Mbotuli Bakamboni ba Jehova, tulasoleka kutobela njiisyo zya Bunakristo nzyaakayiisya Jesu alimwi anzyobakali kutobela baapostolo bakwe. Cibalo eeci cilaamba mubufwaafwi nzyotusyoma.

1.   Leza. Tukomba Leza wakasimpe omwe, Singuzuzyoonse alimwi mulengi, uujisi zina lyakuti Jehova. (Intembauzyo 83:18; Ciyubunuzyo 4:​11) Ngu Leza wa Abrahamu, Musa, alimwi a Jesu.​—Kulonga 3:6; 32:11; Johane 20:17.

2.   Bbaibbele. Bbaibbele tulibona kuti ndibbuku lyakasololelwa amuuya ndyobakapegwa bantu. (Johane 17:17; 2 Timoteyo 3:​16) Lusyomo lwesu luyeeme amabbuku oonse aali 66 aajanika mulindilyo, alo aabikkilizya “Cizuminano Cakaindi” alimwi a “Cizuminano Cipya.” Syaazibwene mumakani aabukombi Jason D. BeDuhn wakalipandulula kabotu Bbaibbele ciindi naakalemba kuti ‘nzyobasyoma akucita Bakamboni ba Jehova ziyeeme a Bbaibbele, alimwi tabayeeyeli buya izyeelede kujanika mumo.’ a

    Nokuba kuti tulalizumina Bbaibbele lyoonse mbolibede, tulanyoneka. Tulizyi kuti zibeela zimwi zyamu Bbaibbele zyakalembwa munzila yamaambilambali naa mumwaambo wacikozyanyoaboobo tatweelede kuzibweza mbubwenya mbozilembedwe.​—Ciyubunuzyo 1:1.

3.   Jesu. Tutobela njiisyo alimwi acikozyanyo ca Jesu Kristo, alimwi tumubona kuti Mufwutuli wesu akuti Mwana wa Leza. (Matayo 20:28; Milimo 5:​31) Nkakaambo kaako ncotuli Banakristo. (Milimo 11:26) Nokuba boobo, mu Bbaibbele twiiya kuti Jesu tali Leza Singuzuzyoonse alimwi akuti njiisyo ya Butatu kunyina mpoijanika mu Magwalo.​—Johane 14:28.

4.   Bwami bwa Leza. Eeyi nimfwulumende iini-ini yakujulu, ikutali bube ibuli mumyoyo ya Banakristo. Buyoonjila mubusena bwamfwulumende zyabantu alimwi buyoozuzikizya makanze aa Leza kujatikizya nyika. (Daniele 2:​44; Matayo 6:​9, 10) Buyoobweza ntaamu eeyo ino-ino, nkaambo businsimi bwamu Bbaibbele butondezya kuti tupona “kumazuba aamamanino.”​—2 Timoteyo 3:​1-5; Matayo 24:​3-​14.

    Jesu ngo Mwami wa Bwami bwa Leza bwakujulu. Wakatalika kulela mu 1914.​—Ciyubunuzyo 11:15.

5.   Lufwutuko. Tulakonzya kufwutuka kuzwa kucibi alufwu kwiinda mucituuzyo cacinunuzyo ca Jesu. (Matayo 20:28; Milimo 4:​12) Kutegwa bantu bagwasyigwe acituuzyo eeco, tabeelede kusyoma buyo muli Jesu, pele beelede kucinca buumi bwabo akubbapatizyigwa. (Matayo 28:19, 20; Johane 3:​16; Milimo 3:​19, 20) Lusyomo lwamuntu lulalibonya kwiinda muzintu nzyacita. (Jakobo 2:​24, 26) Nokuba boobo, lufwutuko talukonzyi kuba cintu civwolwa buya pe​— lulaboola kwiinda ‘muluzyalo lwa Leza.’​—Bagalatiya 2:​16, 21.

6.   Kujulu. Jehova Leza, Jesu Kristo, alimwi abangelo basyomeka mbabakkala kujulu. b (Intembauzyo 103:19-​21; Milimo 7:​55) Bantu basyoonto buyo ibali 144,000 mbabayoobusyilwa kubuumi bwakujulu kuti bakalele a Jesu mu Bwami.​—Daniele 7:​27; 2 Timoteyo 2:​12; Ciyubunuzyo 5:​9, 10; 14:​1, 3.

7.   Nyika. Leza wakailenga nyika kuti ube munzi wabantu kukabe kutamani. (Intembauzyo 104:5; 115:16; Mukambausi 1:4) Leza uyoobaleleka bantu basyomeka abuumi bubotu alimwi butamani mu paradaiso anyika.​—Intembauzyo 37:11, 34.

8.   Bubi akupenga. Zintu eezyi zyakatalika ciindi mungelo wa Leza umwi naakazanga. (Johane 8:​44) Mungelo ooyu iwakazikwiitwa kuti “Saatani” alimwi a “Diabolosi” wakoongelezya banabukwetene bakusaanguna kuti bamusangane, akupa kuti bana babo bapenge citaambiki. (Matalikilo 3:​1-6; Baroma 5:​12) Kutegwa amanizye makani aabweendelezi ngaakatalisya Saatani, Leza wazumizya kuti bubi akupenga zizumanane, pele takazilekeli kuti zizumanane kukabe kutamani.

9.   Lufwu. Kuti bantu bafwa balaleka kubako. (Intembauzyo 146:4; Mukambausi 9:​5, 10) Tabapengi mumulilo wahelo.

    Leza uyoobusya bantu banji kulufwu. (Milimo 24:15) Nokuba boobo, aabo ibayookaka kwiiya nzila zya Leza baakubusyigwa bayoonyonyoonwa kukabe kutamani kakunyina bulangizi bwabubuke.​—Ciyubunuzyo 20:5.

10.   Mukwasyi. Tulabutobela bubambe bwa Leza bwakumatalikilo bwakuti mwaalumi weelede buyo kukwata mukaintu omwe, akuti bumambe kakonzya kupa bantu kulekana. (Matayo 19:​4-9) Tulaalusyomo lwakuti busongo ibujanika mu Bbaibbele bugwasya mikwasyi kukkala kabotu.​—Baefeso 5:22–​6:1.

11.   Bukombi bwesu. Tatulemeki ciingano naa zikozyanyo zimbi. (Deuteronomo 4:​15-​19; 1 Johane 5:​21) Twaambo ootu tutobela tulayandika kapati mubukombi bwesu:

    •   Kupaila kuli Leza.​—Bafilipi 4:6.

    •   Kubala akwiiya Bbaibbele.​—Intembauzyo 1:​1-3.

    •   Kuzinzibala kuyeeya nzyotwiiya mu Bbaibbele.​—Intembauzyo 77:12.

    •   Kuswaangana antoomwe kutegwa tupaile, twiiye Bbaibbele, kwiimba, kutondezya lusyomo lwesu, akukulwaizya Bakambonima abamwi.​—Bakolose 3:​16; Bahebrayo 10:23-​25.

    •   Kukambauka “makani mabotu aa Bwami.”​—Matayo 24:14.

    •   Kugwasya baabo ibabulide.​—Jakobo 2:​14-​17.

    •   Kuyaka akubamba Maanda aa Bwami alimwi amasena aamwi aabelesyegwa kutola ambele mulimo wakwiiya Bbaibbele nyika yoonse.​—Intembauzyo 127:1.

    •   Kutola lubazu mukugwasya baabo bacitikilwa ntenda.​—Milimo 11:27-​30.

12.   Mbunga yesu. Tujanika mumbungano ziindene-indene, zyalo izisololelwa akabunga kabaalu. Nokuba boobo, baalu tabali mbuli basololi bazikombelo, alimwi tabavwoli pe. (Matayo 10:8; 23:8) Tatupi cakkumi, alimwi tatubwezeleli mulumbo mumiswaangano yesu. (2 Bakorinto 9:7) Milimo yesu yoonse ilagwasyilizyigwa kwiinda mukusanga kwakuliyandila.

     Kabunga Keendelezya, kabunga kasyoonto ka Banakristo basimide ibabelekela kumaofesi mapati, mbabasololela Bakamboni ba Jehova nyika yoonse.​—Matayo 24:45.

13.   Lukamantano lwesu. Tulikamantene nyika yoonse muzintu nzyotusyoma. (1 Bakorinto 1:​10) Alimwi tulabeleka canguzu kutegwa lusalululo akaambo kakwiindana zilengwa, mubala, bukkale naa mulimo. (Milimo 10:34, 35; Jakobo 2:4) Nokuba boobo, lukamantano lwesu lulazumizya kulisalila. Kamboni umwi aumwi ulalisalila kweelana amanjezeezya aakwe aayiisyidwe a Bbaibbele.​—Baroma 14:​1-4; Bahebrayo 5:​14.

14.   Kulilemeka. Tulasoleka kutondezya luyando lwini-lwini mumicito yesu yoonse. (Johane 13:34, 35) Tulaitantamuka micito iitamukkomanisyi Leza, mbuli kubikkwa bulowa. (Milimo 15:28, 29; Bagalatiya 5:​19-​21) Tuli basiluumuno alimwi tatutoli lubazu munkondo. (Matayo 5:9; Isaya 2:4) Tulailemeka mfwulumende yamucisi motukkala alimwi akwiitobela milawo yanjiyo ccita kuti milawo eeyo itupa kutyola milawo ya Leza.​—Matayo 22:21; Milimo 5:​29.

15.   Zilongwe zyesu abamwi. Jesu wakalailila kuti: “Weelede kuyanda simukobonyoko mbubonya mbuli mboliyanda omwini.” Alimwi wakaamba kuti Banakristo “tabali banyika.” (Matayo 22:39; Johane 17:16) Aboobo tulasoleka ‘kucitila bantu boonse milimo mibotu,’ pele tatutoli lubazu mutwaambo twacisi alimwi tatuyanzani azikombelo zimwi. (Bagalatiya 6:​10; 2 Bakorinto 6:​14) Nokuba boobo, tulakulemeka kusala kwabamwi mumakani aali boobu.​—Baroma 14:12.

 Ikuti naa mulijisi mibuzyo kujatikizya nzyobasyoma Bakamboni ba Jehova, mulakonzya kubala makani manji aajatikizya ndiswe awebbusaiti yesu, kutuswaya kumaofesi eesu, kujanika kumiswaangano ku Ŋanda ya Bwami iili afwaafwi ankomukkala, naa kubandika a Kamboni umwi kubusena nkomukkala.