Nkaambo Nzi Bakamboni ba Jehova Ncobacinca Njiisyo Zyabo Zimwi?

AMULIZYE

Lyoonse twali kubelesya Bbaibbele kutusololela munjiisyo zyesu, aboobo tulacinca njiisyo zyesu zimwi akaambo kakucinca mbotwaamvwisya Magwalo. a

Kucinca ooku kuleendelana anjiisyo iilembedwe mulugwalo lwa Tusimpi 4:18 yaamba kuti: “Nzila yabaluleme ili mbuli mumuni wamafwumofwumo uumweka, uuyaabumwekesya kusikila mane kwatuba buu.” Mbubwenya mbuli kupola kwazuba mbokupa kuti zintu kaziyaabulibonya, Leza ulatugwasya kumvwisya kasimpe aasyoonto-syoonto, muciindi ncabikkide walo. (1 Petro 1:10-12) Mbubwenya mbolyakasinsima Bbaibbele, eeci ulacicita lino cakufwambaana “kuciindi cakumamanino.”—Daniele 12:4.

Kucinca ooku takweelede kutugambya naa kutunyonganya. Abalo bakombi ba Leza bakaindi bakajisi mizeezo iilubide alimwi izintu nzyobakali kulangila tiizyakacitika, aboobo bakeelede kucinca mbobakali kuzibona zintu.

Musa wakalyaaba kuvwuna cisi ca Israyeli myaka iili 40 katanamupa mukuli ooyu Leza.—Milimo 7:23-25, 30, 35.
Baapostolo bakaalilwa kumvwisya businsimi ibwakali kwaamba lufwu lwa Mesiya alimwi abubuke bwakwe.—Isaya 53:8-12; Matayo 16:21-23.
Banakristo bamwi bamumwaanda wamyaka wakusaanguna bakajisi mizeezo iitaluzi kujatikizya “buzuba bwa Jehova.”—2 Batesalonika 2:1, 2.

Mukuya kwaciindi, Leza wakakululamika kuyeeya kwabo kutaluzi, alimwi tupailila kuti azumanane kucita mbubwenya oobo akulindiswe.—Jakobo 1:5.

a Kunyina notusisa ikuti naa kwaba kucinca mbotulimvwisya Bbaibbele. Muciindi caboobo, tulakulemba akukumwaya. Mucikozyanyo, amulembe kuti “Kusalazya Nzyotusyoma” mukabbokesi kakuvwuntauzizya mu Laibbulali yaa Intaneti ya Watchtower.