Munsondo mu 20 November 2022, muswaangano wakabambwa a-United Nations waCOP27, uuli atala kuchincha kwabwiime bwakunze wakamana. Nikuba kuti kwakachitwa chizuminano chakuti kugwisigwe mali iitagwasye nyika ziswaanana amapenzi ayeetwa akuchincha kwabwiime bwakunze, pesi bantu biingi balizi kuti eezi tazikobambulula penzi eeli.

•   Mu 19 November 2022 mulembi waUnited Nations utegwa António Guterres wakaamba kuti “Ndilikubotelwa akaambo kamabambe akuti kugwisigwe mali iitagwasye aabo baswaanana amapenzi ayeetwa akuchincha kwabwiime bwakunze. Nikuba oobo mabambe aaya taamani penzi eeli nkaambo nyika yesu yayindilila kubija.”

•   “Nyika yesu ilakonzya kuswaanana apenzi lyeetwa akambo kakuchincha kwabwiime bwakunze, zitape kuti bantu bafwabe loko.”—Eezi zyakaambwa a-Mary Robinson wakali mweendelezi wa-Ireland alubo wakali UN High Commissioner for Human Rights, mu 20 November 2022.

 Bachikula ambabo bali kukataazikana loko atala mbuyinobede nyika yesu muchiindi chilikunembo. Nikuba oobo, mfulumende zilakonzya na kubelekelaamwi kuti zichinche bwiime bwakunze? Bbayibbili lyaambaanzi?

 Bbayibbili litubuzya kuti nikuba kuti mfulumende zyabeleka changuzu kuti zibambulule penzi lyakuchincha kwabwiime bwakunze, kwaamba choonzyo tazikozwidilila pe. Twaambo tubili tutobela tupandulula kuti nkamboonzi:

•   “Eeco cigogomene tacikonzyi koololwa pe.”—Mukambausi 1:15.

   Zyaamba kuti: Mfulumende zilikukachilwa nkaambo muntu talengeledwe kuti ayeendelezye muntunyina. (Jeremiya 10:23) Nikuba kuti mfulumende zyajatana, tazikonzyi pe kumanisya mapenzi alimunyika nikuba kuti zyabeleka changuzu biyeni.

•   “Nkaambo bantu bayooba basikuliyanda, bayandisya mali . . . batayandi kuzuminana aabamwi.”—2 Timoti 3:2, 3.

   Zyaamba kuti: Bbayibbili lyakaamba chiindi kuti bantu biingi bayoobikkila maanu kuzintu nzibayanda luzutu alubo tabanoyandi kubelekelaamwi abamwi.

 Mfulumende tazikonzyi kupa kuti nyika yesu izobote kunembo. Pesi Leza wakatupa mweendelezi weelela Jesu Kkristu. Kuti kalyaambuula atala nguwe Bbayibbili liti:

•   “Bweendelezi buyooba agwezyo lyakwe. Izina ndyanakwiitwa ndyakuti Sikulaya Uugambya, Leza Singuzu, Taata Walyoonse Alyoonse, Mwami Waluumuno.”—Isaya 9:6.

 Jesu nguMwaami waBwaami bwaLeza naakuti mfulumende yakujulu. (Mateyo 6:10) Ulaamanguzu, busongo achiyandisyo chakulangania nyika azintu zikkala mumo. (Intembauzyo 72:12, 16) Mubweendelezi bwakwe, mfulumende eeyi iyonyonyoona “baabo banyonyoona nyika” akupa kuti nyika ibote lubo.—Chiyubunuzyo 11:18; Isaya 35:1, 7.

 Kuti ukonzye kwiiya zyiingi atala azintu zikonzya kubambulula kuchincha kwabwiime bwakunze, bala chiiyo chiti “Climate Change and Our Future—What the Bible Says.”