Ndakazyalilwa mudolopo lya Calgary ku Alberta, Canada. Nondakacili mwana, bazyali bangu bakalekana, mpoonya mebo abamaama twakalongela kuli bakaapa bazyala bamaama. Bakaapa bakali kutuyanda mebo abamaama, ndakali mwana uukkomene kapati. Inga ndilaiyeeya myaka yakubwana nondakali muluumuno alimwi akuyandwa.

 Nondakakkwanya myaka iili ciloba, buumi bwangu bwakacinca, ciindi bazyali bangu nobakajolana akulongela ku St. Louis, Missouri, mu United States. Kalitanalampa ndakajana kuti bataata mbasilunya. Mucikozyanyo, buzuba bwakusaanguna nondakakotoka kucikolo, ndakabaambila kuti kuli banduuma mpoonya ndawumuna buyo. Bakanyema kapati cakuti bakanduuma kwiinda mbobakanduuma basicikoloma! Bakandiyiisya kuti tandeelede kuumuna buyo kuti umwi wanditalika, aboobo ndakatalika kulwana abana bamwi nondakali buyo amyaka iili ciloba.

 Bamaama bakali kunyema akaambo kabukali bwabataata alimwi bakali kuzwangana citaambiki. Aboobo ndakatalika kubelesya misamu iikola alimwi akunywa bukoko nondakali amyaka iili 11. Ndakaba muntu uunyema-nyema alimwi kanji-kanji ndakali kulwana bantu mumugwagwa. Nondakamanizya cikolo, ndakaindila buya kuba sinkondo.

 Nondakakkwanya myaka iili 18, ndakanjila busikalumamba kuli ba U.S. Marine Corps. Ookuya ndakaiya mbwajaigwa muntu. Nokwakainda myaka yosanwe, ndakauleka mulimo wabusikalumamba, mpoonya ndakaunka kuyakwiiya psychology kandijisi makanze aakuti ndiyakunjila mulimo kuli ba Federal Bureau of Investigation. Ndakatalika kwiiya kuyunivesiti yaku United States alimwi ndakazumanana kwiiya nociba ciindi nindakajokela ku Canada.

 Kandili kuyunivesiti ndakatyompwa kapati kujatikizya mbobakali kucita zintu bantu. Bantu bakali kuliyanda, zintu zyoonse munyika zyakali kulibonya kuti tazikwe mulimo alimwi mapenzi aabantu akali kulibonya kuti inga taakonzyi kumana. Ndakacileka kusyoma kuti bantu inga bapa kuti nyika ibe busena bubotu.

 Akaambo kakuti tiindakazyi ncondakali kuponena, ndakatalika kunywa bukoko, kubelesya misamu iikola, kuyandisya mali, alimwi akutalilemeka mumakani aakoonana. Kuyungizya waawo, ndakaba muntu uuyandisya mapobwe alimwi ndakaba syaabasimbi. Busikalumamba mbondakaiya, bwakapa kuti kandiyandisya kulwana. Ndakalibikkila milawo kujatikizya ciluzi acitaluzi alimwi ndakali kumunyemena muntu ngondakali kubona kuti tanaabeendelezya kabotu bamwi. Mubwini, ndakaindila buya kuba sinkondo.

 Buzuba bumwi mebo amweenzuma notwakali aŋanda katukoledwe alimwi katulibambila kuyoosambala lubanje, mweenzuma wakandibuzya naa ndakali kumusyoma Leza. Ndakamwiingula kuti, “Ikuti Leza kalinguwe uupa kuti bantu kabapenga munyika, tandiyandi kumuzyiba naaceya!” Buzuba bwakatobela, buzuba bwakusaanguna kumulimo wangu mupya, mubelesima umwi iwakali Kamboni wa Jehova wakandibuzya kuti, “Ino muyeeya buti, sena Leza nguupa kuti bantu kabapenga munyika?” Ndakagambwa kapati nkaambo aaya ngamakani ngotwakali kubandika buzuba bwakainda, aboobo ndakali kuyanda kuzyiba zinji. Kwamyezi iili 6 yakatobela, twakabandika makani manji, alimwi wakanditondezya bwiinguzi mu Bbaibbele bwamibuzyo imwi iikatazya kapati kujatikizya buumi.

 Musimbi ngondakasyabide, walo ngondakali kukkala limwi tanaakali kuyanda kumwaambila zintu nzyondakali kwiiya. Buzuba bumwi mu Nsondo ndakamwaambila kuti ndatamba Bakamboni kuti bazootuyiisye Bbaibbele. Buzuba bwakatobela, nondakapiluka kuzwa kumulimo ndakajana kuti wabweza zintu zyoonse mpoonya akuzwa aŋanda. Ndakaunka aanze akutalika kulila. Alimwi ndakapaila kuli Leza, kumukombelezya kuti andigwasye. Eeci ncecakali ciindi cakusaanguna kubelesya zina lya Leza lyakuti Jehova, mumupailo.—Intembauzyo 83:18.

 Nokwakainda mazuba obilo, ndakaiya Bbaibbele ciindi cakusaanguna a Bakamboni banabukwetene. Nobakaunka ndakazumanana kubala bbuku ndyobakandisiila lyakuti, Mulakonzya Kupona Kukabe Kutamani mu-Paradaiso Anyika, akulimana buzuba oobo masiku. a Ncondakaiya kujatikizya Jehova Leza alimwi a Mwanaakwe, Jesu Kristo, cakandisika aamoyo. Ndakazyiba kuti Jehova ngusiluse alimwi cilamucisa ciindi notupenga. (Isaya 63:9) Cakandijata kapati kumoyo kuzyiba kuti Leza ulandiyanda alimwi akuzyiba kuti Mwanaakwe wakalyaaba akaambo kandime. (1 Johane 4:10) Ndakabona kuti Jehova wakali kundikkazikila moyo “nkaambo tayandi kuti muntu uuli woonse anyonyoonwe, pele uyanda kuti boonse bakonzye kweempwa.” (2 Petro 3:9) Jehova wakali kuyanda kuti ndibe mulongwe wakwe.—Johane 6:44.

 Ndakatalika kujanika kumiswaangano munsondo njoona eeyo. Ndakajisi masusu malamfwu, masikkiyo, alimwi ndakali kuyoosya mbondakali kulibonya, pele Bakamboni bakandilanganya kabotu mbuli wamukwasyi ngobakabwene kaindi. Bakatondezya bwini mbobabede Banakristo bakasimpe. Ndakalimvwa mbuli kuti ndapiluka kuli bakaapa, pele mubusena bwiinda kubota.

 Buce-buce zintu nzyondakali kwiiya mu Bbaibbele zyakatalika kucinca buumi bwangu. Ndakaagela masusu, ndakacileka bukkale bwakutalilemeka mumakani aakoonana, kucileka kubelesya misamu iikola alimwi abukolwi. (1 Bakorinto 6:9, 10; 11:14) Ndakali kuyanda kukkomanisya Jehova. Aboobo ciindi nondakazyiba kuti tanaakali kuzikkomanina zintu nzyondakali kucita, tiindakapa cilitamizyo kuzintu zibi nzyondakali kucita. Muciindi caboobo, cakali kundicisa kumoyo. Ndakali kulyaambauzya kuti, ‘tandikonzyi kuzumanana abukkale oobu.’ Kakunyina kuwaya-waya ndakali kusola kucinca mbondakali kuyeeya alimwi amicito yangu. Aboobo, kalitanalampa ndakatalika kubona bubotu ndacita zintu Jehova nzyaakali kuyanda. Nokwakainda myezi iili 6 kuzwa ciindi nondakatalika kwiiya Bbaibbele, ndakabbapatizyigwa akuba Kamboni wa Jehova mu July 29, 1989.

 Bbaibbele lyandigwasya kucinca bukkale bwangu. Kaindi ikuti umwi wanditalika ndakali sinkondo. Pele lino ndilasolekesya “kukkala muluumuno abantu boonse.” (Baroma 12:18) Aboobo ndilamumba Jehova akaambo kanguzu nzyolijisi Jwi lyakwe alimwi amuuya uusalala.—Bagalatiya 5:22, 23; Bahebrayo 4:12.

 Muciindi cakuba muzike wamisamu iikola, businkondo alimwi akulombozya bukkale bwakutalilemeka, lino ndilasolekesya kukkomanisya Jehova Leza alimwi akubeleka kusikila mpondigolela. Eeci cilabikkilizya akugwasya bamwi kuti bamuzyibe Leza. Nokwakainda myaka misyoonto kuzwa ciindi nondakabbapatizyigwa, ndakalongela kubusena bumwi bubulide ibwakali kuyandika bakambausi. Kwamyaka minji, ndajana lukkomano mukuyiisya bantu banji alimwi akubona Bbaibbele mbolicinca buumi bwabo. Alimwi ndilikkomene kuti bamaama bakaba umwi wa Bakamboni ba Jehova, munzila imwi akaambo kakucinca nkobakabona kulindime.

 Mu 1999, ndakanjila cikolo lino ciitwa kuti Cikolo Cabakambausi ba Bwami ku El Salvador. Cikolo eeci cakandiyiisya alimwi akundigwasya kuba cikozyanyo cibotu mumulimo wakukambauka, kuyiisya alimwi akucita bweembezi mumbungano. Mumwaka nguwenya ooyo, twakakwatana aba Eugenia. Tulabeleka katuli bakambausi baciindi coonse ku Guatemala.

 Lino, muciindi cakutyompwa, ndilikkomene kapati. Kutobela njiisyo zyamu Bbaibbele kwandigwasya kucileka bukkale bwakutalilemeka abusinkondo alimwi kwandipa kuba aluyando aluumuno.