Mu24 February 2022, masoja aaRussia akanjila muUkraine changuzu alubo akapa kuti bantu bachije muUkraine akaambo kankondo. a

 “Kwakali kumvwikka mabbomba aakali kudubuka. Kwakali kuyoosya zyakuti tandikonzyi pe kuzipandulula. Nitwakamvwa kuti kwakali zitima zyakali kubweza bantu, twakasala kuzwa. Zintu zyoonse muntu nzyakalaazyo wakeelede kuzibikka mukakwama kaniini kuti akonzye kukwabilila buumi bwakwe. Twakakonzya kubweza madocuments eesu, misamu, maanzi atwakulya tuuba. Zimwi zyoonse, twakazisiya mpawo twakaya kugadilwa zitima, ooku mabbomba kali kudubuka.”—Nataliia, waku-Kharkiv, Ukraine.

 “Teetwakali kuziyeeyela pe kuti ngakulabuka nkondo. Ndakamvwa mabbomba kali kudubuka mudolopo alubo mawindo akali kuzungaana. Ndakasala kuzwa muUkraine mpawo ndakabweza zintu ziche loko ziyandikana. Ndakazwa aang’anda a8 kuseeni alubo ndakagada chitima chiya kuLviv mpawo ndakazoogada bbaasi iiya kuPoland.”—Nadija, waku-Kharkiv, Ukraine.

Muchiiyo eechi tulabona zintu zitobela

•  Niinzi chilikupa kuti bantu aaba bachije munyika yabo?

•  Nkukuuli nkubakonzya kujana bulangilizi bantu bachija kunyika zyabo?

•  Bbayibbele lilakonzya na kubagwasya bantu bachija munyika zyabo?

 Niinzi chilikupa kuti bantu aaba bachije munyika yabo?

 Mapenzi ngibalikuswaana bantu baliikuchija kuUkraine akaba akaambo kakuti masoja aakuRussia akanjila munyika yabo. Nikuba oobo, Bbayibbele lyaambuula atala atwaambo tulikupa kuti kube mapenzi aali boobo:

•   Mfulumende zyabantu munyika yoonse zyakachilwa kupa bantu zintu nzibayanda. Chiindi chiingi, aabo bali mubweendelezi babelesya manguzu aabo kuti badyaaminine bantu.—Mukambausi 4:1; 8:9.

•   Saatani Dyabbulosi, “mweendelezi wanyika,” ulikweena bantu boonse zyakuti Bbayibbele lyaamba kuti: “Nyika yoonse ili mumaanza aamubi.”—Johane 14:30; 1 Johane 5:19.

•   Kuyungizya kumapenzi aakataazya bantu kwaminyaka myiingi, tupona muchiindi chaambwa aaBbayibbele kuti: “Kumazuba aamamanino kuyooba ziindi zikatazya ncobeni.” (2 Timoteyo 3:1) Mazuba aaya azwide nkondo, mapenzi aalichitikila, nzala, malwazi, zintu eezi zipa kuti bantu bachije munyika zyabo.—Luka 21:10, 11.

 Nkukuuli nkubakonzya kujana bulangilizi bantu bachija kunyika zyabo?

 Bbayibbele litondeezya kuti Mulengi wesu Jehova b nguLeza ulaaluyando alweetelelo kubantu bachija kunyika zyabo abalongela kulizimwi ndawu. (Deuteronomo 10:18) Usyomezya kuzoomaninsya mapenzi ngibaswaana bantu bachija kunyika zyabo kabelesya mfulumende yakwe yakujulu yaambwa kuti Bwaami bwaLeza, iitazoogwisye mfulumende zyoonse zyaanyika. (Daniele 2:44; Matayo 6:10) Jehova uyoobelesya Bwaami bwakwe kuti agwisye Saatani Dyabbulosi. (Baroma16:20) Bwaami oobu buyooyendelezya nyika yoonse alubo buzoogwisya kwaanzaana kuliwo akaambo kakuti muntu umwi awumwi ukkala kunyika yakwe. Bantu boonse bayooba mpuli iimwi iijisini. Taakwe muntu uutazoochije muunzi wakwe nkaambo Bbayibbele lisyomezya kuti: “Bayookkala umwi aumwi munsi lyamusaansa wakwe amunsi lyamukuyu wakwe, alimwi takukabi muntu naba omwe uuyoobayoosya, nkaambo majwi aaya azwa kumulomo wa Jehova wamakamu.”—Mika 4:4.

 Bwaami bwaLeza mbubo abulikke butazoomaninsye mapenzi bantu bachija kunyika zyabo ngibaswaana mazubaano. Jehova uzoobelesya Bwaami bwakwe kuti amaninsye mapenzi aapa kuti bantu bachije kunyika zyabo. Atubone zikozyano:

•   Nkondo. “[Jehova] ulamanizya nkondo munyika yoonse mboizulwa.” (Intembauzyo 46:9) Kuti ubone kuti Leza uzooyimaninsya biyeni nkondo, bala chiiyo chiti “Luumuno Anyika—Ino Luyooboola Buti?”

•   Kudyaamininwa akulwana. “[Jehova] uyoobavwuna kukudyaamininwa akunkondo.” (Intembauzyo 72:14) Kuti umvwisisisye kuti bantu balakonzya kuchincha buntu butali kabotu mbubalaabo, bala chiiyo chiti “Tulakonzya Kuzunda Penzi Lyakuzondana!”

•   Kufwaba. “[Jehova] uyoovwuna mucete uukwiilila lugwasyo.” (Intembauzyo 72:12) Kuti ubone kuti Leza uyoozigwisya biyeni zintu zipa kuti bantu bafwabe, bala chiiyo chiti “Sena Cilakonzyeka Kubantu Boonse Kuba Azintu Nzyobayandika?”

•   Nzala. “Kuyooba maila manji anyika.” (Intembauzyo 72:16) Kuti uzibe kuti Leza uyoochita biyeni kuti bantu boonse babe aachakulya chikkwene, bala chiiyo chiti “Zilachita Na Kuti Bantu Bakkale Munyika Iitakwe Nzala?”

 Bbayibbele lilakonzya na kubagwasya bantu bachija munyika zyabo?

 liyi lilakonzya kubagwasya. Bbayibbele lipa kuti bantu bachija munyika zyabo babe aabulangilizi atala alyajuunza alubo libagwasya kuti bakonzye kulwana mapenzi ngibaswaana lino.

 Njiisyo yamuBbayibbele: “Mutalibiliki acintu nociba comwe, pele muzintu zyoonse, kwiinda mumupailo akukombelezya antoomwe akulumba, amumuzyibye Leza nzyomulomba, eelyo luumuno lwa Leza oolo lwiinda maano oonse luyookwabilila myoyo yanu amizeezo yanu kwiinda muli Kristo Jesu.”—Bafilipi 4:6, 7.

 Nziiwamba: Kumbila Leza kuti akugwasye kuti ube aamoyo uubombede kufumbwa chiimo nchuswaana. Langa chiiyo chiti “Bafilipi 4:6, 7—‘Mutalibiliki Acintu Nociba Comwe.’”