Ndakazyalilwa ku San Juan Chancalaito, dolopo nsyoonto ku Chiapas, Mexico. Mukwasyi wesu uzulilwa kubantu baitwa kuti ba Chol, kabunga kabantu bazwa kuba Maya. Twakali 12 mumukwasyi, mebo ndakali wasanu. Nindakacili mwana, mebo abanabokwesu toonse twakali kwiiya Bbaibbele a Bakamboni ba Jehova. Pele cuusisya ncakuti, tiindakalutobela lulayo lwamu Bbaibbele nindakacili mwana.

 Ciindi nindakajisi myaka iili 13 yakuzyalwa, ndakalitalikide kale kubelesya misamu iikola akubbida bantu. Mpoonya ndakazwa aŋanda akutalika kwiingaila. Nindakakkwanya myaka iili 16, ndakanjila mulimo wakubeleka mumuunda walubanje. Ndakabeleka kwamwaka omwe, mpoonya bumwi buzuba masiku, ciindi notwakali kutola lubanje abwato, baaIumi ibakajisi ntobolo, ibakali kubeleka kukkampani iimwi ayalo yakali kusambala misamu iikola, bakatalika kutulwana. Ndakasotokela mumaanzi nobakali kudubula mpoonya akuyamba mane ndaakuzabuka. Oobo mbondakafwutuka. Kumane, ndakaunka ku United States.

 Ku States, ndakazumanana kubelesya misamu iikola aboobo ndakanjila mumapenzi manji. Nindakakkwanya myaka iili 19, ndakaangwa akaambo kakubba akuyanda kujaya muntu. Kandili muntolongo, ndakanjila kabunga kazigwebenga akupanga milandu iimbi yakulwana. Aboobo, beendelezi bantolongo bakanditola kuntolongo iyakali kugatelwa kapati ku Lewisburg, Pennsylvania.

 Nondakali muntolongo ku Lewisburg, bukkale bwangu bwakaindila kubija. Mbwaanga ndakajisi kale ziganto zitondezya kabunga kazigwebenga nkondakali kuzulilwa, cakanduubila kunjila kabunga nkamunya aaka ikakali muntolongo eeyi. Ndakaindila kuba mukali, ciindi aciindi ndakali kulwana. Ciindi cimwi ndakalwana azigwebenga zimbi muntolongo. Twakalwana ciyoosya, kubelesya nkoli nzyobabelesya mucisobano ca baseball alimwi azibulo. Kutegwa nkondo eeyi imane, basikugatela ntolongo bakabelesya matiyagasi. Kuzwa waawo, beendelezi bantolongo bakanditola kucibeela mobakali kubikka baange bayoosya kapati. Ndakali kufwambaana kunyema alimwi akubelesya majwi mabi. Kuuma bantu tiicakali kundikatazya. Mubwini, ndakali kucikkomanina. Tiindakali kuusa akaambo kabukkale bwangu.

 Kucibeela ooko nkobakali kubikka baange bayoosya kapati, bunji bwaciindi ndakali kukkala mukaanda endikke, aboobo ndakatalika kubala Bbaibbele kutegwa nditalendelelwi. Mpoonya, sikugatela umwi mukaintu wakandipa bbuku lyakuti Mulakonzya Kupona Kukabe Kutamani mu-Paradaiso Anyika. a Nondakali kubala bbuku eeli, ndakatalika kuyeeya zintu zinji nzyondakayiide kubwana nondakali kwiiya Bbaibbele a Bakamboni. Kumane, ndakabona buumi bwangu mbobwakali kweetezya alimwi azintu zibyaabi nzyondakacita akaambo kabukali akulwana. Kunze lyaboobo, ndakauyeeya amukwasyi wangu. Mbwaanga bacizyi bangu bobilo bakazyooba Bakamboni ba Jehova, ndakatalika kuyeeya kuti, ‘Bayoopona kukabe kutamani.’ Mpoonya ndakalibuzya kuti, ‘Ino mebo ma?’ Kuzwa ciindi eeco, ndakakanza kucinca.

 Nokuba boobo, ndakalizyi kuti ndakeelede kugwasyigwa kutegwa ndicince. Aboobo, ndakasaanguna kupaila kuli Jehova Leza akumukombelezya kuti andigwasye. Mpoonya ndakalemba lugwalo kuofesi yamutabi ya Bakamboni ba Jehova ku United States kulomba ciiyo ca Bbaibbele. Bakuofesi yamutabi bakalomba bamumbungano iyakali afwaafwi ankondakabede kuti babikke bubambe bwakundiswaya. Aciindi eeci, bantu batakali bamukwasyi wangu tiibakali kuzumizyigwa kundiswaya, aboobo Kamboni umwi wamumbungano wakatalika kunditumina magwalo aakulwaizya alimwi amabbuku aamba zyamu Bbaibbele, alo aakapa kuti ndiyumye makanze aangu aakucinca.

 Ndakabweza ntaamu mpati ciindi nondakasala kuzwa mukabunga kazigwebenga nkondakali kuzulilwa kwamyaka minji. Musololi wakabunga kazigwebenga awalo wakali kucibeela ooko nkobakali kubikka baange bayoosya kapati, aboobo ndakaunka kulinguwe ciindi notwakali kulikondelezya akumwaambila kuti ndakali kuyanda kuba umwi wa Bakamboni ba Jehova. Ndakagambwa naakandaambila kuti: “Ikuti naa ulisinizyide, kozumanana. Tandikonzyi kukazyanya a Leza. Pele ikuti naa uyanda buyo kuzwa mukabunga, ulicizyi cisubulo mbocibede.”

 Mumyaka yobilo iyakatobela, babelesi bamuntolongo bakabona buumi bwangu mbobwakacinca. Aboobo, bakatalika kundilanganya kabotu. Mucikozyanyo, basikugatela bakaleka kundaanga nsimbi kumaanza ciindi nobakali kunditola mukusamba. Mane umwi wabasikugatela wakaboola kulindime akundikulwaizya kuti ndizumanane kupona kabotu. Mpoonya icakatobela ncakuti, beendelezi bantolongo bakandilonzya akunditola kuntolongo iimbi yakali afwaafwi iyatakali kugatelwa kapati kwalo nkondakamanizyila mwaka wamamanino wakwaangwa. Mu 2004, noyakakkwana myaka iili kkumi njondakaangidwe, ndakaangununwa akutolwa ku Mexico kubelesya bbaasi lyantolongo.

 Nindakasika buyo ku Mexico, ndakayandaula Ŋanda ya Bwami ya Bakamboni ba Jehova. Ndakaswaangana ciindi cakusaanguna kandisamide zisani zyakuntolongo, mbwaanga nzyezisani zibotu zilikke nzyondakajisi. Nokuba kuti tiindakali kulibonya kabotu, Bakamboni bakanditambula amaanza obilo. Mbobakanditambula cakapa kuti ndilimvwe kuba akati ka Banakristo bakasimpe. (Johane 13:35) Noyakamana miswaangano, baalu bamumbungano bakabikka bubambe bwakuti nditalike kwiiya Bbaibbele cakusitikila. Nokwakainda mwaka omwe mu September 3, 2005, ndakabbapatizyigwa akuba umwi wa Bakamboni ba Jehova.

 Mu January 2007, ndakaba mukambausi waciindi coonse, kubeleka mawoola aali 70 amwezi, ikuyiisya bantu Bbaibbele. Mu 2011, ndakamanizya Cikolo Cakwiiya Bbaibbele ca Bakwesu Batakwete (lino ciitwa kuti Cikolo Cabakambausi ba Bwami). Cikolo eeci cakandigwasya kapati kuzuzikizya mikuli yangu yamumbungano.

 Mu 2013, twakakwatana aba Pilar, kalungu kangu kaamoyo. Kanji-kanji balaseka ciindi nobaamba kuti cilabakatazya kusyoma zintu nzyondibaambila kujatikizya mbondakabede kaindi. Tandinabuzuba ndajokela kubuumi bwangu bwakaindi. Mebo abakaintu bangu tulasyoma kuti mbondibede sunu, citondezya nguzu nzyolijisi Bbaibbele zyakucinca bantu.​—Baroma 12:2.

 Ndilimvwa kuti majwi aa Jesu aali mulugwalo lwa Luka 19:10 aamba ndime. Wakaamba kuti: ‘Ndakaboolela kuyandaula akufwutula basweekede.’ Ndakalisweekede, pele lino tandicilimvwi kusweeka. Alimwi ndakacileka kulwana bantu. Ndilalumba mbolyakandicinca Bbaibbele, lino ndipona buumi bukkomanisya, ndilamvwana abantu, alimwi ciinda kubota ncakuti, ndilijisi cilongwe cibotu a Mulengi wangu, Jehova.