Ba Clodean, Mbaakamboni ba Jehova ibakkala ku South Africa, balo ibakajatidwe mucibbaddela kutegwa baandulwe. Bakajisi malwazi manji aakatazya alimwi bakeelede kusala nzila zyabusilisi. Kabatanaandulwa alimwi anobakaandulwa bakali kulimvwa kukatala, kucisa alimwi akukopana mumizeezo. Kwamvwiki zitandila ku 10 kuzwa ciindi nobakajokela kuŋanda, bakali kwaalilwa kukkala kabotu. Alimwi akaambo kabulwazi bwa COVID-19, tiibakali kuswaigwa.

 Ba Clodean tiibakali kuyanda kulimvwa kuusa, aboobo bakalomba Leza kuti abape nguzu zyakuumbulizya bamwi. Mbobakatalikila buyo kucikonzya kukkala kabotu alimwi, bakatumina musimbi umwi simukobonyina, walo aciindi cimwi wakali kwiiya Bbaibbele a Bakamboni pele wakazoocileka. Ba Clodean bakamwaambila majwi aawumbulizya kuzwa mu Jwi lya Leza, alo akamukulwaizya kutalika kwiiya alimwi. Kuyungizya waawo bakamupandulwida bubotu bwakujanika kumiswaangano ya Bunakristo, akuba masimpe kuti wakali kucikonzya kujoina miswaangano yambungano kubelesya videoconference. Musimbi ooyu wakacikonzya kujanika alimwi akupa bwiinguzi ciindi nokwakali cibeela cakubuzya akwiingula.

 Kumane ba Clodean bakabandika amusyoonto wakwe, awalo wakali kuyanda kwiiya Bbaibbele. Alimwi musimbi ooyu wakaambila ba Clodean kujatikizya bambi bakajisi luyandisisyo lwakwiiya Bbaibbele. Ncinzi cakatobela? Ba Clodean bakatalika kwiiya Bbaibbele abamakaintu bambi bone. Pele kuli azintu zimwi zibotu zyakacitika!

 Akaambo kaluyando ndobajisi kubantu, Ba Clodean bakacikonzya kutalisya ziiyo zya Bbaibbele kubamakaintu abambi basika ku 10, boonse buyo muciindi eeci cabulwazi, calo icaamba kuti balasololela ziiyo zya Bbaibbele kubamakaintu bali 16! Bamwi balajanika lyoonse kumiswaangano ya Bunakristo kwiinda mukubelesya videoconference. Akaambo kakuti bajisi bubi kugwasya bamwi kwiiya kujatikizya Jehova, eeci cabagwasya kutabubikkila maano bukkale bwabo. Alimwi balimvwa kuti, akaambo kakuti Jehova ngu “Leza siluumbulizyo loonse,” walo iwakabaumbulizya kumapenzi aabo, abalo bali kuumbulizya bamwi.—2 Bakorinto 1:3, 4.

 Ino bantu mbobayiisya ba Clodean mbobalimvwa buti kujatikizya zintu nzyobaiya? Umwi wabo wakaamba kuti: “Ndakagwasyigwa munzila zinji. Pele cipati nkwiiya kujatikizya zina lya Leza. Eeci candigwasya kuswena kuli Jehova.” Lino kujatikizya mukaintu wakusaanguna ngobakatumina ba Clodean, ulangila kumbele ino-ino kubbapatizigwa. Zyakuluula eezyi zyabapa kuba alukkomano lunji. Alimwi lino bayaabupona kukwaandulwa kwabo.