu, mamiliyoni aabakombima bakkala kuAfrica babukonzya kweebela JW Broadcasting kabatabelesyi intaneti. Bazichita biyeni eezi?

 Kuzwa mu2017, bakombima bakkala muSub-Saharan Africa babukonzya kweebela JW Broadcasting kababelesya Satellite Dish. Channel eeyi tiibbadalisigwi pe, ibeleka kwama-awa aali 24 buzuba abuzuba alubo mviki amviki mumilaka iili 16.

 Kuti eezi zikonzeke, Bakamboni baJehova bakapa imwi kkampani yaTV kuti igwisye JW Broadcasting aSatellite Dish yayo. Bantu bakkala munyika zili 35 zyamuAfrica mbabo bakonzya kweebela JW Broadcasting iipupululwa aakkampani eeyo. Bakamboni babbadala mali yiinda ku$12 000 mweezi amweezi alubo babbadala imwi mali kuti bapupulule zimwi zintu zyamubukombi. Eezi zipa kuti bantu bakonzye kweebela miswaangano yaBbooma aamwi mapulogilamu mbuli akuswayigwa kwamutabi.

 Bantu biingi kuswaanizya abatali Bakamboni balakonzya kweebela JW Broadcasting kabali kumaanda aabo. Pesi bamwi tabakonzyi pe nkaambo tabakwe mali zyakuula ziyandikana kuti bayebele JW Broadcasting. Nkinkaako, kuti bakonzye kuchita oobo, Maanda aaBwaami aayinda ku3 670 akabikkwa masatellite dish kuchitila kuti bakwesu abachizi bakonzye kweebela JW Broadcasting. Kuula satellite dish atumwi tuyandikana akulitola kuNg’anda yaBwaami kuchita $70 kuti Ng’anda yaBwaami kayili aaTV kale. Pesi kuti Ng’anda yaBwaami kayitakwe TV, kuyanda mali iisika ku$530 kuti zyoonse zyuulwe.

 Bakwesu abachizi balabotelwa loko kweebela JW Broadcasting. Umwi mukwesu uuli kuCameroon wakaamba kuti: “Mabambe aaya aali mbuli mana iili aakati kabusena butakwe mvula, zyakuti mpuli yesu ilakonzya kwiijana nkaambo tulakonzya kwiijana kufumbwa chiindi.” Umwi mukwesu utegwa Odebode wakuNigeria wakaamba kuti: “Mpuli yesu twakabamba kuti katwiiyebela tutatu amviki pesi bana besu ngabakumbila kwiiyebela mumazuba atali ngitwakasala.” Rose wakuNigeria wakaamba kuti: “Lino ndaabumaninsya chiindi chiingi kandiyebela JW Broadcasting kutali kweebela nyuzi. Chiindi nindali kweebela nyuzi ndali kunyema zyakuti BP yangu yakali kutanta. Pesi JW Broadcasting ilandisungwaazya akundisimya. Njiyo njindiyandisya loko. Alubo chilongezyo chipati chizwa kuli Jehova.”

 Mulangizi wabbazu wakuMozambique wakaamba kuti mubbazu lyakwe Maanda aaBwaami akabikkwa zibelesyo zichita kuti bakonzye kujata JW Broadcasting. Bakwesu abachizi ngabafwambaana kusika kakuchili aawa naakuti kwiinda kuti bakonzye kweebela JW Broadcasting.

 KuMuswaangano waZisi wamu2019 wakachitilwa kuJohannesburg kuSouth Africa, channel yaJW Broadcasting yakabelesegwa kupupulula nkani ziyandikana ankani zyakali kupegwa amukwesu wamuKabunga Keendelezya kumasena aali 9. Sphumelele uubeleka muDipatimenit yaBroadcasting kuMutabi waSouth Africa wakaamba kuti: “Chiindi twakali kupupulula nkani katubelesya intaneti pesi lino twakakonzya kubelesya channel yaJW Broadcasting nkaambo tiyandi mali nyingi anetiwekki.”

 Zintu nzimusanga mumulimu uuchitwa munyika yoonse zyakapa kuti bakwesu abachizi biingi bakuAfrica kabeebela JW Broadcasting asatellite dish. Tumulumba loko azipo nzimulikupa kamubelesya nzila zisiyene-siyene kuswaanizya adonate.pr418.com.