Peepe, akaambo kakuti kukomba Leza ncintu cakulisalila. (Baroma 14:12) Bakamboni ba Jehova balabayiisya bana babo njiisyo zyamu Bbaibbele, pele bakomena, aumwi weelede kulisalila kuba Kamboni wa Jehova naa pe.—Baroma 12:2; Bagalatiya 6:5.

 Mbubwenya mbuli bazyali banji, Bakamboni ba Jehova bayanda kuti bana babo kabapona buumi bubotu. Balabayiisya zintu nzyobayeeya kuti ziyoobagwasya: zintu mbuli milimo, makani aakulilemeka, amakani aabukombi. Bakamboni ba Jehova basyoma kuti Bbaibbele lipa kuti kabapona buumi bubotu, aboobo balasola kubayiisya bana babo njiisyo zili mumo alimwi akuunka ambabo kumiswaangano ya Bunakristo. (Deuteronomo 6:6, 7) Kumane mwana umwi aumwi akomena, ulakonzya kusala naa ulatobela nzyobasyoma bazyali bakwe naa pe.

•  Sena Bakamboni ba Jehova balabbapatizya bana bavwanda?

•  Sena Bakamboni ba Jehova balabakaka bana babo ikuti basala kutabbapatizyigwa?

•  Nkaambo nzi Bakamboni ba Jehova ncobaunka abana babo mubukambausi?

•  Sena Bakamboni ba Jehova balatola lubazu mumazuba aakulyookezya azilengwa zimwi?

•  Ino aabo ibakakomezyegwa kabali Bakamboni ba Jehova balimvwa buti?

 Peepe. Bbaibbele talikulwaizyi kubbapatizya bavwanda. Mucikozyanyo, litondezya kuti kabatanabbapatizyigwa, Banakristo bamumwaanda wamyaka wakusaanguna, bakaumvwa mulumbe, ‘bakautambula camoyo woonse,’ mpoonya bakeempwa. (Milimo 2:14, 22, 38, 41) Aboobo, kutegwa muntu ayelele kubbapatizyigwa, weelede kuti kali aciimo cakukonzya kumvwisya ncoliyiisya Bbaibbele, kulisyoma, alimwi weelede kuti kalibambilide kupona kweelana anjiisyo eezyo. Mwana muvwanda takonzyi kuzicita eezyi.

 Mbobayaabukomena bana, balakonzya kulisalila kubbapatizyigwa. Pele kutegwa bacite oobo, beelede kumvwisya mboiyandika ntaamu eeyi.

 Peepe. Nokuba kuti bazyali Bakamboni balausa kuti mwanaabo taziyandi nzyobasyoma, tabaleki kumuyanda alimwi taleki kuba mwanaabo akaambo buyo kakuti tayandi kuba Kamboni.

 Tulaunka abana besu mubukambausi akaambo katwaambo tuli mbotubede. a

•   Bbaibbele lyaambila bazyali kuti kababayiisya bana babo kujatikizya Leza ambobeelede kumukomba. (Baefeso 6:4) Mbwaanga kukomba cibikkilizya kulyaambilila lusyomo kubuleya, kukambauka ncibeela ciyandika kapati cakuyiisya mwana kujatikizya Leza.—Baroma 10:9, 10; Bahebrayo 13:15.

•   Bbaibbele cacigaminina lilabakulwaizya bana ‘kutembaula zina lya Mwami.’ (Intembauzyo 148:12, 13, BT) Nzila iiyandika kapati yakutembaula Leza nkwaambila bamwi kujatikizya nguwe. b

•   Bana balagwasyigwa kapati ciindi nobakambauka abazyali babo. Mucikozyanyo, balaiya kubandika abantu baindene-indene, mpoonya baba abube bubotu mbuli, lweetelelo, luzyalo, bulemu, alimwi akulyaaba. Kuyungizya waawo, kukambauka kubagwasya kumvwisya twaambo twamu Bbaibbele tupa kuti kabasyoma mbobasyoma.

 Bakamboni ba Jehova tabatoli lubazu muzilengwa zyakusekelela mazuba aakulyookezya naa zilengwa zimbi zitamukkomanisyi Leza. c (2 Bakorinto 6:14-17; Baefeso 5:10) Mucikozyanyo, tatusekeleli mazuba aakuzyalwa naa Kkilisimasi, nkaambo zizwa kubukombi bwakubeja.

 Nokuba boobo, tulakkomana kuba aciindi cakwiizya abanamukwasyi alimwi akwaabila bana besu zintu kuzwa ansi aamoyo. Muciindi cakusekelela buyo mumazuba aagaminide mumwaka, tulapanga mapobwe aciindi cili coonse.