Basikuswaya masena banji balaswaya mavwuumina aazyibidwe kapati aali munsi-munsi adolopo lya Pagsanjan ku Philippines. Ooku nkonkuko nkobakakomenena bataata ba Nardo Leron mubucete. Nobakali kubona makulo aakali mumfwulumende, kuli bamapulisa alimwi akubusena nkobakali kubeleka, cakali kubacisa alimwi cakali kubanyemya kapati.

 Bazyali bangu bakabeleka canguzu kutukomezya tobana babo notuli lusele. Bunji bwaziindi bakali kuzwa aŋanda kwaciindi cilamfwu, kuyamina zisyango kumalundu. Aboobo kanji-kanji mebo amupati wangu musankwa Rodelio twakeelede kulilanganya, alimwi twakali kuvwula kukkala anzala. Mbokunga twakali bana twakali kuyandika kusobana, pele kwakanyina ciindi cakucita oobo. Umwi aumwi akkwanya myaka iili ciloba wakali kutalika kubeleka mumafaamu, kunyamuna zibbudu zyama coconuts zilema mumalundu. Aboobo kuti naa cibbudu calema kapati twakali kucikwela.

 Twakali kuumwa kapati abataata, pele icakali kutucisa kapati, nkubona bamaama kabaumwa. Twakali kusoleka kubalesya, pele kunyina nocakali kugwasya. Mebo alimwi a Rodelio twakapangana kuti twaakukomena tukabajaye bataata. Ndakali kuyandisisya kuba abataata bajisi luyando!

 Kandinyongene alimwi akunyema akaambo kalunya lwabataata, ndakazwa aŋanda kandijisi myaka yakuzyalwa iili 14. Kwaciindi cili mbocibede ndakali kwiile kwiingaila mumigwagwa, alimwi ndakatalika kufweba lubanje. Mukuya kwaciindi ndakatalika kubeleka mulimo wakweenzya bwato kutola basikulangilila masena kumavwuumina.

 Nokwakainda myaka misyoonto, ndakatalika kwiiya kuyunivesiti ku Manila. Pele akaambo kakuti ndakali kuunka ku Pagsanjan kuyoobeleka kumamanino aansondo, tiindakajisi ciindi cinji cakubala. Buumi bwangu bwakanyina mpindu alimwi ndakanyina bulangizi, alimwi lubanje kunyina nolwakamanizya kulibilika kwangu. Aboobo ndakatalika kubelesya misamu iikola iimbi mbuli methamphetamines, cocaine, alimwi a heroin. Misamu iikola yakali kundipa kutalilemeka. Kwakali bucete, kutalulama alimwi amapenzi. Ndakaliisulide mfwulumende nkaambo ndakazyi kuti njeyakali kuleta mapenzi aaya. Aboobo ndakamubuzya Leza kuti, “Nkaambo nzi buumi ncobuli boobu?” Ndakavwuntauzya muzikombelo ziindene-indene pele kunyina bwiinguzi mbondakajana. Ndakatalika kubelesya misamu minji iikola kutegwa ndaalube-lube mapenzi.

 Mu 1972, basicikolo mu Philippines bakalibunga-bunga akubukila mfwulumende kwiinda mukuleta manyongwe. Ciindi cimwi ndakabasangana, eelyo zintu zyakabija citaambiki. Banji bakaangwa, alimwi nokwakainda myezi misyoonto, mfwulumende yakapa basikalumamba nguzu zyakweendelezya cisi.

 Ndakatalika kwiingaila mumigwagwa alimwi, aciindi eeci ndakali kuyoowa basikalumamba nkaambo andime ndakalijatikizyidwe mukubukila mfwulumende. Akaambo kacizibilizi cakubelesya misamu iikola ndakatalika kubba alimwi akuvwuula abantu bavwubide alimwi abamuzwamasi. Tiindakali kukombelela kufwa.

 Kuciindi eeco, bamaama amusyoonto wangu musankwa bakalitalikide kwiiya Bbaibbele a Bakamboni ba Jehova. Bataata bakanyema kapati, aboobo bakaaumpa mabbuku ngobakali kubelesya kwiiya Bbaibbele. Nokuba boobo, boonse bobilo bakaliyumya mpoonya bakabbapatizyigwa akuba Bakamboni.

 Bumwi buzuba, Kamboni umwi wakabandika abataata kujatikizya cisyomezyo camu Bbaibbele caamba ciindi nokuyooba bululami bwini-bwini munyika yoonse. (Intembauzyo 72:12-​14) Bulangizi oobu bwakabakkomanisya bataata cakuti bakayanda kulivwuntauzizya beni. Mu Bbaibbele, bakajana kutali buyo cisyomezyo ca Leza camfwulumende iili kabotu pele alimwi azyeelelo zya Leza kujatikizya bamalumi alimwi abamausyi. (Baefeso 5:​28; 6:4) Tiilyakalampa, balo alimwi abanabokwesu bambi boonse bakaba Bakamboni. Akaambo kakuti ndakali kulamfwu, kunyina ncondakazyi kujatikizya zintu eezyi zyakali kucitika.

 Mu 1978, ndakalongela ku Australia. Pele nokuba kuti mucisi eeci mwakali luumuno, kunyina nondakaba aluumuno lwamumizeezo. Cilengwa cangu cakunywa bukoko akubelesya misamu iikola cakazumanana. Mumwaka nguwenya ooyo, Bakamboni ba Jehova bakandiswaya. Ndakazikkomanina nzyobakanditondezya mu Bbaibbele kujatikizya nyika yaluumuno, pele ndakayoowa kubasangana.

 Nokwakainda ciindi cisyoonto kuzwa waawo, ndakaunka ku Philippines kwansondo zisyoonto. Banabokwesu bakandaambila kuti bataata bakabeleka canguzu kuti babe muntu uuli kabotu, pele moyo wangu wakali kucisa cakuti tiindakali kuyanda kubonana ambabo.

 Musyoonto wangu musimbi wakandipanduluda kwiinda mukubelesya Bbaibbele, kaambo buumi ncobwakazwide kupenga alimwi akutalulama. Ndakagambwa kumvwa mwana musyoonto ooyu kuti wakalijisi bwiinguzi kumibuzyo yangu. Kanditanabasiya, bataata bakandipa bbuku lyakuti Mulakonzya Kupona Kukabe Kutamani mu-Paradaiso Anyika. a Bakaamba kuti: “Koleka kuyandaula luumuno abwiinguzi kumibuzyo yako kwiinda mukubelesya nzila zitagwasyi mbuli misamu iikola. Bbuku eeli lilakugwasya kujana ncoyandaula.” Bakandikulwaizya kubayandaula Bakamboni ba Jehova ku Australia.

 Ndakaatobela majwi ngobakaamba bataata alimwi akujana Ŋanda ya Bwami ya Bakamboni ba Jehova iyakali afwaafwi aŋanda yangu mu Brisbane. Ndakazumina kwiiya Bbaibbele cakusitikila. Businsimi bwamu Bbaibbele mbuli buli ku Daniele caandaano 7 alimwi a Isaya caandaano 9 bwakandigwasya kuzyiba kuti mfwulumende ya Leza, yalo iinyina bumpelenge naaceya, iyootulela kumbele. Ndakaiya kuti tuyookkomana abuumi bubotu mu Paradaiso anyika. Ndakali kuyanda kutambulwa kuli Leza, pele ndakabona kuti ndakeelede kulyeendelezya, kuleka kubelesya misamu iikola, kuciindizya kunywa bukoko, alimwi akutalilemeka. Twakaandaana amusimbi ngondakali kukkala limwi, alimwi ndakacileka zilengwa zyangu zibyaabi. Lusyomo lwangu muli Jehova mbolwakali kuyaabukomena, ndakali kupaila kuti andigwasye kucinca amumbazu zimbi.

 Asyoonto-syoonto, ndakasinizya kuti nzyondakali kwiiya mubwini zyakali kukonzya kumucinca muntu. Bbaibbele lyaamba kuti kwiinda mukusolekesya, tulakonzya kusama “buntu bupya.” (Bakolose 3:​9, 10) Nondakali kusolekesya kucita boobu, ndakajana kuti nzyondakamvwa kujatikizya bataata mbobakacinca buntu bwabo ambweni akali masimpe. Muciindi cakunyema alimwi akubabikkilila, ndakali kuyanda kubamba luumuno ambabo. Kumamanino, ndakabalekelela bataata alimwi amfwundiilili njondakajisi kuzwa kubwana yakamana.

 Kandili mukubusi, kanji-kanji ndakali kutobela bukkale bubyaabi mbobakali kupona balongwe bangu. Kucenjezya kujanika mu Bbaibbele kwakali kwamasimpe kujatikizya ndime, kuyanzana abantu babyaabi kwakandisowa. (1 Bakorinto 15:33) Pele ndakapanga balongwe basyomeka akati ka Bakamboni ba Jehova, alimwi bandigwasya kuba muntu uuli kabotu. Kuyungizya waawo akati kabo ndakalijanina kalungu kaamoyo, ba Loretta. Antoomwe, tulabayiisya bantu mbobakonzya kugwasyigwa a Bbaibbele.

 Ndilalumba akaambo ka Bbaibbele, nkaambo lyakabacinca bataata kuba muntu ngondatakali kuyeeyela, bakaba balumi bali kabotu, alimwi a Munakristo mubombe, uuyanda luumuno. Notwakabonana kuzwa nondakabbapatizyigwa kandili umwi wa Bakamboni ba Jehova mu 1987, bataata bakandikumbata ciindi cakusaanguna mubuumi bwangu!

 Kwamyaka iinda ku 35, bataata bakali kubeleka antoomwe abamaama, kwaambila bamwi bulangizi bujanika mu Bbaibbele. Bakaba mwaalumi munkutwe alimwi uulanganya, ibakazyibidwe akaambo kakugwasya bantu. Mumyaka eeyo ndakaiya kubalemeka alimwi akubayanda. Ndakalikkomene kwiitwa kuti mwanaabo! Bakafwa mu 2016, pele ndilabayeeya akaambo kazintu zibotu nzyobakacita, toonse bobilo twakacinca bube bwesu akaambo kakutobela ncolyaamba Bbaibbele. Kunyina lusulo lucili mumoyo wangu. Ndilikkomene kapati kuti ndakajana Taata wakujulu Jehova Leza, walo uusyomezya kuyoomanizya mapenzi aali mumikwasyi yoonse.