Ndakazyalilwa ku Montreal, dolopo liinda kukomena ku Quebec, Canada. Mebo abanabokwesu botatwe twakakomezyegwa abazyali basiluyando ku Rosemont. Twakali kupona buumi bukkomanisya alimwi bwaluumuno.

 Nindakacili mwana, ndakatalika kulikkomanina Bbaibbele. Nindakakkwanya myaka iili 12, ndilayeeya kubala Cizuminano Cipya caamba zyabuumi bwa Jesu, alimwi ndakali kulimvwa kabotu. Luyando lwakwe alimwi alweetelelo ndwaakajisi kubantu zyakandinjila mumoyo cakuti ndakali kuyandisya kumwiiya. Pele cuusisya ncakuti, kulombozya ooku kwakamana nindakali kuyaabukomena akutalika kuyanzana abantu batakali kabotu.

 Bataata bakali baimbi, aboobo tiibakandipa buyo cibelesyo cabo cakwiimbya, pele alimwi bakapa kuti kandiziyanda nyimbo akutalika kuzibikkila maano kapati. Ndakali kuziyanda kapati nyimbo cakuti tiilyakalampa, ndakaiya kulizya gita. Mukuya kwaciindi, twakapanga kabunga kabaimbi abeenzuma, mpoonya twakatalika kwiimba mubuleya. Ibaimbi bamwi ibakalaampuwo kapati bakandisikila akundilomba kuti basumpule nyimbo zyangu. Ndakasaina kkontulakiti akkampani imwi mpati yakali kulekkooda nyimbo. Nyimbo zyangu zyakaduma alimwi zyakali kulizyigwa lyoonse awailesi ku Quebec.

 Ndakali kulibonya mbuli kuti ndakalijisi zyoonse nzyondakali kuyanda. Ndakacili mwana alimwi ndakali ampuwo, ndakali kupanga mali manji kucita cintu ncondakali kukkomanina. Syikati, ndakali kuunka ku gym, kumaintavyu, kusaina ma autograph, akujanika a TV. Masiku, ndakali kwiimba kubuleya akuunka kumapobwe. Kutegwa ndicikonzye kwiimikila kumbele lyabantu banji, ndakatalika kunywa bukoko kandicili mwana mpoonya mukuya kwaciindi, ndakatalika kubelesya misamu iikola. Alimwi tiindakali kulilemeka.

 Ibamwi bakali kundinyomenena nkaambo bakali kuyeeya kuti ndilikkomene. Pele mukati, ndakali kulimvwa kulendelelwa, kwaambisya ndanooli endikke. Ndakali kulimvwa kutyompwa akulibilika kapati. Zintu nizyakali kweenda kabotu kapati, cakausisya kufwidwa babelesima bobilo akaambo kabulwazi bwa AIDS. Ndakanyongana kapati! Nokuba kuti ndakali kuziyanda nyimbo, ibukkale bwabaimbi bwakali kundisesemya.

 Nokuba kuti zintu zyakali kundeendela kabotu, ndakalizyi kuti kuli cakanyongene munyika. Nkaambo nzi ncokuli kutalulama kunji boobu? Ndakalibuzya kaambo Leza ncaatakali kubweza ntaamu. Masimpe ngakuti, lyoonse ndakali kupaila kuli Leza kutegwa andiingule. Ciindi cimwi nindakali kupumuna, ndakatalika kulibala Bbaibbele alimwi. Nokuba kuti tiindakali kuzimvwa zinji nzyondakali kubala, ndakalizyi kuti kweelede kuti mamanino alaafwaafwi.

 Nindakali kubala Bbaibbele, ndakaiya kuti aciindi cimwi Jesu wakaliimya kulya munkanda kwamazuba aali 40. (Matayo 4:​1, 2) Aboobo ndakatalika kuyeeya kuti, ikuti ndacita mbubwenya, andiza Leza ulaliyubununa kulindime, mpoonya ndakasala buzuba bwakutalika kuliimya kulya. Nsondo zyobilo kanditanatalika kuliimya kulya, Bakamboni ba Jehova bobilo bakandiswaya, ndakabanjizya muŋanda mbuli kuti ndakali kubalangila. Ndakamulanga Kamboni umwi wakajisi zina lyakuti Jacques mumeso akumubuzya kuti, “Ino inga twazyiba buti kuti tupona kumazuba aamamanino aanyika eeyi?” Wakandibalila lugwalo lwa 2 Timoteyo 3:​1-5 kutegwa andiingule. Ndakababuzya mibuzyo minji alimwi ndakakkomana abwiinguzi bukkazika moyo alimwi ibulimvwisya mbobakandipa, ibwakayeeme a Magwalo. Nibakandiswaya ziindi zili mbozibede, ndakabona kuti tiicakali kuyandika akuliimya kulya.

 Ndakatalika kwiiya Bbaibbele cakusitikila a Bakamboni. Muciindi, ndakaagela masusu aangu akutalika kujanika kumiswaangano yoonse ku Ŋanda ya Bwami. Mbobakanditambula kabotu kumiswaangano eeyi cakapa kuti ndisinizye kuti ndakajana kasimpe.

 Lino kutegwa ndizitobele nzyondakali kwiiya mu Bbaibbele, ndakeelede kucinca bukkale bwangu. Kusaanguna, ndakeelede kucileka kubelesya misamu iikola alimwi akubuleka bukkale bwakutalilemeka. Alimwi ndakeelede kucinca muuya wakuliyanda ngondakajisi akutalika kubabikkila maano bamwi. Mbwaanga ndakali kubalela endikke bana bangu, ndakeelede kwiiya kubikkila maano kuzintu nzyobakali kuyanda kumubili alimwi akumuuya. Aboobo ndakauleka mulimo wakwiimba akutalika kubeleka mulimo watakali kuvwolwa mali manji afakitori imwi.

 Kucinca bukkale bwangu munzila zyoonse eezyi tiicakali cuuba-uba. Nindakacileka kubelesya misamu iikola, ndakapenga kapati alimwi zimwi ziindi ndakali kujokela kucilengwa cangu. (Baroma 7:​19, 21-​24) Kuleka bukkale bwakutalilemeka ncecakali ciyumu kapati. Mulimo mupya ngondakajana wakali kulemya, kumane mali ngondakali kuvwola akali kutyompya. Cakanditolela myezi yotatwe kujana mali ngondakali kujana mumawoola obilo nindakali mwiimbi.

 Mupailo wakandigwasya ciindi nondakali kucinca bukkale bwangu. Alimwi ndakagwasyigwa kapati akubala Bbaibbele cakusitikila. Tupango twamu Bbaibbele tugaminide twakandiyumya kapati. Mucikozyanyo, lugwalo lwa 2 Bakorinto 7:1, lwalo lukulwaizya Banakristo ‘kulisalazya kuzintu zyoonse zisofwaazya mubili amuuya.’ Lugwalo lwa Bafilipi 4:​13 alwalo lwakandigwasya kubona kuti cakali kukonzyeka kucileka bukkale bwangu bubyaabi nolwaamba kuti: “Muzintu zyoonse ndilijisi nguzu kwiinda muli yooyo uundipa nguzu.” Jehova Leza wakawiingula mupailo wangu akundigwasya kumvwisya alimwi akutobela njiisyo zyamu Bbaibbele. Eeci cakandikulwaizya kulyaaba kulinguwe. (1 Petro 4:​1, 2) Ndakabbapatizyigwa akuba umwi wa Bakamboni ba Jehova mu 1997.

 Ndilisinizyide kuti nindakazumanana abukkale bwangu bwakaindi, nindalifwide sunu. Muciindi caboobo, ndipona buumi bukkomanisya kapati! Bakaintu bangu ba Elvie, ncilongezyo cipati. Tulikkomene kubelekela antoomwe mumulimo waciindi coonse wakugwasya bantu kwiiya Bbaibbele. Eeci cindipa kukkomana akukkutila. Ndilamulumba kapati Jehova kuti wakandikwelela kulinguwe.​—Johane 6:​44.