Ndakazyalilwa ku Tiranë, mudolopo mpati lya Albania. Mukwasyi wangu wakali mucete. Bataata bakali kusyomeka akubeleka mawoola manji kutegwa batulanganye. Pele twakali kupenga lyoonse kujana ziyandika. Nondakacili mwana cakali kundicisa kapati kuti twakali bacete. Kubwana tiindakajisi mabbusu alimwi kanji-kanji kulya kwakali kwakuwaya-waya.

 Ndakatalika kubba nondakacili mwana, kandiyeeya kuti ndakali kugwasyilizya kujana ziyandika zyamukwasyi. Mukuya kwaciindi, bakapokola bakandijata. Aboobo mu 1988, nondakajisi myaka 14, bataata bakanditola kucikolo nkobagwasya bana batamvwi. Ndakakkala myaka yobilo akwiiya mulimo wakuumpilila. Nondakamana, ndakayandaula mulimo kutegwa kandijana mali cakusyomeka, pele tiindakaujana. Bantu banji mu Albania tiibakali kubeleka akaambo kamapolitikisi. Ndakatyompwa kapati aboobo ndakatalika kujanika abalongwe bakaindi akutalika kubba alimwi. Tiilyakalampa, mebo abeenzuma twakajatwa akwaangwa myaka yotatwe.

 Nondakaangununwa, ndakazumanana kupanga milandu. Zintu tiizyakali kweenda kabotu mu Albania mumakani aamakwebo, aboobo cisi cakali mupenzi lyamali. Muziindi eezyi zyakali kukatazya, ndakali kupanga mali manji kwiinda mukucita makwebo aatazumizyidwe. Bumwi buzuba notwakamana kubba, beenzuma bobilo bakaangwa, pele mebo ndakatija akuzwa mucisi kuyoowa kwaangwa myaka minji. Aciindi eeco, mebo abakaintu bangu ba Julinda, twakajisi mwana wakajisi myezi iili akati ka 4 a 5.

 Twakaakulijana ku England. Ndakajisi makanze akutalika buumi bupya abakaintu bangu amwaneesu, pele tiicakali cuuba-uba kucinca bukkale bwangu bwakaindi. Tiilyakalampa, ndakatalika alimwi kucita makwebo aatazumizyidwe, aciindi eeci kwakali kusambala misamu iikola aboobo ndakali kupanga mali manji.

 Ino bakaintu bangu bakali kulimvwa buti nondakali kusambala misamu iikola? Amuleke bamulwiide: “Lyoonse ndakali kuyanda kuba muvwubi, nkaambo buumi ku Albania bwakali buyumu. Aboobo ndakaliyandide kusola nzila iili yoonse yakali kukonzya kusumpula buumi. Ndakali kuyeeya kuti mali alakonzya kubucinca buumi bwesu, aboobo ndakali kulubazu lwabalumi bangu tacikwe makani kuti bakali kubeja, kubba, alimwi akusambala misamu iikola kutegwa bajane mali.”

 Mpoonya, mu 2002, bulangizi mbotwakajisi bwakuba abuumi bubotu bwakamana cakutayeeyela. Ndakajatwa amisamu iikola minji akwaangwa alimwi.

 Bbaibbele lyakatalika kundicinca kanditazyi. Mu 2000, bakaintu bangu bakayaanya Bakamboni ba Jehova mpoonya bakatalika kwiiya Bbaibbele ambabo. Kubandika Bbaibbele kwakali kunditolwaazya. Pele bakaintu bangu bakali kukukkomanina. Bakaamba kuti: “Ndakazwa mumukwasyi wabakombi, alimwi ndakali kuliyanda akulilemeka Bbaibbele. Lyoonse ndakali kuyanda kuzyiba ncoliyiisya, aboobo ndakakkomana kwiiya Bbaibbele a Bakamboni. Zintu zinji nzyobakali kundiyiisya zyakali kupanga maano. Nzyondakaiya zyakandigwasya kucinca asyoonto mubuumi. Pele, ndakacili kuyeeya kuti mali alakonzya kutuletela lukkomano, kusikila nobakaangwa balumi bangu. Lino eeci cakandipa kucinca cakumaninina. Cakacitika cakandipa kuzyiba kuti ncolyaamba Bbaibbele kujatikizya mali ncamasimpe. Twakacita cili coonse kutegwa tuvwube, pele kunyina naakatuletela lukkomano. Mpoonya ndakabona kuti ndakeelede kutobela zyeelelo zya Leza cakumaninina.”

 Mu 2004, ndakaangununwa, pele tiilyakalampa ndakasola kuti nditalike alimwi kusambala misamu iikola. Aciindi aawa, bakaintu bangu bakalicincide, alimwi bakaamba cintu cakandipa kukkala ansi kuyeeya. Bakati: “Tandicaayandi mali aanu. Ndiyanda balumi bangu, alimwi bana bangu bayanda bausyi.” Ncobakaamba cakandigambya, pele bakaliluzi. Kwamyaka minji ndakaluulekezyede mukwasyi wangu. Alimwi ndakatalika kuyeeya kujatikizya mapenzi ngondakali kujana nondakali kuyandaula mali munzila yabumpelenge. Aboobo ndakasala kwiileka micito yangu yakaindi akucileka kujanika abalongwe bangu bakaindi.

 Icipati cakapa kuti ndicince nciindi notwakaunka kumiswaangano ya Bakamboni ba Jehova amukwasyi wangu. Bantu mbotwakaswaangana limwi bakandikkomanisya kapati nkaambo bakali kusangalizya. Mukuya kwaciindi, ndakatalika kwiiya Bbaibbele.

 Ndakaiya kuzwa mu Bbaibbele kuti “kuyandisya mali ngomuyanda wamisyobo yoonse yazintu zibyaabi, eelyo kwiinda mukuba aluyandisisyo luli boobu bantu bamwi . . . baliyasaula koonse-koonse amacise manji.” (1 Timoteyo 6:9, 10) Eelo kaka lugwalo oolu ndwamasimpe! Ndakausa kapati kuzintu nzyondakali kucita kaindi nkaambo zyakali kupa mukwasyi wangu kuusa kumane andime buya. (Bagalatiya 6:7) Ciindi nondakaiya luyando Jehova alimwi a Mwanaakwe, Jesu Kristo, ndobajisi kulindiswe, ndakatalika kucinca bube bwangu. Ndakatalika kubikkila maano kuzintu nzyobayandika bamwi kwiinda zyangu, eeci cakali kubikkilizya kujana ciindi cinji cakuba abanamukwasyi.

 Ndagwasyigwa alulayo lwamu Bbaibbele lwaamba kuti: “Ibukkale bwanu butabi bwakuyandisya mali pe, pele amukkutile azintu nzyomujisi lino.” (Bahebrayo 13:5) Lino ndijisi luumuno lwamumizeezo alimwi amanjezyeezya aasalala. Eeci candiletela lukkomano ndondatakajisi kaindi. Cikwati cesu cayuma alimwi mukwasyi wangu ulikamantene lino.

 Ndakali kuyeeya kuti, ikuti katujisi mali manji twakali kuyoojana lukkomano. Lino ndazyiba kupanga milandu alimwi akuyandisya mali mbozyakandiletela macise manji. Tatuvwubide pe, pele ndilimvwa kuti twakajana cintu ciyandika kapati mubuumi bwesu, cilongwe a Jehova Leza. Kumukomba calukamantano mbuli mukwasyi catuletela lukkomano lwini-lwini.