Mu 9 October 2024, iba-World Wildlife Fund bakaamba imwi lipoti iiwusisya loko iili atala abantu mbubatali kubajata kabotu banyama. Bakaamba kuti “kwaminyaka yiinda ku 50 (1970-2020), namba yabanyama yacheya loko amapesenti aali 73.” Lipoti yakaamba kuti: “Tulakonzya kwaamba kuti zitanoochitike muminyaka iili 5 iiza, zitondeezya mbubunoobede buumi bwazilenge aanyika.”

 Bantu biingi balagamba chiindi nibamvwa makani aaya. Tulayiyanda nyika yesu mbotu alubo zilatuchisa kubona banyama kabatali kujatwa kabotu. Tulimvwa oobu akaambo kakuti Leza wakatulenga katuli aachiyandisyo chakulangania banyama.—Matalikilo 1:27, 28; Tusimpi 12:10.

 Ulakonzya kulibuzya kuti, ‘Tuzookonzya na kukwabilila banyama? Bbayibbili lityeni?’

 Nikuba kuti tweezya biyeni kukwabilila banyama, pesi Jehova nguwe kupela uukonzya kubakwabilila munzila iimaninide. Kweendelana alugwalo lwa Chiyubunuzyo 11:18, Bbayibbili lyaamba kuti Leza uzoonyonyoona “aabo balikunyonyoona nyika.” Lugwalo oolu lutuyiisya zintu zibili:

1.  1. Leza uzookasya bantu kuti banyonyoone nyika.

2.  2. Lino-lino Leza uzoobweza ntaamu. Nkamboonzi nitwaamba oobo? Nkaambo mazubaano bantu balikubanyonyoona loko banyama kwiinda chiindi.

 Leza uzoochitaanzi kuti amaninsye penzi eeli? Uzoobelesya mfulumende yakwe yakujulu naakuti Bwaami kuti bweendelezye nyika yoonse. (Mateyo 6:10) Mfulumende eeyo izooyiisya bantu mbubeelede kulangania akukwabilila banyama munyika.—Isaya 11:9.