Bakamboni ba Jehova balabelesya busanduluzi bwama Bbaibbele bwiindene-indene nobaiya Bbaibbele. Nokuba boobo, mumyaambo molijanika Bbaibbele lya Busanduluzi bwa Nyika Mpya, tulakkomana kubelesya ndilyo akaambo kakuti lilijisi zina lya Leza, lyakasandululwa buluzi alimwi lilaamba twaambo cakusalazya.

•   Kubelesya zina lya Leza. Basikumwaya ma Bbaibbele bamwi baalilwa kumulemeka Sikwaanza Bbaibbele. Mucikozyanyo, busanduluzi bumwi bwa Bbaibbele bulijisi mazina ainda ku 70 aabantu bakagwasyilizya mumulimo. Nokuba boobo, mu Bbaibbele ndilyonya eeli, taakwe zina lya Sikulyaanza​—Jehova Leza.

   Mukwiimpana, Bbaibbele lya Busanduluzi bwa Nyika Mpya lyakapilusya zina lya Leza mumasena manji molyakabede kweelana amwaambo wakusaanguna, alimwi bamukkomiti yabusanduluzi oobu tabazyibidwe pe.

•   Lililuzi. Taali ma Bbaibbele oonse aapandulula munzila iiluzi mulumbe wamu Bbaibbele wakusaanguna. Mucikozyano, Bbaibbele limwi lyaamba boobu kujatikizya lugwalo lwa Matayo 7:​13: “Amunjile mumulyango uusyanikide, nkaambo mulyango uutola kuhelo ulikwazeme alimwi nzila iitola nkuko njuubauba.” Nokuba boobo, mwaambo wakusaanguna ubelesya bbala lyakuti “lunyonyooko” kutali “helo.” Ambweni basanduluzi bakabelesya bbala lyakuti “helo” akaambo kakusyoma kuti basizibi bayoopenzegwa kukabe kutamani mumulilo wahelo. Pele Bbaibbele taluuzuminizyi muzeezo ooyu. Aboobo Bbaibbele lya Busanduluzi bwa Nyika Mpya lyaamba munzila iiluzi: “Amunjile mumulyango uusyanikide nkaambo nzila iitola kulunyonyooko ilikwazeme alimwi nimpati.”

•   Lilaamba cakusalazya. Busanduluzi bubotu tabweelede buyo kwamba twaambo munzila iiluzi, pele bweelede kuti kabusalazya twaambo, kabutakatazyi kumvwa. Amulange lange cikozyanyo eeci. Mulugwalo lwa Baloma 12:11, mwaapostolo Paulo wakabelesya bbala lyaamba “kubila kwamuuya.” Mbwaanga bbala eeli talikasalazyi kabotu kaambo mumwaambo wamazuba aano, Bbaibbele lya Busanduluzi bwa Nyika Mpya lilaamba munzila iitakatazyi kumvwa. Lyaamba kuti Banakristo beelede ‘kupya moyo akaambo kamuuya.’

 Kunze lyakuba azina lya Leza, kwaamba twaambo munzila iiluzi alimwi akusalazya twaambo, Bbaibbele lya Busanduluzi bwa Nyika Mpya liliindene kapati ama Bbaibbele aambi: Talisambalwi. Akaambo kaceeci mamiliyoni aabantu balakonzya kubala Bbaibbele mumwaambo wabo​—kubikkilizya abaabo batakonzyi kuula Bbaibbele.