Mukwasyi wesu uzwa ku Tonga, icisi cijisi nsumbu zili 170, icili ku southwestern Pacific. Ku Tonga, twiitwakajisi zinji zyakumubili, alimwi twakali kukkala kakunyina malaiti naa mootokala. Pele ŋanda yesu yakalijisi pompi alimwi twakali kuvwuba nkuku. Ciindi caholide kucikolo, mebo abanabokwesu bobilo twakali kubagwasya bataata afaamu, alo mpotwakali kulima mabbanana, yam, taro, amwaanja. Kwiinda mukulima akusambala zisyango eezyi, mpoonya akucita tulimo tumbi, bataata bakacikonzya kulanganya mukwasyi. Caboola kukukomba, mbubwenya mbuli bantu banji bakali kukkala ansumbu, mukwasyi wesu wakali kulilemeka Bbaibbele alimwi twakali kuunka kucceecci lyoonse. Nokuba boobo, twakali kusyoma kuti nzila ilikke yakusumpula buumi bwesu yakali yakulongela kucisi civwubide.

 Nondakakkwanya myaka iili 16, baaisya bakalonzya mukwasyi wesu akututola ku California, U.S.A. Eelo kaka kwakali kucinca kuyumu ooku kulindiswe nkaambo zilengwa zyakaliindene kapati! Nokuba kuti twakatalika kujana mali manji, twakali kukkala mubusena mwabantu bacete, imwakali bugwebenga alimwi ibantu banji bakali kubelesya misamu iikola. Masiku twakali kumvwa ntobolo zilila, alimwi basimukoboma bakali kuyoowa bakabwalala. Bantu banji bakali kweenda antobolo kulikwabilila naa kubamba mazwanga. Ndakadubulwa ciindi cimwi, alimwi asunu ndicijisi musyonga mucamba.

 Nindakali kucikolo casekondali, ndakali kuyanda kuba mbuli bana bacikolo bamwi. Asyoonto-syoonto ndakatalika kujanika kumapobwe aateendelezyeki, kunywa bukoko cakuciindizya, kulwana, akubelesya misamu iikola. Mukuya kwaciindi, ndakaba acizibilizi cakufweba lubanje. Aboobo ndakatalika kubba kutegwa ndijane mali aakuula misamu iikola. Nokuba kuti banamukwasyi bakali kuunka kucceeci lyoonse, kunyina nobakandipa lulayo lwakundigwasya kutayungwa abeenzuma. Ziindi zinji ndakaangwa akaambo kakulwana. Buumi bwangu bwakali kuyaabwiindila kubija! Mane buya ndakaangwa muntolongo.

 Buzuba bumwi mu 1997, nondakali muntolongo, mwaange umwi wakandibona kandijisi Bbaibbele. Cakali ciindi ca Kkilisimasi, ciindi bantu baku Tonga ncobabona kuti cilisetekene kapati. Wakandibuzya naa ndakalizyi cini Bbaibbele ncolyaamba kujatikizya kuzyalwa kwa Kristo, pele kunyina ncondakazyi. Wakanditondezya cibalo camu Bbaibbele caamba kuzyalwa kwa Jesu, eelyo ndakabona kuti zilengwa zinji zya Kkilisimasi tazyaambidwe kulikoonse. (Matayo 2:1-12; Luka 2:5-14) Ndakagambwa kapati, mpoonya ndakatalika kulyaambauzya kuti ino ncinzi acimbi Bbaibbele ncolyaamba. Mwaalumi ooyu wakali kujanika kumiswaangano ya Bakamboni ba Jehova njobakali kucitila muntolongo, aboobo ndakasala kuti ndimusangane. Bakali kubandika bbuku lyamu Bbaibbele lya Ciyubunuzyo. Nokuba kuti tiindakali kumvwisya izyakali kubandikwa, ndakabona kuti zyoonse nzyobakali kuyiisya zyakali kuzwa mu Bbaibbele.

 Ciindi Bakamboni nobakandilomba kuti batalike kundiyiisya Bbaibbele, ndakabotelwa kapati. Ciindi cakusaanguna mubuumi, ndakaiya cisyomezyo camu Bbaibbele kujatikizya paradaiso anyika. (Isaya 35:5-8) Aboobo ndakaiya kuti, kutegwa ndimukkomanisye Leza, ndakeelede kucinca bukkale bwangu. Ndakazyiba kuti Jehova Leza inga tanaandizumizya kunjila munyika mpya ikuti ndazumanana atumpenda twangu tubyaabi. (1 Bakorinto 6:9, 10) Aboobo ndakasala kuti kandilijata kuti naa ndanyema, kucileka kufweba tombwe, alimwi akucileka kuciindizya kunywa bukoko mpoonya akuleka kubelesya misamu iikola.

 Mu 1999, kanditanaangululwa, balupati-pati bakandilonzya akunditola kuntolongo iimbi. Kwakainda mwaka kakunyina kubonana a Bakamboni. Pele ndakalikanzide kuzumanana kucinca. Mpoonya mu 2000, bamfwulumende bakakukaka kulomba kwangu kwakuti ndikkale mu United States, aboobo bakandijola alimwi ku Tonga.

 Nondakasika ku Tonga, ndakabayandaula Bakamboni ba Jehova akutalika alimwi kwiiya Bbaibbele. Ndakali kuzikkomanina nzyondakali kwiiya, alimwi acimwi cakandakkomanisya nkubona kuti nzyobakali kuyiisya Bakamboni bakunsumbu zyakali kuzwa mu Magwalo mbubwenya mbuli mbobakali kucita Bakamboni baku United States.

 Bataata bakalizyibidwe kapati mucilawo akaambo kacuuno caatala ncobakajisi mucikombelo cabo. Aboobo kumatalikilo banamukwasyi bakagambwa akubijilwa akaambo kakuti ndakali kuyanzana a Bakamboni ba Jehova. Pele mukuya kwaciindi, bazyali bangu bakakkomana kubona njiisyo zyamu Bbaibbele mbozyakali kundigwasya kucinca buumi bwangu.

 Cintu cimwi icakandikatazya kapati kuleka ncilengwa cakunywa bukoko budumide kapati mucilawo. Abuzuba baalumi banji balakkala kunywa bukoko bwiitwa kuti kava bwalo mbobaunza kubelesya miyanda yacisyango cimwi. Lino nkondizwa, ndakali acilengwa cakuunka kumasena nkobanywa kava cakuti ndakali kunywa kusikila limwi ndanetuka. Cimwi cakapede kuti penzi eeli likomene, nkuyanzana abalongwe ibatakali kulemeka zyeelelo zyamu Bbaibbele. Mukuya kwaciindi ndakagwasyigwa kubona kuti zilengwa zyangu zyakali kumunyemya Leza. Kutegwa Leza andilongezye akundikkomanina, ndakacinca bukkale bwangu.

 Ndakatalika kujanika kumiswaangano yoonse ya Bakamboni ba Jehova. Kuyanzana abantu ibakali kukkomanisya Leza kwakandigwasya kukazya masunko. Mu 2002, ndakabbapatizyigwa kuba Kamboni wa Jehova.

 Ndagwasyigwa kukukkazika moyo kwa Leza kweelana ambolyaamba Bbaibbele: “Jehova . . . umukkazikila moyo nkaambo tayandi kuti muntu uuli woonse anyonyoonwe, pele uyanda kuti boonse bakonzye kweempwa.” (2 Petro 3:9) Naali bunyonyweede kale bweende bwazintu oobu bubyaabi, pele wabuzumizya kutegwa buzumanane kuti bantu bali mbuli ndime bakonzye kuba acilongwe anguwe. Inga ndilombozya kuti andibelesye kutegwa ndigwasye bamwi kuti abalo bacite mbubonya.

 Kwiinda mukugwasyigwa a Jehova, ndakatalika kubweendelezya buumi bwangu. Alimwi ndakacileka kubbida bamwi kutegwa nduule misamu iikola amakoko. Muciindi caboobo, ndilasoleka kugwasya bantu kutegwa bamuzyibe Jehova abalo. Akaambo kakwaanzana a Bakamboni ba Jehova, ndakajana bakaintu bangu ba Tea. Antoomwe amwaneesu musankwa, tupona buumi bukkomanisya. Mebo abalo tulabayiisya bamwi ncoliyiisya Bbaibbele kujatikizya bulangizi bwakupona kukabe kutamani muparadaiso yaluumuno.