Niinzi chisika mumizeezo yako kuti wamvwa kuti “kunyonyoonwa kwanyika”? Nga wayeeya mapenzi atazochitike atazonyonyoone zintu zyoonse zipona na zili aanyika? Bamwi bayeeya kuti mapenzi aliboobu azoochitika, kapati kuti babala manyuzi aali mbuli aali aansi aawa:

•   “Kulakonzeka kuzoba nkondo yanyukkiliya, ilakonzya kuzooba aachali naakuti akaambo kakutamvwanana.”—Bulletin of the Atomic Scientists.

•   “Muminyaka iili 10 yayinda zintu zitobela zyakayungizya: mvula mpati ilaaguwo, kupya kwalusaka, kubulika kwamvula, kupya zyiindilide amazambangulwe.”—National Geographic.

•   “Nsozi zinyonyoona zintu zyakavula muAfrica.”—The Associated Press.

 Nyika izoonyonyoonwa chakumaninina na? Bbayibbele lityeni?

 Peepe. Jwi lyaLeza Bbayibbele lyaamba kuti nyika inooliko mane kukabe kutamani. (Mukambausi 1:4) Muchiindi chakunyonyoona nyika, Leza uzoonyonyoona aabo “baabo banyonyoona nyika.”—Ciyubunuzyo 11:18.

 Kuti Bbayibbele kalyaamba kuti nyika yaba kumamanino, nga lyaamba bantu bataswiilili Leza. Mbuli mbaakachita muchiindi chaNowa, Leza uzooyeta lunyonyooko “kunyika eeyo yabantu basampaula Leza.”—2 Petro 2:5; 3:7.

 Lugwalo lwa 1 Johane 2:17 lwaamba kuti: “inyika ilamana antoomwe azisusi zyanjiyo.” Vesi eeyi itutondeezya kuti teenyika eeyi pe njitukkala itazoomane pesi mbantu bataswiilili Leza.

 Bbayibbele talyaambi pe kuti mamanino azoosika lili loko. (Matayo 24:36) Pesi litondeezya kuti mamanino aba afwiifwi. Nzezi zintu zyakaambwa aaBbayibbele:

•   Kwakali kuyoochitika zintu zili mbuli nkondo, nzala, malwazi amizuzumo yanyika “mumasena aaindene-indene.”—Matayo 24:3, 7, 14; Luka 21:10, 11; Ciyubunuzyo 6:1-8.

•   Bantu bakali kuyooba abuntu bubi loko. Muchikozyano bakali kuyooba bantu “bayandisya mali,” “batalumbi” alubo “batanyoneki.”—2 Timoteyo 3:1-5.

 Bantu biingi balazumina kuti zintu zilikuchitika kuzwa mu1914 zilikweendelana azyakaambwa aaBbayibbele kuti zyakali kuyoochitika akuti mamanino aba aafwiifwi. Kuti wiiye zyiingi, langa chiiyo chiti “Kutobelana Kwamakani aamuBbayibbele Kutondeezyaanzi Atala a1914?” achiti “Niinzi Chitondeezya Kuti Tulikupona Kumazuba Aakumamanino?”

 Bbuku lyamamanino muBbayibbele litondeezya chiindi aawo Jesu naatazoosike kuzoonyonyoona bantu bachita zibi akubapa bulumbu aabo bachita zibotu.—2 Batesalonika 1:6, 7; 1 Petro 1:7, 13.

 Alubo bbuku eeli lyaambuula atala azintu zitazoochitike kunembo. (Ciyubunuzyo 1:1) Lili aamakani mabotu alubo litupa bulangilizi. (Ciyubunuzyo 1:3) Litondeezya kuti Leza uzoogwisya kutalulama koonse akuchincha nyika kuti ibe paradayizi. Aachiindi eecho taakwe muntu uutakamvwe kuchisa, kuswaanana aamapenzi naakuti kufwa.—Ciyubunuzyo 21:3, 4.

 Ulayanda na kwiiya zyiingi atala azisyomezyo eezi zibotu zizwa muBbayibbele? Bakamboni baJehova balakonzya kukugwasya kuti wiiye zyiingi kutabbadali pe. Ulakonzya kubakumbila kuti bakugwasye.