Ba Rachel lino ibakkala ku Dominican Republic bakaamba kuti: “Ndakazyalilwa mumukwasyi mobakali kukomba Jehova. Pele cuusisya ncakuti, nondakakkwanya myaka iili 7, bataata bakacileka kuyanzana abantu ba Jehova akutalika kukazya kasimpe ciyoosya. Bakapa kuti cindikatazye kubelekela Jehova. Bakali kusola kundipa zintu kutegwa ndileke kubelekela Jehova. Mucikozyanyo, bakali kundisyomezya zintu mbuli fooni, kunditola kupaakki mpati iili munyika, naa kunduulila zintu zinji kapati kubelesya credit card! Zimwi ziindi bakali kunduuma buya kutegwa ndicileke kubelekela Jehova. Bakali kwaamba kuti, ikuti ndacileka kwaambaula akweenda, tandinakuunki kumiswaangano. Pele eeco tiicakandilesya kubelekela Jehova. Lyoonse inga ndilikanzide kujanika kumiswaangano.

 “Bataata tiibakali kunduuma ikuti baama nkobali. Bakali kundikonga kuti balandijaya ikuti ndabaambila baama kuti bakali kunduuma. Bakali kwaamba kuti zilonda nzyondakajisi ndakalicisa buya ciindi nobakali kundiisya karate.

 “Ndakacili mwana alimwi ndakali kubayoowa bataata nkakaambo kaako tiindakali kubaambila baama cakali kucitika. Aboobo ndakali kumwaambila Jehova. Ndakali kuunka kuyakweendeenda musyokwe kunze aŋanda yesu ku Maryland, U.S.A. Kusyokwe ooko kwakali cisamu cipati, kwalo nkondakali kutanta akutalika kupaila kuli Jehova. Ndakali kumwaambila kujatikizya mbondakali kulimvwa alimwi ancondakali kuyoomucitila ndaakukomena ikuti lilikke buyo wandivwuna kumapenzi aaya. Alimwi ndakamwaambila kujatikizya ncondakali kuyoocita munyika mpya iiboola, mukwasyi ngondakali kuyooba anguwo, alimwi aluumuno alukkomano nzyondiyooba anzizyo ciindi kuyoowa akucisa noziyoomana.

 “Ciindi bataata nobakali kusola kundisyomezya zintu naa kunduuma kutegwa ndileke kubelekela Leza, lyoonse ndakali kulimvwa janza lya Jehova kalinduumbulizya alimwi akundiyumya. Leza wakandigwasya kuzumanana kusyomeka akuyuma.

 “Ndakabbapatizyigwa nondakali amyaka iili 10, mpoonya ndakatalika kucita bupainiya nokwakainda myaka yobilo. Kumatalikilo, bataata tiibakazyi kujatikizya zintu eezyi. Ciindi nobakazyiba, bakanduuma cakuti bakandicisa citaambiki kumweebo.

 “Bamwi bakali kundaambila kuti ndakacili mwana kucita bupainiya, alimwi bakali kulibilika kuti tiindakali kumvwisya ncokwakali kwaamba kusala kwangu. Mukuya kwaciindi, ndakatalika kubona kuti Bakamboni banji bakubusi mucilawo cesu tiibakacili kubikkila maano kuzintu zyakumuuya. Bakajisi bubi azyakulikondelezya. Alimwi nzyobakali kucita zyakali kulibonya mbuli kuti nzibotu, cakuti zimwi ziindi ndakali kuyanda kubasangana. Ndakali kulibuzya kuti, ‘Sena ndicileke kukambauka akutalika kulikkomanisya mbuli bamusela wangu?’ Aboobo ziindi nondakali kulimvwa boobu, ndakali kumwaambila Jehova makani aaya.

 “Ciindi nondakali amyaka iili 15, kwakandisikila bantu bazwa kukkampani ilaampuwo kapati yabasikumodeliŋa. Bakandaambila kuti banoondipa mali manji ikuti ndatalika kubeleka ambabo ku Milan, Italy. Cakandikkomanisya kwaambilwa kuti ndilaba model, ndinoolibonya mumamagazine alimwi akusama zisani zidula kumashow. Ndali painiya waciindi coonse kwamyaka yotatwe, alimwi ndali kuyeeya kuti, ‘Mulimo ooyu ulakonzya kundigwasya kujana mali akundigwasya kucita bupainiya kwaciindi cilamfwu!’ Bataata bakatusiya, aboobo ndakali kuyeeya kuti mali aaya alakonzya kubagwasya baama kuula zintu zimwi.

 “Ndakaapailila makani aaya. Ndakabaambila bamaama balo bakali bapainiya kwamyaaka minji alimwi ndakaambila mwaalu ngondakali kuyanda alimwi akulemeka. Mbuli cilengwa, ndakaunka kucisamu kuyoopaila. Jehova wakayiingula mipalo kwiinda mumajwi aali mukapango kamu Bbaibbele mwaalu nkakanditondezya. Ndugwalo lwa Mukambausi 5:4, lwalo lwaamba kuti: ‘Lyoonse nokonka kuli Leza, utamuki pe kucizuzikizya cikonke eeco.’ Ndakakonka kubelekela Jehova camoyo woonse, alimwi ndakayoowa kuti mulimo ooyu wakali kuyoonyonganya cilongwe cangu a Jehova. Aboobo ndakasala kuukaka mulimo ooyu.

 “Ndakakkomana kuti ndakafwutuka! Lino ndipona buumi bubotu abalumi bangu ba Jaser, amwaneesu musankwa Connor, uujisi myaka iili 9. Ba Jaser mbaalu alimwi Connor ngu sikumwaya uutanabbapatizyigwa. Ndabeleka mumulimo waciindi coonse kwamyaka iili 27.

 “Kanji-kanji ndilakuyeeya kujatikizya mubandi ngondakajisi a Jehova mucisamu cipati cakali kunze aaŋanda. Ndakamulomba Jehova kuti andigwasye, alimwi wakacita oobo munzila mbotu. Wakandiyumya, wakanduumbulizya alimwi wakandisololela. Mubuumi bwangu boonse, Jehova wakanditondezya ziindi zinji mbwali taata mubotu. Ndilikkomene kuti ndakasala kumubelekela amoyo wangu woonse. Ooku nkusala kubotu kwiinda.”