Mbukunga bantu biingi bali kubbabbatizigwa munyaka amunyaka kuyandikana maanda miingi aakukombela. Akaambo kamakani aaya, baDipatimenti Yazyakuyaka iili munyika yoonse bakachita mabambe aakuti kuyakwe naakuti kubambulula masena aakukombela aayinda ku2 700 mumunyaka wamulimu wamu2020. *

 Pesi mabambe aaya akazoonyonganisigwa aabulwazi bwaCOVID-19. Bakwesu bali muKkomiti Iilangania Zipupululwa yaKabunga Keendelezya bakajana bwiimikizya milimu yakuyaka munyika yoonse kuchitila kuti bakwabilile bakwesu abachizi akuti baswiilile milawu yakali yabikkwa aamfulumende. Nikuba boobo, mumunyaka wamulimu wamu2020 kwakayakwa akubambulula maanda aakukombela aayinda ku1 700 bulwazi bwaCorona kabutanasika. Kuyungizya aali zeezi, mayake aamitabi aayinda ku100 akamana. Atubone kuti bakwesu bakagwasigwa biyeni amayake aabili aamitabi aakamana.

 Mutabi wakuCameroon. Mutabi wakusaanguna wakali kuDouala. Mutabi ooyu wakali muniini alubo kwakali zintu zyiingi zyakali kuyanda kubambululwa. Bakwesu bali muKkomiti Iilangania Zipupululwa bakayeeya kuti mutabi ooyu ubambululwe pesi kwakali kuyandikana mali nyingi loko yiinda mali yakali kujanwa kuti zintu zyoonse zili aamutabi ooyu zyawuzigwa. Bakazooyeeya kuti bayake mutabi mupya naakuti bawule busena bwakayakidwe kale akubambulula pesi zyoonse eezi teezyakazwidilila pe.

 Aachiindi eecho, bakwesu bakaziba kuti Douala nkwiili kunyika, mfulumende yakali kuyanda kupanga mugwagwa wakali kwiinda aafwiifwi akuNg’anda Yakuchitila Miswaangano Mipati. Mugwagwa ooyu wakali kubagwasya kuti kubawubile kujana zintu zyakubelesya mbuli maanzi, magesi azimwi. Eezi nzizyo zyakali kuyandikana kuti mutabi Uyakwe. BamuKabunga Keendelezya bakazoozumizya kuti kuyakwe mutabi mupya aafwiifwi loko aNg’anda Yakuchitila Miswaangano Mipati.

 Bakamboni amakkampani aazyakuyaka bakabelekelaamwi aamulimu ooyu, eezi zyakapa kuti bafwambaane kumana akuti babelesye mali nche. Bakabelesya mali nche loko kwiinda njibakali kulangilila zyakuti kwakasyaala mali yiinda ku2 miliyoni. Bamumpuli yaBbeteli bakakonzya kulongela kumutabi mupya bulwazi bwaCOVID-19 kabutanasika.

 Bamumpuli yaBbeteli yakuCameroon bali aakukkala aalikabotu alubo babelekela aabusena bulikabotu. Bakwesu abachizi aaba, bawubona kachili chipo chizwa kuli Jehova mutabi ooyu mupya. Umwi mukwesu amwanakazi wakwe bakaamba kuti, “Tuyanda kuti tubeleke changuzu, tutondeezye kuti tulachilumba chipo eechi.”

 Wofesi Yabusandulazi (RTO) Yamulaka wachiTojolabal iili kuMexico. Kwaminyaka myiingi basanduluzi bamulaka wachiTojolabal bakali kubelekela kumutabi waCentral America uuli aafwiifwi aMexico City. Pesi bantu biingi baambuula mulaka wachiTojolabal bajanika kuAltamirano akuLas Margaritas kule amakkilomita aasika ku1 000 kuzwa kuMexico. Eezi zyakali kupa kuti kubayumine basanduluzi kuziba chiTojolabal chaambuulwa mazubaano. Alubo nibakachili kumutabi kwakali kubayumina kuti bajane bakwesu abachizi beelela baambuula mulaka wachiTojolabal kuti bagwasilizye mumulimu wakusandulula akulekkooda.

 Akaambo kazeezi, bakwesu bali muKkomiti Yakulemba yaKabunga Keendelezya bakasala kuti balonzye basanduluzi aaba bakakubelekele kubusena kwaambuulwa chiTojolabal. Kuti bakonzye kuchita eezi, bakwesu bakumutabi bakasala kuti bawule mayake akayakidwe kale mpawo baabambulule. Kuchita oobo, kwakali kupa kuti babelesye mali nche kwiinda kuyaka mawofesi mapya naakuti kurenta.

 Umwi musanduluzi wakaamba mbaakagwasigwa akulonga nkubakachita, wakati: “Kwaminyaka iili 10 kandibelekela kumutabi taakwe mpundakaswaanana aayimwi mpuli yaambuula mulaka wangu. Pesi lino, twaabubelekela muchaambuula chiTojolabal. Ndaambuula aabantu baambuula chiTojolabal buzuba abuzuba. Eezi zyakandigwasya kuti ndiiye mabala mapya aabelesegwa mazubaano akuti mabbuku eesu ngitusandulula azwe kabotu.”

 Kuti zyiimo kazizumizya mumunyaka wamulimu wa2021, tulangilila kuyaka akubambulula mawofesi aabusanduluzi aali 75 kuswaanizya amayake aachitilwa zikolo zyaBbayibbele. Mulimu ulayinkilila kunembo wakuyaka mawofesi aamutabi aali 8 kuswaanizya amawofesi aakuRamapo kuNew York alubo akulonzya mutabi wakuArgentina awakuItaly. Kuyungizya aali zeezi, kuyandikana Maanda aaBwaami mapya aayinda ku1 000, masena aakubunganina aayinda ku6 000 taali kabotu pe alubo Maanda aaBwaami aali 4 000 ayanda kubambululwa.

 Mali iibelesegwa kukuyaka mayake aambunga akwaabambulula izwa kuli? Mukwesu Lázaro González waKkomiti yaMutabi waCentral America wakasandula mubuzyo ooyu chiindi naakali kwaambuula atala amulimu wakachitwa kuWofesi Yabusanduluzi yamulaka wachiTojolabal. Wakati: “Muchilawu chesu tuli aazintu ziche. Kaansinga teetwakagwasigwa aabakwesu abachizi bali munyika yoonse, nikuli teetwakakonzya pe kuyaka mawofesi aaya aabusanduluzi. Mali yakasangwa aabakwesu bali munyika yoonse njiyo yakagwasya kuti basanduluzi bakonzye kulongela kubusena kwaambuulwa mulaka wabo. Tubalumba loko bakwesu abachizi bali munyika yoonse akaambo kakusanga nkubalikuchita.” Nichoonzyo, milimu yoonse eeyi yakuyaka yakazwidilila akaambo kamali iisangwa kuti igwasilizye mulimu uuchitwa munyika yoonse alubo nyingi yamali eeyi isangwa kakubelesegwa donate.pr418.com.