Aabo bakabbapatizyigwa kuba Bakamboni ba Jehova pele bakaleka kukambaukila bamwi, ambweni bakaleka kuyanzana abasyominyina, tatubasuli pe. Masimpe ngakuti, tulabagwasya kutegwa batalike alimwi kumuyanda Jehova.

 Tatugwisyi muntu akaambo buyo kakuti wacita cibi cipati. Pele, ikuti Kamboni uubbapatizyidwe waba acilengwa cakutyola milawo yamu Bbaibbele alimwi teempwi, ulatantamukwa naa kugwisyigwa mumbungano. Bbaibbele lilasalazya kwaamba kuti: “Amumugusye mwaalumi ooyo mubi akati kanu.”—1 Bakolinto 5:13.

 Ino mbuti kujatikizya muntu wagwisyigwa pesi mukaintu abana kabali Bakamboni ba Jehova? Mbobakali kucita zyintu zyakumuuya antoomwe amukwasyi cilacinca, pele cibbululu cilasyaala mbweena. Cikwati akuyandana mumukwasyi alimwi akucitila antoomwe zijatikizya mukwasyi zilazumanana.

 Bantu bagwisyidwe balakonzya kujanika kumiswaangano yesu. Alimwi kuti kabayanda, balakonzya kutambula lulayo lwakumuuya kuzwa kubaalu bamumbungano. Makanze ngakumugwasya kuti eelele alimwi kuba Kamboni wa Jehova. Bantu bagwisyidwe baleka bukkale bwabo butali kabotu akutondezya luyandisisyo lwakupona kweelana azyeelelo zyamu Bbaibbele balatambulwa alimwi mumbungano.