Swebo Tobakamboni ba Jehova, tulasoleka kuyumya mikwasyi yesu alimwi ayabasimukoboma. Tulamulemeka Leza akaambo kakuti ngo Sikutalisya mukwasyi. (Matalikilo 2:​21-​24; Baefeso 3:​14, 15) Kwiinda mu Bbaibbele, ulayiisya njiisyo zyagwasya bantu nyika yoonse kuyumya zikwati zyabo alimwi akuba alukkomano.

 Tulasolekesya kutobela lulayo lwamu Bbaibbele, nkaambo lulatugwasya kuba balumi, bakaintu, alimwi abazyali bali kabotu. (Tusimpi 31:10-​31; Baefeso 5:22–​6:4; 1 Timoteyo 5:8) Busongo buli mu Bbaibbele bulabagwasya nobaba baabo bali mumikwasyi mobaindene zikombelo. (1 Petro 3:​1, 2) Amulange-lange nzyobakaamba bantu batali Bakamboni ibakwete naa bakwetwe kubantu bakazooba Bakamboni ba Jehova:

•   “Myaka yakusaanguna iili cisambomwe njotwakakkala antoomwe yakazwide mazwanga alimwi akutyompwa. Ivete naakaba umwi wa Bakamboni ba Jehova, wakaba aluyando alimwi wakatalika kukkazika moyo kwiinda kaindi. Kucinca ooku kwakapa kuti cikwati cesu cizumanane.”​—Ba Clauir, baku Brazil.

•   “Tiindakakkomana ciindi balumi bangu ba Chansa nobakatalika kwiiya Bbaibbele a Bakamboni ba Jehova akaambo kakuti ndakali kuyeeya kuti baandaanya mikwasyi. Kuzwa leelyo, ndabona kuti Bbaibbele lyagwasya kapati mucikwati cesu.”​—Ba Agness, baku Zambia.

 Mumulimo wesu wakukambauka, tulabatondezya basimukoboma busongo buli mu Bbaibbele mbobukonzya kubagwasya

•   Kusala kabotu muntu ngobayanda kukwatana limwi

•   Kuzwidilila mumwaka wakusaanguna mucikwati

•   Kukkala abamakwe

•   Kubelesya kabotu mali

•   Kuleka kukazyanya

•   Kwiiya kulekelela

•   Kuyiisya bana

 Kwaamba masimpe, zimwi ziindi kulaleta mazwanga. Mucikozyanyo, mulipooti yamu 1998 yakapegwa aba research company Sofres kwakajanika kuti mucikwati comwe akati kazikwati izili 20 omwe mwali Kamboni, kwakali mapenzi manji ciindi omwe ooyo naakacinca bukombi.

 Jesu wakasinsima kuti aabo batobela njiisyo zyakwe zimwi ziindi balakonzya kupenzyegwa mumukwasyi. (Matayo 10:32-​36) Will Durant, syaazibwene mumakani aakaindi wakaamba kuti mu Bulelo Bwabana Roma, “cikombelo ca Bunakristo cakapegwa mulandu wakwaandaanya mikwasyi,” a alimwi Bakamboni ba Jehova bamwi bapegwa mulandu uuli boobu mazuba aano. Pele sena caamba kuti Kamboni nguuleta mazwanga?

 Nobakali kubeteka mulandu Bakamboni ba Jehova mobakatamikizyigwa kuti baandaanya mikwasyi, ba European Court of Human Rights bakaamba kuti banamukwasyi batali Bakamboni kanji-kanji mbabaleta mazwanga akaambo kakuti tabayandi “kuzumina akulemeka lwaanguluko lwabukombi ndwajisi munamukwasyi lwakutobela nzyaiya kucikombelo cakwe.” Nkuta yakayungizya kuti: “Eeci cilidumide kumikwasyi yoonse mobaindene bukombi, kubikkilizya a Bakamboni ba Jehova.” b Noliba leelyo Bakamboni ba Jehova nobakazyigwa akaambo kabukombi, balasolekesya kutobela lulayo lwamu Bbaibbele lwakuti: “Mutapilusizyi muntu uuli woonse bubi. . . . Kamusoleka kusikila mpomugolela kukkala muluumuno abantu boonse.”​—Baroma 12:17, 18.

 Bakamboni batobela lulayo lwamu Bbaibbele lwakukwata “buyo mu Mwami,” nkokuti, kukwata muntu uusyoma nzyobasyoma. (1 Bakorinto 7:​39) Mulawo ooyu uzwa mu Bbaibbele alimwi ulagwasya. Mucikozyanyo, cibalo camu 2010 cakazwa mubbuku lyakuti Journal of Marriage and Family cakaamba kuti “banabukwetene ibaunka kucikombelo comwe, ibajisi zilengwa zikozyenye, alimwi alusyomo lomwe” inga balamvwana kapati. c

 Nokuba boobo, Bakamboni tabakulwaizyi baabo bakwetwe kubantu batali Bakamboni kwaandaana ambobakwetene limwi. Bbaibbele lyaamba kuti: “Ikuti mukwesu umwi kajisi mukaintu uutasyomi, pele mukaintu ooyo kalisungwide kukkala anguwe, atamusiyi pe; alimwi ikuti mukaintu kajisi mulumi uutasyomi, pele kalisungwide kukkala anguwe, atamusiyi pe mulumaakwe.” (1 Bakorinto 7:​12, 13.) Bakamboni ba Jehova balautobela mulawo ooyu.