Ndakakomenena mudolopo lya Tampere, ku Finland. Bamukwasyi wangu tiibakali kwaabikkila maano kapati makani aabukombi, pesi lwiiyo lwakumubili alimwi akulilemeka kabotu bakali kuzibikkila maano. Bamaama bazwa ku Germany, alimwi ciindi nindakali mwana, ndakali kuswaya ku West Germany, nkobakali kukkala bakaapa.

 Kuzwa kubwana ndakali kuzikkomanina zisobano. Kumatalikilo ndakali kusobana misyobo iili yoonse yazisobano, pele nindakakkwanya myaka iili 14 ndakasala kubikkila maano kutenesi. Nindakakkwanya myaka iili 16, ndakali kutilena ziindi zyobilo naa zyotatwe abuzuba. Masyikati ndakali kutilena ziindi zyobilo abakkoocci mpoonya masiku ndakali kucita oobo endikke. Zyakali kundikkomanisya zibeela ziindene-indene zyacisobano eeci; kuuma tenesi kwakali kundigwasya kulisunka mumizeezo alimwi akumubili naa ndakali muyumu buti. Nokuba kuti ndakali kuyanzana abeenzuma akunywa tukoko zimwi ziindi, tiindakalijana mumapenzi aaboola akaambo kakubelesya misamu iikola naa bukoko. Kuuma tenesi ncecintu ncondakali kubikkila kapati maano mubuumi bwangu.

 Nindakakkwanya myaka iili 17, ndakatalika kuuma mumatonamenti aaitwa kuti ATP. a Nindakazunda mumatonamenti aali mbwaabede, ndakaba ampuwo mucisi coonse. Kandili amyaka iili 22, ndakali akati kabasikusobana tenesi bali 50 ibainda munyika yoonse.

 Kwamyaka minji, ndaizinguluka nyika yoonse kuyaabuuma tenesi. Ndakabona masena mabotu, pele alimwi ndakabona mapenzi manji ngobajana bantu munyika mbuli bugwebenga, kubelesya misamu iikola, alimwi akusofwaazyigwa kwanyika. Mucikozyanyo, nitwakali ku United States, twakaambilwa kuti tatweelede kuunka kumasena aambi akaambo kabugwebenga. Zyoonse eezyi zyakali kundikopa. Aboobo, nokuba kuti ndakali kucita zintu nzyondikkomanina, kumamanino aabuzuba, tiindakali kulimvwa kukkutila.

 Musimbi ngondakasyabide, Sanna, wakatalikide kwiiya Bbaibbele a Bakamboni ba Jehova. Wakandigambya kuti wakali kwaakkomanina makani aabukombi, pesi tiindakamukasya kwiiya. Mu 1990 twakakwatana, mpoonya mwaka wakatobela wakabbapatizyigwa akuba umwi wa Bakamboni ba Jehova. Pele mebo, tiindakali kwaabikkila maano makani aabukombi, nokuba kuti ndakali kusyoma kuti Leza nkwali. Ndakazooyeeya kuti bakaapa baku Germany bakali kulibala kapati Bbaibbele, alimwi bakalindiyiisyide akupaila.

 Buzuba bumwi, mebo aba Sanna notwakaunka kuyooswaya banabukwetene bamwi Bakamboni, balumi, ba Kari bakanditondezya businsimi bwamu Bbaibbele bwaamba “mazuba aamamanino.” (2 Timoteyo 3:​1-5) Akandinjila kapati mumoyo makani aaya, nkaambo ndakazyiba ikaambo ncokuli zintu zibyaabi munyika. Buzuba oobo tiitwakasakana kubandika makani aabukombi. Pele kuzwa waawo, twakatalika kubandika zyamu Bbaibbele aba Kari, alimwi zyoonse nzyondakaiya zyakali kumvwika. Akaambo kakuti ndakajisi bubi alimwi ndakali kweenda kapati, tiitwakali kusitikila kwiiya, pele ba Kari tiibakatyompwa pe. Bakali kundilembela lugwalo buya kwiingula mibuzyo njondakabuzya notwakali kwiiya. Yoonse mibuzyo mipati iijatikizya buumi yakaingulwa kubelesya Bbaibbele, eelyo asyoonto-syoonto ndakatalika kubona mutwe wamakani wa Bbaibbele, wakuti Bwami bwa Leza buyoopa kuti makanze aakwe azuzikizyigwe. Kuzyiba zina lya Leza, Jehova, akubona zintu nzyaatucitila kwakandikkomanisya kapati. (Intembauzyo 83:18) Icakandinjila kapati mumoyo mbubambe bwacituuzyo cacinunuzyo ncaakatupa, tiibwakali buyo bubambe bwakalicitikila naa kwiinzya buyo mulawo pele cakatondezya luyando lwa Leza. (Johane 3:​16) Alimwi ndakaiya kuti ndakajisi coolwe cakuba mulongwe wa Leza akuyoopona kukabe kutamani muparadaiso yaluumuno. (Jakobo 4:8) Ndakatalika kulibuzya kuti: “Ino inga ndatondezya buti kulumba?”

 Ndakakkala ansi kuyeeya buumi mbondakali kupona. Ndakaiya mu Bbaibbele kuti lukkomano lunji luboola akaambo kakupa, aboobo ndakabona kuti ndakeelede kutalika kwaambila bamwi nzyondisyoma. (Milimo 20:35) Mbwaanga kuuma tenesi wakali mulimo buya, ndakali kujanika kumatonamenti mazuba aabalilwa ku 200 mumwaka, aboobo tiindakali kujanika aŋanda mazuba aayo. Boonse mumukwasyi bakali kulangila ndime kutegwa ndibalanganye. Ndakabona kuti ndakeelede kubambulula buumi bwangu.

 Ndakalizyi kuti kucileka mulimo ooyu waatala akaambo kabukombi kwakali kuyoopa kuti banji batandimvwisyi. Pele coolwe cakuzyiba Jehova akuba abuumi butamani cakali cibotu kapati kwiinda bulumbu buli boonse mbondakali kuyoopegwa akaambo kakuuma tenesi, aboobo tiicakandikatazya kusala cakucita. Ndakakanza kutabikkila maano kuzintu nzyobakali kukonzya kwaamba bantu, nkaambo ooku kwakali kusala kwangu. Lugwalo lwakandigwasya kulizunda sunko eeli ndugwalo lwa Intembauzyo 118:8, ilwaamba kuti: “Jehova uli kulubazu lwangu; tandikooyoowa pe. Ino muntu inga wandityani?”

 Aciindi aawa, kwakasika bantu ibakali kuyanda kundipa mulimo iwakajisi mali manji, ngondakali kukonzya kubelesya kwamyaka minji. Nokuba boobo, ndakalisalide kale cakucita, aboobo ndakakaka, alimwi mukuya kwaciindi ndakacileka kuuma mumatonamenti aa ATP. Ndakazumanana kwiiya Bbaibbele, aboobo mu July 2, 1994, ndakabbapatizyigwa akuba umwi wa Bakamboni ba Jehova.

 Mukwiimpana abamwi, mebo tiindakacitikilwa ntenda buya kutegwa ndiyeeye kuti kuli Leza. Alimwi takuli kuti ndakali kukayandaula buya kasimpe. Ndakali kulimvwa kuti buumi bwangu bwakali buyo kabotu akuti tiindakali kuyandika zintu azimwi. Nokuba boobo, mbuli kuti kasimpe kamu Bbaibbele kakali kulindila kuti ndikajane, cakutayeeyela, ndakajana kuti buumi bulaampindu, alimwi buumi bwangu bwasumpuka kapati kwiinda mbondakali kukonzya kweezyeezya. Mukwasyi wesu wayuma alimwi wakamantana kapati. Alimwi ndilikkomene kapati kuti bana bangu boonse botatwe batobela mikondo yangu, kutali kuba basizisobano, pele Banakristo.

 Ndicikukkomanina kuuma tenesi. Mumyaka yainda, ndali kubeleka tulimo-limo tujatikizya tenesi kutegwa ndilanganye mukwasyi wangu. Mucikozyanyo, cimwi ciindi ndakali kkoocci alimwi a manager wabasikusobana tenesi. Pele buumi bwangu tabuciyeeme azisobano. Kumatalikilo, ndakali kutirena mawoola manji nsondo ansondo kutegwa ndibe sikuuma tenesi uucibwene, akuti kandizunda. Lino, ndili mukambausi waciindi coonse alimwi ndilikkomene kubelesya ciindi cangu kugwasya bamwi kwiiya akutobela njiisyo zyamu Bbaibbele izyakacinca buumi bwangu. Ndijana lukkomano kwiinda mukubikkila maano kucilongwe cangu a Jehova Leza alimwi akwaambila bamwi bulangizi bwangu bwakumbele.​—1 Timoteyo 6:​19.