Inzya, kanji-kanji Bakamboni ba Jehova balagwasya nokwacitika ntenda. Tulabagwasya Bakamboni abatali Bakamboni, kweelana amalailile aamu Bbaibbele aajanika mulugwalo lwa Bagalatiya 6:10: “Atucitile bantu boonse milimo mibotu, pele kapati ibaciinga cesu calusyomo.” Alimwi tulabayumya-yumya aabo ibajatikizyidwe akubapa lugwasyo lwakumuuya ndobayandika aciindi eeco.​—2 Bakolinto 1:​3, 4.

 Nokwacitika ntenda, baalu bamumbungano zili kubusena kwacitikila ntenda balabayandaula boonse bamumbungano eezyo kutegwa babone naa bali kabotu alimwi akuzyiba zyintu nzyobayandika. Mpoonya baalu balapa lipooti iijatikizya nzyobajana akwaambila bakuofesi yamutabi ya Bakamboni ba Jehovac yakubusena ooko zyintu nzyobabacitila.

 Ikuti mbungano zili kubusena ooko tazikonzyi kupa lugwasyo luyandika, Kabunga Keendelezya ka Bakamboni ba Jehova kalapanga bubambe bwakugwasyilizya. Eeci cilikozyenye anzila njobakali kubelesya Banakristo bakusaanguna ciindi canzala. (1 Bakolinto 16:​1-4) Ofesi yamutabi ilasala Kkomiti Iilanganya Baabo Bacitikilwa Ntenda kutegwa bagwasye. Bakamboni bazwa kumasena aambi balabelesya ciindi cabo alimwi azyintu zyabo kutegwa bagwasyilizye.​—Tusimpi 17:17.

 Nzila imwi mbozibelesyegwa zyakusanga zitumwa kumaofesi aamitabi ya Bakamboni ba Jehova nkugwasya bantu bacitikilwa ntenda. (Milimo 11:​27-30; 2 Bakolinto 8:​13-15) Mbwaanga mulimo ulacitwa abasikulisungula batavwoli, mali aasangwa abelesyegwa buyo kuntenda yacitika kutali kupa baabo beendelezya bubambe bwalugwasyo. Tulazilanganya kabotu zyakusanga zyoonse.​—2 Bakolinto 8:20.