Kanji-kanji bwiinga bwa Bakamboni ba Jehova bulacitwa munzila nguba-uba alimwi cabulemu, bulabikkilizya amakani aabwiinga aayeeme a Bbaibbele. Bwiinga bulakonzya kubikkilizya apobwe. a Naba Jesu wakajanika kupobwe lili boobu ku Kana kumatalikilo aamulimo wakwe.—Johane 2:1-11.

•  Ino ncinzi cicitika kubwiinga bwa Bakamboni ba Jehova?

•  Ino bwiinga bwa Bakamboni ba Jehova bucitilwa kuli?

•  Mbaani bakonzya kujanika?

•  Ino basikutambwa beelede kusama buti?

•  Sena basikutambwa beelede kutolelezya zipego kupobwe lyabwiinga?

•  Sena balagumanya nkapu mujulu?

•  Sena basikutambwa balabafwusa rice basikukwatana?

•  Sena kunooli zyakulya alimwi azyakunywa?

•  Sena kunooli nyimbo naa kuzyana?

•  Sena Bakamboni ba Jehova balasekelela buzuba nobakakwatana?

 Makani aabwiinga ncecibeela ciyandika kapati cabwiinga. Makani aaya atola maminiti aali 30 alimwi alapegwa amubelesi wa Bakamboni ba Jehova. Alapegwa munzila iisangalizya alimwi iiyaka, akukankaizya Bbaibbele mbolikonzya kugwasya banabukwetene kuba aluyando alimwi alukkomano mucikwati cabo.—Baefeso 5:33.

 Mumasi manji, mfwulumende zilazumizya babelesi ba Bakamboni ba Jehova kweendelezya lukwatano. Ikuti caba boobo, kumamanino aamakani aabwiinga, banabukwetene balakonka kuli umwi aumwi. Kuyungizya waawo, balakonzya kusamikana nweenwe. Kumane mubelesi ooyo ulaambilizya kuti baba mulumi amukaintu.

 Mumasi amwi, mulawo uzumizya kuti mulumi amukaintu beelede kukwatanina kuofesi yamfwulumende. Basikukwatana balacita oobo ciindi cisyoonto makani aabwiinga kaatanapegwa. Ikuti nabwiinga asibwiinga tiibakakonka mumeso aamfwulumende, balakonzya kucita oobo kumamanino aamakani. Ikuti naa bakakonka kale, balakonzya kusala kwiinduluka alimwi munzila iitondezya kuti bakacita kale oobo. Makani alamana amupailo wakulomba Leza kuti abalongezye banabukwetene bapya.

 Bakamboni banji basala kuti bwiinga bwabo bukacitikile mu Ŋanda ya Bwami ikuti kailiko. b Ikuti naa kunooli pobwe, lyalo balicitila kubusena bumbi.

 Ikuti makani aabwiinga kaali ku Ŋanda ya Bwami, kanji-kanji kufwumbwa muntu ulakonzya kujanika tacikwe makani naa ngu Kamboni naa pe. Ikuti kunooli pobwe, banabukwetene balasala bantu mbobakonzya kutamba.

 Nokuba kuti kunyina mulawo uugaminide kujatikizya nsamino ku Ŋanda ya Bwami ciindi cabwiinga, Bakamboni ba Jehova balasolekesya kutobela busolozi bwamu Bbaibbele bwakusama cabulemu. Balalumba kapati ikuti abamwi bacita mbubwenya oobo. (1 Timoteyo 2:9) Alimwi buya, njiisyo eezyi zilabeleka akupobwe lyabwiinga, ikuti banabukwetene basala kucita oobo.

 Bbaibbele litukulwaizya kuba baabi. (Intembauzyo 37:21) Bakamboni ba Jehova balakukkomanina kupa alimwi akutambula zipego zyabwiinga. (Luka 6:38) Nokuba boobo, tabalombi zipego naa kwaambilizya kubuleya mazina aabantu baleta zipego. (Matayo 6:3, 4; 2 Bakorinto 9:7; 1 Petro 3:8) Kucita boobo inga kwaba kutatobela ncolyaamba Bbaibbele alimwi cilakonzya kupa kuti aabo bajanika balimvwe bubi.

 Peepe. Bakamboni ba Jehova tabagumanyi nkapu mujulu pe, nkaambo cilengwa eeci cakatalikila muzilengwa zyabukombi bwakubeja. c Kuyanda kwa Bakamboni nkwakuti cikwati cabanabukwetene bapya kacili calukkomano, alimwi balabaambila oobo, pele kutali kwiinda mukugumanya nkapu mujulu.

 Peepe. Kumasena aamwi, bantu balafwusa rice, naa zintu zimwi zikozyenye kuli banabukwetene bapya. Basyoma kuti kucita boobo kuyoobaletela coolwe, lukkomano alimwi akupona myaka minji banabukwetene. Pele Bakamboni ba Jehova tabaciti zilengwa ziswaangene abukombi bwakubeja. Eeci cilabikkilizya acilengwa ncobacita bamwi cakwaambila banabukwetene bapya kuti leza “wa Mvwuma” abaleleke nkaambo eeci taceendelani ancoliyiisya Bbaibbele.—Isaya 65:11.

 Kunyina kulya naa kunywa ku Ŋanda ya Bwami nokuli bwiinga. Banabukwetene bamwi basala kuba apobwe ainda makani aabwiinga. (Mukambausi 9:7) Ikuti basala kuti kube bukoko, baba masimpe kuti basikutambwa tiibaciindizya kunywa alimwi balikke aabo ibeelela mbobeelede kunywa.—Luka 21:34; Baroma 13:1, 13.

 Ikuti naa kunooli pobwe, banabukwetene balakonzya kusala kubikkilizya nyimbo alimwi akuzyana. (Mukambausi 3:4) Nyimbo nzyobasala zyeezyo nzyobakkomanina alimwi anzyobayanda kubusena ooko, pele bayoobikkila maano kuti tazibafwumpuzyi beenzu baabo. Bwiinga bucitikila ku Ŋanda ya Bwami kanji-kanji bulabikkilizya anyimbo ziyeeme a Magwalo.

 Mbwaanga njiisyo zyamu Bbaibbele tazizumizyi naa kukasya kusekelela buzuba nobakakwatana, banabukwetene Bakamboni balalisalila lwabo beni kusekelela naa pe. Ikuti basala kucita boobo, balakonzya kusekelela balikke naa kutamba balongwe abanamukwasyi.