Mu 24 May 2022, kwakachitika zintu ziyoosya mukadolopo kaniini kwategwa Uvalde, Texas, U.S.A. Kweendelana amakani aakwazwa muThe New York Times, “kuli mwaalumi wakadubula bana bali 19 kuswaanizya abayiisi babili . . . kuchikolo chitegwa Robb Elementary School.”

 Zilawusisya kuti zintu ziliboobu zikkala kazichitika. Imwi lipoti yakazwa mu-USA Today yakaamba kuti muchisi cha-United States amulikke, “mumunyaka wayinda, kudubulwa muzikolo kwakachitika kwaziindi zili 249 kwiinda minyaka yoonse kuzwa mu1970.”

 Nkamboonzi zintu eezi zibi nizichitika? Ngatulalisimya biyeni kuzintu zibi eezi zilikuchitika? Tuli aabulangilizi na bwakuti bubi buli boobu buzoomana? Bbayibbili lilatupa nsandulo.

•    Bbayibbili lyaamba chiindi nchitupona kuti ‘mazuba aakumamanino,’ aawo bantu ‘nibatakwe luyando’ alubo “bayoosya,” nibachita milimu yalunya iiyoosya. Bantu batondeezya buntu buli boobu “bazoozwa kukubija baye kukubija loko.” (2 Timoti 3:1-5, 13) Kuti uzibe zyiingi, bala chiiyo chiti, “Sena Bbaibbele Lyakaambilalimwi Bantu Mbobanikuyeeya Akucita Zintu Mazuba Aano?”

 Bantu biingi balibuzya kuti, ‘Nkamboonzi Leza natalesyi kuti zintu zibi mbuli kudubulwa muzikolo kutachitiki?’ Kuti ujane nsandulo yamuBbayibbili, bala chiiyo chiti, “Nkaambo Nzi Zintu Zibyaabi Ncozibacitikila Bantu Bali Kabotu?”

•    ‘Zintu zyoonse zyakalembwa chiindi, zyakalembelwa kuti tuyiisigwe, kuchitila kuti kwiinda . . . muluumbulizyo luzwa muMagwalo, tube aabulangilizi.’—Baroma 15:4.

 Malayilile aamuBbayibbili alakonzya kukugwasya kuti ulisimye kumapenzi aachitika munyika. Kuti ujane amwi makani, langa Amubuke! Itii, “Sena kulwana kuli nokuyoomana?”

 Kuti bazyali bajane makani aakonzya kubagwasya kuti bayiisye bana babo kuti bazibe nzibeelede kuchita nibamvwa nyuzi ziyoosya, bala chiiyo chiti, “Disturbing News Reports and Your Children.”

•    “Uyoobavwuna kukudyaamininwa kunkondo.”—Intembauzyo 72:14.

•    “Bayoofwula mapanga aabo kuba maamba aakulimya amasumo aabo kuba zyakukwezuzya zisamu. Cisi tacikanyamuni panga kulwana cisinyina alimwi tabakaiyi limbi nkondo pe.”—Mika 4:3.

 Leza uzoomaninsya zintu nzibatakonzyi pe kumaninsya bantu. Bwaami bwakwe bwakujulu buzoogwisya zilwanisyo zyoonse zyankondo ankondo zyoonse. Kuti uzibe zyiingi atala azizoochitwa aaBwaami bwaLeza, bala chiiyo chiti, “MuBwaami bwaLeza ‘Luumuno Luyoovula.’”