Mu 2011, mwaalumi waku Eritrea wakaunka ku Norway kali muzangalisi. Ciindi nobakamuswaya Bakamboni ba Jehova akubandika anguwe, wakabaambila kuti wakali kubabona Bakamboni kucisi nkwazwa. Wakazumanana kubaambila kuti ciindi naakali sikalumamba, wakabona kuti Bakamboni banji ibakaangidwe akaambo kalusyomo lwabo bakali kukaka kunjila mulimo wabusikalumba, nokuba kuti bakali kupenzyegwa.

 Cakutayeeyela zintu zyakacinca, mpoonya wakaangwa akubikkwa muntolongo. Omuya wakajana Bakamboni botatwe, ba Paulos Eyasu, ba Negede Teklemariam, alimwi aba Isaac Mogos, balo ibakaangwa akaambo kalusyomo lwabo kuzwa mu 1994.

 Kali muntolongo mwaalumi ooyu, wakalibonena kuti Bakamboni ba Jehova bapona kweelana anzyobayiisya. Wakabona mbobasyomeka alimwi abwaabi bwabo kwiinda mukwaabana zyakulya abaangenyina. Alimwi buya wakabona mbobakali kubala Bbaibbele antoomwe abuzuba alimwi bakali kwiita abamwi kutegwa babasangane. Ciindi nobakaambilwa kuti balaangununwa ikuti basaina pepa yakali kutondezya kuti bacileka kubelekela Jehova, bakakaka kucita oobo.

 Eeci cakamunjila kapati mwaalumi ooyu, cakuti naakaunka ku Norway, wakali kuyanda kuzyiba kaambo Bakamboni ba Jehova ncobajisi lusyomo luyumu boobo. Aboobo ciindi Bakamboni nobakamuswaya, mpoonya aawo wakatalika kwiiya Bbaibbele ambabo alimwi akujanika kumiswaangano.

 Mu September 2018, wakabbapatizyigwa kali umwi wa Bakamboni ba Jehova. Mazuba aano ulacibelesya ciindi cili coonse ncajisi kukambaukila bantu baku Eritrea alimwi abaku Sudan, kubakulwaizya kwiiya Bbaibbele alimwi akuba aalusyomo luyumu.