Kweendelana amakani aakazwa kuWorld Health Organization (WHO) mu23 May 2022, bantu bali 6.27 miliyoni bakajayigwa aabulwazi bwakkorona. Pesi kweendelana amakani aakapupululwa mu5 May 2022, baWHO bayeeyela kuti namba yabantu bakajayigwa aabulwazi oobu nimpati loko kwiinda eeyi yaambwa. Kwaambwa kuti mumunyaka wa2020 a2021, “bantu bakaboneka zilaantanganana kuti bakajayigwa aabulwazi oobu naakuti bakataboneka zilaantanganana, . . . kuyeeyelwa kuti basika ku14.9 miliyoni.” Bbayibbili lityeni atala amakani aaya aapa kuti tumane manguzu?

•   Jesu wakaamba kuti kwakali kuyooba ‘malwazi mabi’ muchiindi chaambwa kuti ‘mazuba aakumamanino.’—Lukka 21:11, 2 Timoti 3:1.

 Bupolofita bwakaambwa aaJesu bulikuzuzikizigwa mazubaano. Kuti uyiye zyiingi, bala chiiyo chiti, “Ino Citondezyo ca ‘Camazuba Aamamanino,’ naa ‘Kuciindi Cakumamanino’ Ninzi”?

•   ‘Leza siluumbulizyo loonse . . . ulatuumbulizya mumapenzi eesu woonse.’—2 Bakkorinte 1:3, 4.

 Bantu biingi bakafwidwa aabbululu wabo balakonzya kuumbulizigwa aamulumbe uujanika muBbayibbili. Yiya zyiingi kuzwa muzyiiyo ziti, “Kulwana Penzi Lyabuumba—Nzukonzya Kuchita” achiti “Makani Aayandikana Aagwasya Bali Mubuumba.”

•   “Abuze Bwaami bwako. Akuchitwe kuyanda kwako aanyika mbuli kujulu.”—Mateyo 6:10.

 Lino-lino “Bwaami bwaLeza” buyoochita chimwi chintu zyakuti “taakwe muntu naba omwe uukkala munyika uuyakwaamba kuti: “Ndaciswa.’” (Makko 1:14, 15; Isaya 33:24) Kuti uyiye zyiingi atala amfulumende yakujulu anziyoochita, yebela kavidiyo kati, Bwaami bwaLeza Niinzi?

 Tukutamba kuti uyiye zyiingi atala anzilyaamba Bbayibbele kuchitila kuti iwe ampuli yako mugwasigwe abusongo bujanika mumo azisyomezyo nzilyaamba.