Mvwanana Aabamwi Kuti Uzunde Penzi Lyakulendelelwa—Bbayibbili Mbulikonzya Kukugwasya
Mu2023, bazyabusilisi bakabona kuti kulendelelwa mbulwazi bupati loko alubo beelede kuyanduula nzila zyakubumaninsya. Kuli nzila na yakumaninsya bulwazi oobu?
“Kulendelelwa akulitantamuna kuli bamwi kulakonzya kutweetela malwazi akupa kuti tutabotelwi,” zyakaambwa aa-Dr. Vivek Murthy, U.S. surgeon general. Pesi wakayungizya kati: “Kuli zimwi nzitukonzya kuchita atala ankani eeyi.” Nga tulazichita biyeni? “Kwiinda mukuchita zintu ziniini zipa kuti tusimye bweenzuma mbutulaabo abamwi.” a
Kulitantamuna kuli bamwi teenkuko pe akulikke kukonzya kupa kuti tulendelelwe. Bamwi balakonzya kulimvwa kabalendeledwe nikuba kabali aakati kabantu. Bbayibbili lilakonzya kutugwasya, kazitakwe ndaba kuti niinzi zyapa kuti tulendelelwe. Lili aamalayilile aatugwasya kuti tumvwanane aabamwi kuchitila kuti tutalendelelwi.
Malayilile aamuBbayibbili aakonzya kukugwasya
Bamuntu uuwambuula kabotu. Eezi ziswaanizya kuba muswiilizi uulikabotu kutali kubuzya bamwi mbulimvwa kupela. Kuti watondeezya kuti ulaandaba abamwi, mulamvwanana loko.
Malayilile aamuBbayibiili: “Kamutayeeyi nzimuyanda kupela, pesi kamuyeeya nzibayanda bamwi.”—Bafilipi 2:4.
Mvwanana aabantu basiyene-siyene. Mvwanana aabantu bapati naakuti baniini kulinduwe naakuti bakakomezegwa munzila iisiyene anduwe.
Malayilile aamuBbayibiili: “Amwiijule loko myoyo yanu.”—2 Bakkorinte 6:13.
Kuti ujane makani miingi atala ambukonzya kumvwanana aabamwi, bala chiiyo chiti “Satisfying Our Hunger for Friendship.”
a Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.
