Mu24 January 2023, basayensi bakaseta wachi iitegwa Doomsday a, bakaamba kuti chiindi eecho nchibakaseta chizookkwana aakati kamansiku. Wachi eeyo, yiiminina mamanino aanyika.

•   “Wachi eeyi” yiiminina kwiindilila kwakubija kwazintu akuti bantu baba aafwiifwi kuti balinyonyoone. Muli Bwabili, basayensi bakayichunisya loko wachi eeyo kuti chiindi nchibakaseta chikkwane kuchitila kuti mamanino afwambaane kusika. Zyakapa kuti bachite oobo, nzintu zilikuchitika munyika mbuli nkondo yaku-Ukraine, mabbomba aalikubelesegwa munkondo azimwi zintu zilikunyonyoona nyika.”—AFP International Text Wire

•   “Muli Bwabili, basayensi bakaamba kuti bakayichunisya loko wachi yabo zyakuti yasyaalilwa aamasekkoondi aali 90 kupela kuti isike aakati kamansiku, chaamba kuti amagedoni yaba aafwiifwi loko.”—ABC News.

•   “Kabunga kabasayensi basiyene-siyene bakaamba kuti zintu zilikuchitwa aabantu lino zyiindilila kubija zyakuti nyika eeyi yaba aafwiifwi loko kuti inyonyooke.”—The Guardian.

 Bantu anyika zyaba aafwiifwi na kunyonyooka? Zintu ziyoochitika kunembo zyeelede kupa kuti tuyoowe na? Bbayibbili lityeni?

 Bbayibbili lyaamba kuti, “nyika inooliko lyoonse mane kukabe kutamani” alubo kunooli bantu “bayookkala alinjiyo lyoonse mane kukabe kutamani.” (Mukambausi 1:4; Intembauzyo 37:29) Nkinkaako, bantu tabazooyinyonyooni pe nyika naakuti kupa kuti itakkaliki.

 Nikuba oobo, Bbayibbili kuli nzilyaamba atala akunyonyoonwa kwanyika. Muchikozyano, lyaamba kuti “nyika ilayinda.”—1 Joh. 2:17.

•   Kuti ubone kuti Bbayibbili nga lyaambaanzi chiindi nilyaambuula atala akumana kwanyika, bala chiiyo chitii, “Sena Nyika Eeyi Imana Buya? Sena Bbaibbele Lyaamba Kuti Nyika Iyakunyonyoonwa Cakumaninina?”

•   Kuti uzibe nzilyaamba Bbayibbili atala azintu ziyoochitika kunembo, bala chiiyo chitii, “Ino Nyika Iyoomana Lili?”

 Bbayibbili lilakonzya kutugwasya kuti tukkale katuli aamaboneno aalikabotu nikuba munyika kamulikuchitika zintu ziyoosya. Biyeni?

•   Bbayibbili litupa malayilile aagwasya. (2 Timoti 3:16, 17) Muchikozyano, bala chiiyo chitii, “Mbomukonzya Kulwana Kulibilika” kuti ubone Bbayibbili mbulikonzya kukugwasya kuti ube aamaboneno aalikabotu nikuba kuli kuswanana aazyiimo ziyumu mubuumi.

•   Bbayibbili litupa bulangilizi bwabuumi bulikabotu mbututazoobaabo kunembo. (Baroma 15:4) Lipandulula zintu nzitweelede kulangilila lino aziyoochitika kunembo alubo zitugwasya kuti tukkale katuli aachibindi nikuba kuti munyika kulikuchitika zintu ziyoosya.

 Kuti wiiye zyiingi kuzwa muBbayibbili, tukumbila kuti wiiye Bbayibbili mahala.