MuJuly amuAugust 2020, Bakamboni baJehova munyika yoonse bayooyebela pulogilamu yamuswaangano waBbooma iikozyenie aachiindi chimwi. Kanooli kakusaanguna kuchita oobo. Kuti eezi zikonzeke, muswaangano woonse wakeelede kusandululwa mumilaka yiinda ku500. Chiindi chiingi kusandulula nkani amavidiyo aamuswaangano ooyo kuyanda munyaka naakuti kwiinda aawo. Pesi akaambo kabulwazi bwaCorona basanduluzi bakeelede kubeleka muswaangano ooyu mumyeezi iitasiki ku4.

 Bakwesu balanga mulimu wakusandulula abalanga zyakuula babelekela mumaWofesi mapati aaBakamboni baJehova bakagwasilizya loko kuti mulimu ooyu mupati uzwidilile. Balanga mulimu wabusanduluzi bakabona kuti basanduluzi biingi bakali kuyanda zibelesyo zilikabotu kuti bazwidilile kuchita mulimu wabo ziswaanizya mamicrophone aabeleka kabotu. Bakwesu bachita mulimu wakuula bakawula mamicrophone aasika ku1 000 alubo bakaatumizya mundawu zisika ku200 zisiyene-siyene.

 Kuti batabelesyi mali nyingi, bakawula mamicrophone miingi mpawo bakaabunganizya aandawu iimwi kuzwa waawo, akatumizigwa kundawu zisiyene-siyene munyika yoonse. Kuula kali miingi kwakalichipide kwiinda kuula microphone iimwi.

 Bakwesu bachita mulimu wakuula bakeelede kuula akutumizya zintu eezi nkuzyakeelede kwiinka muli April amuMay 2020. Pesi aachiindi eecho, basimabbizinesi biingi teebakali kubeleka kabotu pe akaambo kabulwazi bwaCorona. Nikuba boobo, kumamanino aamweezi waMay mamicrophone aaya aakali aasika kumawofesi aabusanduluzi, kumawofesi aamutabi akuli bamwi basanduluzi bakali kuyanda zibelesyo eezi.

 Jay Swinney uubeleka kali mulangizi mudipatimenti lyazyakuula wakaamba kuti: “BakuBbeteli abasimabbizinesi bakabelekelaamwi chiindi nikwakali kuulwa zintu eezi. Muuya uusalala nguwo wakapa kuti tukonzye kuchita mulimu ooyu chakufwambaana akuti tuzibelesye kabotu zipo zyakuliyandila zisangwa abakombima.”

 Mukwesu Nicholas Ahladis uubeleka kudipatimenti lilanga mulimu wabusanduluzi wakaamba kuti: “Basanduluzi bakali mulock down bakabotelwa loko nibakajana zibelesyo eezyo.” Nikuba kuti teebakali kukonzya kuswaanana aabamwi basanduluzi pesi bakabelekaamwi kusandulula akulekkooda nkani, zisobano amiimbo mumilaka yiinda ku500.

 Kuulwa kwazintu ooku nguumwi wamilimu wakachitwa wakapa kuti bakombima munyika yoonse bakonzye kujana muswaangano waBbooma wamu2020 utii, “Lyoonse Amukondwe.” Zipo zyanu nzimusanga kamubelesya donate.pr418.com azimwi nzila, nzizyo zyakapa kuti tuzwidilile kuula zintu eezi zyakali kuyandikana.