Muswaangano wabbooma wamu2020 tatuzoowulubi pe nkaambo wakali wakusaanguna kulekkoodwa alubo wakali kujanika aintaneti. Nikuba boobo, ku Malawi akuMozambique, bakwesu abachizi biingi bakakonzya kweebelela naakuti kuuswiilila muswaangano wabbooma kabatabelesyi intaneti. Zyakakonzeka biyeni eezi?

 Bakwesu bali muKkomiti Yabeendelezi aKkomiti Yakuyiisya yaKabunga Keendelezya yakazumizya kuti kubbadelwe maTV amaradio station kuchitila kuti bakwesu bakuMalawi akuMozambique bakonzye kweebela akuuswiilila muswaangano wabbooma. Nkamboonzi nikwakali kuyandikana kuti bachite mabambe aali boobu? Nkaambo chisi chakuMalawi nchiimwi chazisi chili aaintaneti iidula loko munyika. Nkinkaako, Bakamboni bache luzutu mbabo bakonzya kuba aintaneti. Mukwesu William Chumbi, waKkomiti yaMutabi wakuMalawi wakaamba kuti: “Nzila ayilikke bakwesu abachizi aaba njibakali kukonzya kuti bajane chakulya chamubukombi nkwiinda mukweebela aaTV naakuti kuswiilila aalediyo.” Mukwesu Luka Sibeko uubeleka muKkomiti yaMutabi wakuMalawi wakayungizya kuti: “Nikunga teekwakalikwe mabambe aali boobu nikuli bakwesu biingi teebakakonzya pe kweebela naakuti kuuswiilila muswaangano wabbooma.” Alubo kuMozambique, kuli bakwesu bache bakali kukonzya kujana intaneti pesi tabakwe zibelesyo pe.

 Akaambo kabulwazi bwaCOVID-19, maTV amaradio station aambi akali kupupulula kale miswaangano yambungano. * Bakwesu bakayinka kumastation aaya akukumbila kuti babayungizizye chiindi kuchitila kuti kabapupulula muswaangano wabbooma.

 KuMalawi, bakwesu bakaswaanana aabuyumu-yumu. Ziindi zyiingi, mastation azumina kupupulula mapulogilamu kwa-awa iimwi luzutu. Bamastation aaba bachita oobo akaambo kakuti balakataazikana kuti baswiilizi balakonzya kutabikkila maanu kuti pulogilamu yayindilila kwa-awa iimwi. Pesi bakwesu bakapandulula kuti mulimu wesu ugwasilizya bantu biingi. Nikuba kuti tulijalilidwe, tulabapa makani mabotu aawumbulizya aazwa muBbayibbele alubo makani aaya alakonzya kubagwasya kuti babe bantu bali kabotu akuti babe aampuli zibotelwa. Nibakamvwa oobo, bamastation bakabazumizya bakwesu.

 KuMalawi, muswaangano wakapupululwa TV station iimwi alubo aaradio station iimwi aapupulula makani chisi choonse. Aboobo, eechi chakapa kuti mamiliyoni aabantu bakonzye kweebela akuswiilila. Alubo kuMozambique, muswaangano wakapupululwa aaTV station iimwi akumaradio station aali 85.

 Muzisi zyoonse kazili zibili, kwakabelesegwa mali iisika ku$28 227 * kuti kubbadalwe maTV station alubo kwakabelesegwa mali iisika ku$20 000 kuti kubbadalwe maradio station. Myuulo yamaradio station yakali kusiyana yakali kutalikila a$15 kumastation maniini kusikila ku$2 777 kumastation aapupulula makani muchisi choonse.

 Bakwesu bakabeleka changuzu kuti bayibelesye kabotu mali iisangwa. Muchikozyano, kuMalawi bakakukombelezya kuti baselusigilwe myuulo aboobo bakazwidilila zyakuti biya kumwi bakabagwisizya 30 pesenti. Mali njibakabagwisizya yakasika ku$1 711. Mpawo kuMozambique, kumastation aamwi bakazumina kutugwisizya muulo akaambo kampuwo yesu mbotu akufwambaana kubbadala.

 Bakwesu bakabotelwa loko akweebela naakuti kuswiilila muswaangano wabbooma. Mukwesu Patrick, mwaalu kuMalawi, wakaamba kuti: “Tubalumba loko bakwesu bamuKabunga Keendelezya akaambo kazintu zyoonse eezi muchiindi eechi chabulwazi.” Isaac wakuMalawi wakaamba kuti: “Tatukwe zibelesyo zyakubelesya, nkinkaako twalumba loko achilongezyo nchitwakajana kuzwa kumbunga yaJehova chakuswiilila muswaangano wabbooma aalediyo. Akaambo kazeezi, mpuli yangu yoonse yakawuswiilila muswaangano. Eechi nchitondeezyo chaluyando ndwalaalo Jehova kubakombi bakwe.”

 Muswaangano wabbooma wamu2020 nguwakali wakusaanguna ngwaakajanika umwi sikupupulula wakuMozambique. Wakaamba kuti: “Mabambe aakweebela muswaangano aTV akandigwasya kubona kuti Jehova nguLeza singuzuzyoonse. Bulwazi buliko teebwakamukachizya kuti atupe chakulya chamubukombi alubo wakacheeta aang’anda zyesu. Ndakalubona luyando luli akati kabakombi baJehova. Alubo ndili aachoonzyo chakuti eeyi nimbunga yakasimpe.”

 Mwaalu uumwi uutegwa Wyson, wakaamba kuti: “Ndilamulumba muzike uusyomeka nkaambo ulatubikkila maanu muchiindi eechino chabulwazi. Mabambe aaya aakweebela muswaangano aTV akuuswiilila alediyo atugwasya swebo nituli aapenzi lyamali kujanika akugwasigwa apulogilamu eeyi yakumuuya.”

 Munyaka uuno wa2021, bakwesu bali muKkomiti Yabeendelezi abali muKkomiti Yakuyiisya bakachita mabambe aakuti muswaangano wabbooma uyebelwe aTV naakuti kuuswiilila alediyo abantu bali mumasena aambi. Mali yakuchita mabambe woonse aaya yakazwa kuli? Yakazwa kumali iisangwa kumulimu uuchitwa munyika yoonse, iisangwa kakubelesegwa nzila zisiyene-siyene zili aadonate.pr418.com. Tumulumba loko akaambo kazipo zyanu zizwa aansi aamoyo.