Bakamboni ba Jehova balazilemeka mfwulumende azitondezyo ziiminina mfwulumende eezyo. Tatubakasyi aabo ibasala kwaamba cikonke cakulemeka cisi, kusalyuuta ndembela naa kwiimba lwiimbo lwacisi.

 Nokuba boobo, swebo Tobakamboni ba Jehova tatutoli lubazu mumapobwe aali boobo akaambo kakuti tusyoma kuti alakazyanya ancoliyiisya Bbaibbele. Tulalumba ciindi bamwi nobalemeka nzyotusyoma mbubwenya mbotulemeka nzyobasyoma.

Mucibalo eeci tulalanga-langa makani aatobela:

•  Ninjiisyo nzi zyamu Bbaibbele zijatikizyidwe?

•  Ino mbuti kuti kakuli mulawo waamba kuti tuleelede kutola lubazu?

•  Sena Bakamboni ba Jehova balajatikizyigwa mutwaambo twacisi naa tujatikizya bukkale?

 Kusala kwesu kuyeeme anjiisyo zyamu Bbaibbele eezyi zyobilo:

•   Alikke Leza nguweelede kukombwa. Bbaibbele lyaamba kuti: “Ngu Jehova Leza wako ngoelede kukomba, alimwi ngonguwe alikke ngoelede kubelekela mulimo uusetekene.” (Luka 4:8) Muzikonke zyakulemeka cisi alimwi amunyimbo zyacisi mulakonzya kuba mabala aakusyomezya kuti muntu unoolyaabide kucisi cakwe kwiinda zintu zyoonse. Aboobo Bakamboni ba Jehova balimvwa kuti taciluzi pe kutola lubazu muzintu zili boobu.

   Kuyungizya waawo, Bakamboni ba Jehova balimvwa kuti kusalyuuta ndembela nkukomba, ncimwi buyo akukomba mituni, calo Bbaibbele ncolikasya. (1 Bakorinto 10:14) Basikwiiya makani aakaindi bamwi baamba kuti ndembela ncitondezyo cabukombi. Sikwiiya makani aakaindi Carlton J. H. Hayes wakalemba kuti: “Kuyandisya cisi kuli mbuli bukombi bwalo bwiimininwa andembela.” a Kujatikizya Banakristo bakusaanguna, mulembi Daniel P. Mannix wakaamba kuti: “Banakristo bakali kukaka . . . kupa zipaizyo kumwami waba Roma​—calo mazuba aano cikonzya kweezyanisyigwa akukaka kusalyuuta ndembela.” b

  Nokuba kuti Bakamboni ba Jehova tabasalyuuti ndembela, tabakonzyi kwiinyonyoona, kwiiwumpa, naa kutailemeka munzila iili yoonse yalo naa citondezyo buyo cimwi cacisi.

•   Bantu boonse baleelene mumeso aa Leza. (Milimo 10:34, 35) Bbaibbele lyaamba kuti “kuzwa kumuntu omwe [Leza] wakalenga bantu ibali muzisi zyoonse.” (Milimo 17:26) Akaambo kaceeci, Bakamboni ba Jehova basyoma kuti taciluzi kulemeka musyobo wabantu umwi naa cisi cimwi kwiinda cimwi. Tulabalemeka bantu boonse, tacikwe makani ankobazwa naa nkobakkala.​—1 Petro 2:17.

 Bakamboni ba Jehova tabaikazyi mfwulumende. Tusyoma kuti mfwulumende ncibeela ‘cabubambe bwa Leza’ mbwazumizya kuti kabuliko. (Baroma 13:1-7) Alimwi tusyoma kuti Banakristo beelede kubamvwida beendelezi.​—Luka 20:25.

 Pele, ino mbuti kuti milawo yamfwulumende yakazyanya amilawo ya Leza? Zimwi ziindi, kuti kacikonzyeka, balakonzya kulomba kumfwulumende kuti milawo eeyo icincwe. c Pele ikuti kacitakonzyeki kucinca, Bakamboni ba Jehova basala “kumvwida Leza mbwali mweendelezi kutali bantu.”​—Milimo 5:29.

 Peepe. Bakamboni ba Jehova tabajatikizyigwi mutwaambo twamapolitikisi naa tujatikizya bukkale. Ciindi notutaambi cikonke cakulemeka cisi, kutasalyuuta ndembela, naa kwiimba lwiimbo lwacisi, tacaambi kuti tuli basikukazya mfwulumende. Muciindi caboobo, tutobela buyo ncolyaamba Bbaibbele kujatikizya zintu eezyi.