Bbayibbili Lityeni Atala Apenzi Lyakubulika Kwamaanzi Munyika?
Bantu boonse bayanda maanzi aatakwe doti kuti bapone. Umwi wakabunga ka-UN uutegwa António Guterres wakaamba kuti, “mbukunga penzi lyakubulika kwamaanzi lili kwiinkilila kunembo, tulangilila kuzooswanana abuyumu-yumu akaambo kakubulika kwamaanzi.” Bantu biingi munyika kulabayumina kujana maanzi aatakwe doti.
Strdel/AFP via Getty Images
Kuli mpututazoojane maanzi akkwana bantu boonse na? Naakuti penzi lyakubula maanzi linooliwo chiindi choonse? Bbayibbili Lityeni?
Nzilisyomezya Bbayibbili atala amaanzi
Bbayibbili lyaamba kuti penzi lyakubulika kwamaanzi lizoomana. Kuzooba maanzi miingi aatakwe doti munyika.
“Maanzi ayoopoomoka munkanda, atulonga tuyookunka mucibanda camucimpayuma. Nyika njumu nta iipya iyooba amazyiba aajisi matete, alimwi nyika njumu iilunda kasuko iyooba atusensa twamaanzi.”—Isaya 35:6, 7.
Nkamboonzi nitweelede kusyoma nzilyaamba Bbayibbili? Bona nzilyaamba Bbayibbili atala anzila mbilengedwaayo nyika.
Bbayibbili lityeni anyika, azichitika kuti mvula ikkale kiiwa
‘[Leza] takailenga buyo [nyika] kakunyina kaambo, pele iwakaibumba kutegwa kaikkalwa bantu’—Isaya 45:18.
Leza wakalenga nyika kuti ikkalwe azintu zipona alubo wakabikka zilengwaaleza zipa kuti kube maanzi miingi.
“[Leza] ulakwela malosi aamaanzi kuzwa ansi; alacinca kuba mvwula kuzwa muli sikunku wakwe; mpoonya makumbi alawisya mvwula mpati; alalosyela bantu maanzi.”—Jobu 36:27, 28
Munzila nguuba, mavesi aaya apandulula Leza mbaakapanga nzila yakuti mvula ikkale kiiwa. Maanzi ayelede kuzwa munyika amulwizi kaya kujulu mpawo mvula ilawa, eezi zipa kuti bantu abanyama bajane maanzi aatakwe doti.—Mukambausi 1:7; Amos 5:8.
“Ndiyoomuwisizya mvwula aciindi ceelede, alimwi nyika iyoopa butebuzi bwayo azisamu ziyoozyala micelo yazyo.”—Levitiko 26:4.
Leza wakasyomezya ma-Israyeli kuti wakali kuyoobalongezya kwiinda mukupa kuti mvula ikkale kiiwa kuchitila kuti bajane chakulya chiingi. Ulizi kuti kuyandikana kuti mvula iiwe achiindi cheelede kuti bantu bakonzye kujana chakulya.
Zintu Leza nzyaakachitila ma-Israyeli chiindi, andiswe uzootuchitila kunembo. (Isaya 30:23) Mazubaano, munyika zyiingi penzi lyamaanzi lili kwiinkilila kunembo alubo kubulika kwamvula nkantomozyo biyo kamapenzi. Nziizili zimwi nzilyaamba Bbayibbili atala apenzi lyakubulika kwamaanzi liliwo mazubaano?
Mbulitakamane penzi lyakubulika kwamaanzi
Bbayibbili lyaamba kuti Leza kabelesya Bwaami bwakwe uyoomaninsya mapenzi woonse aali munyika kuswaanizya alyakubulika kwamaanzi. (Mateyo 6:9, 10) Bwaami bwaLeza nimfulumende yakujulu iyooyendelezya nyika yoonse. (Daniele 2:44; Chiyubunuzyo 11:15) Mukuyungizya, Bwaami bwaLeza buyoochita zintu zili kukachilwa kuchitwa amfulumende zyabantu, buyoogwisya zintu zyoonse zipa kuti maanzi abulike.
Penzi: Kuchincha-chincha nkubulikuchita bwiime bwakunze kulikupa kuti mvula itawi kabotu. Eezi zilikupa kuti kube bbalangwe munyika akuti kube zambangulwe lyeetwa akaambo kamvula nyingi naakuti kupawula mulwizi.
Kumana kwapenzi: Bwaami bwaLeza buyoobambulula zintu zyoonse zyakanyonyooka munyika kuchitila kuti ibe mbuli mbuyakabede kumasaangunino. Leza usyomezya kuti: “Bona! Ndilikupa kuti zintu zyoonse zibe zipya.” (Chiyubunuzyo 21:5) Munyika njumu muyookunka maanzi akupa kuti maluba aminsamu zikomene nikuba munkanda. (Isaya 41:17-20) Mwaami waBwaami bwaLeza, Jesu Kkristu uyooyendelezya zintu zyoonse zili munyika.
Chiindi Jesu naakali aanyika wakawumuzya guwo pati, eeyi yakali nzwisa biyo yamanguzu Leza ngamupede. (Makko 4:39, 41) Kkristu nazooyendelezya kali Mwaami waBwaami bwaLeza, mapenzi aalichitikila ayoomana. Bantu bayoobotelwa kabali muluumuno alubo takwe nibatanoyoowe mapenzi aalichitikila.
Penzi: Bantu babikkila maanu kuzintu nzibayanda luzutu abatangala balikubikka doti mumilonga amulwizi, eezi nziimwi zilikupa kuti kubulike maanzi akunywa aakubelesya.
Kumana kwapenzi: Leza uyoosalazya nyika akubambulula zintu zyoonse zilikupa kuti mumilonga amulwizi mube doti. Nyika iyooba paradayizi. Bbayibbili lyaamba kuti: “Inkanda alimwi anyika iinyina maanzi ziyoosekelela, acalo cibanda camucimpayuma ciyookondwa akufwulula mbuli maluba-luba aasaferone.”—Isaya 35:1.
Niinzi zitazoochitike kuli aabo batakwe ndaba anyika naakuti abamwi bantu? Leza wakasyomezya kuti, ‘uyoonyonyoona aabo balikunyonyoona nyika.’—Chiyubunuzyo 11:18, Tusimpi 2:21, 22.
Penzi: Bantu balikubelesya maanzi miingi loko kwiinda maanzi aajanika munyika.
Kumana kwapenzi: Tulamulumba Leza akaambo kakuti Bwaami bwakwe buyoopa kuti kuyanda kwakwe ‘kuchitwe . . . aanyika.’ (Mateyo 6:9, 10) Bwaami bwaLeza buyooyiisya bantu batanooyendelezegwe ambubo. Lugwalo lwa Isaya 11:9 a lwaamba kuti “nyika iyoozula luzyibo lwa Jehova.” Kabali baba aaluzibo oolu lusumpukide akuyanda Leza kazizwa aansi aamoyo, bantu boonse bayooyilangania kabotu nyika azintu zyoonse zili mulinjiyo.
Kuti ujane zyiingi atala azitakachitwe aaBwaami bwaLeza, langa chiiyo chiti “Bwaami bwaLeza Buzoochitaanzi?”
Bala lsaya chaandaano 35 kuti ubone nyika mbitazoochinche akuba paradayizi.
Yebela vidiyo itii Nkamboonzi Leza Naakalenga Nyika? kuti uyiye zyiingi atala amakanze aaLeza atala anyika abantu.
a Jehova ndizina lyaLeza. (Intembauzyo 83:18) Langa chiiyo chiti “Ngwani Jehova?”
You May Also Like
AMUKKALE KAMULINDIDE!
Bbalangwe—Niinzi Nzilyaamba Bbayibbili?
Penzi eeli lili munyika yoonse lizoomana na? Nziili zisyomezyo zitupa bulangilizi?
NJIISYO ZYABBAYIBBILI ZIYANDIKANA
Bwaami bwaLeza Niinzi?
Chiindi Jesu naakali kukambawuka, wakayiisya atala aBwaami bwaLeza kwiinda zintu zyoonse. Kwaminyaka myiingi, bantu balikukombela kuti Bwaami oobu buze.
ATALA ANDISWE
Kumbila Kuswayigwa
Mwaambuule atala amubuzyo wamuBbayibbili, naakuti yiya zyiingi atala aBakamboni baJehova.
