Ba Zarina nobakabbapatizyigwa ku Russia akuba Bakamboni ba Jehova, bakapiluka nkobazwa ku Central Asia kabajisi makanze aakuyiisya bana babo basimbi bobilo kasimpe kamu Bbaibbele. Akaambo kakuti bakanyina mali, bakali kukkala muŋanda iyakajisi luumu yomwe abazyali babo alimwi amwanookwabo iwakakwete. Bazyali babo bakabakasya kuyiisya bana babo kasimpe kamu Bbaibbele. Kunze lyaboobo, bakaambila bazyukulu babo kuti tiibakeelede kubandika makani aamu Bbaibbele abanyina.

 Ba Zarina bakakkala ansi kuyeeya mbobakali kukonzya kuyiisya bana babo kujatikizya Jehova. (Tusimpi 1:8) Aboobo bakapaila camoyo woonse kulomba busolozi alimwi abusongo. Mpoonya bakacita kweelana akulomba kwabo kwiinda mukutalika kweendeenda abana babo kumwi kababandika kujatikizya zilenge zya Leza zigambya. Kucita boobo kwakapa kuti bana batalike kumuyanda Mulengi.

 Acimbi ncobakacita ba Zarina kutegwa bayiisye bana babo zinji, nkujana nzila yakubayiisya bbuku lyakuti Ino Ncinzi Cini Bbaibbele Ncoliyiisya? a Bakakkopolola mincali amibuzyo kuzwa mubbuku eeli. Kunze lyaboobo, bakayungizya amajwi masyoonto aakugwasya bana babo kwaamvwisya makani. Mpoonya bakaabikka mapepa aayo apensulo kunsi aamuncini uuwasya zisani mobakali kusambila. Ciindi bana banjila kusamba, bakali kwaabala mapepa aayo akulemba bwiinguzi.

 Kwiinda mukubelesya nzila eeyo, ba Zarina bakacikonzya kwiiya zibalo zyobilo mubbuku lya Bbaibbele Ncoliyiisya abana babo kusikila nobakajana ŋanda yabo. Okuya bakalikwaya kuyiisya bana babo. Mu October 2016, bana aabo bobilo bakabbapatizyigwa, bakakkomana kuti banyina bakabelesya busongo abupampu kubayiisya kasimpe kamu Bbaibbele.